Noda Sotava na Cagilaba Vakayalo ena Vakabauti Karisito
Eda na sotava vakavinaka cake na noda cagilaba vakayalo ni da vakabauti Karisito ka muria na Nona ivakaro.
Keirau vakaitikotiko kei noqu daulomani, o Ann ena ono na yabaki sa oti e Texas volekata na Gulf Coast, na vanua sa ravuta kina e vica na cagilaba levu e Amerika, ka biuta tu na vakacaca levu kei na yali ni bula. E ka ni rarawa, ena vica na vula sa oti e sega tu ni vulagi ena veika vakadomobula vakaoqo. E vakasavui yani na neimami loloma kei na masu kivei ira kece sara sa vakaleqai ena sala cava ga. Ena 2017, keitou vakila na Cagilaba o Harvey, ka tau kina na uca levu me yacova na 60 na iji (150 cm).
Na lawa dina e vakatulewataka na kena tauyavutaki na cagilaba. Na ivakarau ni katakata ni wasawasa e dodonu me 80 na diqiri Fahrenheit (27 diqiri), me yacova e 165 na fute (50m) ena ruku ni wasawasa. Ni sotava na cagi na wai katakata ni wasawasa, e vakavuna na wai me cawa ka tubu cake ki na maliwa lala, na vanua e veisau tale kina. Sa qai bulia na o, ka vakavurea mai na cagi e dua na ivakarau e viko sobu ena dela ni wasawasa.
E vakaitamera sara na levu ni cagilaba, ka ra yacova yani e 50,000 na fute (15,240m) se sivia ki na maliwa lala ka teteva yani e rauta ni 125 na maile (200 km). E taleitaki, ni ra sa sotava na cagilaba na vanua, era sa tekivu malumalumu baleta ni ra sa sega tale ni tiko e dela ni wai katakata e gadrevi me vakaukauwataki ira.1
O na sega beka ni sotava e dua na cagilaba vakadomobula. Ia, o keda yadua sa vorata oti, ka na vorata, na cagilaba vakayalo e vakarerea na noda sautu ka vakatovolea na noda vakabauta. Ena vuravura nikua, e vaka me ra sa toso cake tikoga ena veigauna kei na kaukauwa. Eda vakavinavinaka, ni sa vakarautaka na Turaga e dua na sala dei meda uabaleti ira ena reki. Ni bulataki na kosipeli i Jisu Karisito, eda sa vakadeitaka ni “bikai ena o ni rarawa, bolei ena bula dredre, nuidei tavaki keda tu mai, voleka ni talaucaki.”2
E vakamacalataka o Peresitedi Russell M. Nelson:
Oi keda na yalododonu e rawa ni da marau tiko ena ituvaki ni bula kecega. E rawa ni da vakila na reki ni da sotava tiko e dua na siga ca, macawa ca, se dua sara mada ga na yabaki ca!
“… Na reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.
Ni vakanamata na noda bula vei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula.”3
Me vaka ga ni na lawa dina e lewa na cagilaba, na lawa vakalou e lewa meda kila vakacava na reki ena gauna ni cagilaba vakayalo. Na reki se rarawa eda vakila ni da yaloqaqataka na cava ni bula e semati ki na lawa sa virikotora tu na Kalou. Wasea o Peresitedi Nelson, “Era vakatokai me ra ivunau, ia era sa dina me vaka na lawa ni laveti cake, na lawa ni qerevati, [kei] na lawa e lewa na vadugu ni uto.”
E tomana o Peresitedi Nelson, “Sa yaco me dua na iwalewale rawarawa sara: Kevaka o vinakata mo marau, muria na ivakaro.”4
Na vakatitiqa e meca ni vakabauta kei na reki. Me vaka ga na wai katakata ni wasawasa na vanua me yaco kina na cagilaba, na vakatitiqa sa ikoya na vanua ni cagilaba vakayalo. Me vaka ga na vakabauta e dua na digidigi, vaka talega na vakatitiqa. Ni da digitaka meda vakatitiqa, eda sa digitaka meda vakasaurarataki, ka soli kina na kaukauwa vua na meca, ka sa na biuti keda meda malumalumu ka rawai.5
E saga o Setani me liutaki keda ki na yavu ni veisusugi ni vakatitiqa. E saga o koya me vakaukauwataka na yaloda me rawa ni da kakua ni vakabauta.6 Na vanua ni vakatitiqa e rawa ni vaka me veisureti baleta na kena wai e vaka me veivakacegui, ka raragi e sega ni gadrevi kina vei keda meda “bula ena vosa kecega sa lako mai na gusu ni Kalou.”7 Ena wai vakaoqori e temaki keda kina o Setani me da vakamamadataka na noda qaqarauni vakayalo. Na sega ni qaqarauni o ya e rawa ni vakavuna na lailai ni yalodina vakayalo, ka da sa “sega ni batabata se katakata”.8 Kevaka eda sega ni vakaiyaqataki vei Karisito, na vakatitiqa kei na kena veika kece ena kauti keda tani ki na vakawelewele ena vanua eda na sega ni kunea kina na cakamana, marau tawayalani, se “vakacegu ni yaloda.”9
Me vaka ga ni sa malumalumu na cagilaba ni sa cabe e vanua, e vakaisosomitaki na vakatitiqa ena vakabauta ni da tara cake na noda yavu vei Karisito. Eda sa qai rawa ni raica na cagilaba vakayalo ena kena irairai dodonu, ka sa vakalevutaki na noda rawa ni vorata. “Ia ni sa vakaliwava mai na tevoro na nona cagi kaukauwa, io, kei na nona moto ena covulaca, io, ni sa liwavi [keda] na nona uca cevata kecega kei na nona cava kaukauwa, ena sega ni rawai [keda] me dreti [keda] sobu ki na ikeli ni rarawa kei na yaluma tawacava rawa, ni sa dei sara na uluvatu [eda] sa tara kina, ka sai koya na yavudei.”10
Me vaka e vakavulica o Peresitedi Nelson:
Na vakabauti Jisu Karisito sa yavu ni vakabauta kecega kei na sala ni kaukauwa vakalou.
Na Turaga e sega ni gadreva na vakabauta e uasivi meda rawata kina na Nona kaukauwa e uasivi . Ia e kerea o Koya meda vakabauta.”11
Mai na koniferedi raraba ni Epereli, keitou sa saga tiko vakamatavuvale me keitou vaqaqacotaka na neitou vakabauti Jisu Karisito kei na Nona Veisorovaki me vukei keitou “me vukica na [neitou] ibolebole ki na tubu kei na madigi sega ni vakatauvatani rawa.”12
Na makubui keirau yalewa, o Ruby, sa vakalougatataki tu ena yalo dei, vakaveiliutaki. Ni sa sucu mai, a sega ni sema ki na ketena na sala ni kakana. Ni se gonelailai mada ga, o Ruby, ena nodrau veivuke na nona itubutubu, a sotava na veivakatovolei oqo ena yalo e sega ni matalia. Sa yabaki lima tiko oqo o Ruby. E dina ga ni se gone sara, e sa dua na ivakaraitaki kaukauwa ni nona sega ni vakatara na ituvaki ni nona bula me vakadeitaka na nona marau. E dau marau tu ga o koya.
Ena Me sa oti, a sotava o Ruby e dua tale na cagilaba ena nona bula ena vakabauta. A sucu talega mai okoya ka se sega sara ni taucoko e dua na ligana ka gadrevi kina na veisele ni veivakataucokotaki. Ni bera na veisele dredre oqo, keirau a sikovi koya ka solia vua e dua na droini totoka e vakaraitaka tiko na ligana e dua na gone ni taura tiko na ligana na iVakabula. Ni keirau tarogi koya ke sa rere, sega ni wawa, a sauma mai, “Sega, au marau!”
Keirau qai tarogi koya, “Ruby, sa vakaevei o ya?”
A vakadeitaka o Ruby, “Baleta ni’u kila ni na taura na ligaqu o Jisu.”
E veivakurabuitaki na nona bula mai o Ruby, ka tomana tikoga na nona marau. Na duidui ni savasava ni nona vakabauta e dua na gone vakatautauvata kei na lialia ni vakatitiqa ka rawa ni dau temaki keda vakawasoma ni da sa qase mai!13 Ia e rawa vei keda kece me da yaco me vaka na gone lalai ka digitaka me da biuta vakatikitiki na noda tawavakabauta. E dua na digidigi rawarawa sara.
A vakatakekere vagumatua vua na iVakabula e dua na tama dauveikauwaitaki, ka kaya, “Kevaka ko ni sa rawata e dua na ka, … vukei keirau.”14
Sa qai kaya vua ko Jisu:
“Kevaka ko sa vakabauta rawa, sa rawarawa na ka kecega vua sa vakabauta.
“Sa qai tabalaka vakasauri na domona o tamanigone, ka kaya, ia ka vakawai na matana, Kemuni na Turaga, au sa vakabauta; vukea na noqu tawa-vakabauta.”15
Na tama yalomalua oqo a digitaka me nuitaka na nona vakabauti Karisito ka sega ni vakatitiqa. Na nomu tawavakabauta ga ena tarova na Kalou me vakalougatataki iko ena cakamana mo tosoya kina na ulunivanua ena nomu bula.”16
Sa yalololoma dina na Kalou me biuti keda ena ivakatagedegede ni vakabauta ka sega ena ivakatagedegede ni kila‑ka!
A vakatavulica o Alama:
“Sa kalougata ko koya sa vakabauta na vosa ni Kalou.”17
“Ni sa yalololoma na Kalou vei ira kecega sa vakabauta na yacana; o koya sa gadreva sara ko koya, ena imatai ni gauna, mo ni vakabauta.”18
Io, ena imatai ni gauna, e gadreva na Kalou meda vakabauti Koya.
Eda na sotava vakavinaka cake na noda cagilaba vakayalo ni da vakabauti Karisito ka muria na Nona ivakaro. Na noda vakabauta kei na talairawarawa e semati keda ki na kaukauwa eda sega ni rawata me ulabaleta na “[cava ga] e yaco tiko—se sega ni yaco tiko—ena noda bula.”19 Io, na Kalou “sa vakalougatataki [keda]” ni da vakabauta kei na talairawarawa.20 Na kena dina, ni toso na gauna na noda ituvaki ni veisau ki na marau ka “da sa vakabulai vei Karisito” ni da cakacakataka na noda vakabauti Koya ka muria na Nona ivakaro.21
Kemuni na taciqu kei na ganequ, meda digitaka nikua meda “kakua ni vakatitiqa, ia mo dou vakabauta tikoga.”22 “Sai koya na sala dodonu mo dou vakabauta na Karisito.”23 Eda sa “ibulubulu … ena qeteqete ni ligana.”24 O Koya na noda iVakabula kei na Dauveivueti ka duri tu e noda katuba ka tutuki.25 Ena yacai Jisu Karisito, emeni.