Vakavakarau tiko ki na iKarua ni Lesumai i Jisu Karisito
E gadrevi vakalevu me da kua ni levea na dina ni da sa volekata tiko yani na iKarua ni Lesumai i Jisu Karisito.
E volai ena iVola i Momani, ni bera e ono na yabaki nona sucu o Jisu Karisito, ko Samuela, na Lemanaiti yalosavasava a parofisaitaka vei ira na tamata i Nifai, levu vei ira era sa vukitani,1 na ivakatakilakila ena muria na nona Sucu na iVakabula. E vakaloloma, ni vuqa vei ira na Nifaiti era sega ni via rogoca na ivakatakilakila “baleta e sega ni vakaibalebale me lako mai e dua, me vaka na Karisito.”2
Ka ni rarawa, me vaka e tukuna na tiki ni volatabu, e vuqa vei ira na Jiu, e duavata na nodra vakasama, ni sega ni rawa ni vakatarai me dua na turaga vakai Jisu mai na vanua sega ni kilai ko Kalili, na Mesaia era a waraka tiko mai.3 Sa lako mai o Jisu me vakayacora vakaidina e vuqa na veika era parofisaitaka na parofita ni Ipiriu,3a cudruvi ka vakarusai, baleta me vaka e tukuna o Jekope ena iVola i Momani, o ira na Jiu era “rai baleta na maka.” Qai yaco sara me parofisaitaka o Jekope ni “sa kauta tani mai vei ira na Kalou na nona veika matata, ka solia vei ira e vuqa na ka era na sega ni kila rawa, baleta ni ra sa gadreva vakakina. Ia me vaka ni ra sa gadreva sa vakayacora vakakina na Kalou, me ra na tarabe kina.”4
Eda raica ni sega ni dua na ivakavuvuli, caka mana, se na tadu mai ni dua na agilosi ni lomalagi, erau a raica o Leimani kei Lemueli,5 me vukea na kaukauwa ni vakabauta eso me veisau kina na nodra rai se vakabauta ni dua na ka e dina. Oqo e vakatabakidua vei ira era na sega ni vakadonuya na ivakavuvuli se caka mana baleta ni sa tiko rawa na nodra dui kilaka, gagadre, se vakasama.
Raica vakatautauvata mada e rua na tikini volatabu, na imatai mai vei Apositolo o Paula e vosa tiko me baleta na gauna nikua kei na kena ikarua o Alama na parofita ka vakaraitaka tiko na cakacaka ni Kalou vei ira na kawa tamata. Matai o Paula:
“Mo kila talega na ka oqo, ni na yaco eso na gauna ni veivakararawataki ena veisiga mai muri.
“Ni ra na daulomani ira walega na tamata, era na dauvinakata na ilavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava,
“Era na caca veiwekani, era na dauyalayala ka lasu tale, era na dauveibeitaki vakailasu, era na dausega ni rawa na yalodra, era na daucudrucudru, era na daucati ira na tamata vinaka,
“Era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai ga;
“Era sa dau vakatavulici tiko ka sega ni rawata me ra kila na ka dina.”6
“Ko na nanuma beka ni sa ka sesewa vei au na veika oqo; ia raica au sa kaya vei iko, ena dau rawa na veika lelevu mai na veika lalai ka rawarawa, ia na veika lalai era dau vakamaduataki kina na vuku ena vuqa na gauna.”7
Eda bula tiko ena dua na vuravura vou vakasinaiti tu ena kilaka kei na qaqa. Ia, na veika oqo e dau vakamatavulotaka na iyavu sega ni tudei era tarai cake kina. Dau yaco kina, me ra sega ni mua ki na dina ka vua na Kalou kei na kaukauwa ni vakatakila, na ciqomi ni kilaka vakalou, kei na cakacakataki ni vakabauti Jisu Karisito koya na sala ni veivakabulai8
Eda vakananumi vakauasivi ena nona vosa na Turaga vei Tomasi kei eso tale na iApositolo ena bogi ni bera na Nona veisorovaki: “Sa kaya vua ko Jisu, Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.”9
Vei ira era vaka matana me raica, na daliga me vakarorogo, kei na uto me vakila, vakalevu cake sara mai na kena eliu, e gadrevi me da kua ni levea na dina ni da sa volekata tiko yani na iKarua ni Lesumai i Jisu Karisito. E dina, na ibolebole levu e na ravuti ira e vuravura ena nona lesu mai, ia na ituvaki oqo me ra kua ni rerevaka na yalodina.
Au na wasea oqo na Veiulutaga va Kosipeli ena ulutaga na “iKarua ni Lesumai i Jisu Karisito”:
Ni sa lako tale mai na iVakabula, ena lako mai ena kaukauwa kei na lagilagi cecere me tauri vuravura me Nona matanitu. Na iKarua ni Lesumai ena makataka na itekitekivu ni Dua na udolu na yabaki ni vesu o Setani.
“Na iKarua ni Lesumai ena vakarerevaki, era na lolosi na valavalaca, ia ena siga ni vakacegu vei ira na yalo savasava. Sa kaya na Turaga:
Ko ira sa yalomatua ka vakabauta na dina, ka ra sa taura na Yalo Tabu me nodra idusidusi, ka ra qai sega ni rawai—au sa kaya vakaidina vei kemudou, era na sega ni tamusuki sobu ka biu ki na bukawaqa, raica era na tu ena siga ko ya.
Ia ena qai soli vei ira ko vuravura me nodra ivotavota vakawa; a ra na tubu me lewe levu ka kaukauwa mai, era na tubu cake ka sega ni ivalavala ca ko ira na luvedra, io era na rawata na veivakabulai.
“‘Raica ena tiko ena kedra maliwa na Turaga, ka na serauni ira na nona iukuuku, io ena nodra tui ka nodra daunilewa’ (Vunau kei na Veiyalayalati 45:57–59).”10
Ena noda vakavakarau ni iKarua ni Lesumai i Jisu Karisito, au solia e dua na itukutuku bibi ka veivakacegui vei ira na vakabauta mai na parofita o Emosi ena Veiyalayalati Makawa: “E dina, ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.”11
Ena yalo vata oqo, na parofita ni Turaga ki vei vuravura, Peresitedi Russell M. Nelson, e sa solia wale tikoga oqo edua na ivakasala vakalou: “Na kosipeli i Jisu Karisito e kosipeli ni veivutuni. Ena vuku ni Veisorovaki ni iVakabula, sa vakarautaka na Nona kosipeli na veisureti meda sa veisau, tubu, ka caka dodonu vakalevu tikoga. E sa kosipeli ni vakanuinui, ni veivakabulai, kei na toro cake. Vakakina, na kosipeli sa itukutuku ni reki! Sa reki na yaloda ena veikalawa lailai eliu eda taura.”12
Au sega ni vakatitiqataka na noqu vakadinadinataka na bula dina ni Kalou kei na nona caka mana ena noda bula e veisiga na tamata mai na ituvaki lailai sara ki na ituvaki cecere ni bula. E dina, e vuqa na veika tabu e lakocurumi e sega ni dau talanoataki, baleta ni ra yavutaki vakalou kei na kena rawa ni vakasewasewani mai vei ira eso era se sega ni kila vakavinaka na dina.
Ena ituvaki oqo, na iotioti ni parofita ena iVola i Momani, o Moronai e vakananuma vei keda:
“Ka’u na vosa tale vei kemudou sa cakitaka na veivakatakila ni Kalou, ka kaya ni sa oti ka sa sega na ivakatakilakila se parofisai, na isolisoli, na veivakabulai, na vosa tani e so kei na vakadewataki ni vosa tani e so;
“Raica, au sa kaya vei kemudou, ko koya sa cakitaka na veika oqo sa sega ni kila na kosipeli i Karisito; io, sa sega ni wilika na ivolanikalou; ia kevaka sa wilika, sa sega ga ni kila na kedra ibalebale.
“Eda sa sega li ni wilika ni sa i koyakoya tiko ga na Kalou ena noa, na siga edaidai ka sega ni mudu, ka sa sega vua na veivukiyaki se na yaloyalo ni veigoleyaki?”13
Au tinia na noqu vosa ena nona parofisai dina ka veivakauqeti na Parofita o Josefa Simici, a solia ena otioti ni nona veiqaravi ni sa vakanamata tiko ena iKarua ni Lesumai i Jisu Karisito: “Me da kakua beka ni tomana tiko na inaki cecere vakaoqo? Mo toso ki liu ka kakua ni suka ki muri. Na yaloqaqa, kemudou na wekaqu [ka, au na okati ira na marama];ka toso tikoga ki liu; ka toso tiko ga ki liu, ki liu ki na qaqa! Me reki na lomamudou, ka marau vakalevu sara.”14 Au tomana kina na noqu ivakadinadina ena yaca i Jisu Karisito, emeni.