Na iSau ni Vakasaqaqara ena Yalodina
Au sureti keda kece meda tomana tikoga na noda vakabauti Karisito, o koya sa veisautaka na nodra bula o ira kece era vakasaqarai Koya.
Tekivu mai na 1846, e udolu na turaga, marama kei na gone painia era toso ena ilakolako ki na ra ki Saioni. Na nodra vakabauta cecere a vakavuna na nodra yaloqaqa tawayalani. Vei ira eso, era a sega ni vakacavara na ilakolako o ya ni ra a mate koso ena nodra igolegole. Eso tale, ni ra sotava tu na dredre levu, era toso tikoga ki liu ena vakabauta.
Ena vukudra, ena vica na itabatamata ka tarava mai, a marautaka na noqu matavuvale na veivakalougatataki ni kosipeli dina i Jisu Karisito.
Me vakataka ga e dua tale na cauravou, okoya au na qai tukuna malua, au a yabaki 14 ena gauna au sa tekivu me‘u vakataroga na ibalebale ni lotu kei na noqu vakabauta. Au a lako ki lotu ena dua tale na matalotu volekata na noqu vale, ia au a vakila na gagadre me’u sikova e vuqa tale na vei matalotu.
E na dua na yakavi, au a raica e rua na cauravou sutu loaloa kei na sote vulavula ni rau curuma yani na vale keitou veitikivi. Na cauravou oqo e rairai—dokai.
E na siga ka tarava au a sotava na marama keitou tiko veitikivi, o Leonor Lopez ka tarogi koya me baleti rau na cauravou oya. E vakamacalataka o Leonor ni rau daukaulotu ni Lotu i Jisu Karisito ni Yalododonu Edaidai. A tukuna vei au o koya ena reki ni ratou a papitaiso ena Lotu na nona matavuvale ena yabaki sa oti. Ni vakila o koya na noqu gagadre, a sureti au o Leonor me’u sotavi rau na daukaulotu ka vulica na veika me baleta na Lotu.
Oti e rua na siga, au a gole vei iratou na matavuvale nei Lopez me’u sotavi rau na daukaulotu. E rau vakamacalataki rau me o Elda John Messerly mai Ogden, Utah kei Elda Christopher Osorio mai Walnut Creek, California. Au na sega ni guilecavi rau vakadua.
Me vaka ni’u se qai yabaki 14 walega, a cikeva o Elder Messer me keitou lako ki na noqu vale me rawa ni kila o tinaqu na veika e rau vakavulica tiko vei au. E kea, a vakamacalataka ena yalololoma ni rau lako mai me rau mai wasea e dua na itukutuku me baleti Jisu Karisito ka kerea na nona veivakadonui me vakatavulici au. A vakadonuya o tinaqu ka tomani keitou talega ena gauna e rau vakavulici au kina.
E rau a kerei Leonor na daukaulotu me cabora e dua na masu. E tarai au vakabibi na ka oqo baleta ni nona masu e sega ni tokaruataka na vosa e wiligusutaki ia e vakaraitaka saraga mai na ka e tu e yalona. Au vakila ni a vosa sara tikoga okoya ki vua na Tamada Vakalomalagi.
E rau sa qai vakatavulici keitou me baleti Jisu Karisito o rau na daukaulotu. E rau vakaraitaka e dua na Kena iyaloyalo ka vakurabuitaki au baleta ni oya e dua na iyaloyalo ni Karisito sa tucaketale ka bula tiko.
E rau tomana, ka vakavulica vei keirau na sala a tauyavutaka kina o Jisu na Nona Lotu ena gauna makawa, ka liutaka o Koya ka ratou sema yani kina o ratou na lewe tinikarua na iApositolo. E rau vakavulici keirau me baleta na Vukitani—na sala a kau tani kina mai vuravura na dina kei na lewa i Karisito ni oti na nodra mate na Nona iApositolo.
E rau a talanoataka vei keirau me baleta e dua na gonetagane yabaki 14 na yacana o Josefa Simici, ena itekivu ni 1800 vakacaca, a sikova na veimatalotu duidui ena nona vakasaqara tiko na dina. Ni toso tiko na gauna, sa yaco me veilecayaki vakalevu sara o Josefa. Ni wilika oti ena iVolaTabu ni sa rawa me da “kerea vua na Kalou”1 na vuku, o Josefa, ena nona cakacaka ena vakabauta, a gole yani ki na dua na veikau me lak‘i masu ka taroga se lotu cava me na lewena.
E dua vei rau na daukaulotu a wilika na itukutuku nei Josefa me baleta na veika a yaco ni a masu:
“Au sa raica kina e cake e dua na duru bukawaqa donuya tiko na uluqu, ni sa lako sobu tiko mai ka serauni au; ia sa sivia sara na rarama ni matanisiga.
“… Ni sa mai cilavi au na rarama au sa raica e rua na Tamata, ka sega ni vakamacalataki rawa na kedrau iserau kei na lagilagi, e rau tucake tu e macawa donumaki au. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya!”2
Ena gauna ni lesoni oya, a vakadeitaka vei au na Yalo e vica na dina.
iMatai, na Kalou e rogoca kece na nodra masu ena yalodina na Luvena, kei na lomalagi e dola tu vei keda kece—sega ni vei ira ga eso.
Na ikarua, na Kalou na Tamada, Jisu Karisito kei na Yalo Tabu e ratou lewe tolu ka duidui, ka duavata ena nodratou inaki “me ra tucake tale mai na mate na tamata kecega ka rawata na bula tawamudu.”3
iKatolu, eda sa buli me da ucuya na Kalou. Na Tamada Vakalomalagi kei na Luvena, o Jisu Karisito, e Rau vakayago vakalewe ka vakasuina me vakataki keda, ia e Rau sa vakalagilagi ka vakataucokotaki, kei na Yalo Tabu e tamata vakayalo.4
iKava, mai vei Josefa Simici, a vakalesuya mai o Jisu Karisito na Nona kosipeli kei na Lotu dina ki vuravura. Na lewa ni matabete a soli vei ira na iApositolo i Karisito ena 2,000 na yabaki sa oti sa ikoya na matabete vata ga a soli vei Josefa Simici kei Oliva Kaudori mai vei Pita, Jemesa, kei Joni.5
Kena itinitini, keirau a vulica e dua tale na ivakadinadina kei Jisu Karisito: na iVola i Momani. Era a vola na parofita ni gauna makawa, e kedra i talanoa o ira na tamata era a bula tu e Amerika ena gauna e liu, ena gauna sa bera, kei na gauna sa sucu oti kina o Jisu. Mai na veika oqori eda vulica kina na nodra kila, lomana, ka sokalou vei Karisito, ka a rairai vei ira me vaka na iVakabula sa tucaketale.
A vakauqeti au vakabibi na Yalotabu ni’u sa kila na nona ivakaro na iVakabula vei ira: “Raica koi au ko Jisu Karisito, ka ra sa vakadinadinataka na parofita ni na lako mai ki vuravura.”6
E rau solia vei keirau na daukaulotu na neirau ilavelave ni iVola i Momani. Keirau wilika ka ciqoma na veisureti ka kune ena icavacava ni iVola i Momani, ka tukuni kina:
“Ia ni dou sa ciqoma na veika oqo, au gadreva me‘u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.
“Ia ena kaukauwa ni Yalo Tabu dou na kila kina na dina ni veika kecega.”7
E sa sivi qo e voleka ni 45 na yabaki mai na gauna au a vulica kina kei tinaqu na reki kei na kaukauwa ni vakabauti Karisito. E na nodratou vakabauti Karisito o ratou na matavuvale na Lopez e ratou a wasea kina vei au na nodratou vakabauta vou. E na nodrau vakabauti Karisito o rau na daukaulotu oqo e rau a biuta mai na nodrau vale mai Amerika me rau mai kunei au kei tinaqu. Sa ikoya na nodra vakabauta na itokani lomani oqo ka teivaka e dua na sore ni musita ni vakabauta vei keirau ka sa mai tubu me dua na vunikau qaqa ni veivakalougatataki tawamudu.
Ena veiyabaki vakalougatataki oqo, eda sa kila, me vaka a kaya o Peresitedi Russell M. Nelson: “Na veika kece e vinaka ena bula—na veivakalougatataki kece e rawa ni yaco me tawamudu—e tekivu ena vakabauta. Ni da vakatara na Kalou me lewa na noda bula e tekivu mai ena vakabauta ni sa tu vakarau o Koya me dusimaki keda. Na veivutuni dina e tekivu ena vakabauta ni sa tu vei Jisu Karisito na kaukauwa me veivakasavasavataki, veivakabulai, ka vaqaqacotaki keda.”8
Au sureti keda kece me da tomana tikoga na noda vakabauti Karisito, o koya sa veisautaka na noqu bula kei tinaqu lomani ka tomana tikoga me veisautaka na nodra bula o ira kece era vakasaqarai Koya. Au kila ni o Josefa Simici a Parofita ni Veivakalesui Mai, ni o Peresitedi Nelson e noda Parofita nikua, ni o Jisu sa iKoya na Karisito bula kei na noda Dauniveivueti, ka bula tiko na Tamada Vakalomalagi ka sauma na masu kece ni Luvena. Au sa vakadinadinataka na vei dina oqo ena yaca tabu i Jisu Karisito, emeni.