« E nehenehe tātou e tauturu ia vetahi ’ē ’ia ’ite ē ’ua herehia ’e tē fāri’ihia rātou », Liahona, Tetepa 2022.

Te mau parau tumu nō te aupurura’a

E nehenehe tātou e tauturu ia vetahi ’ē ’ia ’ite ē ’ua herehia ’e tē fāri’ihia nei rātou

’Ua ’ite te Fa’aora i te pāto’ira’a ’e ’ua ha’api’i ia tātou nāhea ’ia toro i te rima.

E tamāhine ’āpī ’ōtahi o Sasha i roto i te hō’ē pāroita ’utuāfare, e ’ere i te mea ’ōhie i te mau taime ato’a. E mea ’oa’oa ’oia ’e te hau, e mea pinepine rā e mea ta’a ’ē roa—’e mea ’ite-ri’i-hia—’ati a’e i te tahi atu mau melo o te pāroita. Mai te rahira’a o tātou, tē hina’aro nei ’oia ’ia fāri’ihia ’e ’ia tā’amuhia.

’Ua fa’ata’ahia Thomas, te hō’ē ta’ata pa’ari a’e i roto i te pāroita, ’ei taea’e aupuru nōna, ’e i te hō’ē mahana, ’ua tāpe’a atu rāua tāna vahine nō te fārerei ia Sasha. E mea huru ’ē ri’i te fārereira’a i te mea ē, ’ua haere atu te ’āparaura’a i ni’a i tōna ti’ara’a tamāhine ’ōtahi. Terā rā, ’a paraparau noa ai rātou, ’ua ti’a ia Sasha ’ia mana’o ē, tē tāmata noa nei Thomas ’e tāna vahine ’ia māramarama i tōna huru orara’a ’e e nāhea e ti’a ai ia rāua ’ia tauturu iāna.

I te hō’ē taime, ’ua parau a’era Thomas, « tē hi’o nei vau, tē hina’aro ra tō ’oe ’āua i te tahi here iti. Tē hina’aro nei au e tauturu ia ’oe nō te reira ».

E taime rahi tō Sasha e pau i ni’a i tāna ’ohipa, e ’ere te ’atu’atura’a i tōna ’āua i riro ’ei ’ohipa mātāmua nāna. E ’ere ato’a ho’i te reira i te ’ohipa au roa nāna. ’Ua ’ite ’oia e nāhea ’ia rave i te ’ohipa i roto i te ’āua, ’e ’ua ’ite ’oia ē, e nehenehe tāna e rave i te reira. ’Aita rā te reira e taui nō te mea e mea au ’ore roa nāna te reira ’ohipa.

I riro nā hō’ē taime, e nehenehe tāna uira’a i te ha’amāuiui i tōna mau mana’o. ’Ua parau rā Thomas ē, ’ua haere nā ’oia i te ’āua fa’ehau ’e ’ua ’ite ’oia i te ’ohipa tā te hō’ē vahine e rave tāmau noa ’o ’oia ana’e, ’ia ’ore ana’e tāna tāne i reira. ’Ite a’era ’oia ē, tē ’imi nei Thomas i te hō’ē rāve’a nō te fa’ahōhonu atu ā i tō rāua auhoara’a. Tē tāmata nei Thomas i te fa’atano i tōna orara’a ’e tō Sasha, ’e ’ia ’imi i te rāve’a e tū ai tō rāua mana’o.

’Ua ha’api’i mai nā pae e piti o teie aura’a nō te aupurura’a ’ia here ’e ’ia fāri’i i te tahi ’e te tahi nō hea mai rāua, ’e ’ua tupu mai te hō’ē auhoara’a fātata roa ’e te pāpū ho’i.

’Aita roa te ’aihere a Sasha i nehenehe a’enei mai terā.

Te hi’ora’a maita’i nō te fa’aōra’a mai

I roto i te Faufa’a Tahito, ’ua tohu Isaia ē, e ’ite pāpū Iesu Mesia e aha te rirora’a ’ei mea ta’a ’ē. ’Ua ’ite ’oia e aha te tu’ura’a i te hiti ’e te hāmani-’ino-ra’a. « I vahavahahia ’oia, ’e ’aore i ha’apa’ohia ’ei ta’ata ; e ta’ata mātaro i te ’oto, ’e ’ua ’ite ho’i i te mihi » (Isaia 53:3). Nā roto i tōna here mau, ’ua ’ite ’oia i tō tātou mana’o ’e ’ua ’ite nāhea i te fa’aora ia tātou (hi’o Alama 7:12). ’O ’oia te hi’ora’a maita’i roa nō te huru e ti’a ai ia tātou ’ia toro i te rima ma te here nō te fa’aō mai ia vetahi ’ē, noa atu te huru o tō rātou orara’a ’aore rā tō rātou huru ta’ata.

Te mau parau tumu e feruri

’A ’imi ai ’outou i te mau rāve’a nō te tauturu ia vetahi ’ē ’ia ’ite ē, tei roto rātou, ’a feruri i teie mau parau tumu tā te Fa’aora i ha’api’i ’e i ora :

’Ia hina’aro mau ’outou ’ia matau i te tahi atu ta’ata i te feiā tā ’outou i mātau a’ena (hi’o Mataio 5:43–48).
’Eiaha e mata’u ’ia ’āmui atu i te feiā e ora ra ’aore rā e ti’aturi ta’a ’ē nei, mai te mea e’ita te reira e ha’afifi mai i te mau ha’api’ira’a a te Fa’aora (hi’o Mareko 2:14–17 ; Luka 7:38–50).
E ti’a i te mau ta’ata ato’a ’ia ’ite ē, tē hina’arohia ra rātou e tātou i te fare purera’a (hi’o 3 Nephi 18:22–32). ’Ia vai ’outou i te vāhi i reira rātou e nehenehe ai e ha’api’i mai i te ’evanelia a te Fa’aora ’e ’ia ’ite i tōna here, e taui te reira te ta’ata ato’a.
’Ua ’ite te Fa’aora e aha tā tātou e hina’aro, te tumu nō te mea ’ua ’ite ’oia i te mea tā tātou e putapū nei (hi’o Alama 7:11–12). E nehenehe tātou e fa’a’ite i te here nā roto i te ’imira’a ’ia hāro’aro’a i te mau ’ohipa i tupu nō vetahi ’ē ’e te tu’ura’a ia tātou iho i tō rātou ti’ara’a.
’Ua rave te Fa’aora i te taime nō te pāhono i te mau hina’aro o te feiā e hā’ati ra iāna. ’Ua fa’aea ’oia i te ’atu’atu ia vetahi ’ē, noa atu e fa’anahora’a tāna i te tahi atu vāhi (hi’o Mareko 5:22–43).

E aha te ti’a ia tātou ’ia rave ?

’Eiaha e vaiiho i te mau ta’a-ē-ra’a ’ia tāpe’a ia ’outou ’ia mātau i te feiā tā ’outou e aupuru ra. Noa atu te huru o tō tātou mau ta’a-’ē-ra’a, tē vai ra hō’ē vāhi ha’amataura’a e ti’a ’ia ’itehia mai.