Digital Lamang
Pagpalig-on sa Kabatan-onan pinaagi sa Pagtutok sa Bishopric Kanila
Ang mga tagsulat nagpuyo sa Ceará, Brazil.
Talagsaong resulta ang nahitabo niini nga Brazilian nga ward pinaagi sa pagsunod sa tambag sa mga lider sa Simbahan sa pagtabang sa mga bishopric nga matutokan ang nagtubo nga henerasyon.
Ang kabatan-onan sa Jatobá Ward sulod sa bag-ong chapel.
Tanang litrato sa maayong kabubut-on sa mga tagsulat
Ang Jatobá Ward namugna sa Brazil niadtong Marso 2009, apan sa pagka-Nobyembre 2018 pa sila nakasimba sa ilang bag-ong napahinungod nga chapel. Bisan og mapasalamaton ang mga Santos sa inabangan nila nga mga bilding nga kasimbahan, ang pagkawalay permanente nga bilding naghimong mas lisod aron padayong magmahinamon ang kabatan-onan nga magpabilin ilabi na nga ang naglibot nga kasilinganan mga bayolente kaayo, tiggamitan og druga, ug pinasagdan. Ug bisan pa ang pundok sa kabatan-onan midaghan ngadto sa kapin sa 85 ka miyembro, misangko sa makasaysayanon nga panahon sa ward.
Mga Pagpahiangay Gipahibalo aron sa Pagtabang sa mga Bishop nga Matutokan ang Nagtubo nga Henerasyon
Unsay hinungdan niana nga pagdaghan sa miapil nga kabatan-onan? Ang milagro miabot tungod sa pagsunod sa direksiyon sa Unang Kapangulohan ug sa Korum sa Napulog Duha ka Apostoles.
Sa Oktubre 2019 nga kinatibuk-ang komperensiya, si Presidente Russell M. Nelson mitudlo: “Sa matag ward, ang batalyon sa kabatan-onan sa Ginoo gipangulohan sa usa ka bishop, usa ka mahalaron nga sulugoon sa Dios. Ang iyang una ug importante nga responsibilidad mao ang pag-atiman sa mga batan-ong lalaki ug sa mga batan-ong babaye sa iyang ward. Ang bishop ug ang iyang mga magtatambag mogiya sa buhat sa mga korum sa Aaronic nga Pagkapari ug sa mga klase sa Young Women diha sa ward.”1
Si Elder Quentin L. Cook sa Korum sa Napulog Duha ka Apostoles ug si Sister Bonnie H. Cordon, Kinatibuk-ang Presidente sa Young Women, sa wala madugay mipahibalo sa pipila ka mga pagpahiangay kabahin sa nagtubo nga henerasyon ug sa ilang mga lider. Si Elder Cook mitudlo nga usa ka katuyoan sa mga pagpahiangay mao ang “[pag]tabang sa mga bishop ug sa ilang mga magtatambag nga matutokan ang ilang labing importanting mga responsibilidad sa kabatan-onan ug kabataan sa Primary.”2
Kini nga tambag dayon gihatagan og gibug-aton sa Kapangulohan sa Area, sa Area Seventy, ug sa presidente sa stake alang sa stake nga naglakip sa Jatobá Ward, nga si Presidente Nivaldo Mauro dos Santos. Si Presidente Santos miingon: “Diha sa Alma gisultihan kita nga ‘ ang tigsangyaw dili labaw kay sa tigpaminaw, ni ang magtutudlo maayo pa kay sa tinudloan; ug sa ingon niana silang tanan managsama, ug silang tanan naghago, matag tawo sumala sa iyang kusog’ (Alma 1:26). Samtang naningkamot kong makakat-on sa akong katungdanan, akong gipamalandongan ang akong mga responsibilidad. Wala akoy pagduda nga usa sa akong mga responsibilidad mao ang pagtabang sa mga batan-on nga makasabot ug makapalambo sa ilang balaanong potensyal. Nagkinahanglan kini og gugma ug pailob. Gimahal nako ang kabatan-onan sa Simbahan ug mapasalamaton ko sa oportunidad nga makaserbisyo kanila.”
Ang kabatan-onan nga nanglimpiyo sa chapel.
Mga Pagpahiangay Gihimo sa Jatobá Ward
Nagtinguha nga masunod ang propetikanhon ug lokal nga direksiyon, gitutokan sa mga lider sa Jatobá Ward ang pagtabang sa kabatan-onan nga mapalambo ang ilang balaanong potensiyal diha sa ilang mga council ug mihimo og pipila ka pagpahiangay. Sa matag karon ug unya ang ilang mga miting sa ward council gitutok lamang sa pagpundok sa Israel sa isig ka habig sa tabil. Nagsugod sila sa paghimo og sinemana nga mga miting sa korum ug kapangulohan sa klase, nga adunay miyembro sa bishopric nga motambong. Ug gilakip nila ang mga batan-on diha sa buhat sa kaluwasan. Kana nga buhat wala lamang maglakip sa pagpangalagad [ministering] ug sa Aaronic nga Pagkapari nga pagserbisyo apan usab sa pagpanglimpyo sa chapel, pag-index, pagtabang nga mapaaktibo ang uban, ug daghan pa. Ang ward youth council gani nagplano og pangmisyonaryo nga semana [missionary week] nga matutokan ang pagpaambit sa ebanghelyo sa ilang komunidad. Tanan kana nga pagpaapil nakahimo og kalainan.
Si Willian M., edad 15, mipaambit: “Ang mga misyonaryo maoy unang nakadala nako ngadto sa simbahan. Dayon ang naghimo nako nga mopadayon sa pag-adto mao ang gihimong paghangop sa tanan kanako. Nagtuo ko nga ang pag-adto niini nga Simbahan mao lamang ang pagpaminaw og butang mahitungod sa ebanghelyo ug dayon mopauli, apan akong namatikdan nga dili lang diay ingon niana—butang kadto nga mahangupon kaayo. Dihang si Bishop Gil Santos gitawag isip among bishop, gidapit niya ang mga batan-on sa paglihok, sa tumong nga makadala pa og dugang nga mga batan-on sa Simbahan. Nasayod siya nga ang mga batan-on mao ang kaugmaon sa Simbahan. Mao nga ania ko dinhi!”
Si Cleusiana Teles, usa ka lider sa Young Women, miingon nga ang batan-ong mga babaye “mainiton kaayo ug adunay tinguha nga moserbisyo. Wala kami mohunong sa pagkontak kanila, ug nagpasiugda kami og mga kalihokan—bisan og sa virtual. Ang tanan nga buluhaton sa young women natuman. Ug ilang gipahayag ang ilang kamaya. Kadto naghimo niini nga mas sayon ang pagpadayon sa buhat sa Ginoo ug paglig-on sa usag usa, bisan atol sa pandemya.”
Ang bishopric padayon usab nga suod ngadto sa kabatan-onan aron makatabang sa pagpangalagad kanila. Si Suelen Lopes, edad 18, nahinumdom: nga “Human gayod sa akong bunyag, ang pandemya miabot. Ang bishop buotan kaayo ngadto nako ug kadaghan mitabang sa akong igsoong lalaki dihang nagkasakit siya.”
Ang batan-ong mga lalaki ug batan-ong mga babaye nagpundok alang sa usa ka kalihokan.
Usa ka Pagtutok sa mga Kalihokan
Ang mga lider sa Jatobá Ward miihimo usab og mga pagpahiangay sa mga kalihokan sa kabatan-onan. Nagsugod sila sa paghimo og sinemana nga mga kalihokan, ug gilakip nila ang ward youth council aron mahimo ang mga kalihokan nga mas epektibo.
Si Bishop Santos miingon, “Pinaagi sa diwa sa espiritu sa pag-ampo, among nadiskobrehan ang mga interes sa mga batan-on ug kon unsay naghimo nilang malipayon nianang higayona.” Ang mga lider gusto nga ang mga batan-on maapil sa maayo ug mahiyason nga mga kalihokan nga aron sa pagtabang sa pag-alkontra sa mga kalihokan sa kalibotan. Si Bishop Santos mipadayon: “Among gipuno sa gugma, mga sport, ug pagtulon-an sa ebanghelyo kini nga luna. Nakita sa mga batan-on nga ang mga lider usa nila ka higala.”
Isip kabahin niadto nga mga kalihokan, ang mga lider gustong mohimo sa mga meetinghouse sa Simbahan isip sentro sa bag-ong mga paghigalaay ug espirituhanong paglig-on. Ang pagtambong sa seminary maoy nahimong usa ka dako nga pagtutok niadto nga mga kalihokan.
Ang kabatan-onan nalingaw sa panag-uban nga pagdula og soccer.
Ang inadlaw-adlaw nga mga kalihokan sa sport gikalingawan diha sa bilding sa ward human sa seminary. Si Eliseuda Santos, usa ka instruktor sa seminary sulod sa siyam ka tuig, nakamatikod nga, “Ang pag-adto sa seminary sa bilding sa ward nakatabang og dako.” Ang gugma nga anaa ni Sister Santos alang sa kabatan-onan ug “ang pagtagad nga gihatag sa bishopric” nahimo nga “mahinungdanon ngari kanamo aron kini nga mga batan-on padayon nga magmalig-on diha sa ebanghelyo,” miingon siya. Gipadayon usab ni Sister Santos ang maayong komunikasyon sa mga sakop sa pamilya sa kabatan-onan, ilabi na ngadto sa mga ginikanan nga dili mga miyembro sa Simbahan. Usa ka debosyonal ug panihapon alang niini nga mga ginikanan gitanyag sa pagsugod sa matag tuig nga pag-eskwela sa seminary aron mapasabot ang programa ngadto sa mga sakop sa pamilya ug makahangyo sa ilang suporta.
Gikan sa Gamay ug Yanong mga Butang
Ang pipila ka tawo nagdahom nga ang dako nga pagtubo sa attendance sa kabatan-onan sa Jatobá Ward resulta sa sobra-sobrang paningkamot. Apan kini nga mga resulta miabot tungod sa yanong pagsunod sa tambag sa mga lider sa Simbahan aron matabangan ang mga bishopric nga makatutok sa nagtubo nga henerasyon sa batalyon sa Ginoo sa pagpundok sa Israel sa matag habig sa tabil.