Arata’ihia e te mau peropheta ora

Te feiā fa’atere o te ’Ēkālesia i mua i te ti’i o te Mesia

Te mau peropheta e mau ta’ata ïa tei pi’ihia e te Metua i te ao ra ’ia paraparau nōna. Tē fa’a’ite pāpū nei rātou nō Iesu Mesia ’e tē ha’api’i nei i tāna ’evanelia. Tē ti’aturi nei te mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei i te mau peropheta nō tahito ra ’e nō teie ’anotau.

E paraparau te Atua nā roto i te mau peropheta

E fāri’i te mau peropheta i te heheura’a nō ’ō mai i te Atua ra. ’Ia fa’auru-ana’e-hia te mau peropheta ’ia ha’api’i ia tātou, mai te mea ra ïa tē paraparau mai nei te Atua ia tātou (hi’o Te Ha’api’ira’a Tumu ’e te mau Fafaura’a 1:38). E nehenehe tātou e ti’aturi ē, tē parau mai nei rātou ia tātou i te mea tā te Atua e hina’aro ’ia ’ite tātou.

Tē ha’api’i nei te mau peropheta nō Iesu Mesia

Tē faʼaʼite pāpū nei te mau peropheta ato’a nō Iesu Mesia. Te ha’api’i nei rātou ia tātou ē, e Tamaiti ’oia nā te Atua. Tē ha’api’i nei rātou ia tātou nō ni’a i tōna orara’a, tōna hi’ora’a ’e tāna tāra’ehara. ’E tē fa’a’ite nei rātou ia tātou nāhea ’ia pe’e iāna ’e ’ia ha’apa’o i tāna mau fa’auera’a.

Mau hōpoi’a a te mau peropheta

E ha’api’i te mau peropheta i te ’evanelia a Iesu Mesia. E fa’ata’a mai rātou i te mau ha’amaita’ira’a tā tātou e fāri’i ’ia ha’apa’o ana’e tātou i te mau fa’auera’a, ’e te mau hope’ara’a tā tātou e fāri’i mai te mea ’aita tātou e nā reira. I te tahi taime, e nehenehe rātou e fa’auruhia ’ia parau mai ia tātou nō ni’a i te mau ’ohipa e tupu a muri a’e.

Mau peropheta tahito

’Ua ha’api’i te Atua i te mau ta’ata nā roto i te mau peropheta mai te ha’amatara’a mai ā. Te mau peropheta tei ora i te ’anotau nō te Faufa’a Tahito, ’oia ho’i ’o Adamu, Noa, Aberahama, Mose, Isaia, ’e te tahi atu. Tē vai ato’a te mau peropheta i rotopū i te mau ta’ata o te Buka a Moromona. I roto i teie mau peropheta tē vai ra ’o Lehi, Mosia, Alama ’e ’o Moroni. E nehenehe tātou e ha’api’i mai e aha tā rātou i ha’api’i nā roto i te tai’ora’a i te mau pāpa’ira’a mo’a.

Mau peropheta nō teie ’anotau

’O Iosepha Semita te peropheta mātāmua nō teie ’anotau. ’Ua fa’aho’i fa’ahou mai ’oia i te ’Ēkālesia a Iesu Mesia i te fenua nei. ’O Russell M. Nelson te peropheta ’e te peresideni o te ’Ēkālesia i teie mahana. Tōna nā tauturu i roto i te Peresidenira’a Mātāmua ’e te Tino ’Ahuru ma Piti ’Āpōsetolo e mau peropheta ato’a rātou, e mau hi’o ’e e mau heheu parau.

Faʼaroʼora’a i te peropheta

nā ta’ata fa’aipoipo e māta’ita’i ra i te ’āmuira’a nā ni’a i te niuniu ’āfa’ifa’i

E paraparau mai te peropheta ia tātou i taime o te ’āmuira’a rahi ’e i te tahi atu mau taime. E ha’api’i mai ’oia ia tātou i te mau mea tā te Atua e hina’aro ’ia ’ite tātou ’e nāhea ’ia pe’e ia Iesu Mesia i teie mahana. E nehenehe tātou e ’ite mai i tāna mau ha’api’ira’a i roto i te Liahona ’e i ni’a ChurchofJesusChrist.org.

Mau ha’amaita’ira’a nō te pe’era’a i te peropheta

E ha’amaita’ihia tātou mai te mea e pe’e tātou i te mau ha’api’ira’a a te peropheta. ’Ia pe’e ana’e tātou i te peropheta, e nehenehe tātou e ’ite ē, tē rave nei tātou i te mea tā te Atua e hina’aro ’ia rave tātou. E nehenehe tātou e ’ite i te hau i roto i tō tātou orara’a ’e ’ia ha’afātata atu ia Iesu Mesia.