Tā’u pāhonora’a nō te Buka a Moromona

Nā Annie Wong, Hong Kong, Taina

’Ua tāmata itoito vau i te « tātā’i » ia māmā Wong, tāna noa rā i hina’aro, ’o te parau ha’iha’i ïa ’e te pūai o te parau a te Atua.

I muri a’e i tō’u bāpetizora’ahia i te ’āva’e Tiunu 2002, ’ua fa’a’ite atu vau i tō’u metua vahine i tō’u fa’aro’o. Noa atu ē, e haere pinepine mai māmā Wong i te purera’a nā muri iā’u, ’aita ’oia i hina’aro e ’apo rahi mai ā.

I te pae hope’a, 10 matahiti i muri mai, ’ua mā’iti mama Wong ’ia bāpetizohia ’oia. ’Ua ’oa’oa roa vau. Te mea ’oto rā, tau matahiti i muri mai, ’ua fa’aea ’oia i te ha’apūai i tōna ’itera’a pāpū ’e ’ua ’imi i te tahi mau ’apera’a nō te haere i te purera’a.

’Ua fa’aitoito vau iāna ’ia haere mai i te purera’a, ’ua fa’atupu rā te reira i te mārōra’a. I te pae hope’a, ’ua fa’aea vau i te fa’aitoito iāna ’oi mutu ho’i tō māua aura’a.

I roto i te ’āmuira’a rahi nō ’Ātopa 2019, ’ua ani te peresideni Russell M. Nelson i te mau melo o te ’Ēkālesia ’ia « fa’atupu i tā tātou iho fa’anahora’a » nō te ha’apūai i tō tātou ’itera’a pāpū nō ni’a i te fa’aho’i-fa’ahou-ra’a mai.¹ ’A feruri ai au i tāna anira’a, ’ua ’ite roa vau ē e ti’a iā’u ’ia rave i te hō’ē ’ohipa nō te ha’amaita’i i te mau mea i rotopū ia māmā Wong ’e o vau nei.

Nō tā’u ’ōpuara’a nō te matahiti ’āpī, ’ua fa’aoti au nō’u iho e tai’o i te Buka a Moromona ’e māma Wong. I te mau taime ato’a ’ia parau ana’e ’oia e māuiui ri’i tōna mata, e nā ’ō atu ïa vau : « e fa’aro’o noa ïa ’oe ». ’Ia parau ana’e ’oia e ti’a iāna e haere e hōroi i te mau merēti, e pe’e atu vau iāna i roto i te fare tūtu ’e e tāmau noa vau i te tai’o pūaira’a.

E au ra ē, ’ua fa’aro’o pāpū maita’i māmā Wong ’e e ha’amana’o i te mea tā’u i tai’o. ’A tere noa ai te tau, ’ua mā’iti ’oia e tai’o ’ōna ana’e. I muri a’e, ’ua parau mai ’oia ia’u ē, e’ita e ti’a i te hō’ē ta’ata ha’iha’i e pāpa’i i te Buka a Moromona. ’Aita ’oia i fēa’a ē, e parau nā te Atua teie buka. Nō’u nei, te hi’ora’a iāna i te tāu’a-’ore-ra’a ’ia hina’aro e tai’o ’e ’ia fa’a’ite i te ’itera’a pāpū nō te Buka a Moromona, e temeio ïa.

I muri a’e i te bāpetizora’a ’o māmā Wong, ’ua pe’ape’a vau ’ia tomo mai ’oia i roto i te ’Ēkālesia nō’u. I teienei rā, ’ua roa’a tōna iho ’itera’a pāpū. E rave rahi matahiti tō’u tāmatara’a i te « tātā’i » iāna, tāna noa ra i hina’aro ’o te parau ha’iha’i ïa ’e te pūai o te parau a te Atua.

Tē māuruuru nei au nō te peropheta ora ’o tē hōro’a noa mai nei ia tātou i te arata’ira’a tano. Mai te mea e fa’a’ohipa tātou i te mea tāna e ha’api’i nei, e pe’e ato’a mai te mau ha’amaita’ira’a rahi. ’Ua fa’a’ite mai teie ’ohipa i tupu iā’u i te hina’aro rahi o te Fatu ’ia ha’amaita’i ia tātou. Te mea noa tā’u i rave ’o te tai’ora’a i te tahi tau pene ri’i o te Buka a Moromona i tō’u metua vahine. I muri iho, ’ua rave te Fatu i te ’ohipa i muri mai !