Agavaa i le Alii: Lesona mai le Faatoaga Talo

Saunia e Elder Frederic T. Riemer

Fitugafulu Eria

I le tele o tausaga talu ai, sa ia te a’u le naunautaiga e a’oa’o le auala e tōtō ai le talo, le pateta Polenisia. Ina ia fesoasoani ia te a’u i lea taumafaiga, o lea sa ou alu ai e vaai se uo lelei tele—o se toeaina i le uarota—o lē e lava lona silafia i mea tau faatoaga, mai le tele o tausaga, sa ia a’oa’oina ai tomai talafeagai e maua ai talo lelei i lana fa’a’apu (faatoaga). Na ou talosaga ia te ia pe mafai ona sūsū mai i lo’u fale e a’oa’o mai ia a’u faiga faavae mo le tōtōina o talo lelei. Sa ia talia la’u valaaulia. Sa matuā fiafia o ia e faasoa lona malamalama.

Sa ma talanoa mo le 30-minute, ma sa ou tusitusia le tele o faamatalaga talafeagai uma, e manaomia mo le tōtōina o talo. Sa ou mulimulita’i i mea na ou tusitusia e faatino ai fautuaga sa tuuina mai e la’u uo. I aso uma, sa ou fiafia lava e fui o’u talo pe a maea galuega. Sa ou vaai atu i le ola mai o lau o talo i lea aso ma lea aso; oka se lauusiusi mai. Sa mafai ona ou vaai faalemafaufau ia te a’u lava o ‘ai a’u talo.

Na o’o mai le taimi ua leva ona faatalitali i ai e fafai ai le talo; ua mavae le fitu masina. Sa le mafai ona ou faatali ou te vaai i le lapopo’a o i’o o a’u talo i le eleele. Sa faaaoga la’u suo e sua ese ai le palapala o siomia le talo ae fafai. Na faateia a’u, ina ua se’i le talo, e leai sona i’o. Sa le’i tupu le talo. O se matuā toilalo lava! Na ou vaai atu ua o’o le matua i lau o le talo—e le itiiti ifo o le tasi le mita, ma ua lanu meamata, o le faailoga lea o lo’o ola lelei le talo.

O le a le mea na tupu i a’u talo na ala ai ona lē ola lelei pei o talo a la’u uo? Sa ou mulimuli i fautuaga uma sa ia tuuina mai ia te a’u.

Ou te fia faasoa atu ia te outou nisi o lesona na ou a’oa’oina mai i lenei aafiaga, aemaise lava i auala ua fesoasoani ai nei lesona ia te a’u ma lo’u toalua e tausi ai le ma fanau ina ia tumau i luga o le ala o feagaiga, ma ia fua mai ni fua agavaa i le Alii.

O le lesona muamua sa ou aoaoina, o le talo e sili mamao atu le tele o le vai sa mana’omia e ola ai. Ou te manatu e lei lava lo’u fuiina o lo’u maumaga. O le “i’o” (aano o le talo) le faavae o le fātalo e le tatau ona matuā lilofia i le vai; ae afai e lilofia, ia mo na o se taimi le tumau. Ae peitai, e tatau lava ona tumau i taimi uma le sūsū o le eleele ina ia tupu ai le talo ma i’o.

E pei o le talo, e manaomia e a tatou fanau ona fafagaina e lē aunoa i le Upu Lelei. O nisi taimi tatou te manatu ua lava le aumai o a tatou fanau i sauniga i Aso Sa. Paga lea, e le mafai ona ola i lenei lalolagi pe a fai e na o le Aso Sa e fafagaina ai. E tatau ona faaalu le taimi e aoao ai e le aunoa a tatou fanau i o tatou aiga. Sa faamanatu mai e le Alii i mātua e tatau ona latou a’oa’o a latou fanau ina “ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima” (Mataupu Faavae ma Feagaiga 68:25). Seiloga e malamalama a tatou fanau, e tatau ona faaauau pea ona tatou a’oa’o i latou i mataupu faavae ma aoaoga faavae a Iesu Keriso.

Aisea e finagalo ai le Alii i matua ia faataunuuina lenei tiutetauave? E maua le tali i le Mataupu Faavae ma Feagaiga, ina ua folafola mai e le Alii faapea “ua saili Satani e liliu ese o latou loto mai le upumoni, ina ia faatauasoina i latou ma lē malamalama” (Mataupu Faavae ma Feagaiga 78:10); pe faapea “ona sau lea o le amioleaga e toatasi lena, ma ave’ese mai le fanauga a tagata le malamalama ma le upumoni, e ala i le lē usiusitai, ma ona o le uputuu a o latou tamā” (Mataupu Faavae ma Feagaiga 93:39). I le avea ai ma matua, e tatau ia i tatou ona i ai ni tu masani lelei i o tatou aiga e a’oa’o ai a tatou fanau i le talalelei a Keriso.

Ina ua faalauiloa mai le polokalama o le “Sau, Mulimuli Mai Ia te A’u” i le Konafesi Aoao o Oketopa 2018, na saunoa mai Peresitene Russell M. Nelson, “O le taimi lenei mo se Ekalesia e faatotonugalemu-i-le-aiga, ma lagolagoina i mea o loo tutupu i totonu o o tatou fale, o paranesi, uarota, ma siteki.”¹ Ia tatou faaali atu le faatuatua manaomia e avea ai o tatou aiga ma totonugalemu o le aoaoina o le talalelei mo a tatou fanau. O le ala lea ua tuuina mai ai e le Alii e ala mai i Ana perofeta soifua, o Russell M. Nelson, ina ia le liliueseina e Satani loto o a tatou fanau mai le upu moni.

O le lesona lona lua e faapea, e faaopoopo i le ola ai i se siosiomaga susū, sa manaomia e le talo ona faafetalaisa soo aua e manaomia e le talo ia tele le nitrogen, ae paga lea, o se mea lena ou te le i faia. Atonu ou te le’i amanaiaina lenei faamatalaga taua i le taimi na ou talanoa ai i la’u uo.

I le auala lea e tasi, e manaomia e a tatou fanau ona “faafetalaisa” faaleagaga e le aunoa. O se tulaga matua faanoanoa tele mo i tatou matua, i le mavae ai o le tele o tausaga o tausi a tatou fanau, ae toe iloa ifo e le o lava le malolosi o o latou faavae—e latou te le i malolosi ia Keriso.

Se i o tatou fesili ifo ia i tatou lava i nei fesili: O le a le mea e manaomia e a tatou fanau ina ia ola ai faaleagaga? O a fetalaisa latou te manaomia? O nisi nei o faataitaiga ou te manatu e taua.

O le fetalaisa o le faatuatua i lo tatou Faaola o Iesu Keriso.
O le fetalaisa o le malamalama i Lana talalelei e ala i le suesueina e le aunoa ma le atoatoa o tusitusiga paia.
O le fetalaisa o le alofa mo lo tatou Tama Faalelagi ma Lona Alo o Iesu Keriso.
O le fetalaisa o le iloa lea pe faapefea ona fesootai ma le Agaga Paia.
O le fetalaisa o le manao i taimi uma e mulimuli i fautuaga a le perofeta soifua.

Ia tatou faamautinoa o nei fetalaisa o ni vaega o le ola faifaipea o o tatou talavou, ma a tatou fanau. A aunoa ma i latou, o o tatou talavou ma a tatou fanau o le a ono iu ane faapei o le tupulaga faia’e o Sa Nifaē (Mosaea 26:1–4) ma Sa Lamanā (3 Nifae 1:29–30) o loo faamatalaina mai i le Tusi a Mamona, o e sa lē malamalama i le Afioga a le Atua.

Ia tatou tali atu ma le fiafia i le valaau a lo tatou Perofeta o Russell M. Nelson ina ia laveai lo tatou tupulaga faia’e.