Digital Lamang: Mga Hulagway sa Hugot nga Pagtuo

Usa ka Gasa sa Pagpamatuod ug Gugma

Ni Carter Hydrick, Texas, USA

Nahadlok ko nga ang pagpamatuod ni Brother Bravenec gamit ang musika natapos na, apan nakita nako siya nga hinay-hinay nga mipaingon ngadto sa organ.

Misugod mi sa pagkanta sa “Pag-ambit sa Sakramento,”¹. Nanghinaot ko nga unta mas paspas pa og gamay ang pagkanta, apan mipunting ko sa ordinansa.

Ang kakalma miabot kanako, nga nagpahimutang sa akong kalag. Ang tuno ug ang gipaspason sa organ eksakto ra kaayo nga maandam kami alang sa sakramento.

Mitan-aw ko dala ang pasalamat sa among organista samtang siya uban sa balaanong pagtahod giduyan sa musika. Naghunahuna ko sa una namong paghimamat walo ka tuig na ang milabay. Mga pipila lang ka bulan sa wala pa mi magkahimamat, ang dako kaayo nga mga sunog sa lasang [wildfires] milamoy sa panimalay sa pamilyang Bravanec, apil ang hapit tanang kabtangan sa pamilya. Samtang ang mga misyonaryo ug ako mipaambit og usa ka panaghisgot sa ebanghelyo diha sa iyang bag-o nga mobile nga panimalay [mobile home], gisultihan mi ni Brother Bravanec nga makatukar siya sa organ.

“Mopatukar ko aron ipahayag ang akong pagpamatuod ug gugma sa Dios,” miingon siya. Dayon gihisgotan namo ang mahitungod sa posibling pagtukar niya sa among ward kon mamiyembro siya sa Simbahan.

Mitan-aw ko sa mga tumoy sa iyang mga tudlo. May duha niini ang giputol. Nadasig ko sa iyang hugot nga pagtuo, apan naghunahuna ko mahitungod sa iyang kapasidad sa pagtukar.

“Nahibalo ko nga ang Simbahan magpasalamat nga ikaw makapaambit sa imong mga gasa,” miingon ko.

Nakontento si Brother Bravenec sa akong tubag, ug nagpadayon kami sa pagtagamtam sa maanindot nga leksiyon ug sa sinugdanan sa lig-ong paghigalaay. Nabunyagan siya sa wala madugay ug, sigon sa iyang gitinguha, nahimo nga among organista sa ward.

Paglabay sa katuigan sukad sa iyang bunyag, akong nabantayan nga ang mga hagit sa iyang kahimsog misangpot sa pagputol sa usa sa mga tudlo sa iyang tiil. Wala madugay human niana, si Sister Bravanec, kinsa naaktibo og balik sa Simbahan dihang namiyembro ang iyang bana, nasuta nga adunay stage 4 nga kanser. Dayon si Brother Bravanec naputlan na pod og laing tudlo sa tiil.

Wala na namo siya makita sulod sa pipila ka semana kay giatiman niya ang iyang asawa ug nakigbisog sa iyang kalisdanan. Apan wala madugay mibalik siya sa simbahan, nagpaambit sa iyang pagpamatuod pinaagi sa matahom nga tugtog sa organ.

Niadtong 2019, nahibaloan ni Brother Bravenec nga mawad-an siya og usa sa iyang tiil. Nasubo ko alang kaniya, naghunahuna nga ang iyang katuigan diha sa organ miabot na sa utlanan. Apan human sa pipila ka semana human sa pag-opera, si Brother Bravanec nagtangkihod nga miadto sa Simbahan gamit ang bag-o niyang artipisyal nga tiil.

Gamit ang mga sungkod aron sa pagbalanse, hinay-hinay siyang miadto sa organ. Didto, milingkod sa lingkoranan, gitangtang ang iyang artipisyal nga tiil, ug misugod sa pagtukar sa pasiunang musika. Pipila ka minuto human niadto, gipatukar niya ang pangbukas nga himno. Karon oras na para sa sakramento.

Nanganta mi sa “Tungod og alang kang Kristo,”—sa tono ug sa eksakto gayod nga gipaspason.