Mga Baroganan sa Pagpangalagad
Paghimo sa Pagpangalagad nga Makahuluganon
Kon kamo naghunahuna kon ang inyong mga pagpangalagad makahuluganon ba, ikonsiderar kini nga mga ideya.
Sayon ra nga maghunahuna kon ang atong pagpangalagad nakahimo ba og kalainan, ilabi na kon kita nagsagubang sa atong kaugalingong panlimbasog.
Sa akong panahon sa kinabuhi nga wala pa ko nag-wheelchair, ganahan ko magtan-aw og listahan sa moserbisyo nga ipasa-pasa diha sa Relief Society. Ako sa kasagaran mopalista sa paghatag og serbisyo. Mao kadto ang usa ka paagi sa pagpakita sa akong kaandam sa “pagtambayayong sa usag usa nga mga palas-anon” (Mosiah 18:8).
Gikasubo ko nga dili nako makahimo sa paglista aron moserbisyo. Sa pagkatinuod, ako dili na gayod makasulat sa akong ngalan. Tungod sa akong kakulangan, dili na gani ko makakupot sa listahanan. Walay usa nga milaom kanako sa pagsulat ngadto niini. Apan, ah, gusto gayod ko! Ang pagserbisyo mogakos kanato sa mga bukton sa gugma sa Dios ug mokonektar kanato ngadto sa uban. Ako nanginahanglan gayod kaayo nianang pagbati sa koneksiyon sa akong kaugalingon.
Tungod kay nagkinahanglan ako og mga tawo nga motabang sa pag-amuma kanako, ang akong pagserbisyo ingon og dili tumbas sa paningkamot nga gikinahanglan sa uban sa pagtabang kanako. Kadto nga listahanan nahimong usa ka pahinumdom sa unsay dili na nako mahimo—bisan lang unta hangtod ang akong tigpangalagad nga sister makakita sa akong gipangandoy.
Nangutana siya nako kon unsa ang akong gusto nga buhaton aron makaserbisyo, dili lang unsa akong gikinahanglan nga mahimo alang kanako. Dayon iyang gisulat ang akong ngalan diha sa listahanan. Miadto siya sa akong balay ug mitabang nako sa pagluto sa pagkaon nga miboluntaryo ko sa pag-andam alang sa uban. Wala gayod siya misugyot nga ako ang nanginahanglan og daghang tabang sa akong kaugalingon nga kinahanglan dili ko maningkamot sa pagtabang sa uban. Nalipay siya nga migahin og panahon uban nako.
Sa kataposan, nakaamgo ko nga ang akong mga paningkamot bililhon. Uban sa tabang sa akong pagpangalagad nga sister, ako nakahimo sa pagbuhat og butang. Bisan kon kana nga butang adunay unsang kahulogan o wala ni bisan kinsa, kini nakahimo og kalainan ngari kanako. Bisan og kini dili direktang nakahatag og kaayohan sa akong pamilya o nakaayo sa akong lawas, kini nakatabang sa akong kasingkasing.
EmRee Pugmire
Utah, USA
Ubanan sa Iyang Tabang, Kamo Labaw Pa Kaysa Paigo
City of Zion Translated [Siyudad sa Zion Nabalhin sa Pagkahimaya], ni Del Parson; litrato sa magnifying glass gikan sa Getty Images
Komon ra ang mobati nga dili sarang sa paghimo sa buhat sa Ginoo. Ang propeta nga si Enoc mibati sa ingon usab niana nga paagi. Sa dihang ang Ginoo misugo kaniya sa pagtawag sa katawhan og paghinulsol, siya nabalaka tungod kay siya “apan ako usa lamang ka batan-on, ug ang tanan nga mga katawhan nagdumot kanako; kay ako dili maayo nga mosulti”(Moises 6:31).
Apan ang Ginoo misaad nga Siya magauban kang Enoch ug nga ang Iyang Espiritu diha kaniya, ug sa “imong tanan nga mga pulong Ako mohatag og kaangayan; … busa,” Siya midapit, “lakaw uban kanako” (Moises 6:34).
Si Enoch nagmasulundon ngadto sa unsay gisugo sa Ginoo, ug siya nahimo nga usa ka dakong impluwensya sa mga katawhan, dili tungod sa iyang kaugalingong gahom apan tungod sa “gah[o]m sa pinulongan nga gihatag sa Dios kaniya” (Moises 7:13).
Mga Baroganan nga Hunahunaon
Kon kamo naghunahuna kon ang inyong mga pagpangalagad makahuluganon ba, ikonsiderar kini nga mga baroganan:
-
Pagsabot sa pagpangalagad ug sa mga katuyoan niini makatabang nato sa paghukom sa atong mga paningkamot sa mas tukma nga paagi.
-
Ang pagpangalagad labaw pa kay sa pag-ugmad og mas lig-on nga mga relasyon; mahitungod kini sa pagtabang sa uban nga mapalig-on ang ilang relasyon uban sa Manluluwas.1
-
Ang pagpangalagad dili lamang usa ka buluhaton; kabahin kini kon giunsa nato sa pagsunod ang atong mga pakigsaad sa pagserbisyo Kaniya pinaagi sa pag-amuma sa usag usa.
-
Ang pagpangalagad wala nagsunod og usa ka gitino nang daan nga pamaagi. Nagtabang kini kanato sa pagpahiangay sa sitwasyon ug mangita og inspirasyon sa pagpangalagad sama sa gibuhat sa Manluluwas.
-
-
Ang pagsabot kon sa unsang paagi ang Dios nasayod sa atong pagpangalagad makausab sa atong panglantaw.
-
Ang Dios dili mosukod sa pagpangalagad base sa talagsaong mga resulta o kon ang atong mga paningkamot gani gipasalamatan (tan-awa ang ehemplo ni Oliver Granger sa Doktrina ug mga Pakigsaad 117: 12–13).2
-
Kon ang atong tinguha maayo ug mohimo kita og tinuod nga paningkamot, ang atong pagpangalagad makahuluganon ngadto Kaniya (tan-awa sa Doktrina ug mga Pakigsaad 4:2, 5).
-
Ang Dios andam nga mopalambo bisan sa atong “gamay o dili mamatikdan nga pag-alagad”3 (tan-awa sa Doktrina ug mga Pakigsaad 123:17).
-
Unsa ang Atong Mabuhat?
Imbis nga mabalaka mahitungod sa unsay wala ninyo mahunahunai nga kamo makabuhat, pagmainampuon nga mokonsiderar kon unsa ang inyong mabuhat. Dayon buhata. Samtang kamo mobuhat sa ngalan sa Ginoo, Siya mopalambo sa inyong mga paningkamot ug mogamit niini sa pagpanalangin kaninyo ug sa uban (tan-awa sa 2 Nephi 32:9).