Fet blong Askem mo Afta blong Tekem Aksen
Fet long Jisas Kraes i ki blong kasem ol revelesen blong trutok.
Ol dia brata mo sista we mi lavem.Mi talem tangkyu tumas long janis ia blong toktok wetem yufala long Satedei Naet Sesen blong jeneral konfrens ia. Long fas toktok blong hem long konfrens, long moning, ia, Presiden Russell M. Nelson i talem se “revelesen we i stret gud blong ol kwestin insaed long hat blong yu, bae i mekem se konfrens ia i wan we i nambawan mo bae yu no fogetem.” Sapos yu no lukaotem yet givhan blong Tabu Spirit blong helpem yu blong harem wanem we Lod i wantem yu lisin long hem long tufala dei ia, mo mi invaetem yu blong mekem naoia.”1 Mi bin askem blesing ia taem mi bin rere blong kasem revelesen from visit ia wetem yufala. Prea blong mi, i we yu save kasem revelesen ia we i kam long God.
Wei blong kasem revelesen we i kam long God, i no bin jenis long wanem i stap long taem blong Adam mo Iv. Hem i bin semmak blong evri wokman blong Lod we Hem i bin singaotem, stat long stat kasem tedei. I semmak long yufala mo mi. Oltaem, i hapen taem wan i praktisim fet blong hem.2
Yangfala Josef Smit i bin gat fet we i inaf blong askem wan kwestin long God, mo i bin biliv se God bae i ansarem nid blong hat blong hem. Ansa we i bin kam i bin jenisim wol. Hem i bin wantem blong save wijwan jos blong joenem blong kam klin aot long ol sin. Ansa we hem i bin kasem i leftemap tingting blong hem blong gohed blong askem ol moa gud kwestin afta, mo blong tekem aksen folem revelesen ia we i gogohed blong kam, we i jes stat.3
Eksperiens blong yu bae i save semmak long konfrens ia. Yu gat ol kwestin blong yu we yu stap lukaotem ol ansa. Yu gat inaf fet blong hop se bae yu kasem ol ansa ia long Lod tru long ol wokman blong Hem.4 Bae yu no gat janis blong askem laod ol kwestin ia long ol spika, be yu save askem Papa we i gat lav, tru long prea.
Mi save, wetem eksperiens, se bae ol ansa oli kam we oli stret long ol nid blong yu mo hamas yu rere long saed blong spirit. Sapos yu nidim wan ansa we i impoten long gudlaef blong taem we i no save finis, o blong ol narawan, ansa bambae i kam. Yet, iven long tetaem ia, bae yu save kasem—semmak olsem Josef Smit —ansa ia se bae yu wet longtaem.5
Sapos fet blong yu long Jisas Kraes i lidim yu blong gat sofsof hat tru long ol paoa blong Atonmen blong Hem, bambae yumi save filim moa ol kwaet toktok blong Spirit, blong ansarem ol prea blong yu. Long eksperiens blong mi, i we, kwaet smol voes—we i ril—i klia mo mi haremsave long maen blong mi taem mi filim wan kwaet insaed long mi, mo wan tingting blong wantem folem tingting blong Lod. Filing ia blong gat tingting i stap daon, yumi save talem se i olsem: “no mekem olsem we mi mi wantem, yu mekem olsem we yu nomo yu wantem.6
Rod ia blong kasem revelesen, i from wanem bae yu harem ol spika oli tijim, long konfrens ia, wanem oli singaotem doktrin blong Kraes.7 Revelesen i kam long yumi long smolsmol pat i go kasem mak ia we yumi lukaotem blong tekem doktrin blong Kraes insaed long hat blong yumi mo putum long aksen long laef blong yumi.
Yu tingbaot se, insaed long Buk blong Momon, Nifae i bin tijim yumi se fet long Jisas Kraes, i ki blong kasem ol revelesen we i trutok, mo i ki blong gat tras ia se yumi stap folem daereksen blong Sevya. Nifae i raetemdaon ol toktok ia plante handred yia bifo Jisas Kraes i bon i kam long wol ia:
“Ol enjel oli toktok tru long paoa blong Tabu Spirit, taswe, oli talemaot ol toktok blong Kraes. “Taswe, mi talem long yufala, kakae gud long ol toktok blong Kraes; from luk, ol toktok blong Kraes bae i talem long yumi evri samting we yumi mas mekem.
“Taswe, afta nao we mi bin talemaot ol toktok ia, sapos yufala i no save andastanem olgeta bae hem i from we yufala i no askem, mo tu, we yufala i no noknok; from hemia, yufala i no kam long laet, be bae yufala i mas ded long tudak.
“From luk, bakegen mi talem long yufala se sapos yufala i go tru long rod, mo kasem Tabu Spirit, bae hem i soem long yufala evri samting we bae yufala i mas mekem.
“Luk, hemia i doktrin blong Kraes, mo bae i no gat moa doktrin we bae oli givim kasem taem we bae hem i soemaot hemwan long yufala long bodi blong mit mo bun. Mo taem we bae hem i soemaot hemwan long yufala long bodi blong mit mo bun, ol samting we bae hem i talem long yufala bae yufala i mas mekem.”8
Mo Lod bae i talem ol samting long yu mo mi tedei, tru long ol wokman blong Hem, mo long ol dei we oli stap kam. Bambae Hem i talem long yumi ol samting we yumi mas mekem.9 Sevya bae i no singaot mo talem ol oda long yu mo mi. Olsem we Hem i tijim Elaeja:
“Nao Hae God i talem long hem se, ‘Yu kam afsaed, yu kam mitim mi antap long hil ya.’ Nao Hae God i kam pas long ples ya, mo i mekem wan bigfala win i kam we i strong we i strong, i olsem wan hariken, mo i kilim hil ya, i brebrekem ol ston, mo i sakem olgeta i go olbaot. Win ya i blu gogo i finis, be Hae God i no kamtru long win ya. Nao biaen, graon i seksek, be Hae God i no kamtru long samting ya.
“Nao biaen bakegen, i gat bigfala faea i laet, be Hae God i no kamtru long faea ya tu. Ale, biaen long faea ya, profet i harem we Hae God i stap tok smosmol long hem.”10
Blong harem voes ia, bae i kam tru long bilif blong yumi long Hem. Wetem inaf fet, bae yumi askem daereksen wetem tingting blong go mo mekem wanem we Hem i askem.11 Bambae yumi developem fet ia blong save se wanem Hem i askem bae i blesem ol narawan, mo bae yumi save kam klin gud long semtaem from Hem i lavem yumi.
Taem we fet blong yumi long Jisas Kraes bae i lidim yumi blong askem Papa blong kasem ol ansa, fet ia bae i sofsof han blong Sevya i kam blong yumi harem daereksen blong Hem, mo mekem tingting mo stap glad blong obei. Nao, bae yumi sing ol toktok blong hym wetem glad, iven taem wok ia i had: “Wok ia i swit, O God, O King.”12
Moa yumi gat doktrin blong Kraes insaed long laef mo hat blong yumi, moa bae yumi filim lav mo sore long olgeta we oli neva gat ol blesing ia blong gat fet long Jisas Kraes, o oli gat hadtaem blong holemtaet. Hem i had blong kipim komanmen blong Lod sapos yumi no gat fet mo tras long Hem. Taem we sam oli lusum bilif blong olgeta long Sevya, bae oli save go agensem kaonsel blong Hem, oli singaotem gud i nogud, mo nogud i gud.13 Blong stap longwe long bigfala rong ia, i impoten blong eni revelesen blong yuwan we yu kasem, oli go stret wetem ol tijing blong Lod mo ol profet blong Hem.
Ol brata mo sista. Hem i nidim fet blong stap obei long ol komanmen blong Lod. Hem i nidim fet long Jisas Kraes blong givim seves long ol narawan long bihaf blong Hem. I nidim fet blong go aot blong tijim gospel blong Hem mo givim long ol pipol we oli no filim voes blong Spirit, o oli iven save tanem baksaed mo talem mesej ia i no tru. Be, taem yumi stap praktisim bilif blong yumi long Kraes—mo folem profet blong Hem we i stap laef—fet i kam antap raon long wol. From teknoloji, maet bae i gat plante moa pikinini blong God we bae oli harem mo luksave toktok blong God long wiken ia bitim eni nara tu dei long histri.
Wetem moa bilif se hemia i Jos mo kingdom blong Lod long wol ia, bae moa memba oli pem taeting mo givim mane blong helpem olgeta long nid, iven taem ol memba ia oli fesem tes blong olgeta tu. Wetem fet se Jisas Kraes i bin singaotem olgeta, ol misinari raon long wol oli faenem ol wei blong go bitim ol jalenj we wol sik ia i mekem—taem oli mekem hemia wetem strong paoa long tingting mo wetem glad. Wetem moa efot ia, bilif blong olgeta i kam strong moa.
Fasin blong agens mo ol tes, longtaem finis oli stap olsem wan bed blong sid blong fet i gro. Hemia i bin tru oltaem, speseli stat long stat blong Restoresen mo stat blong Jos ia blong Lod.14
Wanem we Presiden George Q. Cannon i bin talem longtaem finis, i tru tedei, mo bae i stap kasem Sevya i kam, Hemwan, blong i lidim Jos blong Hem mo ol pipol blong Hem: “Fasin blong stap obei long gospel i tekem ol pipol i go kolosap mo gat wan praevet rilesensip wetem Lod. I stanemap wan gudfala rilesensip bitwin ol man long wol ia, mo Hae Meka blong yumi we i stap long ol heven. I tekem long maen blong man, wan filing blong tras we i stret gud, long Hem we i Hae Olgeta, mo long Hat blong Hem blong wantem lisin mo ansarem ol prea blong olgeta we oli trastem Hem. Long ol taem blong tes mo bigfala hadtaem, tras ia i sas we i no gat praes blong hem. Ol trabol oli save kasem wanwan, o wan pipol, ol disasta oli save kam, mo hop blong evri man i olsem se oli sakemaot, be yet, long ol ples we ol pipol oli givim olgeta from ol spesel janis we fasin blong obei long gospel i tekem i kam, oli gat wan sua ples blong stanap long hem; leg blong olgeta i stap long wan ston we oli no save muvumaot.15
Hem i testemoni blong mi, se ston ia we yumi stap stanap long hem, i witnes blong yumi se Jisas, Hem i Kraes, hemia i Jos blong Hem we Hemwan i lidim, mo we Presiden Russell M. Nelson, i profet blong Hem tedei.
Presiden Nelson i lukaotem mo stap kasem daereksen we i kam long Lod. Long mi, hem i wan eksampol blong stap lukaotem daereksen wetem strong tingting blong mekem folem afta. Semfala strong tingting ia blong stap obei long ol daereksen blong Lod i stap long ol hat blong olgeta we oli bin toktok finis, o bae oli toktok, prea, o singsing long jeneral konfrens blong Jos blong Hem.
Mi prea se, raonem wol we i stap waj o lisin long konfrens ia, bae oli gat filing ia se Lod i lavem olgeta. Papa long Heven i ansarem prea blong mi, se maet bae mi filim wan smol pis blong lav blong Sevya from yu , mo lav we Hem i gat long Papa blong Hem we i Stap long Heven, we i Papa long Heven blong yumi.
Mi testifae se Jisas Kraes i stap laef. Hem i Sevya mo Ridima blong yumi. Hemia i Jos blong Hem. Hem i stap long hed blong Jos. Hem, wetem Papa long Heven blong Hem, Tufala i bin kamkamaot long Josef Smit insaed long wan bus blong ol tri long Niu Yok. Gospel blong Jisas Kraes mo prishud blong Hem, ol mesenja blong heven nao oli putumbak.16 Tru long paoa blong Tabu Spirit, mi save se hemia i tru.
Mi prea se bae yu gat semfala witnes ia. Mi prea se bae yu askem Papa long Heven blong gat bilif long Jisas Kraes we yu nidim blong mekem mo kipim ol kavenan we bae i letem Tabu Spirit blong stap olsem kompanion blong yu oltaem. Mi livim wetem yufala, lav blong mi mo sua witnes blong mi, long tabu nem blong Jisas Kraes, amen.