Lako mai vei Karisito, ka Kua ni Lako Duadua Mai
Nanuma tiko, na gaunisala vinaka duadua me vakavinakataki kina o vuravura sa ikoya me vakarautaki o vuravura me ciqomi Karisito ena noda veisureti mai me muri Koya.
Au qai taura wale ga oqo edua na ivola mai vua e dua na goneyalewa dau taro. A vola o koya, “Au sa tao tu qo. … Au sega ni kila se ocei o au, ia au vakila niu namaka tiko e dua na ka veivakurabuitaki.”
O bau vakila mo vakasaqara edua na ka, vakasamataka ke kilai iko dina na Kalou kei na ituvaki ni nomu bula? Kemuni na itabagone, au vakadinadinataka ni kena isau na io! Sa tiko na ituvatuva ni Turaga baleti keda. E sa vakarau taki iko o Koya me baleta na siga nikua, na gauna oqo, mo qaqa ka tutaka na vinaka ena Nona cakacaka cecere. Keimami gadrevi kemuni! Ena sega ni veivakurabuitaki ke sega o kemuni!
Ena so na gauna vakatabui, na noda parofita lomani, o Peresitedi Russell M. Nelson, e vakananuma vei keda e rua na dina e kune ena yavu ni cakacaka cecere ka veivakurabuitaki.
Neirau dabe vata tiko ena idabedabe kei watiqu, dreta mai na parofita e dua tale na idabedabe, voleka ni veisotari na durui keitou, ka rai vakadodonu sara ina mataqu. Au sega ni kila kevaka e vadugu noqu uto se sa muduka na kena cegu tiko ena gauna e kacivi au kina meu veiqaravi vaka Peresitedi Raraba ni Goneyalewa. E taroga o koya e dua na taro ka se rogo tu ga e yaloqu, “Bonnie, na cava na ka bibi duadua me ra kila na itabagone?”
Au vakasamataka qai sauma, “Me ra kila o cei o ira.”
“IO!” a tukuna cake o koya, “ka me ra kila talega na inaki ni nodra bula.”
Keda iVakatakilakila Vakalou
O iko e dua na luvena vakamareqeti, daulomani na Tamada Vakalomalagi. E lomani iko vakataucoko ko Koya, ka tala mai na Luvena o Jisu Karisito, mai mate ena vukumu kei na vukuqu.1 Na Nona iloloma vei keda na iVakabula e sega ni cala—ena gauna madaga eda lutu kina! E sega ni dua na ka ena tawasei keda mai na loloma ni Kalou.2 Na noda nanuma tiko na loloma oqo e rawa ni biliga tani na veilecayaki kei vuravura koya dau tovolea me vakamalumalumutaka na deivaki ni nomu ituvaki vakalou ka vakamatabokotaka na veika o rawa ni rawata.
Ena dua na koniferedi ni Sakisaki ni Tabagone, au sotava kina e rua na goneyalewa ka lakocuruma tiko na dredre. Erau vakaraitaka ruarua na nodrau dau wilika na veivakalougatataki vakapeteriaki me rau raitaleva kina na loloma ni Turaga kei na na veikaroni vakayadua vei rau. Vaqara na nomu veivakalougatataki vakapeteriaki, qusia vinaka, kevaka e sa kumuni duka, ia wilika vakawasoma. Kevaka e sega ni tiko na nomu, saga me dua—kena gauna totolo. Kakua ni vakaberaberataka na nomu vakasaqara na veika e vinakata na Turaga me tukuna vei iko na veika me baleti iko.
Na Noda iNaki Tawamudu
Na ikarua ni dina o tukuna o Peresitedi Nelson vei keimami na siga oya me da kila na noda inaki. Sa ikoya oqo na noda itavi cecere vakatui.
E vuqa na yabaki sa oti, ni se qai yabaki 5 na luvequ o Tanner, ena imatai ni gauna e qito soka kina. E marau okoya!
Na gauna keitou yaco kina ena vanua ni qito, keitou raica ni nona timi e vakayagataka e dua na duru ni vakacuru polo era vakayagataka na qase—e sega ni ka lailai me rauti ira na yabaki lima.
Na rairai ni qito vaka na sara drama niu sa raici Tanner me taura na itutu ni vakatawana na ilawalawa ni polo. Au kidroa saraga. E kila li o koya na nona itavi ena nona dodonu me taqomaka na nodratou matamata?
Sa tagi na sici, keitou sa wele sara ena qito ka guilecavi Tanner. Vakasaurina na nodratou taura na polo na timi kadua ka sa tekivu me ratou caqeta totolo na polo vua. Au rai yani vei Tanner ena vakanananu ni sa vakarautaki koya tiko ena nona tucake dei me taqomaka na ilawalawa ni polo. Au qai raica e dua na ka au sega ni namaka.
Ena dua na gauna ena loma ni qito, sa wele o Tanner ka tekivu me vakacuruma na ligana mawi ena loma ni lawalawa. Qai cakava talega ena ligana imatau. Ka qai tarava na yavana mawi. Qai otioti na yavana imatau. Sa qai mai cori vinaka tu o Tanner ena lawalawa. E sa guilecava na nona inaki kei na veika a nuitaki vua me cakava.
Dina ni sega ni balavu na nona qito soka o Tanner, na lesoni au vulica mai vua na siga oya e sega ni seyavu. O keda kece e tu na gauna eda dau wele mai na keda inaki ka lako vakababa ena duatale na vanua na noda sasaga. E dua na yaragi kaukauwa nei Setani oya me vakasevai keda ena so na inaki vinaka ena gauna ni gagadre, ka rawa ni vakamatabokotaki keda ka vauci keda tani mai nai naki vinaka duadua—ni cakacaka eda kacivi kina ena vuravura qo.3
Na noda inaki tawamudu sa ikoya me lako mai vei Karisito ka vukei Koya ena Nona cakacaka. E matata vinaka vaka e vakatavulica o Peresitedi Nelson: “Na veigauna eda cakava kina e dua na ka me vukea e dua … mera cakava ka maroroya na nodra veiyalayalati kei na Kalou, eda sa vakasokumuni Isireli tiko.”4 Ni da veiqaravi ena vata ena Nona cakacaka, ena yaco meda kilai ka lomani Koya vakalevu cake.
Eda na tomana tikoga na sasaga me da toro voleka vua na iVakabula ena vakabauta, veivutuni e mareqeti, kei na maroroi ni vakaro. Ni da semati keda vei Koya ena veiyalayalati kei na cakacaka vakalotu, e vakasinaita na noda bula ena nuidei,5 tataqomaki,6 kei na marau tawamudu ka titobu.7
Ni da muri Koya, ena yaco me da raici ira na luvena ena rai Vakalou.8 Lako mai vei Karisito Lako mai, kakua ni lako duadua mai!9
Na kosipeli i Jisu Karisito e sega walega ni vinaka; e dua na ituvatuva bibi vei keda kece. “Ni sa sega ni rawa ni dua tale na sala me rawa kina na veivakabulai, ena vukui Karisito duadua ga.”10 Eda gadrevi Jisu Karisito! O vuravura e gadrevi Jisu Karisito.11
Nanuma tiko, na gaunisala vinaka duadua me vakavinakataki kina o vuravura sa ikoya me vakarautaki o vuravura me ciqomi Karisito ena noda veisureti mai me vakamuri Koya.
E dua na italanoa e kune ena Vola i Momani ni nona tucake tale na iVakabula ka mai tiko voli kei ira na Nifaiti. Ena rawa li ni ko vakasamataka na veisiko oya?
A kacivaka na Karisito ni sa lesu tale vei Tamana, “sa vakarairai yani vei ira na lewevuqa.”12 Raica ni ra sa tagi, e kila o Koya na yalodra e vakamasuti Koya me tiko vata mada vakalailai tale kei ira.
E taroga o Koya: “Sa tiko li e so na nomuni tauvimate? Mo ni kauti ira mai. Sa tiko li eso era sa lokiloki, se mataboko, … ko ira sa didivara, o ira kece ga e tauvimate tu? Dou kauti ira mai kau na vakabulai ira.”13
Ena yalo loloma, e sega ni birika e dua na iyalayala ka kaciva ira kece “era tauvimate tu.” Au taleitaka ni sega ni dua na ka levu se lailai me sega ni vakabula o Jisu Karisito.
E kila o Koya na noda vakararawataki ka kaciva me ra lako Vua na nuiqawaqawa kei na lauqa, na oca, na domodomoqa kei o ira era sega ni rogoci, na galili, se o ira “era tauvimate cava ga.”
O ira kece “era sa lako yani … ; a sa vakabulai ira kece ga ko koya. …
“… O ira kecega e vakabulai ka o ira kece e taucoko tu, era cuva e yavana ka vakarokorokotaki koya.”14
Na veigauna meu wilika kina, au dau vakatarogi au: O cei au na kauta vei Karisito? Ocei o na kauta mai?
E rawa ni da rai wavoliti keda, me vaka a cakava o Jisu, me vakadeitaka ni sega ni da calata e dua ka eda sureti kece meda lako Vua ka kilai Koya?
Au gadreva meu wasea edua na ivakaraitaki ni kena rawarawa. Noqu itokani yabaki 15 o Peyton, a navuca me wilika e lima na tikina ena ivolanikalou ena gauna ni katalau e vesiga, ia e sega ni cakava duadua. A raica tale vakadua, e sureti rau na nona itubutubu o Peyton kei ira na tacina, kei ganena yabaki lima. Na ivakaraitaki lalai oqo e vakatavulici Karisito ena Nona sureti keda me da, “Kauti ira mai.”
Na veisureti ni Turaga oqo e yaco tiko ena siga nikua. Kemuni na goneyalewa kei na cauravou, tekivu nikua, ena veivanua o ni tiko kina—ena nomu vale. E rawa beka ni ko masu ka kerea vua na Tamada Vakalomalagi mo kila na sala e rawa ni ko tokoni rau nomu itubutubu ni rau lako tiko mai vei Karisito? Era gadrevi kemuni me vaka ga ni o gadrevi ira.
Oti qai rai tale vei ira na tacimu, itokani, kei ira na wekamu. O cei ona kauta vei Karisito?
E tukuna na iVakabula, “Raica koi Au na rarama; Au sa biuta vei kemudou e dua na ivakarau mo dou muria.”15 Eda rawa ni vakila na loloma kei na vakacegu ni noda iVakabula ni semati keda Vua me vakabulai na Nona vuvale na Kalou, ni sa yalataka, “Ko koya sa muri au ena sega ni lako ena butobuto, ena tu ga vua na rarama ni bula.”16
Sa dua dina na gauna lagilagi ena noda vakaitavi ena inaki i Karisito!
Io, o kemuni, oni tiko qo baleta e dua na ka veivakurabuitaki. Au tomani Peresitedi Nelson, ka kaya: “Na Turaga e gadrevi iko mo veisautaka na vuravura. Ni ko sa ciqoma ka muria na Lomana baleti iko, o na raica ni ko sa cakava na veika dredre sara!”17
Au vakadinadinataka ni kilai kemuni na Turaga ka kila na kemu ituvaki ka lomani kemuni! Ena duavata, me torocake na Nona inaki me yacova na siga lagilagi ni lesu tale mai na Karisito e vuravura ka kacivi keda yadudua me lako “mai.” Eda na soqoni ena yalo marau, eda dau lako mai vei Karisito, ka sega ni da lako duadua mai. Ena yacai Jisu Karisito, emeni.