Paghimo nga Tinuod sa mga Kasulatan alang sa Atong mga Anak
Ikonsiderar kini nga mga ideya alang sa pagtabang sa mga bata nga mobati sa katinuod ug sa epekto sa mga kasulatan.
Ginunting nga papel sa arka ni Noe pinaagi ni Brittany Call; mga paghulagway pinaagi ni David Green; mga litrato pinaagi ni Ryan Hender
Dili gayod ako makalimot niana nga adlaw. Sa akong klase sa Primary, si Brandon ug ang iyang higala nagsul-ob og mga bathrobe uban sa nahibilin sa klase nga nagbarog sa luyo sa mapilo-pilo nga lingkoranan. Among gidrama-drama ang istorya ni Alma ug Amulek sa dihang ang mga matarong gisunog, ug si Brandon ang nagdala sa papel ni Alma. Samtang gibasa niya ang kasulatan diin gipugngan sa Espiritu si Alma sa pagluwas sa katawhan, midagayday ang mga luha sa iyang mga aping. Sa kataposan mitan-aw siya kanako nga kaundangon, “Sister Boyack, dili gayod ako makaako og basa niini! Makaguol gayod kaayo!”
Kasagaran si Brandon medyo kiat sa lawak klasehanan. Apan nianang adlawa, gibati niya ang gamhanang espiritu. Nianang adlawa ang Basahon ni Mormon tinuod kaayo alang kaniya.
Paghimo nga Tinuod sa mga Kasulatan
Ang sugo nga gihatag sa Ginoo ngadto ni Adan magamit usab ngari kanato: “Itudlo kini ngadto sa imong mga anak, aron ang tanan nga mga tawo, bisan diin, kinahanglan maghinulsol, o sila dili makapanunod sa gingharian sa Dios” (Moises 6:57). Ang Ginoo nagpadayon sa susama nga mga pulong, “Ako mohatag nganha kanimo og usa ka sugo, sa pagtudlo niini nga mga butang sa gawasnon nga paagi ngadto sa imong mga anak” (Moises 6:58).
Isip mga hamtong kinsa nagpakabana mahitungod sa mga bata, gusto nato silang tabangan nga makakat-on sa paghigugma sa mga kasulatan. Usa ka paagi nga mabuhat nato kini mao ang paghimo nga sila mobati sa mga kasulatan nga tinuod ngadto kanila. Ang mga bata mahimong mahinamon ug andam sa paghimo og mga tumong sa pagtuon sa Daang Tugon kon kita motudlo kanila sa paagi nga ilang mabati nga ang mga kasulatan may kalabotan sa ilang mga kinabuhi (tan-awa sa 1 Nephi 19:23).
Adunay pipila ka paagi nga makatabang kita sa atong mga bata nga mobati sa katinuod ug sa epekto sa mga kasulatan.
Pag-Drama-Drama
Ang mga istorya sa Daang Tugon mahimong makapainteresado ug mabati nga tinuod pinaagi sa pag-drama-drama. Bisan kon kini mao ang pagsinina sama ni Noe ug pagpundok sa ilang hinimo [stuffed] nga mga hayop ngadto sa “arka”, paghimo og “langob” ilawom sa lamesa uban sa usa ka hinimo nga leon sa sulod ug ang inyong bata nga anak nga lalaki nga nagdala sa maisogon nga si Daniel, o ang inyong anak nga babaye nga nagdala sa walay kahadlok nga propeta nga babaye nga si Deborah nga nangulo sa iyang mga kaigsoonan isip mga kasundalohan sa Israel, ang pag-drama-drama mohimong makapainteresado ug mopabati nga tinuod ang mga istorya sa Daang Tugon.
Dili gayod ako makalimot sa adlaw mga dekada ang milabay sa dihang naglingkod ako diha sa sayo sa buntag nga seminary didto sa Michigan. Ang akong magtutudlo naghisgot mahitungod sa misyon ngadto sa mga Zoramite diha sa Basahon ni Mormon. Kalit lang, milayat siya sa lamesa ug misugod sa pagbasa sa Rameumptom nga pag-ampo sa usa ka makusog nga tingog. Kana nakapamata kanamong tanan! Kini nahitabo daghang mga tuig na ang milabay, apan dili gayod nako kini makalimtan. Usa ka grupo sa mga tin-edyer ang halawom nga naimpluwensiyahan sa usa ka magtutudlo kinsa nagdrama-drama.
Sulod sa katuigan, ang matag usa sa akong mga anak nga lalaki nahimuot nga magbarog sa luyo sa among sofa ug magpakaaron-ingnon nga si Samuel ang Lamanite nga nagsangyaw gikan sa paril o naggunit og sungkod sama ni Moises ug nagpahayag, “Tugoti ang akong katawhan sa pagpahawa!”
Kon ang mga bata adunay kasinatian sa pagdrama-drama sa mga istorya sa kasulatan, ang mga kasulatan mahimong tinuod kaayo ngadto kanila.
Kahimtang
Alang sa mga anak, ang pagbaton og tinuod nga mga kasinatian makatabang kanila sa pagkat-on, pagsabot, ug paggamit sa impormasyon. Mahimo nato kini pinaagi sa paghimo og usa ka kahimtang sa pagkonektar sa mga kasulatan ngadto sa ilang palibot ug sa ilang kinabuhi. Sama pananglit, sa dihang gamay pa ang among upat ka anak, dungan kaming nagtuon sa Basahon ni Mormon. Nahitabo ang usa ka home evening sulod sa among tolda, diin naghisgot kami kabahin ni Lehi ug sa iyang pamilya nga nagpanaw latas sa kamingawan. Naghisgot kami kabahin kon unsa kaha ang gibati sa pamilya ni Lehi nga mobiyahe ug mopuyo sa usa ka tolda og dugay kaayo. Ang istorya nakapainteres ug mabati nga tinuod alang kanila.
Samtang magtudlo kamo mahitungod sa kasinatian ni Abraham sa pagkat-on mahitungod sa mga bituon ug kalangitan, ang kahimtang makahimo og dako nga kalainan. Hunahunaa kana nga leksiyon nga gitudlo sa gabii, nga naghigda sa kasagbotan uban sa inyong mga anak diha ubos sa mga bituon. Ang kasinatian ni Abraham mahimong makahuloganon ngadto kanila sa mas lawom nga paagi.
Kay sa mobasa lamang mahitungod sa mga paril sa Jericho nga gilaglag, makalingkod kamo dapit sa usa ka taas nga paril ug basahon ang istorya didto. Ang mga bata mahimong madani gayod pinaagi sa milagro.
Kay sa maghisgot mahitungod ni Solomon nga nagtukod sa templo, mahimo ninyong dad-on ang inyong mga anak ngadto sa templo kon kamo adunay templo sa duol ug basahon ang istorya diha sa mga nataran sa templo ug maghisgot kon unsa ka importante ang balay sa Ginoo ngadto sa ilang mga kinabuhi.
Kay sa maghisgot lamang mahitungod sa mga sakop sa balay ni Israel nga miadto sa gisaad nga yuta, mahimo ninyong dad-on ang inyong mga anak sa usa ka pag-hike ug manganta og mga awit sa Primary samtang nag-hike.
Ang mga kasinatian mahimong talagsaon alang sa pagtabang sa mga bata nga mobati sa katinuod sa mga istorya sa kasulatan nga ilang nadungog ug nabasa. Ang ingon nga mga kasinatian makamugna usab og talagsaon nga mga panumdoman sa inyong mga bata nga mohimo sa mga kasulatan nga tinuod ngadto kanila.
Pagpangutana
Makatabang kita sa mga bata nga mas makasabot sa mga kasulatan pinaagi sa pagpangutana.
“Unsay inyong bation kon walay naminaw kaninyo?” maghimo sa istorya ni Noe nga tinuod.
“Unsa kaha ka susama nga mabilanggo sa usa ka langyaw nga nasod diin walay tawo nga mituo sa Dios sama sa inyong gituohan?” maghimo sa istorya ni Joseph nga tinuod.
“Unsa kahay inyong hunahuna kon unsa susama ang itambog ngadto sa nagdilaab nga hudno?” maghimo sa istorya ni Sadrac, Mesac, ug Abed-nego nga tinuod.
Kon mangutana kita, importante kaayo nga ang atong mga bata mahimong gawasnon sa pagpahayag sa ilang mga panglantaw nga walay pagpanaway. Tugoti sila nga moistorya. Tugoti sila nga sabton ang istorya. Ug awhaga sila sa pagpangutana og daghan nga ilang kaugalingon nga mga pangutana.
Paggamit
Ang pipila sa labing maayo nga atong mapangutana makatabang sa mga bata sa paggamit sa mga kasulatan sa ilang kaugalingon.
“Unsa ang inyong nakat-onan gikan sa kasinatian ni Joseph Smith? Nakahunahuna ba kamo nga mag-ampo alang sa mga tubag? Unsa ang inyong mga kasinatian?”
“Samtang magbasa kamo mahitungod ni Jonas diha sulod sa balyena, sa unsang paagi kana makatabang kaninyo nga mopili sa pagsunod sa mga sugo sa Dios?”
“Unsay inyong hunahuna kon unsa ang gibati ni Maria sa dihang ang anghel miingon kaniya nga makabaton siya og usa ka bata kinsa mao ang Anak sa Dios? Sa unsang paagi kana makatabang kaninyo sa pagsunod sa plano sa Dios alang sa inyong kinabuhi?”
Importante kaayo ang paggamit alang sa atong mga tin-edyer samtang magsugod sila sa pagkonsiderar sa doktrina ug mga baroganan nga gitudlo sa mga kasulatan ug magsugod sa paglakip niini sa ilang kinabuhi. Ang paghimo og mga paggamit makatabang usab sa pagdugang og kalig-on nga kadaghanan sa mga tubag sa ilang mga pangutana makita diha sa mga kasulatan ug nga ang mga kasulatan adunay kalabotan sa ilang mga kasinatian sa kinabuhi.
Mga Matang sa Pagkat-on
Ang mga tawo labing maayong makakat-on sa lain-laing mga paagi—ang uban pinaagi sa panan-aw nga mga pamaagi sama sa pagbasa; ang uban pinaagi sa pandungog nga mga pamaagi sama sa pagpaminaw; ug ang uban pinaagi sa mahikap nga mga pamaagi sama sa paglihok-lihok, paghimo og kalihokan, o paghimo og usa ka butang gamit sa ilang mga kamot.
Aron matabangan ang mga bata nga makasabot ug magamit ang mga kasulatan, labing maayo nga gamiton ang mga pamaagi nga tukma sa ilang estilo sa pagkat-on. Makatabang ang pagsusi unsa nga matang sa estilo sa pagkat-on ang makadani sa matag bata. Ang mga magtutudlo sa primary mahimong makigtambayayong sa mga ginikanan aron makasabot sa mga estilo sa pagkat-on sa mga bata aron ang mga magtutudlo makapahiangay sa ilang mga pamaagi sa pagtudlo aron sa pagtabang sa matag indibidwal nga bata.
Ang mga tigkat-on pinaagi sa panan-aw makabenepisyo sa pagbaton og ilang kaugalingon nga mga kasulatan aron mabasa ug mamarkahan nila kini. Makapapilit usab kamo og mga litrato gikan sa mga istorya sa kasulatan diha sa ilang mga kwarto o sa bisan asa nga dapit diha sa panimalay.
Ang mga tigkat-on pinaagi sa pandungog malingaw sa pagpaminaw sa mga kasulatan. Ang mga bata mahimong mobasa og kusog sa mga kasulatan sa ilang kaugalingon, maminaw niini diha sa ilang mga computer o mga device, o ipabasa kini sa usa ka ginikanan o igsoon ngadto kanila.
Ang mga tigkat-on pinaagi sa paghikap nagkinahanglan og pisikal nga kalihokan nga bahin sa ilang pagtuon sa kasulatan. Mahimo ninyo silang dapiton sa pagdrowing og hulagway sa istorya sa kasulatan samtang basahon ninyo kini. Kini nga mga bata makabenepisyo usab sa pagbaton og ilang kaugalingon nga mga kasulatan nga ilang mamarkahan o makoloran.
Ang pagsagol sa mga estilo sa pagkat-on mahimong epektibo kaayo sa paghimo sa mga kasulatan nga makapainteresado ug mabati nga tinuod. Mao nga kay sa maghisgot lamang mahitungod ni Moises ug sa Napulo ka Sugo, ang pagpahimo sa mga bata og mga tabla gikan sa kulonon nga yuta [clay tablets] o pagpadrowing ni Moises nga nagdawat sa Napulo ka Sugo didto sa bukid samtang isaysay ninyo ang istorya ngadto kanila makapahimong mas sayon alang kanila nga magkat-on. Samtang magtuon sa Dali, Sunod Kanako, iapod-apod ang mga krayola o dekolor nga mga lapis ug himoa nga ang mas magulang nga mga bata magkolor base sa matang [color-code] sa ilang mga kasulatan samtang ang gagmayng mga bata magdrowing og mga hulagway samtang si Mama o si Papa magbasa sa istorya sa kasulatan. Kini usa ka kombinasyon sa panan-aw, pandungog, ug paghikap nga pagkat-on nga epektibo kaayo.
Makahimo kita og daghan nga mga butang nga makatabang nga mahimong tinuod ang mga kasulatan alang sa atong mga anak. Samtang ato kining buhaton, ang atong mga bata mas makakat-on pa gikan sa mga kasulatan, mas malingaw pa niini, ug magamit kini sa ilang mga kinabuhi sa mas epektibo gayod nga paagi. Ang panghinaot mao nga atol niini nga proseso makakat-on sila sa paghigugma og maayo sa mga kasulatan. Ug kana ang mohimo sa tanang paningkamot nga bililhon.