Na Vakacegu Yadudua ena Veigauna Veibolei
E se sega vakadua ni bibi cake me da vakasaqra na vakacegu yadudua.
Au a lesi wale ga oqo meu laki vakatabuya e dua na tiki kei Nauvoo vakairogorogo. Me tiki ni ilesilesi, au a rawa ni laki sikova na Valeniveivesu e Lipati mai Misuri. Niu raica na valeniveivesu, au vakananuma na veika ka cakava me tiki bibi ni itukutuku ni Lotu. Na nodra bula na Yalododonu e a vakarerei ena vuku ni ivakaro ni veivakarusai ka a solia na kovana kei Misuri. Me kuria, e a vesu tawacala na Parofita o Josefa kei na vica na nona itokani ena Valeniveivesu e Lipati. E dua ve ira na vuna oya na nodra saqati vakaukauwa na noda lewenilotu ni levu vei ira era veisaqasaqa kei na veivakabobulataki.11 Na caudre ni veivakatotogani vei Josefa Simici kei ira na vakamuri koya e taracake kina e dua na ivakaraitaki ni taurivaki vakatawadodonu ni digidigi ka rawa ni tarai ira na tamata dodonu. Na gauna nei Josefa e Valeniveivesu e Lipati e vakaraitaka ni dredre e sega ni ivakadinadina ni cudru ni Kalou se na vakasukai ni Nona veivakalougatataki.
A tarai au vakatitobu niu wilika na ka e a tukuna na Parofita o Josefa Simici ni a vesuki tu mai na Vale ni veivesu mai Lipati: “Oi kemuni na Kalou ko ni sa tiko e vei? Evei na vale ni vakaruru sa ubia na nomuni ivunivuni?”2 A taroga o Josefa se na vakacava na kena dede mera sotava tiko na tamata ni Turaga na “veika rarawa kei na ivalavala tawadodonu.”3
Niu duri tu e loma ni Valeniveivesu e Lipati, e a tarai au vakabibi niu wilika na isaunitaro ni: “Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu; ia, kevaka ko sa vosota rawa, ena vakacerecerei iko cake na Kalou.”4 E matata e kea ni veisaqasaqa e rawa ni vakasavasavataki keda ki na dua na icavacava vakasilesitieli tawamudu.5
Na Nona vosa talei na iVakabula “Ia na luvequ, me vakacegu na yalomu”6 e voqa tu e yaloqu vakai au ka vakaibalebale bibi ki na noda gauna. E veivakananumi vei au ki na Nona ivakavuvuli vei ira na Nona tisaipeli ena Nona veiqaravi e vuravura.
Ni bera ni rarawa mai na Were e Kecisemani na iVakabula kei na kauveilatai, e a veivakaroti o Koya vei iratou na Nona iApositolo mera “veilomani me vaka kau sa lomani kemudou”7 ka a qai vakacegui iratou ena vosa oqo: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”8
E dua na icavuti lomani ni noda Turaga ka iVakabula, ko Jisu Karisito oya na “Tui ni Sautu.”9 Ena yaco me tauyavutaki na Nona matanitu, ka oka kina na vakacegu kei na loloma.10 Eda vakanamata ki na lewa ni yabaki udolu ni Mesaia.
E dina ni tu na rai ni lewa ni udolu na yabaki oqo, eda kila ni sega ni yaco vakalevu na sautu kei na yalovata ena noda gauna.11 Ena gauna ni noqu bula au se sega ni raica vakadua e levu cake na sega ni veidokai. Eda bololaki ena vosa ni cudru ka veisei kei na ivalavala tonotono mata, veivakacacani ka vakarusa na sautu kei na tiko vinaka.
Na sautu e vuravura e sega ni yalataki se vakadeitaki me yacova na iKarua ni Lesumai i Jisu Karisito. E vakavulici ira na Nona iApositolo na iVakabula ni Nona ilesilesi e vuravura sai koya me rawata na vakacegu vakilai raraba. A vakatavuvulitaka, “Dou kakua ni vakasama niu sa kauta mai ki vuravura na veivinakati.”12 Na veivinakati ni vuravura raraba e a sega ni tiki ni veivakalotutaki taumada e vuravura ni iVakabula. Na veivinakati ni vuravura raraba e sega ni tiko e vuravura nikua.
Ia, na vakacegu, yadudua ena rawati e dina ni tu na cudru, veisei, kei na tatawasewase e vakabutotaka ka vakaduka na noda vuravura nikua. E se sega vakadua ni bibi cake me da vakasaqra na vakacegu yadudua. E dua na serenilotu vou lomani ka totoka ka volai baleti ira na itabagone nikua mai vei Brother Nik Day e vakatokai na “Peace in Christ” e cauraka, “Ni sa sega na vakacegu e vuravura, sa tu na vakacegu vei Karisito.”13 Eda vakakalougatataki ni sa tu na serenilotu oqo ni se bera na matedewa na COVID-19.
Na serenlotu oqo e rokataka ena kena ivalavala totoka na lalawa baleta na veivinakati ka vakadreta vakamatau na veivinakati e dabe ena bula kei na veiqaravi nei Jisu Karisito. A cauraka o Peresitedi Joseph F. Smith, “Ena sega ni lako mai ki vuravura na yalo ni veivinakati kei na veilomani … me yacova ni ra sa ciqoma na tamata kece sara na dina ni Kalou kei na itukutuku mai vua na Kalou … , ka vakadinadinataka na Nona kilaka kei na lewa ni sa ka vakalou.”14
Eda na sega ni vakasuka mai na noda igu me rawati na veivinakati ni vuravura raraba, eda sa vakadeitaki ni da na rawata na vakacegu yadudua me vaka a vakatavulica o Karisito. Na ivakavuvuli oqo e vakamatatataki tu ena Vunau kei na Veiyalayalat: “Mo dou kila ni ko koya sa vakayacora tiko vakadodonu na nona itavi ena rawata vakaidina na kena isau, io ena kune vakacegu ena bula oqo ka rawata na bula tawamudu ena bula sa bera mai.”15
Na cava mada eso na “na nona itavi” ka na vukei keda me da walia na veiba ka vakalailaitaka na veisei ka kunea na veivinakati ena vuravura oqo. Na ivakavuvuli kece nei Karisito e dusi kece tu ki na vanua oqo. Meu tukuna mada e vica kau nanuma ni bibi sara.
A imatai: Lomana na Kalou, Bulataka Nona iVunau, ka Vosota na Tamata kecega
O Peresitedi George Albert Smith e a yaco me Peresitedi ni Lotu ena 1945. A kilai tu okoya ena nona veiyabaki ni iApositolo ni a dua ka dau taleitaka na veivinakati. Ena 15 na yabaki ni bera ni yaco me peresitedi, na bolebole kei na dredre ni lutu levu vakailavo ni vuraura, ka muria na mate kei na veivakarusai ni iKarua Valu Levu e Vuravura ,e sega ni veisaututaki.
Ni mai cava na iKarua ni iValu Levu, ena imatai ni nona koniferedi raraba vaka peresitedi ena Okotova ni 1945, e a veivakananumi kina o Peresitedi Smith ve ira na Yalododonu ena veisureti ni iVakabula me lomana na wekana ka vosoti ira na nodra meca ka vakatavulica, “Ni oqo na yalo me vakasaqara me taukena na Yalododonu Edaidai taucoko kevaka era nuitaka me dua na siga me ra tucake e Nona iserau ka ciqoma e ligana na kidavaki lagilagi ki vale.”16
A ikarua: Vakasaqara na Vua ni Yalo
Na iApositolo ena nona ivola vei ira na kai Kalatia e virikotora kina na duidui e tiko ena cakacaka ni dodonu ka da na rawata kina meda taukena na matanitu ni Kalou kei na cakacaka ka rawa, kevaka e sega ni veivutunitaki, ni vakuwai keda. Vei ira ena vakacurumi keda sai ira na vua ni yalo, “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei] na ivalavala malua.”17 E wilika kina o Paula na veivuketaki ni noda icolacola kei na sega ni oca ni caka-vinaka.18 Ena kedra maliwa oqo ka ra sega ni dodonu e okata okoya na dauveileti, na daucudrucudru, kei na dauveiba.19
E dua vei ira na lesoni lelevu ena gauna ni veiyalayalati makawa e tukuni Tamada o Eparaama. O Eparaama kei Loti, na wekana, erau sa vutuniyau, ia erau sega ni rawa ni tiko vata. Me kauta tani na veiba e a vakatara o Eparaama me digia o Loti na vanua e vinakata. A digia o Loti na buca mai na Joritani, ka vakawai vinaka ka totoka. A taura o Eparaama buca sega so ni bulabula mai Mamire. E tukuna ivolanikalou ni a qai birika na nona valelaca o Eparaama ka cakava “e dua na icabocabo ni soro vei Jiova.”20 Ko Loti, e yasa kadua e a, “birika na nona valelaca vaka ki Sotoma.”21 Na lesoni e sa matata ni dodonu me da yalorawarawa me lomasoli ka kauta tani na veiba baleta na veika ka sega ni oka kina na yalododonu me tiko kina veiwekani malumu. Me vaka e a vakatavulica na Tui o Penijamini, “Ka na sega vei kemuni na nanuma mo ni veivakacacani, ia mo ni tiko veilomani.”22 Ia ena ivakarau ka bale ki na ivalavala dodonu kei na ivakavuvuli bibi sara, e gadrevi meda duri vakamatau ka tudei.
Kevaka eda vinakata me noda na veivinakati ka isau ni cakacaka dodonu, eda na sega ni birika na noda valelaca vaka ki vuravura. Eda na birika na noda valelaca vaka ki na valetabu.
A ikatolu: Vakayagataka na Galala mo Digitaka na iValavaladodonu
Na veivinakati kei na digidigi e veicurumaki me tiki bibi ni ituvatuva ni veivakabulai. Me vaka e vakamacalataki ena ulutaga vakosipeli ena “Galala ni digidigi kei na Vauci me savasava,” na “Galala ni digidigi sai koya na rawata kei na dodonu e solia vei keda na Kalou me da digidigi ka cakacaka vakai keda.”23 Koya gona, na galala ni digidigi e tu ena uto ni tubu kei na ka sotavi yadudua ena vakalougatataki keda ni da muria tiko na iVakabula.24
Na galala ni digidigi e a dua na leqa e liu mai na “Matabose taumada mai Lomalagi” kei na veivala vei ira na digitaka mera muri Karisito kei ira na dau vakamuri Setani.25 Na noda laiva yani na dokadoka kei na tautauri ka digia na iVakabula ena vakatara me noda na Nona rarama kei na Nona vakacegu. Ia na vakacegu yadudua ena bolei ni ra taurivaka na tamata na nodra galala ni digidiigi me vu ni mavoa kei na mosi.
Au yalodei ena veivakadeitaki ni vakacegu eda a vakila e yaloda e a vaqaqacotaki mai na kilaka e tu vei keda ena ka ena rawata na iVakabula kei vuravura ena vukuda. E totoka na kena virikotori oqo ena Vunautaka na Noqu Kosipeli“Ni da vakararavi tiko ki na Veisorovaki i Jisu Karisito, e rawa vei Koya me vukei keda meda vosota na noda vakatovolei, tauvimate, kei na mosi. E rawa ni da vakasinaiti ena reki, vakacegu, kei na veivinakati. Na veika taucoko sara e cala me baleta na bula e rawa me vakadodonutaki mai na Veisorovaki i Jisu Karisito.”26
A ikava: Tarai Saioni cake ena Yalomu kei na nomu Vale
Eda sa luve ni Kalou ka tiki ni Nona matavuvale. Eda sa tiki talega ni matavuvale ka da a sucu kina. Na isoqosoqo ni matavuvale e waivure ruarua ni mamarau kei na vakacegu. A vakatavulici keda o Peresitedi Russell M. Nelson, ka da vulica ena loma ni matedewa oqo, ni na qaravi lotu ka dabe e vale ka tokoni mai na Lotu e rawa ni “sereka na kaukauwa ni matavuvale … me veisautaka na [noda] [vei]vale ki na ivakaruru ni vakabauta.”27 Kevaka e noda qaravi lotu oqo ena noda veivale, ena noda talega na vakacegu ni iVakabula.28 Keitou sa kila ni levu vei kemuni e sega ni nomuni na veivakalougatataki ni veivale dodonu ka dau veiqati wasoma kei ira na digia na tawadodonu. Na iVakabula e rawa ni vakarautaka na taqomaki kei na vakacegu me tuberi kemuni yani ki na taqomaki kei na vakaruru mai na cava ni bula.
Au vakadeitaka vei kemuni ni marau, loloma kei na vakasinaiti ka kunei ena matavuvale dodonu ka lomani e vakatubura ruarua na vakacegu kei na mamarau. Na loloma kei na lomavinaka e tu ena uto ni taukeni ko Saioni e lomada kei na noda vale.29
A ikalima: Muria na iVakaro Oqo ni Noda Parofita
Na noda vakacegu ena vakavinakataki vakalevu ni da muria na parofita ni Turaga, o Peresitedi Russell M. Nelson. Ena vakalekaleka walega oqo ena tu vei keda na madigi meda rogoci koya . A vakarautaki mai na tauyavutaki ni vuravura ki na veikacivi oqo. Na nona vakavakarau yadudua e ka vakasakiti.30
E sa vakatavulici keda ni rawa ni da “sotava na vakacegu kei na reki dina, ena gauna saraga ni veilecayaki”31ni da segata me da vaka na noda iVakabula, o Jisu Karisito. A vakasalataki keda meda veivutuni e veisiga, me da na ciqoma na veivakasavasavataki, veivakabulai, kei na veivakaukauwataki mana ni Turaga.32 Au sa dua na ivakadinadina yadudua ni sa ciqomi ka tomani tiko na kena mai lomalagi mai vua na noda parofita lomani.
Ni da doka ka tokoni koya ni noda parofita, eda qarava na Tamada Vakalomalagi kei na noda iVakabula o Jisu Karisito. Eda qaravi tiko mai na Yalo Tabu.
Au vakadinadinataka ka solia na noqu ivakadinadina yadudua vaka iApositolo ni ko Jisu Karisito sa iVakabula ka Dauveivueti kei vuravura, e liutaka ka tubera na Nona Lotu vakalesui mai. Na Nona bula kei na ilesilesi ni veisorovaki e ivurevure dina ni vakacegu. O Koya na Tui ni Sautu. Sa noqu ivakadinadina dei ka bibi oqo ni sa bula tiko o Koya. Ena yacai Jisu Karisito, emeni.