« ’’O vau ana’e ānei tō te feiā ’āpī pa’ari e tāfifi nei i te ’imira’a i te fā ? », Liahona, Tetepa 2022.
Feiā ʼāpī paʼari
’O vau ana’e ānei tō te feiā ’āpī pa’ari e tāfifi nei i te ’imira’a i te fā ?
E au ra iā’u ē, ’ua fa’a’ino vau i te fa’anahora’a—tā’u fa’anahora’a nō’u iho ’e te fa’anahora’a a te Atua nō’u.
I te 25ra’a o tō’u mahana fānaura’a, tē tāmā rā vau i tō’u piha ta’otora’a. E’ita tō’u vāhi i te mea nahonaho roa, ’e ’a feruri noa ai au nō te aha ’aita tō’u orara’a i te mea nahonaho ato’a. ’Aita vau i te vāhi ’o tā’u i mana’o e vai ai i te 25 o tō’u matahiti. ’Aita vau i te vāhi i reira vau e vai ai.
’Ua feruri au i te mea ’o tā’u i fāri’i ’ei feiā ’āpī i te taime ’a fāri’i ai au i tō’u ha’amaita’ira’a pātereāreha. I te mau taime ato’a ’a tai’o ai au i tō’u ananahi, ’ua mana’ona’o vau i te hō’ē pōti’i tei fātata i te maita’i-roa-ra’a. ’Ua ’ite rā vau ē, ’aita vau i pa’ari mai nō te riro mai mai te pōti’i tā’u i mana’ona’o na. ’E ’ua uiui au, mai te mea e ’ite mai tō’u iho ’āpīra’a iā’u i teienei, e au ’ore ānei ’oia ?
I reira iho, tahe a’e ra tō’u roimata. E au ra iā’u ē, ’ua fa’a’ino vau i te fa’anahora’a o tō’u orara’a. ’Aita vau i rave i te hō’ē noa a’e hape rahi, e au ato’a rā iā’u ’aita noa a’e tā’u e fa’a’itera’a nō tō’u orara’a. ’Aita tā’u e fā. ’Ua hāro’aro’a maita’i te tā’āto’ara’a, ’e teie au i’ō nei e ta’ira’a i ni’a i te tahua o tō’u piha ta’otora’a, ’e te mana’ora’a ē ’ua māu’a tō’u orara’a tā’āto’a.
’Ua fāri’i au te ’ōtahira’a i roto i tō’u ’āhuehue ’e tō’u tapineva. I taua ā rā taime, ’ua ’ite au ē, e ’ere roa ’o vau ana’e te feiā ’āpī pa’ari e aro nei nō te ’ite mai i tōna ’ē’a. ’A paraparau ai au ’e te tahi mau ta’ata, ’ua ’ite mai au ē e mea iti roa te feiā e orara’a tō rātou mai tei fa’anaho-maita’i-hia. E nā te reira i tauturu iā’u ’ia ’ite e ’ere o vau ana’e.
’Ua tauturu ato’a te reira iā’u ’ia ha’amana’o vau iho ē, ’aita te Metua i te ao ra e hina’aro ’ia hi’o iā’u iho mai te manuia ’ore. Tē hina’aro nei ’oia « ’ia haere māite [au] i mua i te ti’a-māite-ra’a i te Mesia, ma te ti’aturi pāpū roa » (2 Nephi 31:20). Tē ti’aturi nei ’oia i tō’u ’aravihi ’ia taui ’e ’ia tupu i te rahi maoti te mana o te tāra’ehara a te Fa’aora. ’O Sātane ana’e tē hina’aro nei ’ia parau vau iā’u iho ē, ’aita vau e fana’o fa’ahou ’ia riro mai ’ei pōti’i ’o tā tō’u Metua i te ao ra i ’ite e riro mai au.
Tē māramaramara’a i te fa’anahora’a o te ’oa’oa
E rave rahi o tātou e roa’a mai te mana’o tapineva nō ni’a i te ananahi. ’E nō te mea paha ’aita tātou i māramarama maita’i i te fa’anahora’a nō te ’oa’oa a te Atua. Tē mana’o nei paha tātou ē, e au tō tātou orara’a i te hō’ē ha’uti video—hō’ē ’ā’amu pāpa’ihia e ti’a ia tātou e pe’e nō te upo’oti’a. Tera rā, e ’ere mai te reira tōna fa’anahora’a. I te mau mahana ato’a tē rave nei tātou i te mau mā’itira’a, tē taui nei ’e tē tupu nei tātou i te rahi. ’Aita roa e tai’ora’a ’aore rā te pāpū nō te reira. E’ita roa tā tātou mau mā’itira’a e maerehia e tō tātou Metua i te ao ra, terā rā, e vai noa te reira ’ei mau mā’itira’a nā tātou. Tē pāpa’i nei tātou i tō tātou iho ’ā’amu, ’e ’ōna, ’a haere noa ai tātou.
’E mai te mea e « vaiiho [tātou] i te Mesia ’ia riro ’ei tumu ’e ’ei fa’aoti nō tō [tātou] ’ā’amu »,1 e hi’o noa tātou ma te ti’aturi i ni’a i te hō’ē hope’ara’a ’oa’oa ’e te mure ’ore.
I te tahi mau taime e rave tātou i te hape ’aore rā e mo’ehia ia tātou te ’avei’a, ma te vaiiho ia tātou ’ia ’ōvere haere noa ’e a muri noa atu.
E ’evanelia rā teie nō te tīa’ira’a. Te mau mea tei mo’e ’ua ’itehia mai. E ’evanelia nō te ’apora’a mai. Nō te fa’a’orera’a hara. Nō te tāmata-fa’ahou-ra’a. Mai tā Elder Neil L. Andersen, nō te pupu nō te Tino ’Ahuru ma Piti ’āpōsetolo i ha’api’i : « E ’ere te tātarahapa i te hō’ē fa’anahora’a mono ; ’o te fa’anahora’a ïa ».2
Te here o tō tātou Metua i te ao ra nō tātou e mea maita’i roa ïa, ’e e fa’anahora’a maita’i roa ato’a tāna nō tātou. E fa’anahora’a maita’i roa ra nō te feiā e ’ere i te mea maita’i roa, tei fa’anahohia mā te pa’ari ’e te hāro’aro’ara’a nō tō tātou mau hina’aro ’e tō tātou pūai. Tē vai rā te vāhi i roto i tāna ’ōpuara’a nō tō tātou mau hi’ara’a—tā tātou mau hape ha’avare ’ore ’e tā tātou mau hara onoono ’e tō tātou mau ’ōverera’a i roto i te medebara. ’E tē vai rā te vāhi i roto i tāna fa’anahora’a nō tō tātou mau manuiara’a, ’o tā tātou e fāri’i nei i te mau taime ato’a e fāriu tātou i ni’a iāna ’e ’a tāmata fa’ahou ai.
Tē ’itera’a mai i tā ’outou fā
Mai taua mahana fānaura’a ra, e rave rahi taime tō’u ferurira’a i ni’a i tā’u fā. ’Aita ā vau i hāro’aro’a i te mau mea ato’a. ’Aita rā vau e ha’ape’ape’a fa’ahou nei. ’Ua ’ite au ē, ’ua matau maita’i te Atua iā’u ’e mai te mea e fāriu vau i ni’a iāna, e tauturu mai ’oia iā’u ’ia fa’atupu i te aura’a i roto i te vāhi tā’u e ti’a nei.
Penei a’e e ’itehia mai i te hō’ē ta’ata te hō’ē rā’au tinaira’a i te ma’i māriri ’aita’ata, ’aore rā e ha’amou i te po’ia nā te ao nei, ’aore rā e fa’atupu i te hau nā te ao nei. E tāmāhanahana rā hō’ē ta’ata i teie mahana i te hō’ē hoa i roto i te hevara’a, ’aore rā e tauturu i te ta’ata ’ē’e i roto i te fifi, ’aore rā e pure nō te taime mātāmua roa. ’E tē mana’o nei e aura’a tō te reira mau mea tā’āto’a—te mau mea ato’a.
Te parau mau, e’ita te rahira’a o tātou e rave i te mau mea hanahana ’e te maere i roto i teie orara’a. ’Aita rā te reira e fa’a’ite nei ē, ’aita tā tātou e fā. Tā tātou fā hope’a ’ei tamari’i nā te Atua ’o te rirora’a ïa mai iāna te huru. ’E e pa’ari tātou i roto i te reira fā, ma te ravera’a i te mau mea iti ha’iha’i i te mau mahana ato’a nō te pe’e ia Iesu Mesia.
’Ua roa’a iā’u ’ia here i te ha’api’ira’a o te ’evanelia e nā roto i te reira « te mau mea iti ’e te pāpū e fa’atupuhia ai te mau mea rarahi » (Alama 37:6). ’Ia ha’amana’o ana’e au i tō’u orara’a, ’aita vau e ’ite nei i te mea rarahi a’e. Tē ’ite nei rā vau e rave rahi « mau mea iti ’e te pāpū » ’o tei fa’atupu i te ta’a-’ē-ra’a rahi. ’E ’ua ’ite au ē, maoti te aroha o te Fa’aora, e riro tā’u mau tauto’ora’a iti ma te ’ā’au tae, i te vauvau mai iā’u i te ’ē’a nō te riro mai iāna te huru.
’Aita hō’ē ’ē’a e riro mai tō ’outou. ’Ia tāmata rā ’outou mai tā ’outou e nehenehe mau nō te ta’ahi e tae atu ai i te Mesia, e ’ē’a maita’i ïa tō ’outou. Tē ti’aturi nei te Rahu Nui Mana Hope ia ’outou, nō reira ’a ti’a papū ’e ’a ti’aturi ia ’outou iho. ’Ua fa’aherehere te Atua i te mau mea maere nō ’outou, ’e noa atu ē tē mana’o ra ’outou ’ia ’outou e mea na’ina’i ’e te ha’iha’i, « e tauturu mai te Atua ia ’outou ’ia riro ’ei mea rahi a’e i tā ’outou i feruri na ».3