Digital Lamang: Mga Young Adult
Unsaon Nato Pagpatigbabaw ang Dios Labaw sa Tanan Kon Maghimo og mga Desisyon sa Kinabuhi?
Kon mag-atubang kita og daghan kaayong lahi-lahi nga mga dalan sa kinabuhi, unsaon nato sa pagkahibalo nga anaa kita sa dalan nga gusto sa Langitnong Amahan nga atong subayon?
Nakasulay na ba ka nga walay nahimo dihang nag-atubang og usa ka desisyon? Sa mga gutlo nga ingon niini, posibling sayon ang paghunahuna, Unsa kaha kon makahimo ko og sayop nga pagpili ug mapakyas sa paghimo sa buluhaton nga gitinguha sa Langitnong Amahan kanako nga buhaton niining kinabuhia?
Kanunay kitang gisultihan nga ang Langitnong Amahan makagiya kanato sa atong panaw latas niini nga mortalidad, apan unsaon man nato sa pagsunod ang tambag ni Presidente Russel M. Nelson sa “[pagpili] nga ipatigbabaw ang Dios labaw sa tanan diha sa atong mga kinabuhi,” nga “tug[o]tan ang Dios nga maoy labing gamhanang impluwens[i]ya sa atong mga kinabuhi,”1 samtang padayon pang naghimo sa atong kaugalingon nga mga desisyon? Ang Langitnong Amahan nagdiktar ba kon asa kita moadto o unsay atong buhaton o kon unsay hulagway sa atong kinabuhi sa matag adlaw?
Siyempre, samtang ang Dios nagbaton gayod og usa ka talagsaon nga plano sa kalipay nga naghimong posible nga kita makapuyo og balik uban Kaniya pag-usab, dili Siya mokontrolar sa matag aspeto sa atong kinabuhi. Gusto Siya nga may kaugalingon kitang pagpili kon hisgotan ang mga ekspektasyon ug mga ambisyon sa atong kinabuhi.
Aniay pipila ka butang nga hinumdoman kon maghunahuna niana nga kamatuoran.
Ang Kabubut-on Usa ka Gasa
Tungod kay nag-atubang kita og daghan nga posibling mga dalan sa kinabuhi, ang kabubot-on ingon og makahahadlok o dili sayon. Usahay mahadlok kaayo kong makahimo sa “sayop” nga desisyon nga mibati na noon ko nga walay nahimo, wala makapadayon sa unahan o walay paglambo.
Apan dihang nakakat-on ko sa pagsalig sa Langitnong Amahan ug sa akong kaugalingon, nakakat-on ko sa pagdayeg niini nga gasa sa pagpili (tan-awa sa 2 Nephi 2:16).
Gani sa paggamit sa atong kabubut-on, kinahanglan nga kanunay kitang makigtambag sa Langitnong Amahan mahitungod sa dagko, makapausab sa kinabuhi nga mga desisyon ug kon unsa man ang iyang kabubut-on. Kon buhaton nato kini, Siya makatabang sa paggiya kanato padulong sa maayong mga dalan. Sigon sa gitudlo ni Elder Jeffrey R. Holland nga sakop sa Korum sa Napulog Duha ka Apostoles, “Kinahanglan kitang mag-amping nga dili nato mataligam-an ang kamot sa Ginoo kon kini gitanyag, kon tinguha niya nga motabang.”2 Apan kon magpakabuhi kita nga matarong, Siya usab mosalig kanato sa paggamit sa atong kabubut-on sa maalamong paagi ug sa pagsunod sa atong matarong nga mga ambisyon aron makakita og hingpit nga kalipay samtang magpadayon kita sa dalan sa pakigsaad.
Mahimo Kitang Mopili sa Pagdawat og mga Oportunidad
Duna koy higala kinsa mipili nga dili magmisyon tungod sa personal nga mga panglimbasog. Mga tuig ang milabay, mibati siya og kalibog ug kasakit sa matag higayon nga mabasa niya ang linya sa iyang patriyarkal nga panalangin nga nag-ingon nga siya adunay oportunidad nga makaalagad og misyon. Gibati niya nga iyang nataligam-an ang unsay giandam sa Dios alang kaniya ug sa kasagaran malumos sa kaulaw ug kawalay kasiguroan mahitungod sa iyang kaugmaon.
Apan sa dihang mainampoon siyang namalandong niini nga sitwasyon, iyang naamgohan nga ang mahinungdanong pulong diha sa iyang patriyarkal nga panalangin mao ang oportunidad. Ang Langitnong Amahan nagdapit kanato sa pagsunod Kaniya ug sa pagpili sa maayong mga oportunidad sa tibuok kapanahonan sa kinabuhi.
Ug unsay mahitabo kon mataligam-an nato kana nga oportunidad? O dili nato dawaton ang tanan Niya nga mga pagdapit?
Sa dakong pasalamat, tungod sa atong Manluluwas, aduna pay daghang oportunidad sa pagserbisyo ug paglambo sa tibuok natong kinabuhi.
Ang Langitnong Amahan usa ka Dios sa pagpasaylo ug paghigugma. Sigon sa gitudlo ni propeta Isaias, “Pabalika sila sa Ginoo aron kal[o]y-an sila, pabalika sa atong Dios, kay andam siya sa pagpasaylo” (Isaias 55:7).
Bisan kon ang laing kahigayonan alang sa mga oportunidad maglakip man sa paghinulsol ug pagbalik ngadto sa dalan sa pakigsaad o sa yanong pagkausab sa kasingkasing ug tugotan ang Dios nga mopatigbabaw makausa pa sa atong kinabuhi, hibaloi nga, sama sa gitudlo ni Elder Thierry K. Mutombo sakop sa Seventy, “kon kita mopili nga mosunod ni Kristo, kita mopili nga mausab.”3
Ang akong higala tingali wala makaserbisyo og misyon, apan gipalambo niya ang iyang hugot nga pagtuo diha kang Kristo ug ang iyang kaandam aron malihok ang mga oportunidad ug mga calling nga gihatag Kaniya. Ug nakaplagan niya ang hingpit nga kalipay ug katumanan sa paghimo og maayong mga desisyon ug sa pagtugot nga ang Dios mogiya kaniya.
Pagmausab-usabon ug Tinguhaa ang Pagpadayag
Sa akong hunahuna daghan kanato nagtubo nga nagbaton og lakang ngadto sa usa ka lakang nga latid sa atong mga kinabuhi. Sama nako, pananglitan: nagplano kong makatrabaho sa natad sa medikal, magminyo sa edad nga 21, ug manganak og daghan sa wala pa mag-edad og 30, tanan samtang magpasanay ko sa akong perpektong pamilya diha sa ebanghelyo ug magpakabuhing labihan ka malipayon ug walay balda nga pagpakabuhi.
(Cue pagkatawa.)
Dinhi gayod nga dapit nasungko ang akong kinabuhi samtang misalig ko sa akong kaugalingon sa paghimo og maayong mga desisyon, mihakop sa mga oportunidad, misunod sa mga pag-aghat, ug mitugot nga ipatigbabaw ang Dios:
-
Usa ko ka tigsulat. Ang pagtan-aw og dugo ug mga dagom magpakuyap nako.
-
Wala ko magminyo hangtod nag-27 ko (ug sa tunga-tunga sa pandemya). Ug giminyoan nako ang tawo nga nailhan nako hapit 10 ka tuig na, bisan og nakig-date ko og laing mga tawo atol niana nga panahon.
-
Nakigbisog ko og usa ka balik-balik nga sakit [chronic] nga labihan ka sakit nga maghatag og kalisod usahay sa kinabuhi. Kini nga sakit misangpot usab sa pagkabaog, naghimo og dakong pangutana bahin sa posibilidad sa pagkabaton og mga anak.
Dihang miduol ko sa Langitnong Amahan alang sa giya, nakakaplag ko og hingpit nga kalipay sa mga kahimtang bisan pa sa labihan ka lahi sa akong kinabuhi gikan sa akong orihinal nga mga ekspektasyon. Ug aduna akoy hugot nga pagtuo nga ang kaugmaon mosanag samtang padayon ko kining himoon.
Maanindot ang adunay mga pangandoy ug mga ekspektasyon alang sa atong kinabuhi nga modala ngadto sa kalamboan ug katumanan. Apan ang pagkahimong mausab-usabon ug bukas alang sa kausaban niadto nga mga ekspektasyon magtugot nga kita makakaplag og kalipay sa bisan unsa nga kahimtang.
Ang kinabuhi dili sa kanunay mohatag sa unsa gayod ang atong gusto o gilaoman, apan makagamit kita sa atong hugot nga pagtuo nga ang Langitnong Amahan makapadayon sa paggiya kanato padulong sa maayong mga oportunidad ug kalipay. Si Presidente Russell M. Nelson mitudlo: “Ang tanan nga maayo sa kinabuhi—ang matag kalagmitan nga panalangin nga may mahangt[o]rong kahulogan—magsugod sa hugot nga pagtuo. Ang pagtugot nga ang Dios mopatigbabaw sa atong kinabuhi magsugod sa hugot nga pagtuo nga Siya andam nga mogiya kanato.”4
Ang Langitnong Amahan Gusto nga Kita Makabaton og Hingpit nga Kalipay
Tungod kay nag-atubang kita og daghan kaayong posible nga mga dalan sa kinabuhi, ang atong panaw padayon nga mohimo og bag-ong mga pagliko-liko. Ang importante mao nga kita naghinumdom sa pagpakigtambag sa Langitnong Amahan diha sa atong mga pagdesisyon ug nga ang dalan nga atong gisubay mao ang dalan sa pakigsaad. Ang pagtugot nga ang Dios maoy mopatigbabaw sa atong kinabuhi makadugang sa Iyang pagsalig ngari kanato sa pagsubay sa makapatuman nga dalan nga modala kanato balik Kaniya ug sa paghimo og maayong mga desisyon samtang magpadayon. Siya ug si Jesukristo gusto nga makasinati kita og hingpit nga kalipay, sa pagpili alang sa atong kaugalingon, nga molambo, ug magpadayon sa mga butang nga atong ganahan (tan-awa sa 2 Nephi 2:25).
Ug kon ang atong mga ekspektasyon sa kinabuhi dili makab-ot, mahimo natong ipatigbabaw ang Dios pinaagi sa pagsalig Kaniya, magtuman sa atong mga pakigsaad, ug molihok inubanan sa hugot nga pagtuo. Ang paghimo niini kanunay nga modala kanato ngadto sa dugang nga katumanan, dugang nga kalipay, ug dugang nga mga oportunidad nga mas labaw pa kay sa atong nahunahunaan.
Kini nahitabo gayod kanako.