Mga Sukaranan sa Ebanghelyo

Ang Pagkapukan usa ka Bahin sa Plano sa Dios

Tungod sa Pagkapukan, kita nakaanhi sa yuta ug usa ka adlaw makabalik sa pagpuyo uban sa atong Amahan sa Langit.

Adam and Eve in the Garden of Eden [Adan ug Eva diha sa Tanaman sa Eden], ni Robert T. Barrett; Adam and Eve Cast Out of the Garden [Adan ug Eva Gipapahawa sa Tanaman], ni Gary L. Kapp, dili mahimong kopyahon; Adam and Eve [Adan ug Eva], ni Jay Bryant Ward; The Resurrection [Ang Pagkabanhaw], ni Harry Anderson

Diha sa Tanaman sa Eden, ang Dios misugo ni Adan ug Eva nga dili mokaon sa bunga sa kahoy sa kahibalo sa maayo ug daotan. Dayon Siya miingon kanila, “Ikaw mahimo nga makapili alang sa imong kaugalingon, … apan, hinumd[o]mi nga Ako nagdili niini”(Moises 3:17). Gitintal ni Satanas si Eva sa pagkaon sa bunga sa kahoy. Siya miingon kaniya [Eva], “Kamo mahimo ingon nga mga dios, masay[o]d sa maayo ug sa da[o]tan” (Moises 4:11). Siya mikaon sa bunga ug dayon mipakigbahin niini ngadto ni Adan. Ang Dios mipapahawa kanila gikan sa Tanaman sa Eden.

Ang Pagkapukan

Sa dihang si Adan ug si Eva mibiya sa Tanaman sa Eden, wala na sila sa presensiya sa Dios. Kini nga pagkabulag gikan sa Dios gitawag og espirituhanon nga kamatayon. Ang pagbiya sa tanaman nagpasabot usab nga si Adan ug si Eva nahimong mortal ug sa ingon mamatay. Bisan tuod si Adan ug si Eva dili na uban sa Dios ug karon mga mortal na, malipayon ug malaomon sila sa dihang nakita nila nga sila mahimong mouswag (tan-awa sa Moises 5:10–11). “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (2 Nephi 2:25).

Usa ka Panahon sa Pagsulay

Sa dihang natawo kita, nagpuyo kita nga layo gikan sa Dios, sama ni Adan ug ni Eva human sa Pagkapukan. Si Satanas motintal kanato sa paghimo og dili maayo nga mga pagpili. Kini nga mga tintasyon motugot kanato nga masulayan ug mopili tali sa husto ug sayop (tan-awa sa Alma 12:24). Matag higayon nga kita makasala ug dili maghinulsol, magkalayo kita gikan sa Langitnong Amahan. Apan kon kita maghinulsol, kita mas maduol ngadto sa atong Amahan sa Langit.

Pisikal nga Kamatayon

Ang kalibotan gilalang alang kanato (tan-awa sa 1 Nephi 17:36). Ang Pagkapukan nakapahimong posible alang ni Adan ug Eva sa pagtuman sa sugo sa Dios nga magbaton og mga anak, nga nagtugot kanato nga moanhi sa yuta sa usa ka pisikal nga lawas. Ang atong mga lawas mamatay sa umaabot nga adlaw, apan ang atong mga espiritu magpadayon nga mabuhi. Ang atong mga lawas ug mga espiritu maghiusa pag-usab kon kita mabanhaw.

Naluwas pinaagi ni Jesukristo

Pinaagi sa maulaon nga gahom ni Jesukristo makabuntog kita sa pisikal ug espirituhanon nga kamatayon. Tungod kay nabanhaw si Kristo, ang tanan nga natawo dinhi sa yuta mabanhaw ug mabuhi hangtod sa kahangtoran. Ug tungod kay si Kristo nag-antos alang sa atong mga sala, kita makahinulsol ug mapasaylo aron makapuyo kita pag-usab uban sa atong Amahan sa Langit.

Gikan sa mga Kasulatan

Unsa kaha ang mahitabo kon wala gikaon ni Adan ug ni Eva ang bunga sa kahoy sa kahibalo sa maayo ug sa daotan? (Tan-awa sa 2 Nephi 2:22.)

Unsa ang pipila ka panalangin sa Pagkapukan? (Tan-awa sa Moises 5:10–11.)

Unsa ang mahitabo kanato kon wala ang mga panalangin sa Pag-ula ni Kristo? (Tan-awa sa 2 Nephi 9:7–10.)

Ania Usab Niini nga Isyu

Nanghinaot kami nga giganahan kamo sa pagkat-on mahitungod sa Pagkapukan. Ania ang ubang pipila ka mga pulong sa ebanghelyo gikan niini nga isyu:

Tintasyon: Bisan unsa nga mosulay sa paghimo kanato nga mohimo og sayop nga pagpili. (Tan-awa sa mga pahina 8, 10.)

Panagpundok: Pagdapit sa uban nga moapil kanato diha sa ebanghelyo. Makatabang kita sa pagpundok sa uban pinaagi sa misyonaryo nga buhat. (Tan-awa sa mga pahina 9, 16.)

Jehova: Ang ngalan sa Dios sa Israel, si Jesukristo. (Tan-awa sa mga pahina 12, 42.)