Lomani au Tiko na Turaga ena Noqu Veisiga Kecega
Na cava eda dau cakava ni da sotava na dredre? Eda vakila beka na yalo ni vakavinavinaka baleta ni da vakanamata ki na noda veivakalougatataki ka segai ena veika dredre?
Na matetaka levu na COVID-19 e sa bau dua na veivakatovolei kei na bolebole levu eda sotava na luvena na Kalou ena itukutuku ni vuravura. Ena itekivu ni yabaki oqo, au a lako curuma kei na noqu matavuvale lomani eso na veisiga dredre ni bula. E kauta mai na matetaka levu kei na so tale na ka na mate kei na mosi ki na noqu matavuvale ena nodra sa mai takali yani eso na neitou daulomani. E dina ni vakayacori na veiqaravi vakavuniwai, na lolo, kei na masu, ena loma ni lima na macawa, e ratou a mai takosovo na ilati o iratou na taciqu o Charly, ganequ o Suzy, kei na wati ganequ o Jimmy.
Ena so na gauna au dau vakataroga na vuna a tagi kina na iVakabula ni raica na yaluma nei Meri ena mate nei ganena, o Lasarusa, ni kila ni tu Vua na kaukauwa me vakabulai Lasarusa, ka, ena dua na gauna lekaleka oqo sa na vakayagataka na kaukauwa oqo na iVakabula me vueta na Nona itokani mai na mate.1 Au kurabui ena yalololoma ni iVakabula ena vukui Meri; e kila tu o Koya na mosi vakaitamera e vakila tu o Meri ena mate ni ganena, o Lasarusa.
Eda dau vakila na mosi titobu va‘qori ni da sotava na veitawasei leleka va‘qo vata kei ira noda daulomani. E uasivi sara na Nona yalololoma na iVakabula ena vukuda. E sega ni vakacalai keda o Koya ena lekaleka ni noda rai, se ena noda raica vakaiyalayala na noda ilakolako tawamudu. Ia, e yalololoma o Koya ena vuku ni noda rarawa kei na mosi ni yalo.
E rau vinakata na Tamada Vakalomalagi kei na Luvena, o Jisu Karisito, me da rawata na reki.2 E vakatavulica o Peresitedi Russell M.Nelson: “Na reki eda dau vakila e sega soti sara ni baleta na ituvaki ni noda bula ia sa baleta vakatabakidua na veika e vakanamata kina na noda bula. Ni davo na vakanamata ni noda bula ena ituvatuva ni veivakabulai ni Kalou, e rawa ni da vakila na reki veitalia ga na cava e yaco tiko—se sega ni yaco tiko—ena noda bula.”3
Ni‘u a se daukaulotu cauravou, au nanuma na nona a ciqoma e dua na itukutuku veivakayalolailaitaki e dua na daukaulotu vakasakiti au dau qoroya. E rau a mai takali na tinana kei na tacina ena dua na vakacalaka bibi. A soli veivakadonuya na peresitedi ni kaulotu ki vua na daukaulotu me lako ki na veibulu kevaka e gadreva. Ia, ni oti na nona veitalanoa kei tamana ena talevoni, a mani nanuma na daukaulotu oqo me sa tiko ga ka vakaotia na nona kaulotu.
Ena dua na gauna lekaleka e muri, ni keitou veiqaravi vata ena dua na iwasewase, keirau a ciqoma kei noqu itokani e dua na kaci ni veivuke, eso na daubutako e ratou a butakoca na basikeli nei koya na daukaulotu vata ga qo ka ratou vakamavoataki koya ena dua na isele. E rau taubale kei nona itokani ki na valenibula voleka duadua, keirau a sotavi rau kina kei noqu itokani. Ena ilakolako ki valenibula, au a rarawataka voli na veika sa mai yaco vua na daukaulotu oqo. Au vakasamataka ni na yalolailai sara tu ka sa na via lako dina sara ga i vale ni oti na veika rerevaki a sotava ena gauna oqo.
Ia, ni keirau yaco yani ki valenibula, au raica ni davo no na daukaulotu oqo ena nona idavodavo, a waraka tiko me sa kau yani ki na vanua ni veisele—ia a matadredre voli ga. Au vakasamataka, “E rawa vakacava me matadredredre tu ena dua na gauna va‘qo?” Ni vakabulabula tiko mai valenibula a veisoliyaka ena yalo mamarau na ivolalalai eso kei na iVola i Momani vei ira na vuniwai, nasi, kei ira na tauvimate. Ena veivakatovolei mada ga oqori, e a sega ga ni vinakata me lako i vale. Ia, a veiqaravi tikoga me yacova na iotioti ni siga ni nona veiqaravi vakadaukaulotu ena vakabauta, igu, kaukauwa, kei na yalomarau.
Ena itekivu ni iVola i Momani, e tukuna kina o Nifai, “Kau sa raica e vuqa na ka rarawa ena noqu bula, ia, sa lomani au vakalevu sara na Turaga ena noqu bula taucoko”4
Au vakasamataka na levu ni veivakatovolei a sotava o Nifai, e vuqa era tu ena ivola eso a vola. Na nona veivakatovolei e vukea na noda kila ni dui tu kece na noda veisiga dredre. E dua na veivakatovolei oqori a yaco ena gauna a vakaroti kina o Nifai me lesu tale ki Jerusalemi ka lak‘i kauta mai na peleti varasa a tu vei Lepani. Eso vei ratou na tuakai Nifai e lailai na nodratou vakabauta, ka yaco sara me ratou mokuti Nifai ena kau. A sotava e dua tale na veivakatovolei o Nifai ni a kamusu na nona dakaititi ka sega ni rawata mai e dua na kakana me baleti iratou na nona matavuvale. E muri, ni a vakaroti me taya e dua na waqa o Nifai, e ratou a vakalialiai koya na tuakana ka ratou a bese ni vukei koya. E dina ni a levu na veivakatovolei va‘qo kei na vuqa tale ena nona bula, e dau vakadinadinataka tikoga o Nifai na vinaka ni Kalou.
Ni ra takosova tiko na wasaliwa na nona matavuvale ena ilakolako ki na vanua yalataki, sa tekivu me ra marau eso na matavuvale nei Nifai, era ia na vosa velavela, ka guilecava ni kaukauwa ga ni Turaga a maroroi ira voli mai. Ni vosataki ira o Nifai, era a cudru ka vesuki koya ena wa kaukauwa me kakua kina ni rawa ni yavala. E tukuna na iVola i Momani ni ratou a “vakayacora [vua] na ivalavala voravora; ka rau sa vuce vakalevu talega na nona ilabeniika kei na nona qurulasawa, ka sa ka levu dina na kena mosi.”5 Sa rarawa sara ko Nifai ena vuku ni kaukauwa ni lomadratou na tuakana, ka so na gauna sa rawai koya sara na nona rarawa.6 “Ia,” a, kaya ga o Nifai, “Au sa sega ni vosakudrukudrutaka na Turaga, au sa vakararavi ga vua na noqu Kalou, ka vakacaucautaki Koya ena veisiga.”7
Kemuni na taciqu kei na ganequ lomani, dau vakaivei beka na noda sotava na veika rarawa? Eda dau vosakudrukudrutaka beka kina na Turaga? Se, me vakataki Nifai kei na noqu itokani daukaulotu e liu, eda vakavinavinaka ena veika eda vosataka, vakananuma, kei na ivalavala baleta ni da rai tiko vakalevu cake ena noda vakalougatataki ka sega ena noda bula leqa?
A kena ivakaraitaki vei keda na noda iVakabula ko Jisu Karisito ena Nona veiqaravi e vuravura. Ena veigauna ni dredre kei na veivakatovolei, e vica wale ga na ka ena kauta mai vakalevu cake vei keda na vakacegu kei na sautu mai na noda qaravi ira na tamata. E tukuna na ivola i Maciu na veika a yaco ena nona sa rogoca na iVakabula ni a tamusuka na ului tavalena, o Joni na Dauveipapitaisotaki, na Tui O Eroti me vakayacora kina na lomai luvei Erotiasa yalewa:
“Sa qai lako mai ko iratou na nona tisaipeli, a ratou sa kauta na yagona, ka buluta, a ratou sa qai laki tukuna vei Jisu.
“Ia ni sa rogoca ko Jisu sa soko vakatikitiki tani ena waqa ki na dua na vanua lala: ia ni ra sa rogoca ko ira na lewe vuqa, era sa taubale e vanua mai na veikoro me ra muri koya.
“A sa lako mai ko Jisu, ka raici ira era sa lewevuqa sara a sa lomani ira, a sa vakabulai ira na nodra era sa tauvimate.
“Ia ni sa yakavi mai sa lako vei koya ko ira na nona tisaipeli, ka kaya, Oqo na vanua lala, a sa kala na siga; mo vakatalai ira yani na le vuqa, me ra lako ki na veikoro lalai, me ra volia kina na kedra.
“A sa kaya vei ira ko Jisu, E sega ni yaga me ra lako; mo dou solia mada e dua na kedra.”8
Sa vakaraitaka vei keda ko Jisu Karisito, ena gauna ni veivakatovolei kei na gauna ni dredre e rawa ni da raica na dredre era sotava tiko na tani. Ena yalololoma, e rawa ni da dolele yani ka laveti ira cake. Ia ni da vakayacora vakakina, eda na laveti cake talega ena noda veiqaravi Vakarisito. E tukuna o Peresitedi Gordon B. Hinckley: “Na iwali vinaka duadua ni lomaleqa au kila sa ikoya na cakacaka. Na wainimate vinaka duadua ni yalolailai sa ikoya na veiqaravi. Na veivakabulai vinaka duadua me baleta na lomaocaoca sa ikoya na bolebole ni nona vukei e dua ka sa oca vakalevu cake.”9
Eke, ena Lotu i Jisu Karisito ni Yalododonu Edaidai, sa vuqa na madigi au donumaka me‘u veiqaravi kina vei ira na tamata. Ena veigauna va‘qori au dau vakila kina ni vakamamadataka na noqu icolacola na Tamada Vakalomalagi. O Peresitedi Russell M. Nelson na parofita ni Kalou e vuravura; o koya e sa ivakaraitaki cecere ni ivakarau me da veiqaravi kina vei ira na tani ena gauna dredre ni veivakatovolei. Au vakaduavatataka na noqu ivakadinadina kei na nodra o ira e vuqa tale na Yalododonu, ni Kalou sa ikoya na Tamada Vakalomalagi dauloloma. Au sa vakila na Nona loloma tawayalani ena noqu veisiga dredre. E kila na noda iVakabula o Jisu Karisito na noda mosi kei na noda rarawa. E vinakata o Koya me vakamamadataka na noda icolacola ka vakacegui keda. E dodonu me da muria na Nona ivakaraitaki ena noda veiqaravi vei ira e levu cake na nodra icolacola mai vei keda. Ena yaca i Jisu Karisito, emeni.