’A tāmata ā

Nā Molly Ogden Welch, te mau ve’a a te ’Ēkālesia

’A rave noa ai au e rave rahi mau ’ohipa maitata’i, ’ua fifihia mai rā tō’u aura’a e te Fatu, nō tō’u tāu’a-’ore-ra’a i te hō’ē mea faufa’a roa a’e.

I te otira’a tā’u misiōni i te ’āva’e Tēnuare 2019, ’ua pāpū iā’u ē e tāmau noa vau ma te ’ōhie i tā’u tuatāpapara’a pāpa’ira’a mo’a i te mau mahana ato’a. I te ha’amatara’a, e parau mau te reira. I muri a’e i te ’ohipa, e ho’i au i te fare ’e e tai’o i tā’u mau pāpa’ira’a mo’a mā tē tu’utu’u ’ore. ’Ua ’oa’oa vau i tō’u itoito ’ia tai’o i te mau pāpa’ira’a mo’a ’e i te ha’api’ira’a mai nō ni’a i te Fa’aora.

’Ua taui te reira i te ’āva’e Tiunu 2019, i te ho’ira’a mai tō’u hoa arapae mai tāna misiōni mai. ’Ua ha’amata māua i te arapae i te reira iho ā taime ’e ’ua mōmo’ahia māua e ono hepetoma i muri mai.

I roto i te rahi o te ’ohipa nō te fa’anaho i te hō’ē fa’aipoipora’a, e haere i te ’ohipa, e haere i te fare ha’api’ira’a tuatoru ’e ’ia fa’ata’a i te taime nō tō’u mōmo’a tāne, ’ua iti oi’oi mai tā’u tuatāpapara’a pāpa’ira’a mo’a i te tahi ma’a taime noa i te hepetoma. Nō te mea ’ua fa’anevanevahia vau e mau ’ohipa maita’i, ’ua tau’a ’ore au ma te mana’o ’ore i tō’u aura’a ’e te Fatu.

’Ua faʼaipoipohia māua tā’u tāne i te ’āva’e Novema 2019. I muri mai i te mau mahana fa’afa’aeara’a, ’ua tāmata vau i te tai’o fa’ahou i te vāhi tā’u i fa’aea i te pāpa’ira’a mo’a. Tau ’āva’e i muri mai, ’ua tuatāpapa ’āmui māua tā’u tāne i te mau pāpa’ira’a mo’a ma te manuia. I te mau po’ipo’i ato’a, e tai’o māua tau minuti ri’i i te mau pāpa’ira’a mo’a ’e e ’āparau i te hō’ē ha’api’ira’a nō te Mai, pe’e mai, hou māua ’a horo atu ai i te ’ohipa ’aore rā i te fare ha’api’ira’a.

I muri iho, tae mai nei te ma’i parare COVID-19. Nō te mea e tāuiui noa te tārena o te fare ha’api’ira’a ’e te ’ohipa, ’ua fa’aea tā māua tuatāpapara’a pāpa’ira’a mo’a i te po’ipo’i. E tuatāpapa noa māua i te tahi ma’a taime i terā ’e terā taime, ’e ’ua fifi roa tō māua aura’a ’e te Fatu. I muri a’e ato’a i te matarara’a te mau ’ōpanipanira’a ’e te ho’i-fa’ahou-ra’a māua i te fare purera’a, tē fifi noa ra ā tā māua tuatāpapara’a.

E mea pinepine te mau melo o te ’Ēkālesia e mea fifi nō rātou ’ia tai’o tāmau i tā rātou mau pāpa’ira’a mo’a. E mea ’ohipa roa tō tātou orara’a ’e tē fa’aruru nei tātou i te mau tāmatara’a i te mahana ato’a. ’Aita rā i taere roa nō te ha’amata fa’ahou ā.

’Ua parau te peresideni Russell M. Nelson ē : « ’Aita te Fatu e tītau nei i te fāito maita’i roa ia tātou i teie taime nō tō tātou haerera’a mure ’ore i mua. ’Ua parau fa’ahou rā ’oia, « e nehenehe tātou pā’āto’a e rave maita’i a’e ’e ’ia maita’i atu ā ».¹

’Aita i maoro a’e nei, ’ua fafau fa’ahou māua tā’u tāne e tai’o i tā māua mau pāpa’ira’a mo’a. ’Aita māua i maita’i roa nō te reira ’ohipa, tē tāmata nei rā māua i te mahana tāta’itahi ’ia ha’apūai i tō māua ’itera’a pāpū. Tē māuruuru nei au nō te mau rāve’a e rave rahi tā te Fatu i hōro’a mai ia māua ’ia tātarahapa, ’ia rave maita’i a’e ’e ’ia maita’i a’e.