Mga Tingog sa mga Santos sa Ulahing mga Adlaw
Ang Almuhadon diha sa Salog
Malipayon ko nga motabang sa akong inahan sa iyang buluhaton sa balay, apan nganong kanunay akong makakita og unlan sa salog?
Sulod sa daghang katuigan, mibisita ako sa balay sa akong inahan aron sa pagtabang kaniya sa iyang buluhaton sa balay. Siya 80 anyos na ug usa ka matinud-anon nga miyembro sa Ang Simbahan ni Jesukristo sa mga Santos sa Ulahing mga Adlaw.
Ang akong inahan nagpuyo nga nag-inusara sukad namatay ang akong amahan. Ang iyang labing dako nga kalipay mao ang pagduaw sa panimalay sa matag usa sa iyang tulo ka anak, paggahin og panahon uban kanila ug sa iyang mga apo, ug pagluto og pagkaon nga makapalipay.
Sa matag higayon nga mobisita ako sa balay sa akong inahan aron sa paglimpyo niini ug sa pagsiguro nga hapsay ang tanan, makakaplag ako og karaan nga almuhadon diha sa salog. Balik-balik nga puniton nako kini ug ibutang kini sa usa ka lingkuranan, nagreklamo sa akong kaugalingon mahitungod sa kawalay pagtagad sa akong inahan.
Sa sunod higayon nga ako mobalik aron sa pagbisita ug pagtabang sa akong inahan, makaplagan nako pag-usab ang almuhadon diha sa salog. Wala gayod akoy bisan unsa nga gisulti ngadto sa akong inahan mahitungod sa almuhadon, apan usa ka buntag nasabtan nako sa kataposan kon nganong anaa kini kanunay diha sa salog.
Ang akong inahan nagkinahanglan og humok nga butang diin magluhod ug mag-ampo. Siya usa ka tigulang nga babaye, apan ang iyang dili matarog nga hugot nga pagtuo maoy nakaingon nga siya magluhod ug mag-ampo kada adlaw. Mag-ampo siya alang sa iyang mga anak ug mga apo. Mag-ampo siya alang sa iyang mga higala. Mag-ampo siya alang niadtong labing nanginahanglan. Ug mag-ampo siya alang niadtong iyang kanunay nga gihigugma ug, gani sa iyang katigulangon, giatiman pa gihapon pag-ayo.
Karon, wala na ako moreklamo sa kaugalingon kon akong makita ang almuhadon diha sa salog. Usahay, moluhod gani ko sa humok nga ibabaw niini aron mag-ampo sa Langitnong Amahan, nga magpahayag og pasalamat alang sa hugot nga pagtuo ug ehemplo sa akong inahan.