Ang Pagpadayon sa Dalan sa Kalipay
Kita makapasanay og matarong, malaumon nga mga anak bisan asa sa kalibotan kon sila adunay lig-on nga pundasyon sa Manluluwas.
Daghang katuigan nang milabay, pipila sa akong mas manghod nga mga ig-agaw gitahasan sa paghimo og proyekto sa pagserbisyo didto sa umahan sa among Lolo Crozier Kimball. Isip ganti, gisaaran sila sa lamian kaayong hinimo nga cake ni Lola Clara1.
Sa dihang nakompleto na nila ang ilang mga tahas, miadto sila sa kusina alang sa ilang ganti. Si Lolo, hinoon, miali sa pultahan sa kusina. Ang akong ig-agaw nga si Kathy Galloway, kinsa mga 14 pa niadtong higayona, nahinumdom nga siya milingkod sa lingkoranan sa piano ug gidapit ang mga ig-agaw sa paglingkod sa salog. Iya silang gipasalamatan sa ilang kakugi ug dayon miingon nga siya adunay importanting butang nga ipaambit sa dili pa nila kaonon ang ilang cake.
“Moabot ra unya ang panahon sa inyong kinabuhi nga kamo kinahanglan nga mahibalo ug mobuhat sa unsa ang akong ipaambit diha kaninyo,” miingon siya.
Mipasabot siya nga ang iyang apohan nga si Heber C. Kimball (1801–68) ug ang ubang pioneer nga mga katigulangan misagubang og hilabihan ka lisod nga mga pisikal nga mga hagit. Miingon si Lolo nga ang mga pioneer daling nakakat-on nga aron mabuhi, kinahanglan sila nga magtinabangay ug mohigugma ug moserbisyo sa usag usa.
“Mao kini ang usa sa dakong mga kabilin nga ilang gibilin kaninyo!” miingon siya samtang ang mga luha misugod sa pagdagayday sa iyang mga aping.
“Sa akong calling isip usa ka patriyarka ug isip inyong apohan, kon ako manglantaw sa panahon nga umaabot, … ang akong kasingkasing magsakit alang kaninyo,” miingon siya. “Kamo mosagubang og emosyonal ug espiritwal nga mga hagit nga wala gayod nahunahuna sa inyong mga pioneer nga mga katigulangan.”
Gawas kon ang mas batan-on nga henerasyon mopasidungog sa dakong kabilin sa gugma ug pagserbisyo sa mga pioneer, dugang pa niya, “daghan kaninyo ang mapakyas tungod kamo dili makasugakod nga kamo lang.”
Dayon, uban sa koneksyon sa espiritu ngadto sa espiritu, mitapos si Lolo Kimbal: “Kita nagkinahanglan sa usag usa. Agig dugang sa pagpaambit sa atong pagpamatuod sa ebanghelyo sa usag usa, ang atong katungdanan sa paghigugma ug pagserbisyo ug paglig-on ug pag-amuma ug pagsuporta ug pagpaluyo sa usag usa, … ilabi na sa atong pamilya. Palihog hinumdomi nga sa kataposang mga adlaw, ang inyong paglahutay mahimong magdepende sa inyong kaandam sa pagtinabangay sa usag usa ug sa paghigugma ug pagserbisyo sa usag usa. Karon, mangaon na kita sa cake!”
Nagkinahanglan Kita sa Usag Usa
Gilitratohan ni Wendy Gibbs Keeler
Sama sa gipakita sa kalibotanong kasamok nga nagpalibot kanako, ug sama sa napanglantawan nang daan ni Lolo Crozier Kimball, nagkinahanglan kita sa usag usa. Kita nagkinahanglan og mahigugmaong mga pamilya, mga korum nga puno sa pagserbisyo ug mga Relief Society, ug matinabangon nga mga branch, mga ward, ug mga stake.
“Ang Dios gusto nga kita magtambayayong ug magtinabangay sa usag usa,” miingon si Presidente Nelson. “Mao kana ang hinungdan nga Siya mipadala kanato sa yuta pinaagi sa mga pamilya ug miorganisar kanato diha sa mga ward ug mga stake. Mao kana ang hinungdan nga Siya mihangyo kanato sa pagserbisyo ug pagpangalagad sa usag usa. Mao kana ang hinungdan nga Siya mihangyo kanato nga magpuyo sa kalibotan apan dili iya sa kalibotan. Kita makatuman og daghan kaayo kon magtinabangay kay sa mag-iyahay kita.”2
Ang kinabuhi sa atong ikaduhang kinabuhi lisod. Tungod sa Pagkapukan ni Adan ug Eva, kita mag-atubang og mga tunok ug mga sampinit, mga pagsulay ug mga tintasyon. Ang ingon nga mga kasinatian kabahin sa plano sa kalipay, apan kita makatabang sa usag usa sa pagsagubang sa mga unos sa kinabuhi.
Sama ni Adan ug Eva, kinsa “gipadala … gikan sa tanaman sa Eden” (Genesis 3:23), kita gipadala gikan sa atong panimalay sa pagpangandam sa wala pa dinhi niining napukan nga yuta. Ug sama ni Adan ug Eva, kita magmaya sa atong kahibalo sa plano sa Dios alang sa Iyang mga anak:
“Ug niana nga adlaw si Adan mihimaya sa Dios ug natagbaw, ug misugod sa pagpanagna mahitungod sa tanan nga mga banay sa yuta, nag-ingon: Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios.
“Ug si Eva, iyang asawa, nakadungog niining tanan nga mga butang ug nalipay, nag-ingon: Kon dili pa unta sa atong kalapasan kita dili unta makaangkon og binhi, ug dili gay[o]d masay[o]d sa maayo ug sa da[o]tan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon” (Moises 5:10–11; tan-awa usab sa 2 Nephi 2:25).
“Bahin sa Iyang Balaan nga Katuyoan”
Pagdala sa atong “pagka-imortal ug kinabuhing dayon” mao ang “buhat ug … himaya” sa atong Amahan (Moises 1:39). “Kita mao ang,” sa gitudlo ni Presidente Nelson, “kabahin sa Iyang balaan nga katuyoan.”3
Ang Unang Kapangulohan ug ang Korum sa Napulog Duha ka Apostoles namahayag nga isip espiritu nga mga anak sa atong kinabuhi sa wala pa dinihi sa kalibotan, kita “nakaila ug nagsimba sa Dios ingon nga [atong] Amahan sa Kahangturan ug midawat sa Iyang plano nga naghatag og higayon sa Iyang mga anak nga makaangkon og pisikal nga lawas ug makaangkon og yutan-on nga kasinatian sa paglambo ngadto sa kahingpitan ug sa katap[o]san makakab-ot sa ilang walay kataposan nga kapalaran ingon mga manununod sa kinabuhing dayon.”4 Ug si Presidente Dallin H. Oaks, Unang Magtatambag sa Unang Kapangulohan, bag-ohay lang nagtudlo, “Ubos sa plano sa atong Langitnong Amahan, [si Jesukristo] ‘milalang sa mga langit ug yuta’ (Doktrina ug mga Pakigsaad 14:9) aron nga ang matag usa kanato makabaton og mortal nga kasinatian ang gikinahanglan sa pagkaplag sa atong balaang kapalaran.”5
Ang mga kasulatan ug mga propeta sa ulahing mga adlaw nagklaro sa mahinungdanong tahas sa atong mga lawas diha sa plano sa Dios. Ang atong padulngan mao ang pagbalik ngadto sa Iyang presensiya uban sa nabanhaw, nahimaya nga mga lawas ug aron mabuhi isip mga pamilya hangtod sa kahangtoran.
“Ang atong relasyon sa ubang mga tawo, atong kapasidad sa pag-ila ug paglihok sumala sa kamatuoran, ug atong abilidad sa pagsunod sa mga bar[o]ganan ug mga ordinansa sa ebanghelyo ni Jesukristo mapalambo pinaagi sa atong pisikal nga lawas,” miingon si Elder David A. Bednar sa Korum sa Napulog Duha ka Apostoles. “Sa dapit sa pagkat-on dinhi sa mortal nga kinabuhi, kita makasinati og kalumo, gugma, kamabination, kalipay, kaguol, kasagmuyo, kasakit, ug gani mga hagit sa pisikal nga mga limitasyon sa paagi nga moandam nato sa kahangt[o]ran.”6
Motudlo kabahin kang Kristo
Niining adlaw sa pagduha-duha ug kawalay kasiguroan, ang kahibalo sa plano sa kalipay mahinungdanon sa atong espirituhanon nga pagkaluwas. Apan dili kita makalaom sa kalibotan sa pag-amoma sa atong mga anak gamit ang mga baroganan sa mahangturong kalipay. Isip mga ginikanan, kita kinahanglan motudlo sa atong mga anak mahitungod sa ilang balaanong gigikanan ug balaanong padulngan.
Magsugod kita pinaagi sa pagtabang kanila nga makapalambo og usa ka pagpamatuod ni Jesukristo ug sa Iyang Pag-ula, nga mao ang sentro sa plano sa kaluwasan. Ako nagtuo nga kita makapasanay og matarong, malaumon nga mga anak bisan asa sa kalibotan kon sila adunay lig-on nga pundasyon sa Manluluwas.
Diha sa gabii sa panimalay, sa panahon sa pag-ampo sa pamilya ug pagtuon sa kasulatan, pinaagi sa mga kalihokan sa pamilya ug mga tradisyon, ug bisan sa mga panahon sa pagkoriher, “kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, … nga ang among mga anak mahimo nga masay[o]d sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).
Kita motabang sa atong mga anak nga makasabot nga diha sa plano sa kaluwasan, ang paghinulsol usa ka “tibuok kinabuhi nga kurikulum”7 nga nagdala og paglaom ug pagkaayo kay kini mopalingkawas sa kalag ug modan-ag sa kaugmaon.
Samtang ang akong mga anak makapalambo og hugot nga pagtuo diha sa Pag-ula ni Jesukristo, sila masayod nga ang tanan dili gayod mawala ug nga ang Ginoo naghuwat kanila uban sa bukas nga mga bukton. Kita motabang kanila nga makasabot nga “bisan unsa ang [atong] kinahanglang biyaan aron mahisubay sa agianan pauli ngadto sa [atong] langitnong panimalay mahimo nga daw dili gayod sakripisyo sa umaabot nga adlaw.”8
Pagpundok sa mga Anak sa Dios
Kita dili makaabot sa atong balaanong padulngan nga mag-inusara. Isip mga Santos sa Ulahing mga Adlaw, kita adunay espesyal nga katungdanan sa pagdapit sa uban sa atong panaw sa atong langitnong panimalay. Ang kalibotan nagkinahanglan sa mga Santos sa Ulahing mga Adlaw kinsa andam nga mopadan-ag sa kahayag sa Pagpahiuli pinaagi sa ilang mga pagpamatuod, mga ehemplo ug kaandam sa pagpaambit sa ebanghelyo. Kon makita ang atong ehemplo, kita makapapundok.
“Kon kita mamulong kabahin sa pagpundok,” miingon si Presidente Nelson, “nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag habig sa tabil, angayang makadungog sa mensahe sa gipahiuli nga ebanghelyo ni Jesukristo. Mohukom sila sa ilang kaugalingon kon gusto ba nilang masayod pa og dugang.”9
Ug usab, sama sa gitambag ni Lolo Crozier, kita mopaambit sa atong mga pagpamatuod sa ebanghelyo ni Jesukristo. Kita mohigugma ug moserbisyo, mopalig-on ug moamuma, ug mosuporta ug mopaluyo sa atong mga minahal ug sa atong mga silingan.
Samtang kita motabang sa uban diha sa dalan sa ilang balaanong padulngan, kita nakatabang sa atong mga kaugalingon subay sa samang dalan, “pagadawaton ngadto sa gingharian sa Amahan nga dili na sila mahimulag apan magpuyo kauban sa Dios sa kahangturan diha sa mga kalangitan” (3 Nephi 28:40).