Mai, pe’e mai

Isaia 40–49

E aha tā Isaia i ha’api’i nō ni’a te rirora’a ’ei tāvini nā te Fatu ?

E mea pinepine te Fatu i te parau nō te feiā pe’e iāna ’ei mau tāvini ’aore rā ’ei mau ’ite nōna. E mea mātauhia te reira mau parau nā roto i te mau pāpa’ira’a mo’a, ’e ’aita te buka a Isaia i ta’a ’ē atu i teie mau fa’ahitira’a. I te tau o te Faufa’a Tahito, ’e i teie ’anotau, ’ua hōro’a te Fatu te mau fāna’ora’a i te ta’ata nō te tāvini iāna ’e nō te riro ’ei ’ite nōna.

• ’Ia tai’o ’outou i te mau pene 40–49, a Isaia, ’a ’imi i te mau taime i parau ai te Fatu « tāvini » ’aore rā « ’ite ». ’O vai tāna e parau nei ? ’A ’imi i te mau ’īrava e ha’api’i nei nāhea ’outou e riro ai ’ei ’ite ’e ’ei tāvini nō te Fatu, mai te Isaia 44:2.

  

  Iosepha Semita i te poro haerera’a, nā Sam Lawlor © 2001

• ’Ei reira, ’a tai’o ai ’outou i te mau pene 41–44, ’a ha’amana’o i te mau ’īrava e tano i tō ’outou pi’ira’a ’aore rā i tā ’outou aupurura’a. E aha tā te Fatu e ani nei ia ’outou ’ia rave, ’e nāhea ’oia i te tauturu ia ’outou ?

  

• E aha te mau rāve’a i hōro’ahia ia ’outou ’ia riro ’ei tāvini ’aore rā ’ei ’ite nō te Fatu ? Te mau hi’ora’a e nehenehe e riro hō’ē pi’ira’a, te misiōni, te ha’api’ira’a i tō ’outou ’utuāfare, ’aore rā, te tahi atu tāvinira’a. E tāpura atu i te teie mau ’ohipa i tupu i roto i tā ’outou buka ’ā’amu. E aha tā ’outou i ha’api’i mai nā roto mai i te reira ? Nāhea tō te Fatu tauturura’a ia ’outou ?

  

Pure nō te ’ite nāhea ’ia tauturu

« ’A pure ’ia ha’amaita’ihia ’outou i te fārerei i te mau ta’ata e fāri’i nei i roto i tō rātou ’ā’au i te mea maita’i atu ā nō tō rātou orara’a. ’A pure nō te ’ite nāhea ’outou ’ia tauturu ia rātou. E pāhonohia tā ’outou mau pure.

Peresideni Henry B. Eyring, tauturu piti i roto i te Peresidenira’a Mātāmua, « Te hō’ē tamari’i ’e te hō’ē pipi, » Liahona, Mē 2003, 32.

’Āparaura’a

E aha te tauturu ’e te mau ha’amaita’ira’a nō te ra’i mai tē tae mai i ni’a ia rātou, te mau tāvini ha’apa’o maita’i ? (hi’o Isaia 41:10).