Digital Lamang

Sayop Ba Nako nga Dalaga Ko, o Mao Kini ang Tuyo sa Dios alang Kanako?

Ni Brittany Beattie

Mga Magasin sa Simbahan

Upat ka baroganan nakatabang kanako nga makakaplag og paglaom sa bisan asa nga tubag. Ug akong naamgohan nga ang duha ka managlahing pangutana mas importante sa akong kinabuhi.

Kon ang atong pagka-single taas ra nga panahon kay sa atong gilaoman, natural lang nga makapangutana ta sa atong kaugalingon, “Single ba ako tungod kay may butang ko nga nabuhat (o wala mabuhat) o mao ba gyod kaha ni ang tuyo sa Dios alang nako?” Sa makapainteres nga paagi, ang “oo” sa bisan asa niini nga pangutana sa sinugdanan magdala og paglaom ug kasubo. Apan samtang akong gipamalandongan ang akong estado sa pagkadalaga sulod sa mga katuigan, ang upat ka baroganan—tali sa daghan pang uban—nagdala kanako og paglaom alang sa bisan asa nga tubag niini nga pangutana. Ug akong nadiskobrehan hinoon nga adunay duha ka mas maayong pangutana sa tinuod lang nga akong ikapangutana—mga pangutana nga magtugot kanako nga mapulihan ang akong mga kabalaka ngadto sa hingpit nga kalipay, katuyoan, ug kalamboan (tan-awa sa mga baroganan 3 ug 4 sa ubos).

Baroganan 1: Ang Dios makahimo sa “tanan nga butang … nga magtambayayong alang sa [atong] kaayohan.”

Kon pamalandongan nato nganong kita wala pa maminyo, daghan ang tingali mosulod sa atong hunahuna, sama sa “Mas maayo ba kaha unta to kon mitambong ko og daghang sosyal nga mga outing?” o “Unsa kaha kon mihangyo ko nianang tawhana nga makig-date?” Bisan unsa pa tingali ang posibling mga rason, kon maghunahuna kita nga wala pa kita maminyo tungod sa butang nga atong nahimo o wala himoa, makakaplag kita og kalig-on dinhi niini nga kamatuoran gikan sa Doktrina ug mga Pakigsaad 90:24: “Pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan, kon kamo maglakaw nga matar[o]ng ug mahinumdom sa pakigsaad diin kamo nagpakigsaad sa usag usa. ”

Bisan kon maminyo man kita karon nga may nahimo kitang lahi sa nangagi, makakaplag kita og kalig-on sa pagkahibalo nga kon tumanon nato ang atong mga pakigsaad ug magpaduol kang Kristo diha sa hugot nga pagtuo pinaagi sa pagtuon sa kasulatan, sa pag-ampo, ug sa pagkadisipulo, dayon makasalig kita nga ang tanan nga butang “magtambayayong alang sa [atong] kaayohan.” Kon magtinguha kita sa pagsunod kang Kristo, ang Langitnong Amahan motabang nato sa pagkat-on gikan sa atong nangagi nga mga kasinatian ug magamit kini sa pagpanalangin kanato sa umaabot. Ang saad sa mahangtoron nga kaminyoon dili mawagtang alang niadtong mga magpakabuhi nga matarong.

Baroganan 2: Ang Dios mahunahunaon sa mga detalye sa atong kinabuhi.

Dihang si Presidente Henry B. Eyring, Ikaduhang Magtatambag sa Unang Kapangulohan, mihatag sa iyang pakigpulong sa kinatibuk-ang komperensiya nga “O Hinumd[o]mi, Hinumd[o]mi” sa Oktubre 2007, wala ko makasabot sa dako kaayong epekto niini sa akong kinabuhi. Sa gihapon akong gilihok ang pagdapit sa pagpasidungog ug pagrekord sa gihimo sa Ginoo sa kinabuhi sa akong pamilya matag adlaw.¹ Samtang dili ko 100 porsyento nga makanunayon sulod sa mga katuigan, nakasulat ko og liboan ka mga paagi nga ako gigiyahan sa Ginoo sa akong kinabuhi, sa kasagaran sa ingon og ginagmay nga mga paagi. Kining yano inadlaw-adlaw nga pag-praktis (ug sama sa tanan pang uban nga mga paningkamot, nagkinahanglan kini og praktis aron mahimong mas maayo niini) naghatag kanako og dako kaayong kalipay samtang mibati ko sa gugma sa Langitnong Amahan ug giya alang kanako sa kasagaran sa tibuok gayod matag adlaw.

Kana nga kasinatian ug kahibalo nakatabang usab kanako sa pagkaplag og kalig-on ug paglaom kon maghunahuna ko nga ako dalaga pa kay mao kini ang buhat nga gusto sa Langitnong Amahan nga ipabuhat kanako karon. Pinaagi sa kanunay nga pagsulat kon unsa Siya sa gagmay nga paagi nagmahunahunaon sa akong adlaw, mobati ko og hingpit nga kalinaw nga Siya mogiya kanako diha sa usa sa labing importante nga mga desisyon alang sa kahangtoran. Ang pagtabang kanako nga makakita og matarong, matinumanon sa pakigsaad nga kapikas dili butang nga Iyang mataligam-an. Makabaton ako og pagsalig nga Siya mogiya kanako samtang buhaton nako ang akong bahin sa pagpakabuhing takos, pagtinguha, ug paglihok subay sa mga pag-aghat sa Espiritu Santo. Mobati ako og kalinaw ug hingpit nga kalipay tungod kay misalig ako sa Langitnong Amahan ug ni Jesukristo nga mogiya sa akong kinabuhi.

Samtang gusto gayod akong maminyo, mas gusto pa nako nga mosunod sa plano sa Langitnong Amahan alang kanako. Misalig ko Kaniya tungod kay nasayod ko nga Siya nagmahunahunaon sa mga detalye sa akong kinabuhi. Mao nga imbes manobra ang pagpokus bahin sa kaminyoon, ako mitinguha og pagpadayag mahitungod sa kon unsa nga dalan sa kinabuhi ang Iyang gusto nga akong subayon karon gayod ug unsaon nako nga makaserbisyo sa akong pamilya ug komunidad sa ubang mga paagi.

Baroganan 3: Ang Dios adunay ipabuhat kanako.

Ngadto kang Moises, ang Dios miingon, “Ako adunay usa ka buhat alang kanimo, Moises, akong anak” (Moises 1:6). Si Joseph Smith nakahibalo gikan ni Moroni “ang Dios adunay ipabuhat kanako” (Joseph Smith—Kasaysayan 1:33). Ang matag usa kanato usab adunay buhat nga buhatonon. Ug o, unsa ka makagagahom sa atong panglantaw bahin sa pagka-single kon kini atong lantawon subay sa buluhaton nga gikinahanglan sa Dios nga ipabuhat sa matag usa kanato. Imbes tan-awon ang pagka-single isip butang nga maoy akong “kulang” nga matuman ang buluhaton sa Dios alang kanako, nakadiskobre hinoon ko og usa ka importanting katuyoan kon tan-awon nako kini isip oportunidad aron makatampo sa lainlaing paagi sa buluhaton sa Ginoo niining ulahing mga adlaw.

Si Presidente Nelson mitudlo: “Kamo ang mga anak nga maoy gipili sa Dios nga mahimong kabahin sa Iyang batalyon atol niining dakong kinatumyang bahin diha sa dugay na nga pakigbugno tali sa maayo ug sa daotan—tali sa kamatuoran ug sa sayop. Dili ko matingala kon, ang tabil tangtangon na unya sa sunod kinabuhi, atong mahibaloan nga ikaw sa tinuod nangaliyupo sa atong Langitnong Amahan nga ireserba sa pagkakaron. Dili ako makalitan nga mahibalo nga didto sa premortal nga kinabuhi imong gihigugma sa hilabihan ang Ginoo hinungdan nga misaad ka nga panalipdan ang Iyang ngalan ug ang ebanghelyo atol niining nagkaguliyang nga talan-awon sa kalibotan. Usa ka butang nga sigurado: Ikaw anaa sa balay ni Israel ug ikaw gipadala dinhi aron makatabang sa pagpundok sa pinili sa Dios.”²

Kini nga panglantaw nagdapit kanako nga usabon ang pangutana nga “Tuyo ba sa Langitnong Amahan nga dalaga ko hangtod karon?” ngadto sa “Unsa ang tuyo sa Langitnong Amahan nga akong buhaton isip dalaga hangtod karon?” Ang pipila ka dugang nga mga pulong mohimo og dako nga kalainan. Tungod niana nga panglantaw, mag-ampo ko sa matag adlaw nga ang Langitnong Amahan motabang nako nga mahimong takos ug andam nga mohimo sa Iyang buluhaton bisan asa ko Niya gikinahanglan—dalaga man o dili. Unsaon nako sa pagkahibalo kon unsa nga misyon kana nga alang kanako?

Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo:

“[Ang Manluluwas] nagdapit kaninyo, isip mga anak nga lalaki ug mga anak nga babaye sa Dios, sa pag-andam sa espiritwal nga paagi sa pag-apil sa Iyang buluhaton. Nagkinahanglan kini sa inyong hingpit nga enerhiya, tin-aw nga panghunahuna, pinakamaayong paningkamot, ug kinahugtan nga pagtuo.

“Ang inyong misyon gikan sa Ginoo ipadayag diha kaninyo sa matag adlaw samtang mag-ampo kamo, magsiksik sa mga kasulatan, ug makugihong motugyan sa inyong kaugalingon sa buluhaton sa Ginoo. Mas mahibaloan ninyo ang inyong buluhaton gikan sa Ginoo samtang kamo sa malipayong paagi motugyan ngadto sa Iyang kabubut-on. Hinumdomi nga ang ginagmayng buhat sa pag-alagad ug debosyon ang makahimo og dagkong mga butang. Ang Ginoo miingon: “Busa, ayaw pagluya diha sa maayo nga buhat, kay kamo nagpahimutang sa tuk[o]ranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33).

“Himoa kining tuiga, kining bulana, kining adlawa nga usa ka bag-ong sinugdanan sa inyong kinabuhi.”³

Baroganan 4: Ang Dios adunay plano sa kalipay alang sa Iyang tanan nga anak.

Agig dugang sa pagpangutana kon unsa nga buhat ang tuyo sa Dios alang kanako nga buhaton karon dayon, pipila ka tuig ang milabay nakakat-on ko sa pagpangutana og laing pangutana nga parehong mapuslanon ug puno sa gahom: “Unsa kaha ang akong nahimo sa pagsunod sa plano sa kaluwasan ug kalipay?”

Samtang ang mahangtoron nga kaminyoon usa ka mahinungdanong bahin sa plano sa Langitnong Amahan sa kalipay alang sa Iyang mga anak, dili lang kay mao ra kana ang usa ka bahin niini. Mao nga kon kana nga oportunidad moabot (nga mao karon ang akong gipaningkamotang mabuhat), akong mapadayon ang akong pagtutok sa pagsunod sa ubang bahin sa plano sa Dios alang nako nga mahimo ra nakong idumala ug nga magdala og dako nga kalipay. Tali sa uban pa nga butang, ako

makahimo ug makatuman sa mga pakigsaad sa templo;
magpakabuhing takos ug maandam alang sa pagpaselyo sa templo;
moapil sa buhat sa kaluwasan ug kahimayaan pinaagi sa pagtabang nga mapundok ang Israel sa isig ka habig sa tabil;
mangalagad sa akong pamilya ug sa uban;
mangita og mga paagi nga makamatuto ug makaalima, bisan og ako walay kaugalingon nga mga anak;
moserbisyo sa matinud-anong paagi sa akong mga calling;
magmugna og inadlaw-adlaw nga mga kasinatian nga motabang nako nga mas maduol sa Langitnong Amahan ug ni Jesukristo;
magkat-on sa pagpaminaw Kaniya; ug
mopahayag og gugma ug pasalamat ngadto sa Langitnong Amahan ug ni Jesukristo.

Ug makahimo ako nga mainampoong mamalandong matag adlaw sa pangutana nga “ Kumusta man ang akong pagsunod sa plano sa kaluwasan ug kalipay?” Kana nga pangutana kanunay nga maghatag og oportunidad nga makadawat og pagpadayag ug paglambo.

Padayon inubanan sa Hugot nga Pagtuo

Wala ko mahibalo unsay giandam sa Langitnong Amahan alang sa akong umaabot, apan nagtinguha ko matag adlaw nga madiskobre ang sunod nga lakang sa buluhaton nga Iyang gusto nga ipabuhat kanako. Ug nahibalo ko nga ang karon ug ang umaabot mahimong matahom ug puno sa kamaya tungod kay nasayod ko nga ang Langitnong Amahan nahigugma kanako, sama usab nga Siya nahigugma kanimo. Nagpasalamat ko nga Siya nagtugot nako nga molambo “pagtul[o]n-an ngadto sa lain nga pagtul[o]n-an” (Doktrina ug mga Pakigsaad 98:12) ug “makaangkon og grasya ug dugang pa nga grasya” (Doktrina ug mga Pakigsaad 93:13), tungod kay basin og ang umaabot lisod kon makita dayon nako kini ang tanan. Nakaangkon ko og labihan nga kalig-on gikan sa matahom nga doktrina nga “ang akong hunahuna dili sama sa inyong hunahuna, ug ang akong mga laraw dili sama sa inyong mga laraw, nag-ingon ang Ginoo. Kay sama nga ang kalangitan habog kay sa yuta, ang akong mga laraw habog kay sa inyong mga laraw, ug ang akong hunahuna kay sa inyong hunahuna” (Isaias 55:8–9).

Tingali ako dili mahibalo sa hingpit nganong dalaga gihapon ko hangtod sa akong pagka-40, apan nakakaplag ko og talagsaong kahupayan, paglaom, ug kalipay diha sa kahibalo nga ang Langitnong Amahan nahibalo sa mga rason ug nga Siya mohimo sa “tanan nga butang … nga magtambayayong alang sa [akong] kaayohan.” Padayon akong adunay hugot nga pagtuo nga Siya naghunahuna sa mga detalye sa akong kinabuhi ug nga Siya motabang nako nga makatuman sa buluhaton nga maoy Iyang tuyo nga akong buhaton karon gayod samtang mapaubsanon ko nga magtinguha sa Iyang direksiyon. Sa pagkahibalo niana,ako nakakita niini nga usa ka hingpit nga kalipay ug pribilehiyo nga “ magmalipayon sa pagbuhat sa tanan nga butang nga ubos sa [akong] gah[o]m; ug unya … magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag” (Doktrina ug mga Pakigsaad 123:17).