Dali, Sunod Kanako

Ang Paglalang

Ang yuta gilalang ni Jesukristo ubos sa direksiyon sa Langitnong Amahan aron kita adunay usa ka dapit nga mapuy-an, magkat-on, ug magamit ang atong kabubut-on aron sa paghimo og maayo nga mga pagpili (tan-awa sa Abraham 3:24–26).

Si Propeta Joseph Smith mitudlo nga ang “paglalang … wala magpasabot nga paglalang gikan sa wala, nagpasabot kini sa pag-organisar; sama sa usa ka tawo nga moorganisar og mga materyal ug mobuhat og barko.”¹ Ang Hebreohanon nga pulong sa “paglalang” nagpasabot sa paghulma, paggama, pag-organisar, ug pagporma (tan-awa sa Genesis 1:1; Abraham 3:24).

Si Presidente Russell M. Nelson mipasabot nga “ang pisikal nga Paglalang mismo gipahiluna na pinaagi sa nakatakda nga panahon sa kapanahonan,” dili mga adlaw sa kalendaryo. “Gitawag man kini og adlaw, usa ka panahon, o katuigan, ang matag ang-ang [sa Paglalang] mao ang usa ka panahon tali sa tunga-tunga sa duha ka mailhan nga mga hitabo—usa ka dibisyon sa kahangtoran.”²

Una nga Adlaw: Kahayag ug Kangitngit

“Unya miingon ang Dios, Motungha ang kahayag,” ug “gilain Niya kini gikan sa kangitngit,” nga naghimo sa adlaw ug gabii (tan-awa sa Genesis 1:3–5).

Ikaduha nga Adlaw: Katubigan ug Kalangitan

Gibulag sa Dios ang katubigan ug ang kalangitan. “Miingon ang Dios, Motungha ang usa ka wanang nga magbahin sa katubigan. … Ginganlan Niyag Langit ang wanang.” (Tan-awa sa Genesis 1:6–8.)

Ikatulo nga Adlaw: Dagat ug Yuta

“Ginganlan sa Dios og Yuta ang mala ug ang tubig … ginganlan niyag Dagat” (Genesis 1:10). Ang yuta dayon andam na alang sa kinabuhi sa tanom (tan-awa sa Genesis 1:11–12).

Ikaupat nga Adlaw: Adlaw ug Mahinungdanong mga Panahon

Gihimo sa Dios ang adlaw, bulan, ug mga bituon “nga maoy magbulag sa adlaw gikan sa gabii” ug “magpaila sa pagsugod sa mga adlaw ug sa mga tuig ug sa mahinungdanong mga panahon” (tan-awa sa Genesis 1:14–16).

Ikalima nga Adlaw: Buhi nga mga Binuhat

Ang Dios milalang sa “tanang buhing binuhat” (Genesis 1:21). Kini nga mga mananap gisugo sa pagsanay ug paglukop sa yuta ug sa dagat (tan-awa sa Genesis 1:22).

Ikaunom nga Adlaw: Adan ug Eva

Ang paglalang sa Dios sa kinabuhi nagpadayon sa “mga mananap sa yuta,” “mga baka” ug “mga butang nga nagkamang” (Abraham 4:24–25). Dayon gilalang Niya si Adan ug Eva “diha sa panagway sa iyang kaugalingon nga lawas” (Moises 6:9) ug misugo kanila “sanay kamo ug panaghan, ug lukpa ang yuta, … ug kamo ang maggahom … sa tanan nga buhing binuhat” (Genesis 1:28).

Ikapito nga Adlaw: Adlaw sa Pagpahulay

Human sa pagtapos sa Iyang buhat, ang Dios mipahulay sa ikapito nga adlaw. “Gipanalanginan sa Dios ang ikapitong adlaw ug gibalaan niya kini kay sa maong adlaw natapos niya ang iyang pagpamuhat ug mipahulay siya gikan sa tanan niyang gibuhat” (Genesis 2:3).

Ang Dios sa wala madugay misugo nga kita usab “[mohinumdom sa] adlaw nga igpapahulay ug [moila niini] nga balaan” (Exodo 20:8).

Mabalaan nato ang adlaw nga Igpapahulay pinaagi sa paggahin og panahon sa pagsimba, pag-ambit sa sakramento, ug paghinumdom sa Manluluwas. Ang Ginoo mitudlo, “Kay sa pagkatinuod kini mao ang adlaw nga gitudlo ngadto kaninyo sa pagpahulay gikan sa inyong mga kahago, ug mohatag og mga paghalad sa inyong mga pag-ampo ngadto sa Labing Halangdon” (Doktrina ug mga Pakigsaad 59:10).

Sa adlaw nga Igpapahulay, “ang atong mga hunahuna, mga binuhatan, ug kinaiya maoy mga timailhan nga atong gihatag sa Dios ug usa ka timailhan sa atong gugma alang Kaniya.”³