Dulaka Cake Na Nomuni Rarama
Na noqu veisureti nikua e rawarawa walega: wasea na kosipeli. Tu vakai iko ka dulaka cake na rarama.
Ena dua na ilakolako ena waqavuka ki Peru ena vica na yabaki sa oti, au a dabe tikiva toka e dua na tamata tawa-vakabauta ena dua na vuka. A taroga o koya se cava au vakabauta kina na Kalou. Ena veitalanoa taleitaki tarava, au a tukuna vua niu vakabauta na Kalou baleta o Josefa Simici ea raici Koya—kau tukuna vua ni noqu kila na Kalou a lako mai na veika au a sotava dina vakayalo, vakai au. Au a wasea na noqu vakabauta ni “veika kece sa vakaraitaka ni dua na Kalou”1 ka taroga se kila beka o koya a tauyavu vakacava na vuravura—na ivurevure oqo ni bula ena loma ni maliwalala. A sauma mai o koya ena nona vosa, ni, “na vakacalaka” e a rawa ni yaco ena loma ni veitaba milioni na yabaki. Ni’u vakamacalataka ni sa bau dredre sara me dua na “vakacalaka” me bulia rawa e dua na ituvaki totoka ka matau sara, a vakadigagalu vakalailai o koya ka qai kaya mai ena yalovinaka, “Ko sa rawati au.” Au a tarogi koya se na via wilika na iVola i Momani. A makutu o koya, au mani vakauta vua e dua na ilavelave.
Vica na yabaki e muri au a sotava e dua na itokani vou ena dua na rara-ni-waqavuka e Lagos, Nigeria. Keirau a veikilai ni vakadigova tiko o koya na noqu pasipote. Au a vakatarogi koya me baleta na nona vakabauta vakalotu, ka mani vakaraitaka mai na nona vakabauta dei na Kalou. Au a wasea na reki kei na bulabula ni kosipeli vakalesuimai i Jisu Karisito ka taroga kevaka ena via vulica vakalevu cake o koya mai vei ira na daukaulotu. A vakaio okoya, ka vakavulici, ka papitaiso sara. Oti e dua se rua na yabaki, ni’u a taubale tiko ena rara-ni-waqavuka e Liberia, au a rogoca e dua na domo ni kaciva mai na yacaqu. Au vuki yani, ka a torovi au mai na cauravou vata ga oya ena dua na matamamarau sara. Keirau a veimokoti ena reki ka tukuna vei au o koya ni sa bulabula tiko ena Lotu ka cakacaka tiko kei ira na daukaulotu me vakavulici nona itau yalewa.
Au sega mada ni kila se a qai wilika rawa na iVola i Momani se lewena na Lotu na noqu itokani tawa-vakabauta. Na noqu ikarua ni tokani a vakayacora vakakina. Vei rau ruarua, na noqu itavi2—noqu madigi—e a tautauvata ga: meu dulaka cake na rarama ni kosipeli—meu lomana, wasea, ka sureta ena dua na sala donu, ka matau.3
Kemuni na taciqu kei na ganequ, au sa vakila oti na veivakalougatataki eso ni kena wasei na kosipeli, ka ra sa vakasakiti. Oqo e vica vei ira:
Na Wasei ni Kosipeli e Kauta Mai na Reki kei na Nuinui
O iko kei au daru kila ni da a bula tu vaka luvena na Tamada Vakalomalagi ni bera ni da lako mai ki na vuravura oqo4 ka ni a buli na vuravura ena inaki me solia na madigi ki na tamata yadua me taukena e dua na yago, bulataka na bula oqo, vuli, ka tubu me rawa kina ni ciqoma na bula tawamudu—na bula va‑Kalou.5 Sa kila tu na Tamada Vakalomalagi ni da na rarawa ka ivalavala ca e vuravura, ka tala mai kina na Luvena, o koya ena “nona loloma tawayalani”6 kei na solibula veisorovaki7 sa rawa kina vei keda me da vosoti, vakabulai, ka vakataucokotaki.8
Me da kila na vei dina oqo e veisautaka na bula! Ni sa vulica e dua na tamata na inaki lagilagi ni bula, ka yaco me kila ni dau vosoti ka vukei ira era muri Koya o Karisito, ka digitaka me muri Karisito ki na wai ni veipapitaisotaki, e dau veisau na bula me vinaka cake—ni sega sara mada ga ni dau vakakina na ituvaki ni bula eso.
A tukuna vei au e dua na marama mamarau au a sotava e Onitsha, Nigeria, ni gauna ga a vulica kina na kosipeli ka papitaiso sara, “Sa vinaka vei au na veika kecega. Au sa marau sara ga. Au sa tu e lomalagi.”9 Na wasei ni kosipeli e dau vakacaudreva na reki kei na inuinui ki na yalodrau ruarua o koya e solia kei koya e ciqoma. E ka dina ni na, “vuabale sara na nomu marau”10 ni o wasea na kosipeli! Na wasei ni kosipeli e sa reki ena reki, inuinui ena inuinui.11
Na Wasei ni Kosipeli e Kauta Mai na Kaukauwa ni Kalou ki na Noda Bula
Ena gauna ni noda papitaiso, eda a cakava yadua edua na veiyalayalati12 tudei kei na Kalou “mo dou qaravi Koya ka muria na Nona ivunau,”13 ka oka kina “mo dou tu ka vakadinadinatak[i] [Koya] ena veigauna kecega kei na veika kecega, kei na veivanua kecega.”14 Ni da “tu vei” Koya ena maroroi ni veiyalayalati oqo, na kaukauwa veivakabulabulataki, veitokoni, veivakasavasavataki vakalou ena drodrova noda bula mai vei Karisito, me vaka sa vakani e dua na tabana mai na vaini.15
Na Wasei ni Kosipeli e Taqomaki Keda mai na Veitemaki
E sa vakarota na Turaga:
“Dulaka cake na nomuni rarama me cilavi vuravura. Raica sai Au ga na rarama mo ni dulaka cake—me vaka ko ni sa raica ni’u a kitaka. …
“… Au a vakaroti kemuni … mo ni lako mai vei au, ka mo ni tara ka raica; ia mo ni kitaka tale ga vakakina vei ira na kai vuravura; ia ko koya sa sega ni muria na ivakaro oqo, sa vakatara me kau ki na veitemaki.”16
Na noda digitaka me da kua ni dulaka cake na rarama ni kosipeli e tosoi keda ki na butobuto, ka da na rawai cake kina ena veitemaki. Ia e bibi, ni kena i sa e dina: na noda digitaka me da dulaka cake na rarama ni kosipeli e tosoi keda voleka yani ki na rarama oya kei na veitaqomaki e vakarautaka mai na veitemaki. Sa qai dua dina na veivakalougatataki cecere oqo ena vuravura edaidai!
Na Wasei ni Kosipeli e Kauta Mai na Veivakabulai
A ciqoma na veisureti o Sister Tiffany Myloan me tokoni ira na daukaulotu dina ga ni sotava na dredre bibi eso vakai koya, oka kina nona lomatarotaro ena vuku ni nona vakabauta. E tukuna o koya na nodra tokoni na daukaulotu e sa vakavouia na nona vakabauta kei na ituvaki ni tiko vinaka. E kaya ena nona vosa, “Na cakacaka ni kaulotu e sa rui veivakabulai sara.”17
Reki. iNuinui. Kaukauwa veitokoni mai Vua na Kalou. Veitaqomaki mai na veitemaki. Veivakabulai. Na ka kece oqo—ka so tale (oka kina na veivosoti ni ivalavala ca)18—ena drodro mai ki yaloda vaka veivakalougatataki mai lomalagi ni da wasea na kosipeli.
Na Noda Madigi Cecere Oqo
Taciqu kei na ganequ, “era sa lewe vuqa … ena kedra maliwa … na ilawalawa, [matatamata,] kei na veimatalotu … era sa sega ga ni kila rawa na ka dina ni ra sa sega ni kila na vanua me ra vakasaqara kina.”19 Na gadrevi ni kena dulaki cake na noda rarama e se sega vakadua ni cecere cake ena itukutuku makawa kece vakatamata. Ka sa tu vakalevu cake, vakarawarawa na dina.
E dua ka a susugi ena lotu Buddhist o Jimmy Ton, a vakurabuitaki mai na dua na matavuvale ka wasea nodratou bula ena YouTube. Ni qai kila o koya ni ratou lewena Na Lotu i Jisu Karisito ni Yalododonu Edaidai, a vulica sara na kosipeli vakataki koya ena initaneti, wilika na iVola i Momani ena app, ka papitaiso sara ni sota oti kei ira na daukaulotu ena vuli torocake.20 Sa dua tu na daukaulotu tudei o Elder Ton.
O koya kei ira nona itokani daukaulotu e vuravura raraba era sa mataivalu ni Turaga—me vaka e tukuna na noda parofita.21 O ira na daukaulotu oqo era vukica na ivakarau ni vuravura: dina ga ni macala ni vakadidike eso vaka Gen Z e sa vuki tani tiko mai vua na Kalou,22 o ira noda itabagone qaqa23 elda kei na sisita era sa vukici ira tiko na tamata kivua na Kalou. Ka sa tubu cake tiko na wiliwili ni lewe ni Lotu era duavata tiko kei ira na daukaulotu ena wasei ni kosipeli, ka vukea tiko e vuqa vaka vuqa na itokani me ra lako mai vei Karisito kei na Nona Lotu.
O ira noda lewenilotu Yalododonu Edaidai lomani e Liberia a vukea e 507 na itokani me ra papitaiso ena loma ni 10 na vula a sega tu kina ni dua na daukaulotu tudei me veiqaravi tiko ena nodra vanua. Ni a rogoca e dua noda peresitedi ni iteki taleitaki e Liberia ni ra sa na lesu tiko yani na daukaulotu tudei, a kaya o koya: “O vinaka, oqo era sa na rawa ni vukei keda ena noda cakacaka.”
E dina o koya: na sokumuni Isireli—na inaki cecere duadua e vuravura24—e sa noda ilesilesi vakaveiyalayalati. Ka sa ikoya oqo na noda gauna! Na noqu veisureti nikua e rawarawa walega: wasea na kosipeli. Tu vakai iko ka dulaka cake na rarama. Masuta na veivuke vakalomalagi ka muria na veivakauqeti vakayalo. Wasea nomu bula ena kena ivakarau ka vakamatau, ka sureta e dua tale na tamata me lako mai ka raica, me lako mai ka veivuke, ka me lako mai ka tiko.25 Ka reki ni o ciqoma kei ira o lomana na veivakalougatataki yalataki.
Au kila ni vukui Karisito sa vunautaki kina na irogorogo vinaka vei ira na yalomalumalumu; ena vukui Karisito sa vakabulai kina o ira sa ramusu na yalodra; ena vukui Karisito sa vunautaki kina na veisereki vei ira na bobula; ka ena vukui Karisito, na vukui Karisito duadua ga, sa soli kina vei ira era sa tagi na isala vakaiukuuku me isosomi ni dravusa.26 Okoya gona sa ka gadrevi sara me tukuni yani me kilai na veika oqo!27
Au vakadinadinataka ni o Jisu Karisito sa vakatekivuna ka sauma talega na noda vakabauta.28 O Koya ena tinia, o Koya ena vakacavara, noda cakacakataka noda vakabauta—se vacava na kena sega ni vinaka sara—ena kena dulaki cake tiko na rarama ni kosipeli. O Koya ena vakayaco cakacaka mana ena noda bula kei na nodra bula o ira kecega e sokumuna o Koya, ni sa Kalou ni caka mana o Koya.29 Ena yaca veivakurabuitaki i Jisu Karisito, emeni.