Mga Tingog sa mga Santos sa Ulahing mga Adlaw
Sila Adunay usa ka Basahon ni Mormon Dinhi!
Samtang ako naggunit sa Basahon ni Mormon, gibati nako ang akong mga palas-anon nga gibanlas diha sa kainit sa gugma sa Manluluwas.
Gilitratohan ni Jacob A. Brown
Usa ka Sabado sa tunga-tunga sa tingtugnaw, ang akong asawa ug ako mipahimulos sa init apan tugnaw nga adlaw aron makig-ila ila og maayo sa among kasilinganan. Bag-ohay lang kami mibalhin gikan sa liboan ka milya gikan sa among panimalay padulong sa East coast sa Estados Unidos aron ipadayon ang oportunidad sa edukasyon ug panarbaho.
Nakahukom kami nga lakawon ang duol nga unibersidad nga wala pay usa kanamo nga nakabisita. Wala madugay among nakita ang punoang librarya sa unibersidad. Nalingaw kami sa pagbasa, ug ang akong asawa, nga usa ka estudyante sa post-graduate, nakoryuso kon unsa nga kapanguhaan ang lagmit iyang makit-an aron iyang tun-an. Tungod kay siya nagtuon sa relihiyoso nga kasaysayan, among gi-browse ang anaa sa librarya nga seksyon sa relihiyon. Samtang mipasiplat kami sa pipila ka makapaikag nga mga ulohan, usa ka gamay nga basahon nga pamilyar ang asul nga hapin nakadani sa akong mga mata.
“Sila adunay usa ka Basahon ni Mormon dinhi!” Mahinamon ko nga mihonghong.
Akong gikuha ang basahon gikan sa estante. Mas daan na kadto nga kopya, ug naghunahuna ko kon unsa na kaha kini ka dugay didto. Unsa gayod ang nakadani sa akong atensyon mao ang usa ka gamay nga gisukip nga gipapilit sa sulod sa atubangang hapin.
Ang gisukip usa ka mubo nga pagpamatuod sa usa ka magtiayon gikan sa Blackfoot, Idaho, USA. Sa ilang pagpamatuod, sila mipasabot unsa ang Basahon ni Mormon ug nganong importante kini. Sila mipaambit og mubo apan gamhanang pagpamatuod sa basahon, ug sila midapit sa mobasa nga mag-ampo aron masayod kon kini tinuod.
Ang ilang mga pulong yano, apan ang ilang mensahe midiretso sa akong kasingkasing. Tingali gituyo sa magtiayon ang ilang pagpamatuod sa basahon aron mabasa niadtong dili sa atong tinuohan. Tingali sila mihatag niini nga kopya sa usa ka tawo nga ilang kaila. Kinsay nasayod kon pila na kahigayon nga kini napasa pasa sa laing mga kamot o kon pila na ka milya ang nabiyahe niini nga misangpot sa librarya sa unibersidad?
Samtang akong gikuptan ang basahon sa akong mga kamot, ang Espiritu mipuno sa akong kasingkasing. Sa makadiyot, gibati nako ang akong palas-anon nga gibanlas diha sa kainit sa gugma sa Manluluwas.
Nianang adlawa sa librarya nagpadayon ko sa mga panalangin nga akong nadawat pinaagi sa pagbasa sa Basahon ni Mormon ug sa kaimportante sa pagpaambit sa akong pagpamatuod kabahin niini. Ang atong mga pagpamatuod mahimong mahulog sa “yuta nga batoon” o “sa maayong yuta” (tan-awa sa Mateo 13:3–9), apan importante nga kita mopakigbahin niini. Ang Dios mosiguro nga kini mahatod sa husto nga panahon, diha sa husto nga dapit, ug ngadto sa husto nga mga tawo.