Na Cakacaka Mana ni Kosipeli i Jisu Karisito
Au kila na Nona kosipeli e kauta mai na inuinui, vakacegu, kei na marau, sega walega eke, ia ena vakalougata taka e lewe vuqa na itabatamata era muri mai.
Mabuhay! Au kauta mai vei kemuni na iloloma kei na nodra matadredre na Yalododonu mai na Filipaini. Na yabaki qo e makataka na ika 60 ni yabaki ni nodra tadu mai ki Filipaini na imatai ni daukaulotu. Nikua, e 23 na levu ni buturara ni kaulotu ka sivia e 800,000 na lewe ni lotu era lewena e 123 na iteki. Ena gauna oqo e vitu na valetabu era cici tiko, vakavinakataki, se kacivaki. Oqo sa dua dina na cakacaka mana. Eda sa sarava tiko oqo na kena sa mai vakadinadinataki kina na parofisai ena 2 Nifai 10:21: “Ia sa ka levu na nona vosa ni yalayala na Turaga vei ira ka tiko ena veiyanuyanu ni wasawasa.”
Na cakacaka mana oqo e sa mai yaco talega kina na parofisai e a soli ena masu nei Elder Gordon B. Hinckley e Manila ena 1961. “Keimami sureta na Nomuni veivakalougata taki vei ira na tamata ni vanua oqo, me ra itokani vinaka, veikauwaitaki, veilomani, ka lomasoli vei ira era lako mai ike, ka me vuqa, io Turaga, keimami masulaka me vuqa vaka vuqa na udolu me ra ciqoma na itukutuku oqo ka vakalougata taki vakakina. Ni vakalougatataki ira me tadola na nodra vakasama kei na yalo me tudei, na vakabauta me ciqomi, kei na veivakauqeti me bulataki na ivakavuvuli ni kosipeli” (Gordon B. Hinckley, American Cemetery, Philippines, April 28, 1961).
Mai vei ira na vuqa vaka vuqa na udolu ni Yalododonu yalodina, na kosipeli e kauta mai na veisau vinaka ki na vanua kei na kena tamata. Au vakadinadinataka na veika oqo. Au a sa qai yabaki ono ena gauna rau lewena kina na Lotu na noqu itubutubu ena yanuyanu mai na sauca o Mindanao. Ena gauna oya, e a dua voli ga na buturara ni kauloutu ena vanua taucoko, ka se sega na iteki. Au vakavinavinakataka tawamudu na noqu itubutubu ena nodrau qacoya ka dinata na muria tiko na iVakabula. Au vakacaucautaki rau kei ira na painia ni Lotu e Filipaini. Era caramaka na sala me ra vakalougata kina na itabatamata era muri mai.
Na Tui o Penijamini ena Vola i Momani e tukuna: “Ka dua tale, au gadreva mo ni vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo” (Mosaia 2:41).
Ni da bulataka ka muria na ivakavuvuli kei na cakacaka vakalotu ni kosipeli, eda na vakalougatataki, veisau, ka saumaki mai me da vakataki Jisu Karisito. Oqo na sala e a veisautaka ka vakalougataka kina na kosipeli na nodra bula na Yalododonu ni Filipaini, kei ira na nodra dui vuvale. Na kosipeli e sala dina duadua ki na bula marau kei na sautu.
Na imatai ni ivakavuvuli ni kosipeli sa ikoya me da vakabauta na Turaga o Jisu Karisito. Vuqa vei ira na Filipaini e sega ni ka vou vei ira na Vakabauta na Kalou. E rawarawa vei keimami me niutaki Jisu Karisito ka kila deivaki ni na sauma mai na neimami masu.
Na vuvale na Obedoza e ivakaraitaki vinaka ni veika oqo. O baraca Obedoza a peresitedi ni tabana ena noqu a se cauravou voli. Na nodrau gagadre levu duadua o baraca kei sista Obedoza sa ikoya me rau vauci ki vei nodrau vuvale ena Valetabu e Manila. Rau vakaitikotiko ena Siti o General Santos, 1,000 na maile mai Manila. Ratou lewe 9 na vuvale qo, na ilakolako ki na valetabu e sa bau dua na ibolebole levu. Ia me vakataki koya ga na dauvolivolitaki ni a lako ka volitaka na nona iyau kecega me volia kina e dua na mata ni civa talei (raica na Maciu 13:45–46), rau sa lewa vakakina na veiwatini oqo me rau volitaka na nodrau vale me isau ni ilakolako oqo. Sa lomaleqa o Sista Obedoza baleta ni sa sega na vale me ratou na lesu mai kina. Ia a vakadeitaka vua o Baraca Obedoza ni na vakarautaka na Turaga.
E ratou sa mai vauci vakamatavuvale me tawamudu ena valetabu ena 1985. E ratou a kunea e valetabu na reki e sega ni vakatauvatani rawa— na nodratou mataniciva talei. Sa dina sara na vosa nei Baraca Obedoza, ni veivakarautaki dina na Turaga. Ni ratou sa lesu mai Manila, era solia na nodra vale eso na wekadratou vakaveikilai me ratou tiko kina, ka qai yaco me dua ga na nodratou vale. Na Turaga ena karoni ira era vakaraitaka na nodra vakabauti Koya.
Na ikarua ni ivakavuvuli ni kosipeli sa ikoya na veivutuni. Na veivutuni sa ikoya na vuki tani mai na ivalavala ca ka gole yani vua na Kalou mo vosoti. Oqo na veisau ni vakasama kei na yalo. E vakavulica o Peresitedi Nelson, sa ikoya “mo cakava ka vinaka cake vakalailai e veisiga” (“E Rawa Ni Da Caka Vinaka Cake ka Vinaka Cake,” Liaona, Me 2019, 67).
Na veivutuni e vakataka na sovu. Ni‘u a se ijinia gone ni wainimate, au a cakacaka ena qaqi ni sovu e Filipani. Au vulica na caka sovu kei na ituvatuva ni kena caka. Na kena wakivata na waiwai yavutaki ena alkaline kei na wainimate e vakamatea na manumanuca lalai, sa qai mai dua kina na wai kaukauwa me vakamatea na manumanu lalai edau vakavuna na tauvimate. Me vaka na sovu, na veivutuni e dua na dau ni veivakasavasavataki. E vakatara vei keda na madigi meda biuta laivi na dukadukali kei na bibi makawa, me da kilikili kina vua na Kalou, ni sa sega ni taukena na matanitu vakalomalagi e dua na ka tawasavasava (Alama 11:37
Na veivutuni ena kauta mai na savasava, kei na kaukauwa veivueti i Jisu Karisito. E tiki bibi ni tuvatuva ni saumaki mai. Oqo a yaco vei ira na Saqati-Nifai-Liai ena iVola iMomani. Qo o ira na Lemanaiti saumaki mai ka ra sega tale ni qai tavuki tani (raica Alama 23:6–8 Era buluta na nodra iyaragi ni vala ka sega ni qai taura cake tale. Era sa bolea na mate, me ra kua ga ni voroka na nodra veiyalayalati. Era qai cakava vakaidina. E da kila ni nodra isoro e a qai kauta mai na cakacaka mana; e udolu vei ira era a valuti ira era a qai biuta sobu na nodra iyaragi ni valu ka ra saumaki kece mai. Ni oti yani e vica na yabaki, o ira na luvedra tagane, ka da kilai ira me ra vakatokai na gonetagane sotia yaloqaqa, era a taqomaki ena ivalu levu!
Na noqu vuvale kei na vuqa na Yalodina e Filipaini era a lakocuruma na ituvatuva ni saumaki vata oqo. Na gauna keimami ciqoma kina na kosipeli i Jisu Karisito ka lewena na Lotu, keimami veisautaka na neimami vakarau kei na itovo me duavata kei na kosipeli. Keimami biuta laivi na itovo ca. Au raica qo vei tamaqu ena nona vulica na kosipeli ka veivutuni, ka sega tale ni qai rai lesu. E a dua na dau kana tavako kaukauwa o koya, ia a qai viritaka laivi kece ka sega ni tara tale. Mai na veisau oqo, e va na itabatamata era a vakalougatataki kina.
Na veivutuni e muataki keda me da ciqoma ka taqomaka na noda veiyalayalati ni cakacaka tabu vakalotu. Na imatai ni cakacaka vakalotu ni veivakabulai kei na bula vakalou sa ikoya na papitaiso tabadromuci e wai me bokoci kina na ivalavala ca. Na papitaiso e vakatara meda ciqoma na isolisoli ni Yalo Tabu, ka curu ki na dua na veiyalayalati kei na Turaga. Eda vakavouia na veiyalayalati oqo ena noda laki vakayagataka na sakaramede. Oqo sa dua dina na cakacaka mana!
Kemuni na taciqu kei na ganequ, au sureti kemuni mo ni kauta mai na cakacaka mana oqo ki na nomuni bula. Lako mai vei Jisu Karisito ka digitaka na bulataki ni nomu vakabauti Koya, veivutuni, ciqoma ka maroroya na nomu veiyalayalati e kune ena cakacaka vakalotu ni veivakabula kei na bula vakalou. Ena vakatara me da coriti keda vei Karisito ka ciqoma na kaukauwa kei na veivakalougatataki vakalou (raica na Vunau kei na Veiyalayalati 84:20
Au vakadinadinataka ni bula tiko o Jisu Karisito ka lomani keda vakayadua tu. Au kila na Nona kosipeli e kauta mai na inuinui, vakacegu, kei na marau, sega walega eke, ia ena vakalougata taka e lewe vuqa na itabatamata era muri mai. Oya na vu ni nodra mata mamarau rairaivinaka na Yalodina e Filipaini. Sa ikoya na cakacaka mana ni kosipeli kei na ivakavuvuli i Karisito. Au vakadinadinataka na veika oqo ena yaca tabu i Jisu Karisito, emeni.