Dali, Sunod Kanako
Ang mga Panalangin sa Pagtuon sa Daang Tugon
Ni Presidente Mark L. Pace
Kinatibuk-ang Presidente sa Sunday School
Samtang kita mobasa sa mga kapitulo ug mga bersikulo niining karaan nga basahon sa kasulatan, kita mahimong mapalig-on sa espirituhanong paagi.
Si Jehovah mao si Jesukristo. Ang mga propeta sa Daang Tugon nanagna ug nagtudlo mahitungod ni Jesukristo.
Christ and the Creation [Si Kristo ug ang Paglalang], ni Robert T. Barrett
Welcome sa 2022 nga pagtuon sa Daang Tugon, uban sa Dali, Sunod Kanako nga kapanguhaan isip giya! Ang Daang Tugon mao ang koleksiyon sa mga kasulatan nga gitipigan sa kamot sa Dios aron atong mabasa ug kapamalandongan. Kini mahimong usa ka panalangin ug giya kanato niining ulahing mga adlaw.
Ang Daang Tugon naghatag kanato og usa ka talan-awon sa 3,500 ka tuig sa hugot nga pagtuo ug debosyon sa mga 4,000 BC ngadto sa 500 BC. Adunay mga 39 ka basahon sa Daang Tugon. Ang Genesis naglangkob sa upat ka mga dispensasyon ni Adan, Enoch, Noe, ug Abraham. Ang nahabilin nga 38 ka basahon, Exodo ngadto sa Malaquias, matinuoron ngadto sa dispensasyon ni Moises.
Samtang kita magbasa sa Daang Tugon, kita mas makaila sa mga propeta niini ug sa ilang mga pagtulun-an. Sila nagtudlo sa ebanghelyo ni Jesukristo. Sila nanagna ug nagpaabot sa pag-anhi sa Mesiyas. Ang ilang dinasig nga mga pagtulon-an gitagana alang sa atong panahon.
Samtang kita mobasa sa mga kapitulo ug mga bersikulo sa Daang Tugon, kita mahimong mapalig-on sa espirituhanong paagi. Ang Espiritu Santo modala sa atong atensyon sa pihong mga bersikulo sa kasulatan nga mahimong molig-on kanato samtang kita molantaw sa unahan sa Ikaduhang Pag-anhi sa Manluluwas.
Usa ka Makapadasig nga Pangutana
Gusto kong mopaambit og usa ka istorya mahitungod kon sa unsang paagi ang usa ka bersikulo gikan sa Daang Tugon nakaimpluwensya kanako sa akong tibuok kinabuhi.
Niadtong 1974, 17 anyos pa ko. Nalingaw ko sa kinabuhi isip junior sa high school. Nanglantaw ko sa unahan sa akong pagmisyon. Sa Oktubre 1974 Ensign nga magasin, akong nabasahan ang usa ka gamhanan nga mensahe gikan ni Presidente Spencer W. Kimball (1895–1985) nga giulohan og “When the World Will Be Converted [Dihang ang Kalibotan Makabig].”1 Ako kining gibasa sa makadaghang higayon. Hangtod niining adlawa kini nagdasig kanako.
Gipresentar ni Presidente Kimball ang usa ka dakong panan-aw sa paglambo sa Ang Simbahan ni Jesukristo sa mga Santos sa Ulahing mga Adlaw niini nga dispensasyon. Mitudlo siya bahin sa atong oportunidad ug responsibilidad sa pagdala sa ebanghelyo sa tibuok kalibotan. Si Presidente Kimball mikutlo og usa ka bersikulo gikan sa basahon sa Genesis. Nakapadasig kini kanako kaniadto ug kini mipadayon sa pagdasig kanako sa tibuok kong kinabuhi: “Aduna ba goy dili mahimo sa Ginoo?” (Genesis 18:14, nga giiskedyol alang sa pagtuon sa Pebrero).
Abraham on the Plains of Mamre [Si Abraham sa Kapatagan sa Mamre], ni Grant Romney Clawson; litrato sa mga misyonaryo ni Alicia Cerva; litrato sa yuta gikan sa Getty Images
Si Presidente Kimball miribyo sa istorya ni Abraham ug Sara. Si Sara mikatawa sa gisaad sa Ginoo nga siya ug si Abraham makabaton og anak nga lalaki. Sila wala napanalangini og mga anak. Sila kon sa karon, sa tinagsa, 90 ug 100 ang panuigon. Milapas na sila sa panuigon nga makaanak.
“Unya nangutana ang Ginoo kang Abraham, “Nganong mikatawa man si Sara … ?”
“Aduna ba goy dili mahimo sa Ginoo? Sa sunod tuig mobalik ako kaninyo ug si Sara manganak og batang lalaki”(Genesis 18:13–14).
Si Abraham ug si Sara mipakita og hugot nga pagtuo. Ang Ginoo mituman sa Iyang saad. Natawo si Isaac. Si Abraham nahimong amahan sa mga nasod.
Kalig-on sa Pag-atubang sa mga Hagit
“Aduna ba goy dili mahimo sa Ginoo?” Kini nga kasulatan sa Daang Tugon nakapalig-on kanako kon ako nag-atubang og mga hagit sa kinabuhi o mga kabalaka:
-
Isip usa ka bag-ong misyonaryo kon bation nako nga nabug-atan. “Aduna ba goy dili mahimo sa Ginoo?”
-
Human sa akong misyon, dihang si Anne Marie ug ako naghunahuna sa pagminyo ug gipangkulbaan mahitungod kon sa unsang paagi nga makabayad sa pagkaon, abangan, ug matrikula sa kolehiyo. “Aduna ba goy dili mahimo sa Ginoo?”
-
Isip bag-ong kinasal, pagka anaay mga anak ug sa pag-amgo sa mga pinansiyal nga mga kalisod sa kinabuhi. “Aduna ba goy dili mahimo sa Ginoo?”
-
Ang pag-atubang og mga hagit sa pagbalik og eskwela human sa kolehiyo [graduate school], sa nagtubo nga pamilya, ug pagsugod sa panarbaho. “Aduna ba goy dili mahimo sa Ginoo?”
-
Sa dihang ako ang presidente sa Spain Barcelona Mission, si Anne Marie ug ako balik-balik nga mitan-aw niini nga kasulatan sa dihang nagtudlo sa mga misyonaryo. “Aduna ba goy dili mahimo sa Ginoo?” Ang mga sulat ngadto sa among mga misyonaryo kanunayng naglakip og usa ka pakisayran sa “Aduna ba goy dili mahimo sa Ginoo?”
Usa ka Pundayon base sa Kasulatan
Moses Parting the Red Sea [Gibahin ni Moises ang Pulang Dagat], ni Robert T. Barrett; Adam and Eve in the Garden [Si Adan ug Eva diha sa Tanaman sa Eden], ni Lowell Bruce Bennett; pagkopya sa papan nga bato gikan sa Getty Images; litrato sa San Diego California Temple ni Monica Georgina Alvarado Zarate
Kini nga bersikulo sa kasulatan usa lang sa daghang mga ehemplo sa makapadasig nga mga bersikulo nga makita diha sa Daang Tugon. Sigurado ko nga daghan na ang nakapadasig kaninyo. Samtang kita magbasa sa makugihon ug mainampoon nga paagi sa Daang Tugon niining tuiga, ang Espiritu Santo mohatag sa atong atensyon og dugang nga piho nga mga bersikulo nga makapalig-on sa atong pagkakabig ngadto ni Jesukristo ug sa Iyang ebanghelyo.
Ang Daang Tugon naglangkob sa doktrina ug mga baroganan sa walay kinutuban nga importansya. Kini naglangkob sa mga panagna nga matuman pa. Nagtudlo kini kanato kon diin kita gikan. Ug kini nagtudlo kanato kabahin sa pakigsaad sama kang Abraham, nga gipatuman gihapon karon.
Ang Daang Tugon naghatag og pundasyon alang sa atong uban pa nga mga kasulatan. Kon magkadako ang atong pagsabot sa Daang Tugon, mas magkadako ang atong pagsabot sa uban pa nga mga bolumin [volume] sa mga kasulatan , tungod kay ang mga pagtulon-an niini mitumaw sa ubang mga basahon sa kasulatan:
-
Atol sa Iyang pangalagad, ang Manluluwas nagtudlo gikan sa Daang Tugon.
-
Si Lehi ug ang iyang pamilya midala sa mga palid nga tumbaga, nga naglangkob sa kasulatan gikan sa Daang Tugon.
-
Si Nephi nagtudlo ni Jacob pinaagi sa pagkutlo gikan sa Isaias sa Daang Tugon.
-
Atol sa Iyang pagbisita ngadto sa mga Nephite human sa Iyang Pagkabanhaw, si Jesukristo mikutlo sa Isaias ug sa Malaquias sa Daang Tugon.
Vision in the Kirtland Temple [Panan-awon sa Kirtland Temple], ni Gary Smith; The Second Coming [Ang Ikaduhang Pag-anhi], ni Harry Anderson
Ang mga propeta ug mga pagtulun-an diha sa Daang Tugon mao usab ang sentro sa mensahe sa Pagpahiuli sa ebanghelyo sa atong panahon:
-
Sa iyang unang pagbisita ngadto ni Propeta Joseph Smith, si Moroni mikutlo gikan sa Malaquias.
-
Ang Perlas nga Labing Bililhon naglangkob sa mga basahon ni Abraham ug Moises.
-
Sila si Moises, Elias, ug Elijah nagpakita ug mitugyan sa mga yawe sa priesthood ngadto ni Propeta Joseph Smith sa Templo sa Kirtland.
Unsay ang Katuyoan?
Samtang kita mobasa sa mga basahon sa Daang Tugon, kita kinahanglan nga mokonsiderar nga ang mga basahon gipili, ug gihatagan og gibug-aton, ug gihan-ay sa piho nga paagi alang sa usa ka teyolohikanhon nga rason. Kita mahimo sa tukma nga paagi makapangutana sa atong kaugalingon, “Ngano kini nga impormasyon gilakip ug unsa ang katuyoan niini?”
Samtang ang mga bahin sa Daang Tugon medyo lisod sa pagsabot, kinahanglan natong hinumdoman nga kini naglangkob og kamalamboon nga kinahanglan dili gayod ibalewala. Ingon sa gitudlo ni Joseph Smith nga “Kami nagtuo sa Biblia nga pulong sa Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.” (Mga Artikulo sa Hugot nga Pagtuo 1:8). Sa pagkatinuod kita napanalanginan pinaagi sa pagtuon sa pulong sa Dios!
Mahimong makatabang diha sa atong pagtuon sa Daang Tugon ang pagpangita sa mga tema ug mga panabot. Kita kinahanglang mangita og mga paagi aron mas masabtan og maayo nga ang Dios sa Daang Tugon mao usab ang Dios sa Bag-ong Tugon. Si Jehovah mao si Jesukristo. Sa unsang paagi ang pagtuon sa Daang Tugon makatabang kanato nga mas makaila og maayo sa atong Manluluwas?
Ubang dagkong mga tema nga akong makit-an diha sa Daang Tugon naglakip sa pakigsaad, pagkabalaan, buhi nga mga propeta, sakripisyo ug pagkamasulundon, hugot nga pagtuo ug paghinulsol, pagdayeg sa Ginoo, ug gahom sa Dios.
Samtang kita magtuon, kinahanglan natong hinumduman nga ang pagpadayag sa ulahing mga adlaw naghatag kanato og usa ka mas kompleto nga pagsabot sa Daang Tugon. Sama pananglit, salamat sa pagpadayag sa bag-ong panahon, kita nasayod nga ang mga propeta sa Daang Tugon naghupot sa Melchizedek nga Pagkapari ug ang mga propeta sa nag-unang mga dispensasyon nasayod ug nagtudlo sa ebanghelyo ni Jesukristo.
Ang mga Saad sa Propeta
Niini nga dispensasyon, sa makausa pa kita napanalanginan nga masayod nga ang mga propeta ug apostoles mohatag og dinasig nga mga pagtulun-an ug tambag.
Si Elder Quentin L. Cook sa Korum sa Napulog Duha ka Apostoles una nga mipaila sa Dali, Sunod Kanako—Alang sa mga Indibidwal ug Pamilya niadtong Oktubre 2018 nga kinatibuk-ang komperensya.2 Kini nga kapanguhaan nahimong usa ka dakong panalangin alang kanatong tanan. Sa katapusang tulo ka tuig ako nahatagan sa labing lawom ug makahuluganong mga kasinatian sa pagtuon sa kasulatan sa akong kinabuhi. Ako nakasiguro nga ang managsama nga mga panalangin nagpaabot sa matag usa kanato sa 2022.
Si Presidente Russell M. Nelson miingon nga samtang mousab kita sa atong mga panimalay ngadto sa mga santwaryo sa hugot nga pagtuo ug sentro sa pagkat-on sa ebanghelyo, kita makadawat sa upat ka piho nga mga panalangin:
-
“Paglabay sa panahon sa inyong adlaw nga Igpapahulay adlaw mahimong usa ka kahimut-an.”
-
“Ang Inyong mga anak magmahinamon sa pagkat-on ug pagsunod sa mga panudlo sa Manluluwas.”
-
“Ang impluwensiya sa kaaway sa inyong kinabuhi ug sa inyong panimalay mokunhod.”
-
“Ang mga kausaban sa inyong pamilya mahimong dako ug makapatunhay.”3
Ang mga saad ni Presidente Nelson lawom, ug kini tinuod. Kini nga mga panalangin nahimong usa ka reyalidad ug magpadayon sa 2022 samtang kita magtuon ug magkat-on gikan sa Daang Tugon.