Ua Molimoli Atu le Alofa o Polenisia Falani i Toga

Potu o talafou

Ua tali atu le malo, o aulotu, ma nu’u i le mala fa’anatura ma ni fesoasoaniga manaomia.

Na matamata tagata o Falani Polenisia ma le faateia i le faaleagaina ma le faatafunaga i Toga, na mafua mai i le mauga mu ma le galulolo i le aso 15 o Ianuari.

Sa faia tatalo ma anapogi e tagata o Le Ekalesia a Iesu Keriso o le Au Paia o Aso e Gata Ai mo o latou uso a Au Paia i Toga, ma auina atu savali o le lagolagosua e ala i upega tafailagi.

I le mavae o isi mala faanatura i le lalolagi, sa tali atu le toatele o tagata o le Ekalesia ma uo e ala i le foa’i atu ma le limafoai i le tupe mo auaunaga alofa a le Ekalesia po o isi faalapotopotoga alofa.

“Na i ai lagona malolosi i o matou taitai e manaomia ona matou fesoasoani atu, ae o le fesili, o a nisi mea e mafai ona matou faia e fesoasoani atu ai ia Toga,” o le saunoaga lea a Elder Frederic Riemer, o le Fitugafulu Eria i le Ekalesia a Iesu Keriso o le Au Paia o Aso e Gata Ai.

“Sa matou talosagaina tagata uma ina ia tatalo faatauanau ina ia iloa le auala sili e mafai ai ona matou fesoasoani i o matou uso ma tuafafine i Toga.”

Na oo mai le tali i le faasalalauga a le Peresitene o Polenisia Falani, o Edouard Fritch, o le a totogipau e le malo le vaa Tahiti Nui e la’u atu ai sapalai mo le to’omaga i Toga, le va’a lava lea na la’u atu ai sapalai i Fiti ina ua taia e se afa i le tausaga ua mavae. Sa ia vala’au atu i tagata o Tahiti e toe faaali lo latou agalelei faaleaganu’u mo o latou tuaoi Polenisia.

Na saunoa mai Elder Riemer o lenei mea e pei o se tali ia latou tatalo. I le fono ai i se aufono mo faalavelave faafuasei, sa autasi ai o ia ma peresitene o siteki e toaiva (taitai o le Ekalesia i le lotoifale) o Tahiti e faia se faaiuga e faamaoopoopo: na valaaulia aulotu e ao mai foai o meaai, lavalava, oloa mo le tumama ma vai. O le Fale Tutotonu o le Siteki a Fariipiti, e tu i le laumua o Papeete, o le a avea ma nofoaga e faapotopoto i ai le Ekalesia mo mea uma.

Sa tali vave atu ma le agalelei tagata o le Ekalesia i le valaau atu a Elder Reimer mo le lagolago i lenei faailoga o le alofa.

I lalo o le va’ava’aiga a epikopo o uarota taitasi, e toatele volenitia na aoina, faavasega, ma teuina ia foa’i. Sa auai foi faifeautalai e aoina foai, faailoga i latou ma uta i luga o loli e agai atu i le uafu.

O uo mai isi faatuatuaga, nu’u atoatoa ma faalapotopotoga o le lotoifale sa auai fo’i ma aumaia a latou foa’i i falesa eseese i le motu o Tahiti ma Moorea ma avatu sa’o foi i le fale tutotonu mo le faavasegaina i Fariipiti. Sa ofoina atu foi e kamupani tumaoti ni oloa ma ofo e ave fua foai a le Ekalesia e aunoa ma se totogi ona o le tele o mea na aoina mai.

O foa’i uma sa tuufaatasia ma mea sa saunia e le malo ma ave i le uafu i Motu Uta i Papeete.

I le faaiuga, e sili atu i le 250 kupita mita o meafaigaluega ma sapalai e sili atu i le 300 tone le mamafa na utaina i luga o le vaa. O lea na aofia ai ma tane vai, tapoleni, laupapa, ie ‘afu, iliafi, meaai faamago, fagu vai, lavalava, oloa faamamā ma tausileleia, salu, pulumu, ma napekini pepe. Na aofia ai foi ma le 30 tone o vai.

A o utaina mea mulimuli i luga o le vaa, sa faafetai atu Peresitene Fritch i tagatanuu uma mo lo latou agalelei ma le tali mai.

“O le agaga o le lotogatasi e iloga ai o tatou tagata o le Pasefika ua taunuu lona igoa tauleleia mo le agalelei i tulaga sili ona faigata. Ma o taimi ia tatou te iloa e ui i le faitau afe o kilomita e vavae’eseina i tatou, o so’otaga ma Toga e moni ma malosi. E mafua ona o i tatou o le aiga e tasi, o tagata maoa’e o le Vasa Pasefika (Oceania).”

Na faaopoopo mai Peresitene Fritch: “E tele mea e sili atu nai lo meafaitino o loo i luga o lenei vaa; o loo tauaveina ai foi faailoga o le alofa ma le faailoaina o lo tatou lotogatasi.”

Saunoa mai Elder Riemer, “Mai na’o mea lava ua aoina e le Ekalesia, e mafai ona tatou iloa atu ai le lotofoa’i ma le alofa agalelei o tagata Polenisia. Matou te faafetai mo faatinoga ua faia, o foai uma ua tuuina mai, e le afaina po o le a le laitiiti, ia e tali atu i le apoapoaiga a Iesu Keriso: ‘Aua na faia e outou i le tasi o e aupito itiiti o o’u uso nei, o a’u lea na outou faia i ai’ (Mataio 25:40).”