« Vaiiho i te Fatu ’ia arata’i i tō ’oe orara’a », Liahona, Tetepa 2022.
Feiā ʼāpī paʼari
Vaiiho i te Fatu ’ia arata’i i tō ’oe orara’a
E’ita vau e ’ite i te mau taime ato’a e nāhea te mau mea ’ia tupu mai, i tō’u rā fa’a’ohipara’a i te fa’aro’o, ’ua ha’amaita’i mai te Fatu iā’u.
E ’ere te ha’apa’ora’a fa’aro’o i te mea paraparauhia iō mātou nei i tō’u pa’arira’a mai—noa atu ē, e ta’ata fa’aro’o tō’u nā metua i te tuha’a rahi o tō rāua orara’a, nā te ma’i rahi o tō’u metua tāne, te hō’ē o tō rāua mau tāmatara’a, i arata’i ia rāua ’ia fa’aru’e i te ha’apa’ora’a fa’aro’o i pa’arihia mai e rāua. E maha tō’u matahiti i tōna pohera’a i te ma’i māriri ’aita’ata, ’e ’o vau ato’a te hōpe’a o nā tamari’i 13, ’e ’aita tō’u metua vahine ’ivi i ti’aturi ē, e vaiiho te Atua i te hō’ē mea mai teie te huru ’ia tupu i roto i tō mātou ’utuāfare.
I te 14ra’a rā o tō’u matahiti, ’ua tae mai te mana’o i roto iā’u ē, tē ’ere nei te hō’ē ’ohipa i roto i tō’u orara’a. ’Ua ui maere au, e fā rahi ānei tā’u ’o tā’u i ’ore i māramarama. E au ē, mai ia Iosepha Semita ra vau, « ’ua ō mai te hō’ē ferurira’a hōhonu ’e te pāpū ’ore i roto i tō’u mana’o » (Iosepha Semita—’Ā’amu1:8). Noa atu, ’aita vau i fa’aro’o na i te parau nō Iosepha Semita i taua taime ra, ’ua ha’amata vau i te rave hō’ē ā ma’imira’a mai iāna, ’a haere ai au i te mau fare purera’a e rave rahi ma te ti’aturi ē, e ’itehia mai iā’u te parau mau.
’E ’ua nā reira vau i te hō’ē mahana, i tō’u ’itera’a e piti nā taure’are’a ma te pereue i te haerera’a i te fare o tō’u veutupu. ’Ua hia’ai roa vau ’ia ’ite ’e ’ua ani au ia rāua ’ia ’āmui atu i roto i tā rāua fārereira’a. I muri a’e i te parau fa’ati’a a tō’u metua vahine, ’ua ha’amata vau i te ’āparaura’a misiōnare ’e tomo atu ra i roto i te ’Ēkālesia i muri iho.
Nā roto i tō’u tomora’a i roto i Te ’Ēkalesia a Iesu Mesia i te Feiā Mo‘a i te mau Mahana Hope’a nei, ’ua tauturu te reira iā’u ’ia ’ite i tā’u ’ōpuara’a, i te taime iho ā rā ’a ō ai au i roto i te pupu a te feiā ’āpī pa’ari, e tau ’a rave ai au i te mau fa’aotira’a tei ’ore i fāri’ihia e te mau ta’ata e hā’ati ra iā’u. Noa atu rā e fā ’e e arata’ira’a tā’u, ’aita vau i pāpū roa i te huru o te tupura’a mau o te mau ’ohipa.
Terā rā, ’a fa’aruru ai au i te mau mea ’ite-’ore-hia ’e te pāpū ’ore ’e tae noa atu i te mau tauira’a e rave rahi, ’ua vai tāmau noa i roto iā’u te arata’ira’a a tō tātou Metua i te ao ra, ’a fāriu ai au iāna ra. ’Ua ha’api’i mai au i te tahi mau rāve’a nō te tūru’i i ni’a iāna ’e i ni’a i tō’u fa’aro’o tei tauturu iā’u ’ia haere i mua ’e ’ia tāmau noa i te ’imi i tā’u ’ōpuara’a.
Te haerera’a i mua ma te hō’ē misiōni
I te matahiti ’a fa’aineine ai te rahira’a o tō’u mau hoa e haere i te ha’api’ira’a tuatoru, tē feruri ra vau e nāhea vau ’ia haere i te misiōni. I Tīreni, e fa’aō te mau pīahi ato’a i roto i te hō’ē hi’opo’ara’a, hou rātou ’a haere ai i te ha’api’ira’a tuatoru. E fa’atupuhia te reira hō’ē noa taime i te matahiti, nō reira mai te mea e haere au i te misiōni, e’ita te ha’api’ira’a noa tā’u e fa’ataime e piti matahiti, e tīa’i ato’a rā vau hō’ē atu ā matahiti hau nō te haere fa’ahou i te ha’api’ira’a i muri a’e i te reira.
’Ua pāto’i tō’u ‘utuāfare, tō’u iho ā rā metua vahine, i te misiōni. E mea faufa’a roa nōna ’ia haere au i te ha’api’ira’a tuatoru. ’Ua ti’aturi rā vau ē e tauturu mai te Fatu iā’u ’ia rave i te mea e tītauhia, nō reira ’ua ha’amata noa vau i te fa’aineine ma te pure ’ū’ana.
I te haerera’a mai tō’u ’episekōpo i tō’u fare ma tā’u mau parau nō te misiōni tei fa’aotihia, ’ua ani ’oia i te tu’urimara’a a tō’u metua vahine, ’ua maere roa tō’u māmā ; ’aita ho’i au i parau iāna ē tē tāmau noa nei au i te fa’aineine nō te misiōni. ’Ua tītauhia e rave rahi ravera’a nō te fa’ataui i tōna mana’o, ’ua tāmaru rā te Fatu i tōna ’ā’au ’e ’ua tauturu iāna ’ia ’ite ē, tē hina’aro nei au e tāvini.
’Ua ha’apāpū mai te ’evanelia iā’u ē, tē rave nei au i te ’ohipa maita’i, nā roto i te nu’ura’a i mua, te ta’ahira’a i muri i te tahi ta’ahira’a, ma te fa’aro’o—noa atu ā tā’u mau uira’a ato’a ’e tō’u mau fea’ara’a—’ua tāmau noa vau i te haere i mua.
Te pe’era’a i te heheura’a i muri mai i te heheura’a
Te ho’ira’a mai i te fare i muri mai i tā’u tau misiōni, tōna aura’a ato’a ’o te ho’ira’a ïa i roto i te pāpū ’ore. ’A ’imi ai au i te arata’ira’a nō ’ō mai i tō’u Metua i te ao ra nā roto i te pure ’e te ha’apaera’a mā’a, ’ua fāri’i au i te heheura’a e reva i te fenua Marite ’e ’ia haere i te fare ha’api’ira’a tuatoru nō Brigham Young, e au ra ē e ’ohipa fifi ri’i.
’Ua rave au i te mea e mara’a iā’u e rave, ’e te mau ta’ahira’a maita’i roa a’e i muri mai. I te tahi mau taime, e au ē, ’aita tō’u e tāpaera’a i ni’a i tō’u haere’a—tē ha’a nei au ma te itoito, ’aita rā vau i ’ite ma te pāpū ē, e tauturu tā’u mau tauto’ora’a ’ia fa’atae iā’u i tā’u mau fā. Terā rā, tā’u fā rahi ’o te pe’era’a ïa i te mea tā te Fatu e hina’aro iā’u ’ia rave, ’e e fā tao’a rahi te reira nō’u.
’A rave ai au i te reira mau tauto’ora’a, i te hō’ē mahana ’ua fa’auruhia vau e haere e tauturu i te hō’ē hoa maita’i tō’u nō te fenua Marite mai, e ora ra i roto i tō’u ’oire ’āi’a. ’Aita vau i ’ite e aha te ’ohipa e tupu mai i taua tau ra—’ua tauturu noa vau iāna nō te mea ’ua arata’i te Vārua iā’u ’ia nā reira—’ua riro rā tō’u hoa ’e tōna metua tāne ’ei mauha’a nō te tauturu iā’u ’ia ’ite, e nāhea ’ia fa’atae i te anira’a ’e ’ia fāri’i i te visa e tītauhia nō’u nō te haere i te ha’api’ira’a i BYU. Nā roto i tā rāua tauturu ’e i te mau tāranira’a rahi i ravehia e tō’u metua vahine nō te ’aufau i tō’u tere, ’ua manuia vau. E temeio te reira.
Mai te reira ato’a tō’u orara’a i te haere-tāmau-ra’a i mua. E rave maita’i au ’e i muri iho e fāri’i au i te fa’aurura’a, hō’ē ’ohipa i te taime hō’ē, nō te ’ohipa ’o tā’u e rave i muri iho. I tō’u nā reirara’a, ‘ua roa’a tā’u ’ohipa i te pū ha’api’ipi’ira’a misiōnare, ’ua ’itehia iā’u te mau rāve’a nō te ’aufau i tā’u ha’api’ira’a, ’ua fa’aoti au ’ia maita’i roa a’e i te hi’opo’ara’a, ’e ’ua roa’a tā’u parau tū’ite, e ’ua fa’aipoipohia vau.
Te mau pāhonora’a tā’u i fāri’i ’aita te reira i tae ’oi’oi mai ’e ’aita ato’a vau i fāri’i i te hō’ē fa’anahora’a pāpū maita’i, ’ua fāri’i rā vau i te ha’apāpūra’a ē, ’ua māuruuru te Fatu i te haere’a i ravehia e au.
’Aita ana’e tō te heheura’a e ’avei’a
Tau matahiti i muri mai, ’ua ha’api’i mai au i te faufa’a rahi ’ia fa’atusia nō te ora i te ’evanelia. Mai te mea e hina’aro tātou i te Fatu ’ia hōro’a mai i te fā ’e i te arata’ira’a, ’ei ’ā’au tae tō tātou nō te rave i te reira ’avei’a.
I muri a’e i te tau ha’api’ira’a, ’aita te mau mea i tupu mai tei mana’ohia i roto i te taiete tei reira vau i te ravera’a i te ’ohipa, nō reira, e piti mā’itira’a tā māua tā’u vahine : e fa’aea i te fenua Marite ’aore rā, e ho’i i te fenua Tīreni. ’Ua tae mai te mana’o pāpū i roto ia māua ē, e tītauhia ia māua e ho’i i te fenua Tīreni. E au ē, mai te reira iho ā e hina’aro e ho’i i te fare, terā rā e taime fifi roa te reira. ’Aita re’a ho’i e ’ohipa i Tīreni. E mea rave ’atā ho’i nō’u ’ia ho’o i tō māua fare. I te pae nō te moni ’e nō tā māua mau tauiha’a, e’ita te reira i te ’ohipa ’ōhie ’ia rave ; tē mana’o ato’a ra tō māua nā ’utuāfare ē, tē ’ere ra māua i te pa’ari.
E aha tā ’oe e rave ’ia tito ana’e te heheura’a i te arata’ira’a pa’ari ? Noa atu e ’ere i te mea ’ōhie, ’ua ’ite rā māua tā’u vahine i te mea e ti’a ’ia rave. ’Ua fa’aha’amana’o te reira ia māua ē, nā te ’evanelia māua e arata’i i teie vāhi ātea. ’Āhiri ’aita te Fatu, e’ita vau e fāri’i i te fa’aurura’a tei tauturu iā’u ’ia tāvini i te hō’ē tau misiōni, ’ia fāri’i i tā’u parau tū’ite ’e ’ia fārerei i tā’u vahine. E ti’a noa ia māua e ti’aturi ē, rau noa atu ā te tumu, ’ua hina’arohia māua i te fenua Tīreni.
’Ua vaiiho māua i tō māua fare i tō māua ’episekōpo ’ia nehenehe iāna ’ia hōro’a tārahu atu e tae roa atu i te taime e nehenehe ai iāna ’ia ho’o atu, ’e ’ua reva atu māua. E mea fifi roa te reira, tera rā ’ua fāri’i māua i te mau ha’amaita’ira’a ’e i te mau temeio e rave rahi i tō māua fāri’ira’a i te pi’ira’a a te Fatu. ’Ua ’ite te Fatu i hea tātou e hina’arohia ai ’e i hea tātou e tano ai ’ia tāvini maita’i a’e i tāna mau ’ōpuara’a, ’e e ha’amaitai ho’i ’oia ia tātou nō tō tātou ha’apa’o.
Te ’imira’a i te mau rāve’a ’e te Fatu
Tē ti’aturi nei au ē, e pe’e te feiā ’āpī pa’ari i teie mahana i te hi’ora’a o te taea’e o Iareda. Noa atu ’ua ’ite te ’āti Iareda ē, e fano rātou i te fenua i parauhia ra, ’aita rā rātou i ’ite roa nāhea ’ia haere i reira. ’Āre’a te taea’e o Iareda « ti’aoro atu ra i te i’oa o te Fatu » (Etera 2:15), pūpū mai nei ’oia i te tahi mau rāve’a. ’Ua parau te Fatu iāna ’ia hāmani i te mau pahī ’e ’ua hōro’a iāna i te arata’ira’a nō te fa’ahaere mai i te mata’i nō te feiā i roto i te pahī.
I muri iho rā, ’ua ui te Fatu i te taea’e o Iareda i teie uira’a : « E aha tā ’oe i hina’aro iā’u ’ia rave ’ia roa’a mai te māramarama i roto i tō ’outou mau pahī ? » (Etera 2:23). ’Aita ’oia i parau i te taea’e o Iareda e aha te rave, ’ua ani rā te Fatu iāna ’ia haere e ’imi i tāna iho rāve’a.
E mea nā reira tō’u orara’a i te terera’a. I te tahi taime, e hōro’a mai te Fatu i te mau arata’ira’a pāpū nō’u. I te tahi atu mau taime, tē tīa’i nei ’oia iā’u ’ia haere iāna ra ma tō’u iho mau mana’o. Terā rā, e mea faufa’a roa ’ia fa’aō vau iāna i roto i teie ’ohipa. E mau ta’ahira’a tītauhia te ha’apaera’a mā’a, te pure ’e te ’āparaura’a ’e te Fatu nō te ta’ata e tāmata ra i te rave i te mau fa’aotira’a nō tōna orara’a.
Nō te feiā ’āpī pa’ari e ’imi nei i te fā rahi a’e, tē hōro’a atu nei au i teie parau a’o : ’A fāriu atu i te Fatu ra nō te fāri’i i te heheura’a nō ’outou iho. ’A tai’o pinepine i tō ’outou ha’amaita’ira’a pātereāreha. ’E ’a fa’aineine nō te fa’atusia i te mau mea faufa’a ri’i o tō ’outou orara’a, mai te mea e parau mai te Fatu ia ’outou ē, e ’ōpuara’a rahi atu ā tāna nō ’outou.
’Ua here au i te Fatu. ’Ua riro te ’evanelia ’ei mea faufa’a roa nō’u. ’Ua ’ite au ē, tē ’ite nei te Fatu i tō ’outou pūai ’e tē hina’aro nei ’oia e tauturu ia ’outou ’ia fa’atupu i tā ’outou ’ōpuara’a hanahana.