Blong Stap Kam Moa Olsem Kraes: Parabol blong Laen
Folem taem blong Lod, i no ples we yumi stat long hem, be ples we yumi stap go long hem we i impoten.
Taem mi yang boe, mi gat ol bigfala drim. Wan dei, afta skul, mi askem: “Mama. ?Bae mi kam wanem taem mi groap: wan profesonol basketbol pleya o wan miusik sta? Sore tumas, Clark we i no gat tut, i no soem se bae i kam wan spotman o gat miusik glori long fiuja. Nomata plante efot, oli neva akseptem mi long wan top akademik skul program. Nao ol tija oli talem se bae mi folem nomo standet klasrum. Wetem taem, mi developem ol evri dei fasin blong stadi we oli givim gud praes long mi. Be, long misin blong mi long Japan nao, mi filim se waes mo spirit blong mi i gat fulap janis blong mekem samting. Mi gohed blong wok had. Be blong fas taem long laef blong mi, oltaem mi putum Lod long divelopmen blong mi, mo i mekem evri samting i kam defren.
Ol brata mo sista. Insaed long Jos ia, yumi biliv long tabu paoa blong evri pikinini blong God, mo long paoa blong yumi blong kam wan samting moa tru long Kraes. Folem taem blong Lod, i no ples we yumi stat long hem, be ples we yumi stap go long hem we i impoten.1
Blong soemaot prinsipol ia, bae mi droem sam besik matematik. Nao, yufala i no fraet blong harem toktok ia, matematik long jeneral konfrens. BYY–Aedaho skul blong yumi i talem se iven wan we i stat, bae i kasem kaen tingting ia. I stat wetem fomula blong wan laen. Long yumi, ples we i joen i stat blong laen blong yumi. Ples we i joen, i save stat antap o daon. Hao laen i slip, we i save slip i go antap, o i kam daon.
Yumi evriwan i gat ol defren ples blong stat long laef—yumi stat long ol defren ples wetem ol defren samting we yumi bon wetem long laef. Sam, oli bin wetem ol hae stat, we i gat fulap janis. Sam narawan oli stat wetem ol situesen we i gat jalenj, mo i luk se i no stret.2 Afta, yumi progres folem laen ia blong progres blong yumiwan. Fiuja blong yumi, bae i no dipen tumas long ples we yumi stat long hem, be i dipen long wei we laen ia i slip long hem. Jisas Kraes i stap luk hae paoa we yumi save kasem, i nomata weaples yumi stat long hem. Hem i bin luk hemia long man we i askem mane, man we i sin, mo hem we i gat disabiliti. Hem i bin luk long man blong kasem fis, man blong karem takis, mo strong man blong politik. I nomata weaples yumi stat long hem, Kraes i lukluk wanem yumi stap mekem wetem wanem yumi gat.3 Wol ia, i lukluk long ples we yu stat long hem, be God i lukluk nomo long ples we yu stap go long hem. Long kalkulus blong Lod, bae Hem i mekem evri samting we Hem i save mekem blong helpem yumi tanem laen ia i slip i go long heven.
Prinsipol ia, i mas givim kamfot long olgeta we oli gat hadtaem mo stop long olgeta we oli ting se oli gat evri gud samting blong stat wetem. Bae mi stat mo toktok long olgeta wetem ol had situesen blong stat wetem, olsem pua laef, no gat tumas janis blong kasem edukesen, mo famli situesen wetem jalenj. Ol narawan oli fesem ol jalenj long bodi, long helt blong tingting, o ol samting we oli kamaot long famli laen.4 Long eniwan we i gat hadtaem wetem ples we hem i stat wetem, plis luksave se Sevya i save ol hadtaem blong yumi. Hem i tekem long hem ol samting blong [yu] we oli no strong, blong mekem se insaed blong hem i save kam fulap long sore, blong hem i save olsem wanem blong helpem [yu] long saed blong ol samting [we yu] no strong long olgeta.”5
Bae mi serem tu ples blong leftemap tingting blong olgeta we oli fesem had stat situesen. Faswan, lukluk nomo long weaples yu stap go long hem, be i no ples we yu stat long hem. Bae i rong blong no luksave situesen blong yu—oli ril mo i nid blong lukluk long ol. Be blong lukluk tumas long wan had stat poen i save mekem se i talemaot huia yu, mo iven i save stopem paoa blong yu blong mekem joes.6
Sam yia i pas, mi bin wok wetem wan grup blong ol yut insaed long Boston, Masajuset, we oli niu long gospel, mo wanem Jos i wantem aot long olgeta. I gat temtesen blong mi miksim tru tingting mo wari blong mi long situesen blong olgeta wetem wan tingting blong daonem ol standet blong God.7 Long en, mi luksave se wei we i gat moa paoa blong mi soem lav blong mi, i blong neva daonem mak blong wanem mi wantem i hapen. Wetem evri samting we mi bin save blong mekem, tugeta, mifala i lukluk long wanem paoa oli save kasem, mo wanwan i stat blong leftemap laen ia blong olgeta. Hao oli groap insaed long Jos i stap go antap sloslo, be i hapen evri taem. Tedei, oli bin go long ol misin finis, oli bin graduet long skul, oli bin mared long tempol, mo oli stap lidim ol praevet mo profesonol laef we oli gud tumas.
Nambatu, putum Lod insaed long wok ia blong stap leftemap laen ia. Taem mi stap olsem presiden blong BYU–Pathway Worldwide, mi tingbaot se mi stap sidaon long wan bigfala divosen long Lima, Peru, mo Elda Carlos A. Godoy nao i spika. Taem hem i lukluk i go long kongregesen, hem i glad tumas blong stap luk plante fetful fas jeneresen yunivesiti studen. Maet taem hem i bin stap tingtingbak long rod blong hem tru long kaen had situesen olsem, Elda Godoy i talem wetem filing long hat: “Lod bae i givhan i bitim we yu save givhan long yuwan. Mekem se, yusum Lod long wokabaot ia.”8 Profet Nifae i bin tijim se from “mifala i save se hem i tru long gladhat blong God we Lod i sevem mifala, afta evri samting nomo we mifala i save mekem.”9 Yumi mas mekem bes blong yumi,10 we i tekem tu blong stap sakem sin, be hem i tru long gladhat blong Lod nomo we bae yumi luksave tabu paoa we yumi save kasem.11
Laswan, bae mi serem tu eria blong kaonsel long olgeta we oli gat ol stat ples we i antap. Faswan, ?bae yumi save soem fasin blong tingting i stap daon from ol situesen ia we yumiwan yumi no krietem? Olsem we foma BYY presiden, Rex E. Lee i talem long ol studen blong hem: “Yumi evriwan i dring long ol wel ia we yumi no digim, mo yumi kam mekem yumi wom long ol faea ia we yumi no laetem.”12 Hem i singaotem ol studen blong hem blong oli givimbak, mo fulumap ol edukesen wel we ol paeonia bifo oli bin bildimap. Blong no planem sid bakegen long ol garen we ol narawan oli bin planem, i olsem blong givimbak wan talen we yu no yusum.
Nambatu. Blong lukluk nomo long hae ples blong stat wetem, i save mekem yumi fas long filing ia we yumi stap traehad, be wanem i stap i we, laen insaed long yumi i slip flat semmak nomo. Harvard profesa, Clayton M. Christensen i bin tijim se, plante sakses pipol oli olgeta we oli gat moa tingting i stap daon from oli gat tras ia se eniwan i save stretem olgeta mo tijim olgeta.13 Elda D. Todd Christofferson i bin givim kaonsel ia long yumi se “yumi mas glad mo wantem faenem ol wei blong akseptem, mo iven, lukaotem man i stretem yumi.”14 Iven taem we, i luk se ol samting oli stap go gud, yumi mas lukaotem ol janis blong kam antap tru long fasin blong askem tru long prea.
I nomata se yumi stat wetem fulap samting, o wetem had situesen, bae yumi luksave ful paoa we yumi save kasem taem nomo bae yumi mekem God i patna blong yumi. I no longtaem i pas, mi storian wetem wan top nasonal eduketa we i stap askem abaot sakses blong BYU Pathway. Hem i glad mo kwestin blong hem i kam long tru hat, be hem i wantem wan ansa olsem hemia blong wol. Mi serem wetem hem ol program blong holemtaet studen mo ol efot blong tijim maen. Be mi endem mo talem: “Evriwan ia oli ol gudfala praktis, be ril risen from wanem ol studen blong mifala oli stap progres i from mifala i stap tijim olgeta tabu paoa we oli save kasem. ?Traem tingting se ful laef blong yu, bae oli talem long yu se yu yu no save gat sakses? Afta, tingting se bae wanem bae i mekem long yu taem bae oli tijim yu se yu yu wan boe o gel blong God wetem plante janis we oli kam long heven?” Man ia i stop smol mo ansa nomo: “Hemia i gat paoa.”
Ol brata mo sista. Wan long ol merikel blong Jos ia blong Lod, i we, wanwan long yumi, i save kam wan samting moa tru long Kraes. Mi no save eni nara oganaesesen we i givim moa janis, long ol memba blong hem, blong oli givim seves, givimbak, sakem sin, mo kam ol moa gud pipol. I nomata se yumi stat wetem gud o had situesen, bae yumi kipim ae blong yumi, mo laen blong yumi i poen i go long heven. Taem yumi mekem olsem, bae Kraes i leftemap yumi i go long wan moa hae ples. Long nem blong Jisas Kraes, amen.