Digital Lamang
Ang Saad sa Pagkahisakop
Gikan sa Brigham Young University nga pakigpulong sa Komperensiya sa Kababayen-an sa Abril 29, 2021.
Ang saad sa Relief Society mao nga kita mamahimong Zion society. Ang atong buluhaton isip mga sister sa Relief Society mao ang pag-awhag sa usag usa.
Tanan kita mianhi sa yuta uban sa pangandoy nga mahisakop. Usahay makakaplag kita og uban nga ikasuod, ug usahay lisod. Sa unsang paagi kita makatabang sa usag usa nga mobati sa siguradong pagdawat ug paghigugma nga atong nasinati didto sa langitnong panimalay?
Sa Simbahan, ang matag babaye nga nag-edad og 18 ug pataas sakop sa Relief Society. Karon dunay 7.5 ka milyon nga sakop niining lahi nga organisasyon. Bisan og karon nagserbisyo ka man sa Primary, Young Women, Relief Society, o Sunday School, labot gihapon ka sa Relief Society. Bisan og bag-o ka pang nahuman og high school, nagtrabaho na, inahan sa gagmayng mga bata, babaye nga nakasinati og diborsyo, o nabiyuda—o sa bisan unsang kombinasyon niini nga mga sitwasyon—ikaw sakop gihapon kaayo sa Relief Society.
Ang Saad sa usa ka Zion Society
Ang saad sa Relief Society mao nga kita mamahimong usa ka Zion society. Kon kita makahinumdom kon si kinsa kita ug sa mga pakigsaad nga atong gihimo, makita nato ang usag usa isip mahangtoron nga mga sister. Makaila kita sa usag usa gikan nianang dugay nang panahon samtang nagtinabangay kita sa pagpakig-away batok sa dragon ug sa iyang mga anghel (tan-awa sa Gipadayag 12:7) alang sa katungod sa pagpili ug tanan kita misalig kang Jesus nga motuman sa Iyang saad nga mahimo natong Manluluwas. Dihang nangandam kita sa atong panahon dinhi sa yuta, mainiton kitang nanghinaot nga ang tanan nga nakig-uban kanato nianang malampuson nga paningkamot sa pagbuntog ni Satanas mobalik ngadto sa langitnong panimalay human sa ilang pagsulay nga panahon isip mga mortal.
Kon magtinan-away kita matag usa gikan sa mahangtoron nga panglantaw, makita nato ang usag usa isip usa ka mahangtoron nga sister. Malipayon kita sa kalamposan sa usag usa, nag-inambitay kita sa usag usa nga mga kasubo, nagpasaylo kita sa usag usa nga mga sayop, ug kita naglig-on sa usag usa nga atong mga kahuyang. Tingali dili kita perpekto bahin niini, apan ang tanan nga gikinahanglan sa Ginoo mao nga kita magsugod sa pagbaton og kasingkasing nga andam (tan-awa sa Doktrina ug mga Pakigsaad 64:34). Samtang kita “andam sa pagtambayayong sa usag usa nga mga alant[o]son,” samtang kita andam sa “pagbang[o]tan uban niadto nga nagbang[o]tan” ug “paghupay niadto nga nagkinahanglan sa kahupayan,” samtang kita andam nga “mobar[o]g ingon nga mga saksi sa Dios” (Mosiah 18:8–9), nagtuman kita sa atong mga pakigsaad uban Kaniya.
Hinoon, adunay panginahanglan alang sa kalamboan. Ang mga pagtuon nagpakita nga ang unang rason nga ang katawhan motalikod sa relihiyon mao kay gibati nila nga gihukman o wala ihangop. Kana kasagaran kaayo nga makutlo kay sa doktrinal nga pagkasukwahi o kakulang sa pagtuo. Ang maayong balita mao nga ang sitwasyon sa tinuoray mahimo rang mapapha kon kita mobukas lang gayod sa atong mga bukton ug mga kasingkasing ngadto sa tanan. Makapaningkamot kita nga “mahimong usa ka kahayag, dili tighukom.”1 Butang kana nga Ginoo ra ang magbuot. Ang atong responsibilidad mao ang pagtunol sa atong bukas nga kamot ug kasingkasing. Kon mabuhat nato kana, makita nato nga nagmugna kita og luwas nga dapit alang sa pagpaambit, luwas nga dapit sa paglambo, luwas nga dapit sa pagkahimong mas maayo sa atong kaugalingon.
Motan-aw, Maminaw, ug Mosanong uban sa Gugma
Sa pagpraktis nga makasanong uban sa gugma aron ang Relief Society mahimong dapit diin ang matag babaye mobati nga siya nahisakop, naghunahuna mi nga basin makalingaw ang pagpaambit og usa ka sitwasyon ug pagsugyot og mga tubag. Asa sa tubag ang sa imong hunahuna pinakamaayo?
Sitwasyon #1: Diha sa miting sa sakramento, nakakita ka og misyonaryo kinsa nauli og sayo gikan sa iyang misyon.
-
A: “Nag-unsa man ka dinhi? Bag-o lang kang niadto sa misyon. Gikinahanglan ba nga mouli ka?”
-
B: “Lipay kaayo kong nakakita nimo. Sultihi ko mahitungod [sa dapit nga imong giserbisyohan].”
Ang labing maayo nga tubag mao ang “B.”
Sitwasyon #2: Nakakita ka og usa ka paresan nga young adult nga nahibaloan nimo nga nag-date.
-
A: “Nindot kaayong nakakita ko ninyong duha. Kumusta ang pag-eskwela ug ang trabaho?”
-
B: Mokidhat ug mosikdol sa batan-ong lalaki gamit ang siko ug sa kusog nga hagawhaw mangutana, “Mga kampana ba sa kasal ang akong nadungog gikan sa layo?”
Ang labing maayo nga opsiyon ang “A.”
Sitwasyon #3: Sa simbahan, nakit-an nimo ang usa ka magtiayon nga naminyo taod-taod na ug walay mga anak.
-
A: “Nganong wa man gyod mo manganak? Kanus-a kaha mo magkaanak? Nagkatigulang na ra ba mo!”
-
B: “Paglingaw lang una mo karon nga wala pay mga anak. Gusto ba mo’g usa sa akong anak?”
Pangutana kini nga makalipat. Ang duha ka tubag parehong kiwaw ug walay pagbati!
Sitwasyon #4: Sa usa ka service project sa ward, gi-assign ka nga motabang sa usa ka miyembro nga wala pa maminyo.
-
A: “Maanindot nga makaari ka sa pagtabang. Tingali maayo kaayo ka. Nganong wala ka maminyo?”
-
B: “Ganahan kong mahibalo pa og dugang mahitungod nimo. Sultihi ko mahitungod sa imong trabaho [o pamilya o mga interes].”
Ang labing maayo nga tubag mao ang “B.”
Sitwasyon #5: Ang imong higala miingon nimo nga makigbulag siya sa iyang kapikas.
-
A: “Sori kaayo. Ania ra ko kanunay aron maminaw kon kana makatabang.”
-
B: “Ikaw ba misulay sa pagsulbad niini? Nabalaka ko bahin sa mga bata. Nagpuasa ka ba ug nag-ampo mahitungod sa imong desisyon?”
Ang labing maayo nga tubag mao ang “A.”
Niini nga praktis, ikaw ba nakatino og mga paagi nga pwedeng buhaton natong tanan aron mas maayo ang pagtan-aw, pagpaminaw, ug pagsanong uban sa gugma? Ang mosunod nga tulo ka ideya makatabang usab nga kita makamugna og luwas nga dapit alang sa atong mga sister.
1. Pangita og Dapit nga ang Matag Usa Makatampo
Hunahunaa ang kababayen-an sa imong Relief Society. Kinsay nagpanuko sa pag-apil, nagduhaduha sa pagsulti, o mibalibad nga moapil? Gusto gayod nato nga ang matag sister mahimong kabahin sa atong Zion society. Sa unsang paagi kita mahimong usa sa kasingkasing ug usa sa hunahuna”? (Moises 7:18). Sa unsang paagi atong mapaapil ang matag sister?
Usa ka paagi mao ang pagtan-aw sa mga hinungdan. Usa ka presidente sa Relief Society sa ward, nga si Chris, adunay kinaiya sa pagpangita niadtong mga tawo nga tingali wala maapil. Kon sila iyang makita, timbayaon niya sila pinaagi sa pahiyom ug tan-awon sila sa mata, maminaw og maayo unsay ilang isulti. Tungod sa iyang tinuoray, nakatutok nga atensiyon, mobati sila nga nakita ug nasabtan. Samtang maminaw siya, sa kasagaran iyang madiskobrehan ang ilang mga kalig-on ug ang mga paagi nga sila makatampo. Iyang mamatikdan nga adunay wala magamit nga potensiyal o natagong mga talento nga naghulat nga mapalambo diha sa matag usa. Niana nga dinasig nga proseso, ang mga indibidwal madala ngadto sa pundok sa ebanghelyo ni Jesukristo, ug tibuok pamilya ang mapanalanginan.
Mapalapad nato ang atong sirkulo hangtod ang matag sister nagkasumpay sa paggunitay. Mamahimo kitang usa, andam alang sa Zion society nga maoy resulta sa atong nagkahiusa nga Relief Society karon.
Si Presidente Henry B. Eyring, Ikaduhang Magtatambag sa Unang Kapangulohan, miingon: “Gani … ang mga panaglahi mahimong tan-awon isip usa ka oportunidad. Ang Dios motabang kanato nga makakita og usa ka kalahian ngadto sa uban dili isip usa ka tinubdan sa kapungot apan isip usa ka kontribusyon.”2 Ang mga panaglahi makahimo nga buhong sa atong kalibotan. Kon kita makamatikod ug makapakita sa atong mga kalig-on gawas sa atong kaugalingon, mas makahimo kita sa buluhaton sa Ginoo sa Iyang paagi.
2. Motan-aw lapas sa Klaro nga mga Kalainan
Kadaghanan kanato gusto nga magmahinangpon, apan usahay dili kita makasulti o mahadlok nga masipyat. Dili kita mahibalo unsay isulti o unsaon sa pag-usab ang paagi sa atong pagsanong sa mga tawo. Diha sa Mateo 8:1–34, atong makita unsa ka maayo ang paagi ni Jesus sa pagtabang sa uban sa pagkahisakop dihang Siya
-
miayo sa sanlahon;
-
mitabang sa usa ka sulugoon sa Romano nga Opisyal;
-
miayo sa ugangan nga babaye ni Pedro;
-
mipagula sa daotang mga espiritu gikan sa daghang pundok sa katawhan;
-
midasig sa usa ka eskriba nga Judeo;
-
mitawag sa tawo kinsa nagbangotan sa iyang amahan sa pagsunod Kaniya;
-
mipahunong sa unos ug gihupay ang kasingkasing sa nalisang Niya nga mga disipulo;
-
miayo sa duha ka tawo nga nagpuyo sa langob nga gihimong lubnganan kinsa gisudlan og mga espiritu ug gisinggitan Siya; ug
-
miuyon nga mobiya gikan sa maong dapit dihang ang matuotuohon nga mga katagibalangay mihangyo Kaniya sa pagbiya.
Ang Manluluwas nga si Jesukristo adunay mga mata nga makakita lapas sa mga kalainan ug sa sulod sa atong kasingkasing, potensiyal, ug mga tinguha. Ang atong kapangulohan nagpadangat og usa ka pagdapit sa pagkahimong mas mabination, pagpakita og mas tinuoray nga interes, ug motanyag og mahigalaong kamot.
3. Ilakip Kadtong Tingali Anaa sa Gawas nga Naglili sa Sulod
Nagpuyo kita sa panahon nga ang mga saad sa Dios ngadto sa Iyang katawhan sa pakigsaad nagsugod sa pagkatuman. Isip mga anak sa Dios, kita nagkatibulaag gikan sa Iyang presensiya. Niini nga kalibotan, ubos kita sa mga pagsulay ug mga kasubo. Hinoon, ang atong Ginoo nga si Jesukristo misaad nga kita Iyang pundokon sama sa himongaan nga motigom sa iyang mga pisô ilawom sa iyang mga pako kon kita maghinulsol ug mobalik ngadto Kaniya uban ang hingpit nga katuyoan sa kasingkasing (tan-awa sa 3 Nephi 10:6). Ang Manluluwas nagpundok kanato pinaagi sa Iyang pag-amuma ug paghigugma. Sama sa mga pisô, kita dali rang maapektohan ug kita nagdepende sa Iyang grasya. Isip mga disipulo ni Kristo, kita usab makatabang sa pagpundok sa Iyang katawhan. Kini magdala kanato og kalipay.
Tanan kita adunay managlahi nga dalan, apan kita makapalakaw kanila nga magdungan. Diha sa 1 Mga Taga-Corinto 12:12–27, si Pablo mikompara sa tawhanong lawas ngadto sa Simbahan aron ipakita nga ang matag indibidwal nagdala og importanting tahas diha sa lawas sa Simbahan. Kitang tanan adunay mga kalig-on ug mga kahuyang. Tanan kita adunay butang nga ikatampo sa pagdala sa uban ngadto kang Kristo, ug, sa samang higayon, tanan kita nagkinahanglan nga mas mahiduol Kaniya.
Kitang tanan, lakip ang mga bata ug kabatan-onan, sa aktibong paagi mopundok sa uban aron sila mobati sa gugma sa Dios ug mamahimo nga mga disipulo ni Kristo. Kon magtinguha kita og pagpadayag, ang Espiritu mogiya kanato, ug masayod kita unsay buhaton ug isulti aron matabangan ang uban nga mobati nga sila nahisakop.
Usa ka Pagdapit
Ang Relief Society ba makahatag sa saad sa pagkahisakop? Oo! Adunay daghan kaayong kalainan sa atong mga sirkumstansiya, ug sa gihapon kitang kababayen-an susama og sukaranang mga kinaiya ug mga gilaoman sa kahangtoran. Ang kababayen-an, adunay dakong panginahanglan—ug kahanas—sa pagkonektar sa uban, ug tanan kita nagkinahanglan nga mahisakop.
Ang atong buluhaton isip mga disipulo ni Kristo mao ang paghimong sayon sa mga tawo sa pagduol ngadto Kaniya. Tanan kita naningkamot sa pagtuman sa mga sugo ug pagsunod sa ehemplo ni Jesukristo, apan tanan kita masayop sa lain-laing paagi. Apan makapadayon kita sa pagpaningkamot nga mahimong mas maayo uban sa makatubos nga gahom sa Manluluwas. Ang atong buluhaton isip mga sister sa Relief Society mao ang pag-awhag sa usag usa.
Moawhag kami kaninyo sa padayon nga paglig-on sa mga higot sa pagka-sister uban sa matag babaye sa inyong ward o branch, nga nag-edad og 18 ngadto sa 108. Ang matag indibidwal adunay talagsaon nga bili ug walay kinutoban nga potensiyal, mao pangutan-a ang imong kaugalingon: Unsay akong mahimo nga akong mapalambo kana nga potensiyal ug makatabang nila sa pagbati nga sila adunay bili? Ang Relief Society nagkinahanglan nga mosuporta sa tanang kababayen-an, sa pagtabang nila nga kanunayng mobati og usa ka bahin sa atong balaanon, mahangtoron nga panag-igsoonay.
Mopamatuod kami nga ang Ginoo, atong Manluluwas ug Manunubos, nagahulat uban sa nakatuyhad nga mga bukton aron sa pagdala sa matag usa ngadto sa Iyang panon. Siya mainitong naglaom nga kita motabang niining mahinungdanong paningkamot sa pagpundok sa pag-andam alang sa Iyang Ikaduha nga Pag-anhi. Unta kita mopadangat sa saad sa pagkahisakop ngadto sa matag sister sulod sa mga sirkulo sa atong impluwensiya.