I Naes Nomo—I Naes mo Simpol
Bae yumi kipim gospel i simpol taem yumi stap mekem ol responsabiliti we God i givim long yumi.
Fas Toktok
Naes welkam long wanwan long yufala we i stap tekpat long konfrens ia.
Tedei, mi hop blong tokbaot tu pat blong gospel ia we i kambak blong Jisas Kraes, folem wetem fofala stori blong Ol Lata-dei Sent raon long wol we oli soem hao oli yusum olgeta prinsipol ia. Fas pat blong gospel ia we i kambak—wok ia blong God blong fasin blong sevem man mo fasin blong kam olsem wan god i — lukluk nomo long responsabiliti we God i givim blong mekem. Nambatu pat, i mekem yumi tingbaot se gospel i tok stret, i impoten tumas, mo i simpol.
Ol Responsabiliti we God I Givim long Yumi
Blong kasem laef we i no save finis, yumi mas “kam long Kraes, mo kam stret evriwan tru hem.”1 Taem yumi stap go long Kraes mo stap helpem ol narawan blong oli mekem semmak, yumi stap tekpat long wok ia blong God blong fasin blong sevem man, mo blong mekem oli kam olsem wan god, we i lukluk nomo long ol responsabiliti we God i givim long yumi.2 Ol tabu responsabiliti ia we God i givim oli ron folem ol ki blong prishud we Moses, Elaeas, mo Elaeja oli bin putumbak, olsem we oli raetem long namba 110 seksen blong Doktrin mo Ol Kavenan,3 mo i ron folem nambatu hae komanmen we Jisas Kraes i bin givim long yumi, blong lavem neba blong yumi olsem yumiwan bakegen.4 Oli stap long ol fas tufala pej blong niu Jeneral Hanbuk, we i stap blong evri memba oli ridim.
Sapos we, taem yu harem ol toktok ia “Jeneral Hanbuk” o “ol responsabiliti we God i givim yumi” oli mekem yu seksek tumas, se hemia i bigwan tumas, plis no seksek. Ol responsabiliti ia, oli simpol, oli givim insperesen, oli pusum yu, mo yu save mekem. Hemia nao olgeta:
-
Stap laef folem gospel blong Jisas Kraes
-
Stap kea long olgeta we oli stap long nid
-
Stap invaetem evriwan blong akseptem gospel
-
Joenem ol famli blong taem we i no save finis
Maet yu save lukluk olgeta olsem mi: olsem wan map blong rod blong gobak stap wetem Papa long Heven we i gat lav.
Gospel I Tok Stret, I Impoten Tumas mo I Simpol
Wan toktok i talem se gospel blong Jisas Kraes, hem i naes nomo, mo i simpol mo naes.5 Wol i no olsem. Wol i fasfas, i defdefren, mo i fulap wetem trabol mo traehad. Yumi gat blesing taem we, yumi lukaotgud blong no letem samting we i fasfas tumas, we i hapen olbaot long wol, i kam insaed long rod ia mo praktisim gospel.
Presiden Dallin H. Oaks i talem olsem: “Oli bin tijim yumi plante smol mo simpol samting insaed long gospel blong Jisas Kraes. I nid blong oli mekem yumi tingbaot se long ful taem mo ova long wan longfala taem, olgeta smol samting ia oli mekem ol bigfala samting oli stap hapen.”6 Jisas Kraes, Hemwan bakegen i tokbaot se yok blong Hem i isi, mo trabol blong hem i nomo hevi.7 Yumi evriwan i mas traehad blong kipim gospel i simpol nomo—insaed long laef blong yumi, insaed long ol famli blong yumi, insaed long ol klas, mo ol kworom blong yumi, mo insaed long ol wod mo ol stek.
Taem yu stap lisin long olgeta stori ia we bae mi serem, luksave se oli bin lukaotgud blong jusum olgeta blong givim insperesen long wan han, mo givim infomesen long nara han. Aksen blong wanwan long Ol Lata-dei Sent ia i kam wan eksampol blong wanwan long yumi, we yumi stap yusum gospel ia long ol wei we oli stret, impoten, mo simpol mo semtaem mekem ol responsabiliti we God i givim long yumi.
Stap Laef Folem Gospel blong Jisas Kraes
Faswan, stap laef folem gospel blong Jisas Kraes. Jens blong Denmak, i prea evri dei blong laef folem gospel, mo i luk ol kwaet toktok we i kam long Tabu Spirit. Hem i bin lanem blong tekem aksen kwiktaem olsem we hem i filim se Spirit i talem blong hem i mekem.
Jens i serem hemia:
“Mifala i laef insaed long wan smol haf timba haos, we i gat tajruf, we i stap long medel blong wan smol vilej, we i stap kolosap long ples blong wota blong vilej.
“Long naet ia, we weta i wom gud, ol doa mo ol windo oli open i stap, mo evri samting i pulum gud win long pis mo kwaet. From ol sama naet oli saen mo longwan, mi no hariap blong putum wan laet long ples blong hemia we i bon, long wan rum blong haos.
“!Nao mi gat strong tingting se mi mas riplesem naoia.! Long semtaem, mi harem waef, Marian, i singaotem mi mo ol pikinini blong go wasem han from kaekae i rere.
“Mi bin mared longtaem finis blong save se, hemia, i no taem blong go mekem nara samting, be blong go wasem han nomo. Be mi talem long Marian se bae mi go long stoa blong pem niu laet. Mi filim se mi mas aot naoia.
“Stoa i stap narasaed long wota ia. Mifala i stap wokbaot nomo, be tetaem ia mi karem baeskel i go. Taem mi stap ron i kam pasem wota ia, long kona blong ae blong mi, mi luk wan smol boe, kolosap tu yia, we i wokbaot hemwan, long saed blong wota ia, kolkolosap long wota—nao !hem i foldaon insaed long wota! Wan minit hem i stap ia—nekis minit, hem i lus finis.
“I no gat wan i luk be mi nomo. Mi sakem baeskel i stap, mi ron, mo jiam long pul blong wota ia we i hae long wes blong mi. Antap long wota i fulap long nalumlum, mekem se mi no save luk tru long wota. Nao, mi filim samting i muv long wan saed. Mi putum han blong mi long wota, holem wan sot, mo pulumaot smol boe i kam. Hem i stat blong pulum win, kof, mo krae. I no longtaem afta, boe i stap wetem papa mo mama blong hem bakegen.”
Taem Brata Jens i stap prea evri moning blong kasem help blong luksave ol kwaet toktok we i kam long Tabu Spirit, iven wan samting we i defren smol, olsem jenisim laet long taem blong kakae, be tu, hem i stap prea blong Lod i stap yusum hem olsem wan tul blong blesem ol pikinini blong God. Jens i laef folem gospel taem hem i stap lukaot daereksen we i kam long heven evri dei, i traehad blong stap klin inaf, mo afta, hem i mekem bes blong folem daereksen we i kam.
Stap Kea long Olgeta long Nid
Hemia wan eksampol blong stap kea long olgeta we oli stap long nid. Wan dei, wan stek presiden long Kukuta Stek long Kolombia i go wetem stek Yang Woman presiden blong visitim tu yang woman blong olgeta–wetem bigfala yang brata blong tufala—we oli bin stap gotru long sam bigfala nogud trabol. Papa blong olgeta i jes lus, mo mama blong olgeta i jes pasawe wan yia i pas. Naoia, olgeta trifala brata mo sista ia nomo oli stap olgetawan insaed long smol, simpol selta blong olgeta. Ol wol blong haos oli mekem wetem wud we oli haedem wetem plastik bag, mo kapa i kavremap nomo ples we oli slip long hem.
Afta long visit blong tufala, tufala lida i bin save se bae oli mas help; Tru long wod kaonsel, oli statem wan plan blong helpem olgeta. Ol wod mo stek lida—Rilif Sosaeti, kworom blong ol elda, ol yang man, ol yang woman, mo plante famli—evriwan i joenem han blong blesem famli ia.
Ol oganaesesen blong wod oli kontaktem samfala memba blong wod we oli wok long konstraksen. Sam oli help blong raetem plan, sam oli givim taem mo wok, mo sam oli mekem kaekae, mo sam narawan oli givim ol tul we oli nidim.
Taem smol haos i finis, i bin wan dei blong glad blong olgeta we oli bin help, mo ol trifala yang memba blong wod. Ol pikinini ia, we oli nomo gat papa mo mama, oli bin filim ol wom mo gud filing blong wod famli blong olgeta, mo save se oli no stap olgetawan, mo we God i stap oltaem blong olgeta. Olgeta we oli bin go help, oli bin filim lav we Sevya i gat long famli ia mo oli bin stap olsem ol han blong Hem taem oli givhan.
Stap Invaetem Evriwan blong Akseptem Gospel
Mi ting se bae yufala i laekem eksampol ia blong stap invaetem evriwan blong akseptem gospel. Kleiton, we i gat 17 yia blong Kap Verde, i no save wanem bae i hapen taem hem i wokbaot go insaed long seminari klas wan dei. Be laef blong hem, mo laef blong ol narawan bae i jenis olwe from hem i bin go long seminari.
Kleiton, wetem mama mo bigfala brata, oli bin baptaes long Jos sam taem eli, mo afta, famli i stop blong kam long jos. From nomo we hem i kam long Seminari, bae i soem se hemia i wan ples blong stat blong famli.
Ol nara yut long seminari klas, oli naes mo oli welkamem hem. Oli mekem se Kleiton i filim se hem i stap hom mo oli leftemap tingting blong hem blong kam long nara aktiviti. Hem i go, mo i no longtaem hem i stap go long ol nara miting blong Jos. Wan waes bisop i luk hamas paoa long spirit Kleiton i save kasem, mo invaetem hem blong i asisten blong hem. “Stat long tetaem ia,” Bisop Cruz i talem, “Kleiton i kam wan eksampol mo wan paoa long ol nara yang pipol.”
Faswan we Kleiton i bin invaetem blong kambak long jos, i mama blong hem, mo afta bigfala brata blong hem. Afta i go kasem ol fren blong hem. Wan long ol fren ia, i wan yang man we i sem yia long hem, Wilson. Taem we hem i mitim ol misinari blong fastaem, Wilson i talem se hem i wantem kasem baptaes. Ol misinari oli bin sapraes mo sek long hamas samting Kleiton i bin serem finis wetem Wilson.
Ol hadwok blong Kleiton oli no stop ia. Hem i bin helpem ol nara lesaktiv memba blong kambak, antap long wok blong serem gospel wetem ol fren we oli gat defren bilif. Tedei, wod ia i gat 35 aktiv yut, wetem ol gudfala seminari program, mo hemia, tangkyu bigwan long hadwok blong Kleiton, blong lavem, serem, mo invaetem. Kleiton, wetem bigfala brata blong hem, Klebea, tufala i stap rere blong go wok long ol fultaem misin.
Stap Joenem Ol Famli blong Taem we I No Save Finis
Laswan, bae mi serem wan naes eksampol blong stap yunaetem ol famli blong taem we i no save finis. Lidia, blong Karkiv, Yukren, i lanem faswan abaot tempol, tru long ol misinari. Kwiktaem, Lidia i filim strong tingting long hat blong go long tempol, mo afta long baptaes blong hem, hem i rere blong kasem wan tempol rekomen.
Lidia i go long Fribeg Jemani Tempol blong kasem endaomen blong hem, mo i spendem plante dei blong mekem proksi wok insaed. Afta long dedikesen blong Kiv Yukren Tempol, Lidia i go long tempol plante moa taem. Hem mo hasban blong hem, Anatoli, i bin sil long ples ia, mo afta, oli singaotem tufala olsem ol tempol misinari. Tugeta, oli faenem ova long 15,000 nem blong ol bubu mo oli wok blong mekem ol tempol odinens blong olgeta.
Taem oli askem Lidia abaot ol filing blong hem long saed blong tempol wok, hem i talem se “?Wanem nao mi kasem insaed long tempol? Mi bin mekem ol niu kavenan wetem God. Testemoni blong mi i kam strong moa. Mi lanem blong kasem revelesen blong miwan. Mi save mekem ol odinens we i sevem man long bihaf blong ol ded bubu blong mi. Mo mi save lavem mo givim seves long ol nara pipol.” Hem i endem wetem tru toktok ia: “Lod i wantem luk yumi moa insaed long tempol.”
Las Toktok
Mi gat insperesen tru long ol gud fasin blong Ol Lata-dei Sent ia, wanwan we oli gat ol defren situesen, we oli stap long ol fofala stori ia. Yumi save lanem plante aot long merikel risal we i stap kam tru long simpol aksen blong praktisim ol simpol gospel prinsipol ia. Evri samting we oli bin mekem, yumi tu i save mekem.
Bae yumi kipim gospel i simpol taem yumi stap mekem ol responsabiliti we God i givim long yumi, blong laef folem gospel blong Jisas Kraes long wan wei we yumi stap harem ol kwaet toktok blong Spirit olsem we Jens long Denmak i bin harem. Blong kea long olgeta long nid, olsem we ol memba blong Kukuta Stek long Kolombia oli mekem blong givim selta long pikinini we i lusum parens. Blong invaetem evriwan blong akseptem gospel, long wei we Kleiton blong Afrika aelan kantri blong Kap Verde, i bin mekem wetem ol fren mo famli blong hem. Laswan, blong yunaetem ol famli blong taem we i no save finis, olsem we Sista Lydia blong Yukren i soem, tru long tempol odinens blong hemwan, famli histri hadwok, mo seves insaed long tempol.
Sapos yumi mekem hemia, bae i tekem glad mo pis i kam. Abaot hemia, mi promes mo testifae long hem—mo tu abaot Jisas Kraes, Sevya mo Ridima blong yumi—long nem blong Jisas Kraes, amen.