Na Veika ni Yaloqu
Na cava eso na ka ko dauvakananuma vakatitobu? Na veika cava beka e rui bibi vei iko? Na cava soti beka na veika ni yalomu?
Kemuni na taciqu kei na ganequ niu mai tu tale oqo ena noda Vel ni Koniferedi lomani, au nanuma lesu na nona vosa na iApositolo ko Pita: “Turaga, sa vinaka na nodatou tiko eke.”1
Na noqu vakanananu nikua e yavu toka ena nona vosa na parofita o Nifai, o koya a maroroya voli na kedra ivolatukutuku na nona tamata ni sa mate oti na Qase ko Liai. A vola o Nifai, “Ia au sa vola ena peleti oqo na veika ni yaloqu.”2
Au dau wilika na veitikina oqo, kau nanuma ni sega soti ni daumaka se vakayalo, sega ni veiraurau vinaka sara kei na malanivosa “ni yaloqu” na vosa na veika. Ia au sa vulica ni vosa veika e vakayagataki vaka 2,354 ena ivolanikalou.3 Dua na ivakaraitaki ena Mosese: “Koi Au na iVakatekivu kei na iVakataotioti, na Kalou Kaukauwa; mai Vua na Noqu Le Dauabau Ga Au sa bulia kina na veika oqo.”4 Kei na vosa i Nifai: “Raica, sa dau rekitaka na yaloqu na veika ni Turaga; ka sa dau vakananuma tiko ga na lomaqu na veika au sa raica ka rogoca.”5.
Na vosa nei Nifai e vakavurea na taro eso “Na veika cava beka o dau vakananuma?” “Na veika cava beka e rui bibi vei iko?” “Na cava soti beka na veika ni yalomu?”
Na veika ni yaloda e vakavuqa ni dau vakamatatataki ka vakatitobutaki ni da taro.
Ena gauna ni matetaka au sotavi ira na itabagone mai na veiyasai vuravura ena vuqa na lotu, lelevu kei na ka lalai, ena kakaburaki kei na tabana ni itukutuku vakaveimaliwai, ka keimami veivosakitaka na nodra taro.
A tiko e dua na taro e vuniyaloi Josefa Simici yabaki tinikava, ka kauta vua na Turaga. Sa dau vakabibitaka o Peresitedi Russell M. Nelson: “Kauta na nomu taro vua na Turaga kei na ivurevure yalodina tale eso. Vuli ena gagadre mo vakabauta sega ni nuitaka mo kunea e dua na cicila ena nona bula na parofita se dua na luluqa ena ivolanikalou. Kakua ni tosoya nomu vakatitiqa ena nomu cakava tiko vata kei ira na dauvakatitiqa. Vakatara me liutaki iko ena nomu ilakolako ni vakadidike vakayalo.”6
Wasoma nodra dau tarogi na itabagone se cava au vakabauta kei na vuna au vakabauta kina.
Au nanuma noqu sikova e dua na goneyalewa ena nona vale. Au taroga kevaka e imatai ni gauna me curu yani kina i nodratou e dua na iApositolo. E matadredre mai ka sauma, “Io.” Totoka nona tarogi au: “Na cava na veika bibi e dodonu meu kila?”
Au sauma ena “veika ni yaloqu,” na veika e vakarautaki au meu rogoca na uqe, ka laveta noqu rai mai na veika ni vuravura, ka solia na inaki ni noqu cakacaka ena kosipeli kei na noqu bula sara ga.
Meu wasea mada eso na veika ni yaloqu? Na veika oqo e baleti ira kece era segata me ra tisaipeli dina i Jisu Karisito. Vinaka na tini, e naba taucoko. Nikua au na solia vei kemuni e vitu ena vakanuinui ni o ni qai vakacavara na walu, ciwa, kei na tini mai na veika o ni sa sotava.
iMatai, lomana na Kalou na Tamada kei Jisu Karisito, noda iVakabula.
A vakatauca ko Jisu na imatai ni ivakaro cecere: “Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega.”7
Sa vakadeitaka o Peresitedi Nelson na nona yalodina vua na Kalou, na Tamada Tawamudu, kei na Luvena o Jisu Karisito, ena gauna a kacivi kina me liutaka na Lotu, ena nona kaya, “Au kilai Rau, lomani Rau, kau yalataka niu na qaravi Rau—kei kemuni—ena vo taucoko ni igu ena noqu bula.”8
O koya taumada, lomana na Tamada kei na Luvena.
iKarua, “Lomana na wekamu.”9
Oqori e sega walega ni dua na vakasama vinaka; sai koya na ikarua ni ivunau levu. Na wekamu sai koya na watimu kei na matavuvale, lewe ni tabanalevu, itokani vakacakacaka, rumu vata, o ira eda sega ni vakabauta vata, o ira era gadreva tu na veivuke, kei, vakadodonu sara, na tamata kecega. Na ibalebale ni “lomana na wekamu” e vakavoqataki ena sere ni lotu “Dou Veilomani.”10
E vakananuma vei keda o Peresitedi Nelson, “Ni da lomana na Kalou e yaloda taucoko, ena vagoleya o Koya na yaloda ki na nodra tiko vinaka na tani.”11
iKatolu, loomani iko.
Qo na vanua era leqa kina e levu. E sega beka ni da dau liaca ni dredre cake na lomani keda vakataki keda mai na lomani ira na tani? Ia, na Turaga e kaya, “Lomana na wekamu me vaka na nomu lomani iko.”12 E vakabibitaka o Koya na vakalou e tu vei keda; ka sa dodonu vakakina vei keda. Ni da bikai ena icolacola bibi ni cala, mosi ni yalo, yalolailai, rarawa, cudru, se ivalavala ca, na mana ni Veisorovaki ni iVakabula, ena lewa vakalou, e dua na ka ena laveta na yalo.
iKava, maroroya na vunau.
Sa vakamatatataka na Turaga: “Kevaka dou lomani au, muria na noqu ivunau.”13 Segata e veisiga me vinaka cake vakalailai nomu bula kei na nomu cakacaka ka toso tiko ki liu ena buladodonu.
iKalima, dau kilikili e veigauna mo curuma na valetabu.
Au vakatoka meu vakaturi vua na Turaga. E rawarawa ni o yaco ki na dua na valetabu se sega, ni o kilikili me tu vei iko e dua na ivolatara ni valetabu ena vakataudeitaki iko tiko ena veika e bibi, na salatu ni veiyalayalati.
iKaono, yaloreki ka mamarau.
“O koya mo dou marau kina ka kakua ni rere,”14 sa kaya na Turaga. Baleta na cava? Vakacava, ni da sa bolei ena ilesu kecega? Baleta na yalayala a vakayacora ko Jisu Karisito: “Niu sa tiko vata kei kemudou koi au na Turaga, kau na tu e yasamudou.”15
E vakamacalataka o Peresitedi Nelson na kosipeli vakalesui mai me “dua na itukutuku ni reki!”16 “Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula.”17
iKavitu, muria na nona parofita bula na Kalou.
E ikavitu beka ena noqu ituvatuva ni veika oqo, ia e toka sara ga e cake ena noqu vakasama me baleta na kena bibi nikua.
E tiko e dua na parofita ni Kalou e vuravura nikua! Kakua ni vakawalena na kena ibalebale oya vei iko. Nanuma tiko na goneyalewa au a cavuta tiko ena ivakatekivu. A vinakata me kila na veika e bibi duadua. “Muria na parofita bula,” Au a kaya ena gauna oya kau vakabibitaka tale nikua.
Eda kilai tani ni dua na Lotu me liutaki mai vua e dua na parofita, daurairai, ka dauvakatakila e kacivi ira na Kalou ena gauna oqo. Au yalataka ni o rogoca ka muria na nodra ivakasala, ena sega vakadua ni o vagolei tani. Sega vakadua!
Eda bula tiko ena dua na gauna eda sa “veitosoyaki ka veikauyaki,”18 sa bololaki tiko kina vakalevu na veika vakayalo, na bula dodonu, bula dokai, kei na veidokai. Sa dodonu me da digidigi. Sa tu vei keda na domo ni Turaga mai vua na Nona parofita me vakaruruya noda rere ka laveta na noda rai, ni vosa o Peresitedi Nelson, e vosa ena vuku ni Turaga.
Eda sa vakalougatataki tu ena ivolanikalou kei na ivakavuvuli ka vakananuma vei keda, “Ni sa duatani na noqu vakanananu ka duatani na nomudou vakanananu, ka sa duatani na noqu ivalavala ka duatani na nomudou ivalavala, sa kaya ko Jiova.”19
A vakakina vei Nemani, e dua na iliuliu levu vakaivalu e Siria, ia e tauvi vukavuka tu, ka tukuni vua ni rawa ni vakabulai koya na parofita ko Ilaisa. A kaya o Ilaisa vua na nona tamata me tukuna vei Neamani me laki sili vakavitu ena uciwai na Joritani, ka na vakabulai. A vosa kudrukudru o Nemani. E tiko dina e dua na uciwai kaukauwa cake mai na Joritani, kei na cava me talai ga mai kina e dua na dauveiqaravi ni namaka tiko, o Ilaisa, sara ga na parofita me mai vakabulai koya? A vuki ka gole tani yani ko Neamani, ia era a mani qai veisautaka na yalona na dauveiqaravi: “Kevaka ka vakarota vei kemuni e dua na ka levu na parofita, ko na sega li ni cakava?”20 A qai mani lai sili vakavitu o Nemani ena Joritani ka bula.
Na italanoa kei Nemani e vakananuma vei keda na rerevaki ni noda vakadigia ga na veitiki ni ivakasala vakaparofita e veisotari kei na noda vakasama, nanamaki, se na veika sa matau tu nikua. Na noda parofita sa dusi keda tikoga ki na noda dui Joritani me da vakabulai kina.
Na vosa bibi duadua eda rawa ni rogoca, vakananuma, ka muria sai koya e vakatakilai mai vua na noda parofita bula. Au vakadinadinataka niu sa dau dabe vata ena veivakasalataki vata kei Peresitedi Nelson me veivosakitaka eso na ka bibi ni Lotu kei na ka ni vuravura, kau sa raica na kena drodro mai vua na ivakatakila. E kila o koya na Turaga, e kila na Nona sala, ka gadreva o ira kece na luvena na Kalou me ra rogoci Koya, na Turaga o Jisu Karisito.
Ena vuqa na yabaki eda sa rogoca tiko mai kina na Parofita me vakarua e veiyabaki ena koniferedi raraba. Ia ena veika dredre eso ni noda gauna, sa dau vosa tiko vakalevu o Peresitedi Nelson ena veimatabose,21 tabana vakaitukutuku raraba,22 lotu,23 vei ira sara mada ga na dau volaitukutuku.24 Au sa dau dikevi koya ni vakarautaka ka cavuta na itukutuku ni vakavure ivakatakila ka sa vakatubura na vakavinavinaka, ka vakavuna nodra oka mai na tacida kei na ganeda e vuravura, kei na sautu, inuinui, reki, bula vinaka, kei na veivakabulai levu cake ena noda dui bula yadua.
O Peresitedi Nelson e kenadau ena veivosaki, ia e bibi duadua, o koya na parofita ni Kalou. Totoka oya ni o vakasamataka, ia e bibi sara mo raica ni nona veidusimaki matata ena viribaiti keda mai na ilawaki, ivadi qaseqase, kei na veisala vakavuravura sa kaukauwa cake tikoga mai e vuravura nikua.25
Na ilesilesi vakaparofita sa baleta kecega na ivakatakila. “Na Vakalesui mai ni Taucoko ni Kosipeli i Jisu Karisito: E Dua na iTukutuku vaka-Ruanadrau na Yabaki ki Vuravura,” ka a soli ena koniferedi raraba ni Epereli 2020, sa vakadeitaka ni sa liutaka tiko na Turaga na cakacaka oqo. Ena itukutuku oqo, eratou tukuna kina na Mataveiliutaki Taumada kei na Kuoramu ni iApositolo Le Tinikarua: “Keitou cavuta ena yalomarau ni sa toso tiko ki liu na Veivakalesuimai yalataki ena ivakatakila tomani tikoga mai. Ena sega tale ni tautauvata na vuravura, ni Kalou sa “soqona vata na ka kecega vei Karisito’ (Efeso 1:10).”26
“Soqona vata na ka kecega vei Karisito”27 kei na “veika ni yaloqu”28 sai ira na veika kecega e baleta na Lotu, kosipeli, kei ira na tamata oqo.
Au tinia ena veisureti vei kemuni yadua mo ni vakasamataka na vitu na “veika ni yaloqu” au sa wasea nikua: lomana na Kalou na Tamada kei Jisu Karisito, na noda iVakabula; lomana na wekamu; lomani iko; muria na ivunau; mo kilikili kaya tikoga e dua na ivolatara ni valetabu, mo yaloreki ka mamarau; ka muria na parofita bula ni Kalou. Au sureti kemuni mo ni raica na nomuni kena ika walu, ciwa, kei na tini. Vakasamataka na sala mo wasea kina na nomu “veika” ni yalomu vei ira tale eso ka vakayaloqaqataki ira me ra masu, vakananuma vakatitobu, ka kerea na veituberi ni Turaga.
Na “veika ni yaloqu” era sa vakamareqeti sara vei au me vaka ga na nomu vei iko. Na veika oqo e vaqaqacotaka na noda veiqaravi ena Lotu kei na veiyasa kece ni bula. Era kauti keda vei Jisu Karisito, era vakananuma vei keda na noda veiyalayalati, ka ra vukei keda me da vakila na veitaqomaki ena liga ni Turaga. Au vakadinadinataka ni gadreva o Koya me “sega ni viakana se viagunu na yalona, ia ena vakasinaiti” na yaloda29 ena Nona loloma ni da segata me da Nona tisaipeli dina, me da duabau kei Koya me vakataki Rau kei Tamana. Ena yacai Jisu Karisito, emeni.