Vakabauta mo Cakacaka ka Yaco mo Vakakina
Ena masu, vuli ivolanikalou, kei na cakacaka, sa rawa ni da tadolava na veivakalougatataki ni lomalagi ka yaco meda dau vakamuria vakavinaka cake na iVakabula o Jisu Karisito.
Oti vakalailai na noqu kacivi meu veiqaravi vaka dua na Vakailesilesi Raraba ena Vitusagavulu, sa noqu na madigi meu sota kei Peresitedi Russell M. Nelson me vica na miniti. E a dua na veisotari tawanamaki ena vanua ni kana, ka yalovinaka tu o koya me sureti Elder S. Mark Palmer kei au me dabe ka vakasigalevu vata kei koya.
“Na cava eda veivosakitaka kei na parofita ena gauna ni vakasigalevu?” na ka au a vakasamataka tu. Au mani navuca meu tarogi Peresitedi Nelson se tiko vua e dua na ivakasala se veituberi vei au ka niu se qai tekivuna tiko na noqu ilesilesi. A rawarawa ka dodonu sara na nona isaunitaro; a raici au o koya ka kaya, “Elder Schmeil, o sa kacivi mo rawa ni yacova na veika e vinaka cake.” Au biuta mai na veitalanoa oya ena noqu vakasamataka vakatitobu se cava e vinaka na Turaga meu yaco meu vakakina. Niu vakasamataka tu, au vakila ni sa vinakata o Koya meu yaco meu dua na turaga vakawati, tama, luvena ka italai vinaka cake. Au qai vakasamataka ni sa rawati na ka kece oqo niu cakacaka tu meu vakataka e dua na tisaipeli vinaka cake ni iVakabula o Jisu Karisito.
Na koniferedi raraba sa oti, a kaya o Peresitedi Nelson: “Me caka vinaka e dua na ka sa gadrevi kina na sasaga. E sa sega ni duidui mai na vakataka tu na tisaipeli dina i Jisu Karisito.”1 Sa veisureti tiko o Peresitedi Nelson meda cakacaka vakaukauwa ni vakataka na tisaipeli vinaka cake i Jisu Karisito. A tukuna o koya meda yaco meda vakataka cake na iVakabula, sa gadrevi me vaqaqacotaki na noda vakabauta ena kerekere, cakacaka, kei na vuli, mai na ka tale eso.
1. Kerekere
Kaya o koya, “Kerea na Tamamu Vakalomalagi, ena yaca i Jisu Karisito, me veivuke.”2 Na kerekere ena masu e sa dua na idola ni kena kilai na sala meda vakataka kina na tisaipeli vinaka cake i Jisu Karisito.
Me yacova na icavacava ni Nona veiqaravi vei ira na Nifaiti ena vanua vaka-Amerika, sa lako cake ki lomalagi o Jisu Karisito. Emuri, era a soqoni vata na tisaipeli, “duavata ena masu kei na lolo vagumatua sara. A sa rairai tale vei ira ko Jisu ni ra a masu tiko vua na Tamada ena yacana.”3 Cava na vuna a vakaraitaki Koya tale kina o Jisu vei ira na Nona tisaipeli? Baleta ni ra a masu tiko; era a kerekere tiko.
Qai tomana tu o Koya:
“Ia oqo au sa lako vua na Tamada. Au sa kaya vakaidina vei kemudou, ena soli vei kemudou na veika kecega ko ni sa kerea vua na Tamada ena yacaqu.
“O koya mo dou kerekere, ka na soli vei kemudou; mo dou tukituki, ka na dolavi vei kemudou; ni sa rawata ko koya yadua sa kerekere; ka na dolavi vua sa tukituki.”4
Sa dodonu meda kerekere ena vakabauta ni kila na loma ni Turaga, ka vakadonuya ni sa kila na Turaga na ka e vinaka cake vei keda.
2. Cakacaka
Na cakacaka sa dua talega na usutu bibi ni vakataka tu na tisaipeli vinaka cake i Jisu Karisito. Ni da cakacaka, ena tuberi ka dusimaki keda o Koya ena ilakolako. Au vakadinata ni a vasaqara na veidusimaki tu o Nifai mai vua na Turaga me kila na sala me taura mai kina na peleti parasa mai vei Lepani, dina ni ratou tawarawata vakaveitacini ni saga vakarua. Ia ratou a cakacaka voli, ka sa dusimaki ratou tiko na Turaga ena ilakolako. Kena itinitinii, sa rawaka tu o Nifai enai katolu ni gauna. A raitaleva o koya, “A sa liutaki au tiko na Yalo, ia au sega ni kila rawa tiko yani na ka meu na cakava.”5
Oqo na sala e cakacaka kina na Turaga ni da sasaga vakalevu tu ka cakacaka ena gauna mada ga e sega ni tiko kina vei keda na kilaka matata ena ka sa gadrevi me caka. Na Turaga a tukuna vei Nifai na ka me cakava: lako ka taura mai na peleti. Ia a sega ni tukuna vei Nifai na sala me cakava kina. A vakalaiva vei Nifai o Koya me cakacakataka ka vasaqara na veivuke ni Turaga—ka sa vakaoqo na sala e dau cakacaka kina na Turaga ena noda bula. Ni da cakacaka ena vakabauta, sa tuberi ka dusimaki keda na Turaga.
3. Vuli
Ena 3 ni Nephi, era a tukuna na tisaipeli vua na iVakabula ni sa tiko na veileti vei ira na tamata ena vuku ni yaca ni Lotu. Ni sausaumi, a vakatavulica na iVakabula e dua na ivakavuvuli bibi ni a taroga, “Era sa sega li ni wilika na ivolanikalou?”6 Na vuli e sa dua talega na usutu bibi ni vakataka tu na tisaipeli vinaka cake i Jisu Karisito. E sa salavata na masu kei na vuli ivolanikalou. Rau sa cakacaka vata me yaga vei keda. Oqo na ivalavala e sa yavutaka tu na Turaga. “Tugana ki lomamudou na vosa i Karisito; ia raica, na vosa i Karisito sa tukuna vei kemudou na veika kece mo dou kitaka.”7
A vakatavulica talega na iVakabula ni sega ni dodonu walega meda vulica na ivolanikalou ia meda veivakavulici talega mai kina, me vaka a vakaraitaka vei ira na Nifai: “Ka sa yaco ni sa vakamacalataka taucoko vakadua ko Jisu na ivolanikalou era sa vola tu, sa qai vakaroti ira me ra vakatavuvulitaka na veika sa vakamacalataka vei ira.”8
Oqo e dua na vuna e sa rui bibi kina vei Nifai me lesuva tale ka kauta mai na peleti parasa: sa gadreva tu na nona matavuvale na ivolanikalou sega ena nodratou vukei walega ena ilakolako ki na vanua yalataki ia me vukei ira talega ni vakatavulica na luvedra. Sa dodonu talega meda vasaqara veituberi mai na ivolanikalou ena noda ilakolako, ka veivakavulici mai kina ena noda itikotiko kei na veikacivi ni Lotu.
4. Cakacaka mo Yaco Mo Vakakina
Vuqa na gauna, ena sega ni basika totolo tu na isau ni masu. Ia sa dodonu meda vakabauta tikoga ni tomana, cakacaka ena yalododonu, ka dau qaqa tu vakataki Nifai ni a saga tiko me kauta mai na peleti parasa. Na Turaga ena vakaraitaka vei keda e lailai vagauna; ni da vulica na ivolanikalou, na Turaga ena solia vei keda na isaunitaro se na kaukauwa e gadrevi meda lako curuma kina e dua tale na siga, dua tale na macawa, ka tavolea tu vakadua tale. A kaya o Elder Richard G. Scott, “Mo vakavinavinaka ni so na gauna e vakavuna na Kalou mo sotavi dredre ena dua na gauna balavu ni bera ni yaco mai na kena isau. Sa vakavuna oqori me levu cake na nomu vakabauta ka tubu na nomu itovo ni bula.”9
Mai na masu kei na vulici ni ivolanikalou, e sa solia tu ga vei au na Turaga na kaukauwa meu cakacaka ka vosota e dua tale na siga, dua tale na macawa, ka tovolea tale mada vakadua. Vuqa na gauna e sega ni basika totolo tu na isau ni masu. E tiko vei au na taro eso ka se bera ni saumi tu, ia au se kerekere ka vuli tikoga, kau sa marau ni tomana tiko na Turaga me solia vei au na kaukauwa meu cakacaka niu waraka tu na isaunitaro.
A kaya talega o Elder Scott, “Ni ko lako tu ki na yalayala ni nomu kilaka ki na malolo ni veilecayaki, ena cakacakataki ni vakabauta, o na tuberi mo raica na iwali eso o na sega ni rawata ena dua tale na sala.”10
Meda yaco meda dau vakamuria vinaka cake na iVakabula o Jisu Karisito, sa dua na ilakolako ni bula balavu, ka da sa tiko kece ena ivakatagedegde duidui, toso voli ena duidui ni totolo ni dua na kalawa. Sa dodonu meda nanuma tiko ni oqo e sega ni dua na veisivisivi, ka da sa tiko eke meda loloma ka veivuke vakaikeda. Sa gadrevi meda cakacaka tu me rawa ni vakatara na iVakabula me cakacaka vata kei keda ena noda bula.
Ni vosa tiko vei Sidney Rigdon, a kaya vakaoqo na Tuaraga: “Au sa raici iko kei na nomu cakacaka. Au sa rogoca na nomu masu, ka qisi iko ki na dua na cakacaka bibi cake.”11 Au vakadinadinataka ni sa rogoca ka sauma na noda masu na Turaga; sa kilai keda o Koya, ka sa tiko Vua e dua na cakacaka levu me baleti keda yadua. Ena masu, vuli ivolanikalou, kei na cakacaka, sa rawa ni da tadolava na veivakalougatataki ni lomalagi ka yaco meda dau vakamuria vakavinaka cake na iVakabula o Jisu Karisito.
A vakavulica o Peresitedi Dallin H. Oak: “na iOtioti ni Veilewai e sega walega ni mai dua na vakadikevi ni wiliwili taucoko ni caka vinaka kei na caka ca—na ka eda sa cakava. E sa vakatakilai ni otioti ni revurevu ni noda cakacaka kei na vakasama—na ka eda sa vakataka.”12
Au sa vakavinavinakataki ira na parofita, daurairai, kei na dauvakatakila; era sa ivakatawa ena vale cere. Era raica na veika eda sega ni raica tu. Au vakadinadinataka ni mai na nodra vosa, sa rawa ni da vakataka na imuri vinaka cake ni iVakabula o Jisu Karisito ka rawata na noda sasaga. Au vakadinadinataka ni bula tiko na Karisito ka sa kilai keda tu vakayadua. Oqo na Nona Lotu. Ena yaca tabu i Jisu Karisito, emeni.