Mga Young Adult
Yano nga mga Pahinumdom sa Pagpangita sa Inyong Dalan latas sa Kinabuhi
Ang pagdiskubre kon unsay gusto ninyong buhaton sa kinabuhi mahimong makaugtas. Ug salamat na lang, kamo dili na kinahanglan nga mohimo niini nga mag-inusara.
Paghulagway sa litrato gikan sa Getty Images
Minilyon ka tawo sa tibuok kalibotan ang nakatan-aw sa telebisyon samtang ang unang mga tawo milakaw didto sa buwan. Ang akong papa usa kanila. Sa kalit lang, sa edad lang nga syete, kahibalo na siya kon unsa ang iyang gustong buhaton sa iyang kinabuhi.
Sa dihang nahibaloan niya nga daghang astronaut ang nagsugod isip piloto nga panggubat, nakahukom siya diha-diha dayon kon unsay iyang gusto nga tutokan sa eskwelahan—ang pagka-enhenyero sa kawanangan [aerospace engineering]. Siya sa kataposan nahimong usa ka piloto sa panggubat sa Navy sa Estados Unidos uban sa pangandoy nga mamahimong astronaut.
Samtang nagdako ko, gibati nako ang akong kinabuhi nga kinahanglan adunay plano kon unsay angay nga buhaton. Apan dili kini sayon kaayo alang nako sa pagdesisyon kon unsay gusto nakong buhaton. Akong gibati nga dili igo ang akong kamaalamon, dili igo ang kamapahinunguron, o igo nga kaisog sa pagplano sa akong kinabuhi ug mopadayon niini. Sa tinuoray, nanlimbasug gihapon ako niini usahay.
Samtang nagkahingkod ko, akong nakat-onan nga daghang kabatan-onan mibati sa samang paagi. Ang pipila sa mga tawo nasayod gayod kon unsa nga dalan ang subayon sa sayo pa. Kadaghanan kanato masayran nang daan kon asa kita moadto. Ug kana maayo ra! Salamat na lang, kita dili na kinahanglan nga mohimo niini nga mag-inusara. Adunay tabang samtang magpadayon.
Hinumdumi Unsa ang Labing Importante
Ang pagkadili sigurado sa unsa nga direksyon nga gusto nako nakapahimo kanako nga mobati og dili maayo usahay. Gibati nako nga ako kinahanglang mobuhat og laing butang o maanaa sa laing dapit. Gibati nako nga aduna lang gyod usa ka butang nga gusto sa Langitnong Amahan nga ipabuhat kanako, ug kon ako kining mataligam-an, akong maguba ang akong mga oportunidad alang sa kahangturan. Kon inyong hunahunaon, kini nakamugna og daghang walay hinungdan nga mga kabalaka sa akong kinabuhi!
Sukad niana akong nakat-onan nga ang Langitnong Amahan mipanalangin sa matag usa kanato og espirituhanong mga gasa ug nga adunay daghang maayo nga mga butang nga atong buhaton nga makapahimuot Kaniya. Dili kita angayang mabalaka mahitungod sa pagpangita sa usa ug bugtong nga dalan alang sa atong kinabuhi. Basta nagsunod lang kita sa ebanghelyo ug naghimo ug nagtuman sa sagradong mga pakigsaad, Siya motabang kanato nga mapahimuslan kon asa man kita karon ug masayod kon unsaon sa pagpadayon sa unahan.
Ang Atong Ginagmay nga mga Pagpili Makahimo og Kalainan
Sa dihang akong nadawat ang akong patriyarkal nga panalangin, usa ka bahin ganahan kaayo ko—usa ka butang nga magamit kanatong tanan. Ako gipahinumduman nga ang pag-adto sa celestial nga gingharian dili mahimo pinaagi sa usa ka dakong buhat o usa ka talagsaong binuhatan. Kini mahimo diha sa mga pagpili—dako ug gamay—nga atong gihimo sa matag adlaw, ilabi na kon kita mopili sa pagduol ngadto kang Jesukristo ug mosunod sa Iyang ebanghelyo.
Samtang kita molihok sa tanang aspeto sa atong mga kinabuhi uban sa hugot nga pagtuo sa Langitnong Amahan ug ni Jesukristo, atong gibutang ang atong kaugalingon sa posisyon nga magiyahan. Kita usab makakaplag nga bisan asa kita dad-on Nila mao gayod ang eksakto nga gusto usab nato.
Ang mga Butang Mamaayo Ra
Bisan aduna pay labing maayong plano nga nalatid, ang mga butang dili kanunayng mosangpot sumala sa paagi nga atong gusto nga mahitabo. Sa kinabuhi sa akong papa wala. Wala gayod siya nahimong astronaut, apan siya ang unang makasulti ninyo nga ang Ginoo migiya kaniya sa unsay labing maayo alang kaniya ug sa among pamilya.
Ang mga kasulatan nagtudlo kanato sa, “[pag]pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan” (Doktrina ug mga Pakigsaad 90:24). Ang Langitnong Amahan ug si Jesukristo nasayod kon sa unsang paagi magtambayayong ang tanan nga mga butang. Nasayod usab Sila kon unsa ang maayo alang kanato tungod kay Sila nasayod ug nahigugma kanato sa hingpit.
Ang Langitnong Amahan ug si Jesukristo wala maglaom kanato nga magkinaugalingon sa pagsulbad sa atong mga kinabuhi. Kon kita mosalig Kanila ug magtugot Kanila sa paglakaw niining kinabuhia uban kanato, kita giawhag sa pagpadayon ug paghimo og desisyon nga makatabang kanato nga mapuslan ang atong mga kinabuhi.