Mga Young Adult
Mamahimong Lig-on sa Emosyonal nga Paagi
Ang tagsulat nagpuyo sa Seville, Spain.
Wala pa gayod ako nakasinati og kabalaka [anxiety] hangtod nga mipauli ko gikan sa akong misyon, mao nga dili ko sigurado kon unsaon sa pagpadayon sa unahan.
Litrato nga giposingan sa modelo
Ang kinabuhi nagpadayon sumala sa plano.
Hapit na nako makompleto ang akong misyon. Atol sa miaging 18 ka bulan, ang akong pagpamatuod napalig-on, ug ang akong panan-awon sa plano sa kaluwasan napalapdan. Wala ako sukad mibati og mas nasuod sa akong Manluluwas ug sa akong Langitnong Amahan. Ang kinabuhi ingon og malipayon lang gayod.
Tinuod, ang akong pamilya ug ako nakasinati sa among bahin sa mga pagsulay, apan sa kinatibuk-an, mahinamon ko ug adunay daghang plano alang sa unsay sunod moabot. Apan mipauli na ko. Ug ang kakurat grabe kaayo. Ako nanglimbasog sa pagpahiuyon pag-usab sa kinabuhi. Nagmakanunayon ang akong kabalaka mahitungod sa paghimo og mga maayong pagpili ug paghingpit sa akong pagkamasulundon. Akong gipugos og maayo ang akong kaugalingon sa pagpabilin diha sa taas nga ang-ang sa pagkaespirituhanon nga akong nabatunan sa tibuok sa akong misyon tungod kay nahadlok ako nga kon dili nako buhaton, ako mokunhod sa espirituhanong paagi.
Samtang ang pagpugos nga akong gipahamtang sa akong kaugalingon nagkadako, misugod ko sa pagsinati og kabalaka, ug mga pag-ataki sa pagkalisang. Nag-anam kini nga nagsunod-sunod, ug sa kataposan gibati nako nga mura kog malumos.
Subo lang, akong gitago ang akong mga pagbati gikan sa akong pamilya ug mga higala. Nasayod ko nga ang kabalaka ug depresyon dili angayng ikaulaw, apan gibati ko ang dili mapugngan ug nawala na nga wala na gani ko masayod kon unsaon sa pagpahayag sa unsay akong gisinati aron makapangita og tabang.
Salamat na lang, ang Ginoo anaa kanunay aron sa paggiya kanato kon kita molingi ngadto Kaniya. Human sa pipila ka pagpamalandong ug pag-ampo, naaghat kong motug-an ngadto sa akong igsoong lalaki ug sa iyang asawa. Sila mitabang nako nga makaamgo nga ako dili ingon ka “boang” sama sa akong gihunahuna ug kana nga mga emosyonal nga panglimbasog mahimong mahitabo ni bisan kinsa.
Si Sister Reyna I. Aburto, Ikaduhang Magtatambag sa Kapangulohan sa Relief Society mipamatuod niini nga kamatuoran: “Minahal kong mga higala, mahitabo kini ni bisan kinsa kanato—ilabi na kon, sama sa mga tumutuo diha sa laraw sa kalipay, atong ibutang ang wala kinahanglana nga palas-anon sa atong kaugalingon pinaagi sa paghunahuna nga kita kinahanglan nga mahimong hingpit karon. Ang sama nga mga hunahuna mahimong makapabug-at. Ang pagkab-ot og kahingpitan usa ka proseso nga mahitabo sa tibuok natong mortal nga kinabuhi ug lapas pa—ug pinaagi lamang sa grasya ni Jesukristo.”1
Usa ka Dinasig nga Kurso
Samtang nag-ampo ko sa Langitnong Amahan alang sa giya, nakaamgo ko nga kinahanglan kong mohatag og kahigayonan sa mga kapanguhaan nga Iyang gihatag kanato, ug ako kinahanglan nga makat-on ug mag-usab alang sa mas maayo. Maayo na lang, nianang panahona nakahigayon ko sa pagtambong sa kurso nga emosyonal nga kalig-on sa Simbahan. Ang oportunidad ingon og miabot sa tukmang panahon, ug dili ko motuo nga usa kadto ka sulagma.
Diha sa manwal sa kurso, ang emosyonal nga kalig-on nagpasabot sa mosunod:
-
“Ang abilidad sa pagpahiangay sa emosyonal nga mga hagit uban sa kaisog ug hugot nga pagtuo nga nakasentro diha kang Jesukristo.
-
“Pagtabang sa imong kaugalingon ug sa uban kutob sa imong mahimo.
-
“Pagpangayo og dugang nga tabang kon gikinahanglan.”2
Sa laing pagkasulti, ang emosyonal nga kalig-on usa ka butang nga kitang tanan nagkinahanglan.
Alang kanako, kining dinasig nga kurso usa ka klarong timailhan nga ang Langitnong Amahan nahibalo sa mga pagsulay nga atong giatubang karong mga panahona isip mga miyembro sa ang Simbahan ni Jesukristo. Siya gusto nga makatabang kanato nga magpadayon og abante sa unahan diha sa dalan balik ngadto Kaniya. Nagtan-aw sa daghang matahom nga mga aspeto niini nga kurso nakatabang kanako sa pagkaamgo kon unsa na lang gayod ka dako ang pagkaila sa Langitnong Amahan kanato ug sa atong indibidwal nga mga panginahanglan, ug diha-diha dayon ako mibati og kalinaw samtang nagsugod ko sa pagtuon. Ang kurso nagtudlo og klaro ug gamhanang mahangturon nga mga kamatuoran nga mahimong magamit sa atong kinabuhi kon magsagubang og mga problema sa panghunahuna, mahimong sa atong kaugalingon o sa atong gimahal.
Usa sa mga pagtulun-an nga nakatandog kanako makita sa kapitulo 9, “Paghatag og Kalig-on ngadto sa Uban.” Kini nga kapitulo mao ang nakatabang kanako sa kataposan nga makakuha pa og dugang nga tabang. Kini nagtudlo sa baroganan sa pagserbisyo sa usag usa. Akong nakat-onan nga importante ang pagserbisyo ngadto sa uban pinaagi sa pagdayeg sa ilang mga pagbati, mga emosyon, mga opinyon ug motabang nga dunay pagbati ug pagsabot. Nakaamgo usab ko nga kinahanglan kong mosalig sa uban aron sa pagtabang kanako sa akong mga panglimbasog.
Sa dihang ako nakahimo sa pagbutang niini nga mga ideya ngadto sa buhat ug gisulti ngadto sa akong pamilya ug mga higala mahitungod sa akong mga panlimbasog sa panghunahuna, nasurprisa ko nga sila maloloy-on ug dili mahukmanon. Nakadawat ko og daghan kaayong suporta gikan kanila.
Akong gibati nga mura og ang akong kabalaka mas mograbe ug mosangpot pa sa mas ngil-ad kon ako wala mipaambit sa akong mga hagit uban sa akong mga minahal. Ug kini nga kasinatian nakatabang nako sa pagtabang ug pagsabot sa uban mahitungod sa ilang mga kabalaka ug mga problema usab.
Kita Makaatubang sa Umaabot uban sa Paglaom
Para nako kataw-anan kon giunsa dihang miuli ko gikan sa misyon, nabalaka ako og maayo mahitungod kon mawad-an sa “espirituhanong pag-uswag” nga akong naangkon atol sa akong misyon, tungod kay karon akong naamgohan nga ang pag-uli sinugdanan lang sa bag-ong kapitulo diin ako makakaplag og bag-ong mga paagi sa pagpalambo sa akong hugot nga pagtuo.
Ang akong personal nga relasyon uban sa Langitnong Amahan ug ni Jesukristo mitubo ug napalawman og maayo sukad sa akong pag-uli, ilabi na tungod sa mga baroganan nga akong nakat-onan niining kurso nga emosyonal nga kalig-on ug pinaagi sa pagsalig sa tabang sa Langitnong Amahan ug sa Manluluwas. Sila mabati nga mas tinuod ug anaa sa akong inadlaw-adlaw nga kinabuhi.
Akong nakat-onan ug nadawat nga isip mga anak sa Dios, kita kanunay nga mausab, magkat-on ug mouswag. Ug bisan sa tanan nga mga kausaban sa atong kinabuhi, ang Langitnong Amahan wala nag usab-usab. Wala Siya maglaom kanako nga mahimong hingpit sa akong misyon, ug wala Siya maglaom niana karon. Siya yanong naghigugma kanako ug gusto nga ako magpadayon sa pagpaningkamot ngadto Kaniya ug sa pagbuhat sa labing maayo nga ako makahimo sa akong panaw balik ngadto Kaniya.
Karon, tungod kay ako mikuha niini nga kurso sa emosyonal nga kalig-on, wala kana magpasabot nga wala koy bisan unsang dugang nga mga kabalaka o kahadlok o mga gutlo nga mobati ko nga nabug-atan sa kahadlok sa umaabot. Bation gihapon nako panagsa. Apan karon akong naamgohan kini nga mga sundanan ug nakakat-on sa mga himan sa pagtabang nga masulbad kini sa mas himsog nga paagi, nagpalambo sa kalidad sa akong inadlaw adlaw nga kinabuhi.
Sa kataposan, kini nga kurso mitudlo nako og kinaiya sa pagsugakod sulod sa mga panahon kon ako makasinati og kabalaka ug mga hagit. Kini nagtudlo kanako sa pagbaton og pailob ug kapuangod alang sa akong kaugalingon ug sa akong pagkadili hingpit. Ug ako nakakat-on sa pagsabot kon sa unsang paagi ang Dios nagtan-aw kanako ug dili mahadlok pinaagi sa wala pa mahibaloi sa umaabot.
Pinaagi sa propesyonal ug langitnong tabang, akng naamguhan nga kita adunay mga himan nga gikinahanglan aron masayod unsaon sa “pagbuhat … ug nga dili pagaaghaton” (2 Nephi 2:26) pinaagi sa atong mga pagbati samtang magpadayon kita magpadulong ngadto kang Kristo.