Talatuu o le Faatuatua e ala i Auaunaga Faafaifeautalai

Saunia e John Millar

I le aso 2 o Mati 1942, sa valaauina uma peresitene o misiona a Le Ekalesia a Iesu Keriso o le Au Paia o Aso e Gata Ai e toe foi i o latou aiga ona o le Taua Lona Lua a le Lalolagi. O Peresitene Archibald Campbell sa valaauina e avea ma sui peresitene o le misiona mo le Misiona a Ausetalia. Sa vaetofiaina o ia e le peresitene o le mission i luma atu, o Elvon W. Orme i le aso 27 o Aperila 1942.

Sa lauiloa Archibald Campbell i lona tuuto ma le mausali i le talalelei a Iesu Keriso. Sa auauna o ia i le tele o auala e fausia ai le malo o le Atua i Ausetalia, e aofia ai le avea ma fesoasoani i peresitene o le misiona muamua atu. Ina ua maliu lona faletua, sa auauana o ia i se misiona i le 70 o ona tausaga ma femalagaai atoa ai i le Misiona a Ausetalia. Sa lilo ia Peresitene Archibald Campbell i le 1942 o le a ia faataatiaina se faavae o le faatuatua, tuuto ma le auauna atu o le a mulimulitaia i le tele o augatupulaga mulimuli ane.

Ia Iulai 2020, sa avea le atalii o le atalii o le atalii o Peresitene Campbell, o Dale Campbell Maurer, ma le uso mulimuli o le au uso e toatolu e mauaina se valaauga o se peresitene o le mission, o ona uso matutua atu, o Wayne ma Carl sa auauna muamua ai i lea lava tulaga. O nei uso sa soifua mai i Brisbane Ausetalia o ni tupulaga lona lima [i lo latou aiga] o tagata o le Ekalesia ma ola a’e ai i le talatuu o le faatuatua, tuuto, ma le auauna atu a o latou tamā o tamā matua.

O le uso ogatotonu o Carl, o se Fitugafulu Eria mo le Eria a le Pasefika i le taimi lenei, sa auauna o se peresitene o le Misiona a Perth Ausetalia mai le 2007 i le 2010. O le misiona foi lea sa auauna ai o se alii talavou. O lona uso matua atu, o Wayne, sa auauna o se peresitene i le Misiona a Tacloban Filipaina mai le 2014-2017 ma o loo avea nei ma Peresitene o le Nofoaga Autu e Aoao ai Faifeautalai mo le atu Filipaina. O Wayne sa auauna ai foi i lana ulua’i misiona o se alii talavou i le Misiona a Manila Filipaina. O Dale, le uso pito itiiti, o loo auauna ai i le Misiona a Raleigh North Carolina talu mai le 2020. Sa auauna i lana uluai misiona i le Misiona a Melepone Ausetalia.

Faatasi ai ma lo latou tamā o tamā matua, o Archibald Campbell, sa faaauau pea lenei talatuu o le faatuatua e lo latou tamā matua, o Allan Campbell, o lē sa avea ma uluai peteriaka i le Siteki o Brisbane Ausetalia sa fou le faavaeina i le 1960. Sa a’oa’o e le aunoa Allan mai le pulelaa, mai lona aiga, sa ia faasoa le manaomia ona taulai i se talatuu o le faatuatua ma le taua o le tumau ai se’ia o’o i le iuga. O Allan ma lona faletua o Madge sa auauna foi i se misiona i Adelaide Ausetalia i se taimi mulimuli ane o ō la olaga.

O le tamā o lenei au uso, o Arthur Maurer, sa auauna o se fesoasoani i le au peresitene o le siteki faapea foi o se fesoasoani i Au peresitene o Malumalu o Sini ma Brisbane. O Arthur ma Jan, o matua o tama e toatolu ma teine e toalua, sa auauna foi i ni misiona i le Misiona a Adelaide Ausetalia ma le Malumalu i Fiti. O i, na faataatia ai se mamanu mo a laua fanau ma fanau a fanau e 16 o loo auauna i le taimi nei, pe ua mae’a fo’i ona auauna atu i ni misiona.

O le auauna atu fa’afaifeautalai talavou ua avea o se faatosinaga tele i o latou olaga taitoatasi. O le suiga faaletagata lava ia ma le maitauina o suiga i olaga o isi tagata, e ala i le ola ai i le Talalelei a Iesu Keriso, ua fesoasoani e fofoa ai se mamanu amiotonu o le ola ma le auauna atu i totonu o o latou aiga taitasi. O le sailia ia faaauauina lenei talatuu o le faatuatua i augatupulaga o le lumanai o le naunautaiga lea o le au uso taitoatasi ma o latou tuafafine e toalua.

A o tula’i mai ni lu’itau mo faifeautala’i o lo’o auauna atu e ala mai i le faama’i pepesi, latou te talitonu pea, e leai lava seisi taimi e sili atu e auauna ai i se misiona nai lo le taimi lava lenei. E faamanuia e le Alii i latou o e auauna atu faatasi ma le tuputupu ae faaletagata lava ia ma le faamanuiaina, a o fausia e faifeautalai le malo o le Atua. Fai mai le Au Maurer, o le avea ma se meafaigaluega i le aao o le Alii e faamanuiaina ma faaoaina o latou lava olaga faapea foi i latou o e latou te auauna atu i ai. Mai aafiaga i o latou lava olaga ma i le tele o faifeautalai sa latou auauna faatasi, sa latou faamamafaina taunuuga lelei nei mai le auauna ai i se misiona:

O se naunautaiga malosi atu mo a’oa’oga ma sauniuniga mo se lumanai tutoatasi.
O se faamautinoaga lelei o le tagata lava ia ma se gafatia e fesootai lelei ma isi tagata.
O se liua faaletagata lava ia i le Alii o Iesu Keriso ma Lana talalelei.
O le faatupuina o manatuaga faaleagaga faatasi ma tagata lelei o le Ekalesia ma tagata e fiafia [i le Ekalesia].
O se talitonuga mautinoa e maua mai i le auauna atu i le Alii o se faifeautalai.

O le auaunaga faafaifeautalai o se tasi o auala sili ona taua e mafai ai e tagata o le Ekalesia ona faia ni sao taua i le galuega a le Alii. O le auaunaga faafaifeautalai a le aiga i le tele o tausaga ua avea ma talatuu. A o talitonu le au uso Maurer uma e toatolu i le upusii a Peresitene J. Reuben Clark Jnr. (1871–1961) e faapea, “I le galuega a le Alii, e le o le mea e te auauna ai ae o le auala e te auauna ai”¹, ua latou faafetai mo lo latou talatuu faaleaiga ma le avanoa e fesoasoani ai e fausia le malo o le Atua i soo se auala e finagalo ai le Alii ia i latou.