Stap Luksave Helt blong Tingting
Givim mi janis blong serem sam samting we mifala i bin luk, taem famli blong mi i bin gotru long ol tes.
Nomata we famli blong mifala i bin glad long ol bigbigfala blesing taem mifala i bin stap wokbaot wetem glad long kavenan rod ia, mifala i bin go tru ol bigbigfala hadtaem tu. Mi wantem serem sam eksperiens we i blong miwan nomo wetem yufala, long saed blong siknes long tingting. Hemia i tekem tu, tingting we i foldaon fulap, wari tumas, ol filing we oli stap jenis oltaem, tingting we i no stap tingting stret—mo samtaem evri samting ia wantaem. Mi serem ol spesel eksperiens ia wetem raet blong olgeta we oli bin gotru ol eksperiens ia.
Long taem blong seves blong mi, mi bin save long ol handred man, woman mo famli we oli gat ol eksperiens olsem. Samtaem mi stap askem miwan sapos sik ia we i “prapa spolem gud” man we i kavremap kantri ia,1olsem we oli bin tokbaot long ol skripja, i tekem siknes long tingting tu. Siknes long tingting i stap long ful wol, i kavremap evri kantri mo kalja, mo i spolem evriwan—yangfala, olfala, rij mo pua. Hem i no lego ol memba blong Jos tu.
Long semmak taem, doktrin blong yumi i tijim yumi blong traehad blong kam olsem Jisas Kraes mo kam stret evriwan tru long Hem. Ol pikinini blong yumi oli singsing: “Mi traem blong kam olsem Jisas.”2 Yumi wantem tumas blong kam stret evriwan semmak olsem Papa blong yumi long Heven mo Jisas Kraes.3 From se siknes long tingting i save blokem lukluk blong yumi blong stap stret evriwan, fulap taem hem i gohed blong stap olsem wan samting we oli no stap tokbaot tumas. Olsem wan risal, fulap taem ol man oli no stap wantem luksave, ol man oli no stap talemaot mo stap safa, mo ol man oli lusum hop. From fulap oli no kasem standet ia we yumi stap lukluk long hem, oli filim se i bigwan tumas long olgeta, mo oli stap mekem mistek blong bilivim se oli no gat ples insaed long Jos.
Blong faet agensem wan giaman olsem, hem i impoten blong tingbaot se “Sevya i lavem wanwan long ol pikinini blong Papa blong Hem. Hem i andastanem fulwan, soa long bodi mo hadtaem we fulap i stap eksperiensem, taem oli stap laef wetem fulap defdefren kaen jalenj long saed blong helt long tingting. Hem i safa long ‘ol harem nogud long ol sobodi mo fulap hadtaem mo temtesen blong evri kaen; … [mo i tekem] long hem ol sobodi mo ol sik blong ol pipol blong hem.’ (Alma 7:11; oli ademap italik; luk tu long Hibrus 4:15–16; 2 Nifae 9:21). From se Hem i andastanem evri kaen hadtaem, Hem i save olsem wanem ‘blong hilim olgeta we hat blong olgeta i brok’ (Luk 4:18; luk tu long Aesea 49:13–16).”4 Fulap taem ol jalenj i soem se yumi nidim sam moa tul o sapot mo hem i no minim se yumi no gud inaf.
Givim mi janis blong serem sam samting we mifala i bin luk, taem famli blong mi i bin gotru long ol tes.
Faswan, plante pipol bae oli krae wetem yumi; bae oli no jajem yumi. Boe blong mifala i bin kambak hom long misin blong hem fo wik nomo afta we hem i bin go, from hem i bin stap sek wetem fraet, wari mo gat tingting we i fasfas. Olsem papa mo mama blong hem, mitufala i bin faenem i had blong handelem harem nogud mo no glad, from mitufala i bin prea fulap blong hem i gat sakses. Olsem evri papa mo mama, mitufala i wantem ol pikinini blong mitufala blong gat sakses mo stap hapi. Blong go long misin i bin wan impoten step long laef blong boe blong mitufala. Mitufala i bin tingting tu se, bae ol nara man oli tingting olsem wanem long mifala.
Mitufala i bin luksave be, boe blong mitufala nao i bin harem nogud moa we hem i kambak long misin. Tingbaot se hem i lavem Lod mo i wantem blong givim seves, be yet, hem i no save mekem from ol risen we hem i stap faenem i had blong andastanem. I no longtaem, hem i stap long wan taem long laef blong hem we hem i nomo gat hop, mo i sem bigwan. Hem i nomo filim se oli akseptem hem mo nomo filim wan samting long spirit. Hem i draon insaed long ol tingting blong ded we i wokem kam long hem.
Taem hem i stap long situesen blong hem ia, boe blong mitufala i biliv se wan samting ia nomo blong mekem, hem i blong karemaot laef blong hemwan. I bin tekem Tabu Spirit mo wan bigfala namba blong ol enjel long tugeta saed blong vel blong sevem hem.
Taem hem i stap faet from laef blong hem long wan taem ia we i had tumas, famli blong mifala, ol lida blong wod, ol memba, mo ol fren oli bin mekem bigfala efot tumas blong sapotem mo givhan long mifala.
Mi neva bin filim lav we i kapkapsaet olsem. Mi neva bin filim, wanem i minim blong kamfotem olgeta we oli nidim kamfot, wetem moa paoa mo long wan wei we i blong miwan, Famli blong mi, oltaem bae i talem tangkyu from lav ia we i kapsaet long mifala.
Mi no save tokbaot gud ol fulap merikel we i bin hapen afta long ol taem ia. Wetem tangkyu, boe blong mitufala i bin winim sik ia, be i bin tekem wan longfala taem, mo kea long saed blong meresin, hiling, mo spirit, blong hem i save kam oraet, mo akseptem se oli lavem hem, hem i gat valiu, mo oli nidim hem.
Mi luksave se, i no evri situesen i finis olsem blong mifala. Mi harem nogud wetem olgeta we oli bin lusum olgeta we oli lavem long wan taem we i eli tumas mo naoia oli stap nomo wetem ol filing blong sore mo ol kwestin we oli no ansarem.
Nekis lukluk we mi bin mekem hem i, hem i save had blong ol papa mo mama blong luksave ol hadtaem blong ol pikinini blong olgeta, be yumi mas tijim yumiwan. ?Olsem wanem nao bae yumi luksave wanem i defren bitwin ol hadtaem we i kam wetem nomol divelopmen mo ol saen blong siknes? Olsem ol papa mo mama, yumi gat tabu wok ia blong helpem mo gaedem ol pikinini blong yumi blong gotru ol jalenj blong laef; be, i gat sam long yumi nomo we oli save gud abaot helt blong tingting. Nomata long hemia, yumi nidim blong kea long ol pikinini blong yumi taem yumi helpem olgeta blong lanem blong stap hapi long ol tru efot blong olgeta, taem oli stap traehad blong kasem ol stret samting we yumi wantem blong olgeta. Wanwan long yumi i save aot long ol rong blong yumiwan, se blong groap long saed blong spirit i wan rod we i stap gogohed.
Naoia yumi andastanem se “i no gat wan simpol ansa nomo blong hilim evri siknes long saed blong filing mo tingting. Bae yumi eksperiensem wari mo hadtaem blong no sua, from se yumi stap laef long wan wol we i gat sin wetem wan bodi we i gat sin. Antap long hemia, i gat fulap samting we i save mekem wan i kasem siknes long tingting. Nomata long gudfala helt blong tingting mo filing blong yumi, blong stap lukluk moa blong groap, hem i moa helti bitim blong stap lukluk tumas long ol samting we yumi no strong long hem.”5
Long waef blong mi mo mi, wan samting we i oltaem helpem mitufala hem i, blong stap kolosap long Lod olsem we mitufala i save mekem. Naoia mitufala i luklukbak mo mitufala i luksave olsem wanem Lod i bin tijim mitufala wetem fasin blong wet long taem, tru long ol bigfala taem we mitufala i no bin sua long ol samting blong mekem. Laet blong hem i bin gaedem mitufala, wan step afta long narawan, tru long ol hadtaem. Lod i bin helpem mitufala blong luk se valiu blong wanwan sol, i impoten tumas insaed long plan blong God, bitim eni wok o ajivmen blong wol ia.
Bakegen, blong stap tijim yumiwan abaot siknes blong tingting, i mekem yumi rere blong helpem yumiwan mo ol narawan tu we maet oli stap gotru long hadtaem. Ol open mo ones storian wetem wanwan long yumi, bae i help blong man i luksave mo tokbaot impoten topik ia. Afta long evri samting, infomesen i kam faswan long insperesen mo revelesen. Ol jalenj ia, we fulap taem man i no stap luksave, i save spolem eniwan, mo taem yumi stap gotru long hem, bae i luk se i bigwan tumas blong winim.
Wan long ol fas samting we yumi nidim blong lanem hem i we, yumi no stap yumiwan. Mi invaetem yu blong stadi long topik blong siknes long tingting long seksen blong Help long Laef long Gospel Laebri ap. Blong stap lanem samting bae i lidim yu andastanem moa, akseptem moa, gat moa sore, gat moa lav. Hem i save mekem hadtaem long laef i kam moa smol, mo long semmak taem, hem i helpem yumi blong developem mo skelem gud ol helti tingting mo helti lukluk.
Las lukluk blong mi, hem i: yumi nidim blong lukaot moa long wanwan long yumi. Yumi mas lavem wanwan long yumi mo no jajem man tumas—speseli taem ol samting yumi wantem i no hapen. Yumi mas helpem ol pikinini mo yut blong yumi blong filim lav blong Jisas Kraes insaed long laef blong olgeta, iven taem oli stap traehad blong filim lav long olgetawan bakegen. Elda Orson F. Whitney, we i bin wok olsem wan memba blong Kworom blong Olgeta Twelef Aposol, i bin givim kaonsel long ol papa mo mama abaot wei blong helpem ol pikinini we oli stap traehad: “Prea from … ol pikinini blong yufala; lukaotem gud olgeta wetem bilif blong yu.”6
Fulap taem mi stap tingting hevi long, wanem i minim blong holemtaet olgeta wetem fet. Mi biliv se hemia i tekem tu ol simpol aksen blong lav, gat sopsop hat, kaen fasin, mo respek. Hem i minim blong letem olgeta oli develop long spid blong olgetawan mo stap serem testemoni blong helpem olgeta blong filim lav blong Sevya. Hem i nidim yumi blong tingbaot olgeta moa, mo no tingbaot yumiwan o ol narawan tumas. Fulap taem, hemia i minim blong no toktok tumas mo lisin fulap, fulap moa. Yumi mas lavem olgeta, givim paoa long olgeta, presem olgeta fulap taem long ol efot blong olgeta blong gat sakses, mo blong stap fetful long God. Mo laswan, yumi mas mekem evri samting long paoa blong yumi blong stap kolosap long olgeta—semmak nomo olsem we yumi stap kolosap long God.
Blong evriwan we siknes long tingting i spolem olgetawan, hang strong long ol kavenan blong yu, iven sapos yu no filim lav blong God long taem ia. Mekem wanem i nidim blong mekem long paoa blong yu mo afta “stanap kwaet … blong luk fasin blong God blong sevem man, mo blong Lod i soemaot han blong hem.”7
Mi testifae se Jisas Kraes i Sevya blong yumi. Hem i save yumi. Hem i lavem yumi, mo bae Hem i no givap long yumi. Long ol hadtaem blong famli blong mifala, mi kam blong save hamas Hem i kolosap. Ol promes blong Hem oli tru:
No fraet, no wari, from mi stap wetem yu,
Mi mi God blong yu mo mi mas helpem yu.
Mi helpem, sapotem, mi mekem yu stanap, …
From we mi gat paoa, gat paoa i stap.
Wetem save ia se hamas tijing blong Jisas i stamba blong yumi, bae yumi talemaot wetem glad:
Spos man i putum tras blong hem long Jisas Kraes,
Mi sapotem hem, Mi no save spolem tras,
Spos Setan i traehad tumas blong winim yu, …
!Mi neva, no neva save ronwe long yu!8
Long nem blong Jisas Kraes, amen.