Hō’ē mahana i te taime hō’ē

Nā Casey Paul Griffiths, Utah, Marite

’Ua māuruuru māua i te mau melo fa’ahiahia o tā māua pāroita, tei tauturu mai ia māua ’e i tā māua tamaiti ma’i hiparoto.

’O Josh i roto i te hō’ē tere hiero ’aita i maoro a’enei.

I te 18ra’a ’āva’e o tā māua tamaiti o Joshua, ’ua ’itehia ia māua i te tahi mea huru ’ē i roto i tōna huru ta’ata. ’Ua nehenehe ia Josh e tai’o ’ā’au fātata te tā’āto’ara’a o te mau ta’o o te hīmene tāta’itahi i roto i te ’āfata teata ’o tāna i māta’ita’i, e mea taere rā ’oia ’ia ha’api’i mai i te paraparau. I te hō’ē mahana, ’ua parau mai tō’u metua vahine ho’ovai ē, tē vai ra te mau tāpa’o nō te ma’i hiparoto i ni’a ia Josh. ’Ua parau ato’a mai te mau taote ’aravihi i te reira parau.

’Ua tai’o ta’u vahine ’o Elizabeth i te mau buka e rave rahi e fa’a’ite ra i te parau nō te ma’i hiparoto. ’Ua fa’aō ato’a ’oia ia Josh i roto i te mau fa’anahora’a nō te tauturu iāna. ’Ua fa’aitoito onoono ’oia ’ia roa’a i tā rāua tamaiti te hō’ē ha’amatara’a maita’i a’e i roto i te orara’a ’o tā rāua e nehenehe e hōro’a nōna.

I te mau mahana e fēa’a ai au nō ni’a i te ’ananahi, e tāmarū mai Elizabeth iā’u. ’Ua parau mai ’oia iā’u ē, e ti’a ia māua e rave i te mau mea hō’ē mahana i te taime hō’ē.

« Mea ti’a ia tāua ’ia māuruuru i te ’ohipa ’āpī ato’a tā Josh e ha’api’i mai, ’eiaha rā ’ia rōtahi i ni’a i te mau mea ’ite-’ore-hia nō te ananahi » ’ua parau ’oia.

I tōna pa’arira’a mai, ’ua riro Josh ’ei tamari’i fa’aro’o ’ore i te fare purera’a. Nō te tāpe’a iāna ’ia ’ore ’ia fa’ahuehue i te Paraimere, ’aore rā ’ia ha’apēpē i te mau tamari’i, ’ua rave mai au iāna i ni’a i tō’u nā turi ’āvae. E ’aro mai ’oia, e pāra’u mai ’e e taputō mai iā’u i te roara’a e toru hora purera’a. Pinepine au i te ho’i mai i te fare ma te mamae ’e te rohirohi.

« Nō te aha ’aita tāua e vaiho noa iāna i te fare i te taime purera’a ’e e tāuiui tāua i te fa’aeara’a i te fare ’e ’ōna ? » ’Ua parau atu vau.

Pāhono mai nei Elizabeth : « Mai te mea e’ita tāua e tāmau i te rave iāna, e ha’api’i mai ’oia ē, mai te mea e ha’uti ’oia, e nehenehe ’oia e haere i rāpae i te fare purera’a ». ’Ua ’ite au ē ’ua tano ’oia.

I te hō’ē mahana, ’ua parau mai te metua vahine o te tahi atu ’utuāfare e tamari’i ma’i hiparoto tāna ē : « ’Ia ti’ahia tō Josh e va’u matahiti ’e ’ia fāri’i ’oia i te Vārua Maita’i, e tāmārū ’oi’oi ’oia iāna ! »

’Aita vau i ti’aturi roa i tāna parau, i te va’ura’a rā o tōna matahiti, ’ua fāri’i ’oia i te Vārua Maita’i ’e ’ua tāmarū ’oia iāna—ma’a vāhi iti.

I te pa’arira’a mai Josh, ’ua fāri’i ’oia i te autahu’ara’a. ’Ua ’ōpere ’oia i te ’ōro’a mo’a ’e ’ua ha’api’i mai i te faufa’a rahi nō te tāvinira’a. ’Ua ha’api’i mai te mau melo o tāna pupu autahu’ara’a ’e o Josh i te hō’ē ori nā ni’a i te hō’ē video nō te mau matahiti 80 ’e ’ua fa’a’ite i te reira i te hō’ē fa’a’oa’oara’a pāroita.

Mea maita’i roa tā mātou pāroita i ni’a ia Josh. E mata ’oa’oa tō te mau melo ’ia ’ōpere ana’e ’oia i te ’ōro’a mo’a, ma te ’ori ri’i te tahi tu’ura’a ’āvae nō te mau matahiti 80.

E 17 matahiti tō Josh i teienei. E ta’ata ha’uti upa’upa ’aravihi ’oia ’o tē pāpa’i nei i te mau hīmene. E mea au nāna e ha’uti ’e e haere tāmau i ni’a i te tahua teatara’a o te fare ha’api’ira’a ’e o te fare ’oire.

Tē māuruuru nei māua ’ia riro ’ei metua nō Josh ’e ’ia vai i roto i tōna tere. ’Aita māua i pāpū e aha tā tō ananahi e fa’aherehere nei nō mātou, ’ua fafau rā māua ’ia ora hope roa i pīha’i iho iāna i te mau mahana atoa.