Veika e Vakacilavi mai na ika 191 ni Koniferedi Raraba Vakayabaki

Eda sa veisau ni da bulataka na dina ni kosipeli eda vulica. E a wasea o Russell M. Nelson na itukutuku dina ka vakaibalebale oya me dolavi ka sogoti kina na koniferedi raraba.

“Na ivunau savasava i Karisito e kaukauwa,” a kaya ena nona vosa idola. E veisautaka na bula ni tamata yadua e kila vinaka ka vakasaqara me vakayagataka ena nona bula. Ena siga ka tarava, ena iotioti ni nona vosa, e a kaya: “Eda sa vakavulici vinaka sara. … Ia na taro ena gauna oqo, eda na duatani vakacava ena vuku ni veika eda sa rogoca ka vakila?”

Ena maliwa ni vuqa na lesoni bibi e a vakavulici ena koniferedi raraba oqo:

Eda vulica ni sa kena gauna oqo me da vakayagataka na ivakarau cecere me da vakaqaqacotaka kina na noda yavu vakayalo yadua (raica na Peresitedi Nelson ena tabana e 93).
Eda vulica me baleta na bibi ni bula vakatisaipeli ka vakakina na kena rawarawa (raica na Peresitedi M. Russell Ballard ena tabana e 51, Elder Dieter F. Uchtdorf ena tabana e 77, kei Elder Gary E. Stevenson ena tabana e 47).
Eda vulica na vuna eda gadreva kina na Lotu ka rawa ni da vakayacora e levu na ka me da vakalougatataki ira kina na tani ni da cakacaka vata (raica na Peresitedi Dallin H. Oaks ena tabana e 24, Bisopi L. Todd Budge ena tabana e 100, Bonnie H. Cordon ena tabana e 10, kei na Sharon Eubank ena tabana e 53).
Eda vulica ni na rawa ni vukei keda na Kalou dauloloma me da ulabaleta na vei wasewase ka tarovi keda me da yaco me da duabau (raica na Elder Jeffrey R. Holland ena tabana e 8, Elder D. Todd Christofferson ena tabana e 16, kei Elder Dale G. Renlund ena tabana e 83).
Eda vulica ni rawa ni da sureta na ivakatakila ki na noda bula ena noda soli keda ki na loma ni Turaga kei na kena tarogi na taro e sega ni tiko vei keda na kena isau (raica na Peresitedi Henry B. Eyring ena tabana e 74, Camille N. Johnson ena tabana e 80, kei na Susan H. Porter ena tabana e 33).

Na cava o a rogoca? Na cava o a vakila? O na bulataka vakacava ena nomu bula na dina savasava, ivunau savasava, kei na ivakatakila savasava o na kunea ni o tomana tiko na nomu vulica na itukutuku ni koniferedi raraba?