Itulau i le lotoifale
O le Aiga e Felelei Mai Totonu Toe Felelei Ese Atu
O Jason ma Tai Makai e o mai mai Ipswich, Ausetalia. Ua 24 tausaga talu ona faaipoipo i la’ua ma i ai o lā atalii e to’afa ma afafine e to’alua. O Jason e galue o se tagata faigaluega lele-mai-lele-atu, o lona uiga e tele lava ina galue ese o ia i fafo atu o lona aiga mo ni taimi uumi. Ae ui ina faigaluega Jason mamao ese mai lona aiga, ua maua e le aiga o Makai auala e faatumau ai le latou sootaga o se aiga ma tumau ai le malolosi i le talalelei a Iesu Keriso.
O le aiga o Makai
O lo’u toalua o Jason ua faigaluega nei mo le 12 tausaga i le matagaluega faufale i maina, o se tagata faigaluega lele-atu-lele-mai. Ina ua amata Jason i lenei galuega, sa ou faigaluega tumau foi, ma sa i ai le ma fanau laiti e toafa. Faatasi ai ma le galue mamao o Jason ma lo’u faigaluega tumau, sa ou tauivi e tausia le ma fanau, tausia le faatulagaina lelei o le fale, ma ave tamaiti i le lotu na o a’u.
Sa ma talanoaina pe tatau ona faaauau pea ona ou galue pe nofo i le fale faatasi ma tamaiti. Sa ou popole i le faataunuuina o la’u matafaioi o se ava ma se tina, ae sa ou popole foi pe faapefea ona aafia lo’u aiga i lo’u tuua o le galuega. I lo’u lē iloa po’o le a le mea o le a fai, sa ou alu ifo i lalo i o’u tulivae ma ou tatalo atu i le Tama Faalelagi, “Ou te matua manaomia lava le fesoasoani aua e le mafai ona ou faia lenei mea na o a’u.”
Sa ou filifili e tuu la’u galuega, ae sa faamautinoa e le Alii sa tausia lelei i matou. E matua toatele tagata sa o mai e fesoasoani mai ia te a’u e fesoasoani i le fale ma tamaiti. Sa i ai le Alii iina i o’u tauiviga, ma faavave mai Ana agelu o e na faamalosia a’u.
Faatumauina o le Sootaga
Talu ai e tele taimi e toesea ai Jason mai le aiga, ua ma popoto lava e faia auala e faatumauina ai a matou sootaga o se aiga ma le auala e faatumauina ai a matou sootaga i le talalelei.
E tele lava ina faigaluega Jason i nofoaga maotua. A mafai loa ona maua se matou sootaga lelei, ona valaau mai lea o Jason e talanoa ma tamaiti ma auai i le matou afiafi faaleaiga. A oo ina leaga le sootaga, matou te auina atu ia te ia se feau tusitusi e faailoa atu ai ia te ia le matou talanoaga i le afiafi faaleaiga. Ma te auina atu e le tasi i le isi upu sii po o mau i le vaiaso pe a maua mea e musuia ai i maua.
E masani ona faalogologo Jason i mau po o lauga o konafesi aoao i taimi e tau leai ai ni galuega i le nofoaga o lana galuega. Afai e i ai isi tagata o le Ekalesia i le nofoaga o lana galuega, e masani ona latou faia faatasi a latou afiafi faaleaiga pe talanoaina faatasi a latou suesuega o le Sau, Mulimuli Mai ia te A’u.
A sau Jason i le fale, matou te faaalu faatasi o matou taimi o se aiga. Ma te o foi ma Jason i le malumalu a itiiti ifo ia tasi se aso a o i ai i lona taimi malolo. E matua toatele lava tagata o ma aiga e manaomia ona faia o latou galuega i le malumalu, ma sa avea lenei ma auala ofoofogia mo i maua e galulue ai i le malumalu ma faaalu faatasi ai o ma taimi.
E Fiafia Tele Le Alii i Taumafaiga
Ua ou a’oa’oina mai i le tele o tausaga e fiafia tele le Alii i taumafaiga, ma o taumafaiga e aumaia ai taui. Afai tatou te faataitaia pea, alualu pea i luma, ma taumafai e mulimuli ia te Ia, e mafai ona tatou mauaina le fesoasoaniga faalelagi. E lē faamoemoe o Ia ia atoatoa nei. Ae a o faagasolo pea le taimi, o na taumafaiga e aumaia ai taunuuga e faavavau. O ai o le a le manao i lena mea?
E ui o o’u matua e le o ni tagata o le Ekalesia, ma sa papatisoina a’u mulimuli ane i lo’u olaga, sa ou aoaoina nei mataupu faavae a o ou itiiti. Sa masani ona fai mai soo lava lo’u tamā ia i matou, afai e te faamuamua le Alii, o le a sologa lelei mea uma.
E moni le Atua, ma e alofa o Ia ia i tatou. Na Te silafia i tatou ma ua ia i tatou le gafatia e avea ai faapei o Ia. Ou te faafetai e mafai ona ou tuliloaina lena sini. Ou te iloa o le Atua o lo tatou Tama ma o Iesu o le Keriso. E matua alolofa tele i La’ua ia i tatou uma, ma o le a fesoasoani i La’ua ia tatou tauiviga.