Mānava ia ’oe i roto i teie ve’a

Tē vai ra te tīa’ira’a !

nā metua e paraparau ra i tā rāua tamāhine

Noa atu te mau tāmatara’a tā tātou e fa’aruru nei, ’o Iesu Mesia tō tātou tīa’ira’a. ’Ua ha’amau Elder Ronald A. Rasband nō te pupu nō te Tino ’Ahuru ma Piti ’āpōsetolo i te parau tumu nō te ve’a i teie ’āva’e ’e teie parau mau nehenehe i roto i tāna parau pāpa’i ’āpī, « Te tīa’ira’a ’e te tāmāhanahanara’a i roto i te Mesia » (’api 4).

Nō te mau metua e rave rahi, e hina’aro-ta’a-’ē-hia teie poro’i nō te tīa’ira’a, ’a rave ai rātou ma te maita’i roa i te aupuru i te mau tamari’i i roto i te hō’ē ao fifi. ’Ua haʼapiʼi te peresideni Russell M. Nelson : « Tē fa’arahi noa atu ra te ’enemi i tāna ’arora’a i te fa’aro’o ’e ia tātou nei, ’e i tō tātou mau ’utuāfare ma te ’ū’ana roa. Nō te oraora i te pae vārua, e tītauhia ia tātou te mau fa’anahora’a nō te pāto’i atu ’e te ’ohipa itoito roa » (« Mau parau ’ōmuara’a », Liahona, Novema 2018, 7). Nō te pāturu i te mau metua i roto i teie ’ohipa mo’a, e tāmau noa te ’Ēkālesia i te ’imi ’ia hōro’a i te mau rāve’a tauturu tano ’e te faufa’a.

I roto i te ve’a nō teie ’āva’e, tē fa’a’ite atu nei tō’u hoa pāpa’i parau ’e ’o vau nei i te hō’ē hōho’a nō te mau metua e ha’aputu nei i te mau parau tumu o te ’evanelia ’e te mau rāve’a ’ōhie, ’o tē nehenehe e tauturu i te mau metua ’ia fa’atupu i te mau autā’atira’a pūai ’e tā rātou mau tamari’i, e aupuru nei i tō rātou fa’aro’o, ’e e patu nei i te hō’ēra’a (hi’o « Te hō’ē hōho’a pūai nō te metuara’a » i te ’api 10).

E arata’i te Vārua Maita’i ia tātou i te tīa’ira’a ’e i te tauturu ’o tā tātou e hina’aro. Tē ha’api’i nei Elder José A. Teixeira nō te Hitu ’Ahuru, nāhea e ti’a ai ia tātou ’ia fāri’i i te arata’ira’a hau atu ā nā roto mai i te Vārua Maita’i i roto « Mā’iti ’ia riro ’ei ta’ata ferurira’a pae vārua » (’api 40).

Tē ti’aturi nei mātou ē, e tauturu teie ve’a ia ’outou ’e i tō ’outou ’utuāfare ’ia ’ite mai i te tīa’ira’a, ’ia ’ite i te here rahi a’e, ’e ’ia ora i te ’oa’oa rahi a’e.

Ma te here mau,

Maren Daines, JD

Te ta’ata ’aravihi i roto i te fa’ahotura’a i te fa’aturera’a ’e te fa’anahora’a nō te ’utuāfare nā te ao ato’a nei