« E hōho’a pūai nō te ti’ara’a metua », Liahona, Tetepa 2022.

E hōho’a pūai nō te ti’ara’a metua

Nā Maren Daines, JD, Ta’ata ’aravihi i te pae fa’ahotura’a i te mau fa’anahora’a ’e i te mau ture ’utuāfare nā te ao ato’a nei, ’e G. Sheldon Martin, ta’ata a’o nō te ea i te pae nō te ferurira’a

’Ia au i te mau parau tumu o te ’evanelia ’e te turura’a a te mā’imira’a, e nehenehe teie hōho’a nō te ti’ara’a metua e tauturu ia ’outou ’ia fa’atupu i te mau autā’atira’a pāpū, ’ia aupuruhia te fa’aro’o ’e ’ia fa’arahi atu, ’e ’ia patuhia te hō’ēra’a ’e te tupu-fa’ahou-ra’a i roto i tō ’outou ’utuāfare.

Hōho’a

e metua tāne e tai’o ra i te mau pāpa’ira’a mo’a ’e tāna tamāhine

Te rirora’a ’ei metua e ’ōpuara’a mure ’ore ïa ’e e nehenehe e riro mai ’ei mea ho’ona, te māramarama ’e te ’oa’oa. Nō te mea rā ’ua rau te huru ’e te fāito o te mau ’utuāfare ’e tē fa’aruru nei i tō rātou iho mau tāmatara’a ta’a ’ē, te ’atu’atura’a i te tamari’i e nehenehe ato’a e riro ’ei ’ohipa teimaha ’e te rohirohi i te tahi taime.

Aua’a a’e rā, ’aita e tītauhia ia tātou ’ia rave i te reira ’o tātou ana’e.

Ma te arata’ira’a a tō tātou Metua i te ao ra, te pāturura’a a te Fa’aora ’e tāna ’evanelia, ’e te fa’a’ohipara’a ma te ’ā’au pure i te mau a’o fa’auruhia, e ’itehia mai ia tātou te tauturu ’e te tīa’ira’a nō tō tātou tere ’ei ti’ara’a metua.

Hō’ē hōho’a tei turuhia e te ’evanelia nō te ti’ara’a metua

Ma te fa’auruhia e te ’evanelia a Iesu Mesia ’e te turura’a a te mā’imira’a nō ni’a i te ti’ara’a metua, ’ua ’itehia mai ia mātou e toru parau tumu arata’i nō te pāturu i te tupura’a o hō’ē tamari’i i te pae ’āehuehu ’e i te pae vārua. ’Ia ’āmui-ana’e-hia, e hōro’a mai teie mau tuha’a faufa’a nō te tahi ’e te tahi i te hōho’a pūai ’o tē nehenehe e tauturu i te mau ’utuāfare ’ati a’e te ao nei.

E mea pūai teie hōho’a nō te mea tē tū’ati nei te reira i te mau parau mau o te ’evanelia ’e te mau tumu parau faufa’a o te mā’imira’a nō ni’a i te ti’ara’a metua ’e te fa’ahotura’a o te tamari’i. E nehenehe te ’imira’a i te heheura’a nō te ta’ata iho nō ni’a i te fa’a’ohipara’a i te mau parau tumu i roto i teie hōho’a, e tauturu ia ’outou ’ia patu i te tupu-fa’ahou-ra’a o tō ’outou ’utuāfare ’e ’ia ha’amau i te hō’ē ’utuāfare tei fa’atumuhia i ni’a ia Iesu Mesia.

Nā parau tumu arata’i e toru ’oia ho’i :

Fa’atupu i te mau aura’a ’utuāfare here
Aupuru i te ’apora’a mai ’e te tupura’a i te rahi
Patu i te hō’ēra’a ’e te pūai nā roto i te tāvinira’a

E tauturu teie hōho’a ia tātou ’ia fa’atumu i ni’a i te mau mea faufa’a a’e. Te tuha’a tāta’itahi o te hōho’a e tuha’a faufa’a roa ïa ’o tē ha’apūai i tō tātou ’utuāfare. Nā roto i te ’ohipa-’āmui-ra’a, e fa’aitoito te reira i te mau aura’a ’e te mau ’itera’a rau maita’i, e tauturu i tō tātou mau ’utuāfare ’ia fa’aruru i te ’ati, ’e ’ia patu i te ’aravihi ’e te tupu-fa’ahou-ra’a.

’A pa’ari noa ai tātou ’ei mau metua, e riro teie hōho’a ’ei hō’ē fa’anahora’a maita’i nō te ’ite mai nāhea ’ia ha’api’i maita’i a’e ’e ’ia aupuru maita’i a’e i te tamari’i tāta’itahi.

E ’ite mai ’outou i raro nei te hō’ē hi’ora’a poto nō te tuha’a tāta’itahi o te hōho’a ’e hō’ē hi’ora’a nō roto mai i te orara’a o te Fa’aora nō te arata’i ia tātou i roto i te fa’a’ohipara’a i teie hōho’a i roto i tō tātou orara’a. E roa’a te mau ha’amāramaramara’a hau atu, te mau rāve’a tauturu au, ’e te mau pāhonora’a i te mau uira’a mātarohia nō ni’a i te ti’ara’a metua, i ni’a family.ChurchofJesusChrist.org.

1. Fa’atupu i te mau aura’a ’utuāfare here

E fa’aha’amana’o teie parau tumu ia tātou ’ia ha’afaufa’a nā mua roa i te mau aura’a ’e te Metua i te ao ra, te Fa’aora, tō tātou hoa fa’aipoipo ’e tā tātou mau tamari’i. E mea faufa’a rahi teie mau aura’a ’utuāfare. Nō roto mai te ihota’ata ’e te mau aura’a mure ’ore o tā tātou mau tamari’i i te parau mau niu ē, « ua riro tātou tāta’itahi ’ei tamaiti ’aore rā ’ei tamāhine vārua herehia e nā metua i te ra’i ra, ’e nō reira, e huru ’e e hope’a hanahana tō tātou tāta’itahi ».¹

E nehenehe tātou e fa’aitoito ia rātou ’ia ’ite i te Atua ’e ia Iesu Mesia nā roto i te fa’aro’o, te pure, te tuatāpapara’a pāpa’ira’a mo’a, ’e te heheura’a a te ta’ata iho nō ’ō mai i te Vārua Maita’i ra (hi’o Ioane 17:3). E nehenehe tātou e aupuru i te fa’aro’o nā roto i te fa’a’amura’a i te « hina’aro noa ’ia ti’aturi » (Alama 32:27) o tā tātou mau tamari’i ’e te tauturura’a ia rātou ’ia ’ite i te here o te Atua. E mea faufa’a nō tā tātou mau tamari’i ’ia ’ite ē, ’ua māramarama hope roa te Metua i te ao ra ’e te Fa’aora ia rātou, ’ua here hope roa ia rātou, ’e ’ua hina’aro ’ia tauturu ia rātou ’ia manuia (hi’o Roma 8:38–39).²

’Ei mau metua, e mea faufa’a roa ’ia fa’atupu i te hō’ē aura’a here ’e te tamari’i tāta’itahi tei ’ī i te māhanahana ’e te aroha. Te ta’a-maita’i-ra’a i te hi’ora’a ātea o tā tātou mau tamari’i ’e te fa’aro’ora’a ma te fa’atura i te mea tā rātou e parau, e fa’atupu te reira i te hō’ē aura’a pāpū ’e te here. E hina’aro tā tātou mau tamari’i ’ia ’ite ē, tē ’ana’anatae nei tātou ia rātou, tē ha’apa’o nei tātou i tō rātou mana’o, ’e tei reira tātou nō te tauturu ia rātou. Tā tātou ’ohipa nō te ha’apa’o-maita’i-ra’a i tā tātou mau tamari’i, e tauturu te reira ia rātou ’ia fa’ahotu i te hō’ē hi’ora’a maita’i nō ni’a ia rātou iho, ’ia ’ite i tō rātou faufa’a mure ’ore, ’e ’ia fa’atupu i te mau aura’a ti’aturi ’e te Atua ’e Iesu Mesia.

Hau atu, e nehenehe te mau melo o te ’utuāfare e riro ’ei pāturura’a rahi nō te tahi ’e te tahi. E fa’atupu tā tātou i te mau aura’a ’utuāfare, ’a putuputu ’āmui ai tātou nō te tū’ati, nō te pure, nō te a’o ’e nō te ’ārearea.

Hi’o i te Mesia

Tē fa’a’ite nei Iesu Mesia i tōna here, te tahi i te tahi, nā roto i te hō’ē aura’a ’o te pūpū i te tā’amura’a, te tīa’ira’a ’e te fa’aorara’a. I muri a’e i tō te Fa’aora fa’aotira’a i te paraparau i te ’āti Nephi, ’ua toro atu ’oia i te rima ma te aroha, ’e ’ua fa’aora ’e ’ua ha’amaita’i ’oia iho i te ta’ata tāta’itahi. Ma te here, « ’ua rave atu ra ’oia i tā rātou mau tamari’i ri’i, te tahi i muri iho i te tahi, ’e ’ua ha’amaita’i atu ra ia rātou, ’e ’ua pure atu ra i te Metua nō rātou » (3 Nephi 17:21).

’Ei metua, e nehenehe ’outou e ha’amaita’i i tā ’outou mau tamari’i nā roto i te fa’atupura’a i te hō’ē aura’a here ’e ’o rātou—hō’ē tū’atira’a faufa’a rahi i te hō’ē ā taime.

Mau mana’o nō te fa’atupura’a i te mau aura’a ’utuāfare here

’A paraparau i tā ’outou mau tamari’i nā roto i te fa’aro’o-maita’i-ra’a, te pāhonora’a ma te here, ’e te pe’era’a i tā rātou tāpa’o nō te pāhono i tō rātou mau hina’aro.
’A fa’a’amu i te fa’aro’o i te Metua i te ao ra ’e ia Iesu Mesia ’e ’a fa’aitoito i te pure ’e i te heheura’a a te ta’ata iho nō te ha’apūai i teie mau aura’a hanahana.
’A ha’apa’o maita’i ia ’outou iho ’e i tō ’outou fa’aipoipora’a. E tauturu te reira ia ’outou ’ia tū’ati maita’i a’e i tā ’outou mau tamari’i ’e ’ia riro ’ei metua ’e tō ’outou hoa fa’aipoipo i roto i te hō’ēra’a ’e te here, ’ei nā ’āpiti ’aifāito. Mai te mea e ta’ata ’ōtahi noa ’outou, ’a arata’i i tō ’outou ’utuāfare ma te fa’aro’o ’e te ti’aturi. ’A ’imi i te tahi atu ā pāturura’a i roto i te feiā tā ’outou e ti’aturi nei.
’A fa’aherehere i te pārurura’a, te rirora’a ’e te ’oa’oa i roto i tō ’outou ’utuāfare.

2. Aupuru i te ’apora’a mai ’e te tupura’a i te rahi

Hōho’a

nā metua e paraparau ra i tā rāua tamāhine

Aupuru i te tupura’a i te rahi o tā ’outou mau tamari’i nā roto i te ha’afaufa’ara’a i tō rātou huru ta’a ē, te hōro’ara’a ia rātou i te here ’āueue ’ore, ’e te pāturura’a i tā rātou mau tauto’ora’a. ’A hi’o e aha te huru o tā ’outou mau tamari’i i roto i tō rātou fa’ahotura’a ’e ’a fa’atano i tā ’outou pāturura’a i ni’a i tō rātou mau hina’aro ta’a ’ē. E mea faufa’a rahi tō ’outou hi’ora’a, tā ’outou a’ora’a, tā ’outou arata’ira’a ’e tā ’outou fa’aitoitora’a nō te fa’ananea i te ’aravihi ’e te ti’aturira’a o tā ’outou tamari’i. ’A hi’o haere atu ’e ’a aroha atu ’a ha’api’i mai ai tā ’outou mau tamari’i nā roto i te tupura’a ’ohipa.

’Ia ha’apae ato’a te mau metua aupuru i te tītau rahi roa, ’ia vaiiho rahi noa, ’aore rā ’ia fa’ati’a rahi noa. Te hōro’ara’a i te mau ’ōti’a tano, te mau ’ohipa mātarohia ’e te mau tītaura’a tano, e fa’aitoito te reira i te tupura’a o tā ’outou tamari’i. Mai tō tātou Metua i te ao ra, e mea ti’a i te mau metua ’ia fa’atumu rahi i ni’a i te tupura’a ’ōhie o tā rātou mau tamari’i, ’eiaha ra i ni’a i tō rātou au maita’i (hi’o 2 Nephi 28:30 ; Te Ha’api’ira’a Tumu ’e te mau Fafaura’a 50:24, 40).

’A fa’atere, ’a arata’i, ’a haere i piha’i iho i tā ’outou mau tamari’i, ’a ha’api’i mai ai rātou i te pe’e ia Iesu Mesia.³ ’A ha’api’i ia rātou nāhea ’ia fāriu atu i ni’a i te Fa’aora ’e ’ia turu’i i ni’a i tāna tāra’ehara nō te tauturu ia rātou ’ia tupu i te rahi. E ’ite marū noa tā ’outou mau tamari’i nā roto mai i tō ’outou hi’ora’a ’e tō rātou iho mau ’itera’a ē, « e ti’a ia [rātou] te mau mea ato’a nei i te Mesia », ’o tē fa’a’ore i te hara ’e ’o tē ha’apūai ia rātou (Philipi 4:13). E riro te tupura’a i te rahi ’e te tauira’a ’ei mea pa’ari ’e e tītau i te ha’api’ipi’ira’a rahi. E fa’aitoito te mau metua parauti’a ’e te hina’aro mau ’ia ha’api’i i tā rātou mau tamari’i ’eiaha noa nāhea « ’ia haere nā te ’ē’a o te parau mau » (Mosia 4:15) e ha’api’i ato’a rā nō te aha e ti’a ia rātou e nā reira. ’A aupuru i tō rātou hāro’aro’ara’a ’e ’a pāturu i tā rātou fa’a’ohipara’a ti’a i te ti’amāra’a i roto i te ta’ahira’a tāta’itahi tā rātou e rave.

Hi’o i te Mesia

E ha’apūai Iesu Mesia i tō ’outou tupura’a i te rahi nā roto i te hi’ora’a i te mau hina’aro parauti’a o tō ’outou ’ā’au ’e te tauturura’a ia ’outou ’ia fa’atupu i te reira (hi’o 1 Samuela 16:7 ; Enosa 1:12). ’Ua ani te Fatu i tāna mau pipi « te tahi i te tahi … : E aha tā ’outou i hina’aro iā’u nei ? » (3 Nephi 28:1 ; hi’o ato’a 1 Nephi 11:1–3). E nehenehe te hi’o-māite-ra’a i teie uira’a e tauturu ia ’outou ’ia ’ite ’e ’ia fa’ananea i te mea faufa’a a’e nō ’outou. ’A feruri nāhea te Fa’aora i te fa’a’amura’a i te ha’api’ira’a mai ’e te tupura’a i te rahi i roto i te taea’e o Iareda, nā roto i te fa’aturara’a i tōna ti’amāra’a ’ia mā’iti ’e ma te ui ē, « E aha tā ’oe e hina’aro iā’u ’ia rave ? » (Etera 2:23). ’Ua pāturu te Fatu iāna nā roto i te hōro’ara’a i te mau arata’ira’a ta’a ’ē, mai te mea e tītauhia, nā roto ato’a rā i te fa’aitoitora’a iāna ’ia hāro’aro’a ’ōna iho i te tahi mau mea. ’Aita te Fa’aora e fa’ahepo ’aore rā e ha’avī ia ’outou, e ha’api’i rā ’oia ’e e ani ’oia ia ’outou ’ia fa’a’ohipa i tō ’outou ti’amāra’a ’ia mā’iti nō te maita’i (hi’o Te Ha’api’ira’a Tumu ’e te mau Fafaura’a 58:26–28).

Fa’aitoito i te tupura’a i te rahi o tā ’outou mau tamari’i nā roto i te pāturura’a i te mau hina’aro parauti’a o tō rātou ā’au—hō’ē uira’a fa’ahiahia i te taime hō’ē.

Mau mana’o nō te aupurura’a i te ’apora’a mai ’e te tupura’a i te rahi

’A fa’atoro atu i tā ’outou mau tamari’i i ni’a ia Iesu Mesia ’e ’a ha’api’i ia rātou nāhea ’ia fāri’i i te mana o tāna tāra’ehara.
’A pe’e ia Iesu Mesia ma te hōro’ara’a i te here, te arata’i, te pāturura’a ’e te aumihi ’a ha’api’i mai ai tā ’outou mau tamari’i ’ia pe’e iāna.
’A aupuru i te tupura’a i te rahi nā roto i te pāturura’a i te hāro’aro’ara’a, te ’aravihi, te ti’amāra’a ’ia mā’iti, ’e te ti’aturira’a o tā ’outou tamari’i.
’A haere mai i te Mesia ra nā roto i te ha’api’ira’a mai i tāna ’evanelia ’e ’ia fa’a’ohipa ma te orara’a ’āmui i te reira, ’a haere ai ’outou i mua i ni’a i te ’ē’a nō te fafaura’a.

3. Patu i te hō’ēra’a ’e te pūai nā roto i te tāvinira’a

Hōho’a

e ’utuāfare e ’āfa’i ra i te mā’a nā te tahi atu ’utuāfare

’Ua ha’api’i Iesu Mesia i tāna mau pipi ’ia « aroha ’outou ia ’outou iho, mai iā’u e aroha atu ia ’outou nā » (Ioane 13:34). ’A tāmāhanahana ai, ’a fa’ateitei ai, ’e ’a tāvini ai ’outou te tahi i te tahi, tē ha’aparare ra ïa ’outou i te here mau o te Mesia ’e tē riro rahi atu ra ïa ’outou mai iāna te huru. E hōro’a ato’a mai te Atua e rave rahi mau rāve’a faufa’a rahi i tā ’outou mau tamari’i ’ia ha’api’i mai ’e ’ia tupu i te rahi ma te ’āmuira’a mai i roto i tāna ’ohipa ’e ma te tape’ara’a i tā rātou mau fafaura’a ’ia tāvini ia vetahi ’ē (hi’o Mose 1:39 ; Mosia 18:7–11). E fa’ataui te fa’a’itera’a i te here o te Mesia ’e te fa’a’itera’a i tōna māramarama ia rātou ’e i te feiā tā rātou e tāvini nei.

E fāna’o ato’a tō ’outou ’utuāfare i te rirora’a ’ei melo nō te hō’ē pāroita ’aore rā ’āma’a i reira tā ’outou mau tamari’i e hōro’a ai ’e e fāri’i ai i te here ’e te pāturura’a. E ha’apūai te ’āmuira’a i tō ’outou ’ā’au « i roto i te tāhō’ēra’a ’e i roto i te here te tahi i te tahi » (Mosia 18:21) i te mau aura’a pāturu ’e te mau ’itera’a maita’i ’o tē ha’apūai i tō ’outou ’utuāfare. ’Ia tāvini ana’e ’outou ia vetahi ’ē ma te here mai tō te huru Mesia, e nehenehe ’outou e tauturu i te patura’a ia Ziona i roto i tō ’outou ’utuāfare ’e i roto i te tōtaiete ’ei tā’āto’ara’a (hi’o Mose 7:18).

’A ha’api’i i te mau tamari’i ē, e nehenehe te tāvinira’a e riro ’ei ’ohipa tāmahana ’eiaha rā ’ei ’ōpuara’a ’ōtare noa. E tauturu te tūtavara’a ’ia tāvini te tahi ’e te tahi i te mau tamari’i ’e te feiā ’āpī ’ia ’ite i te hō’ē orara’a hau atu i te maita’i, ’a hi’o ai rātou i ’ō atu i tō rātou iho mau hina’aro i te mau hina’aro o vetahi ’ē. E mea māere mau ’ia ’ite ē, nāhea te patura’a ia Ziona i te patu i te hō’ē nūna’a nō Ziona.

Hi’o i te Mesia

’Ua ani manihini mai te Fa’aora ia tātou tāta’itahi ’ia here ’e ’ia tāvini ia vetahi ’ē (hi’o Ioane 13:34–35). E ha’apūai te ’āmuira’a mai i roto i te ’ohipa nō te fa’aorara’a a tō tātou Metua i te ao ra ia tātou ’e e fa’ataui ia tātou. « ’Ia ha’apa’o [’oia] i tā [tōna] Metua e ti’a ai » (Luka 2:49) ’ua riro ïa ’ei tuha’a nō te tupura’a ’o tā Iesu i ’ite i roto i tōna ’āpīra’a, ’a tupu ai ’oia « i te rahi ’e te pa’ari, ’e te herehia mai e te Atua ’e te ta’ata ato’a » (Luka 2:52).

E ’āmui atu tō ’outou ’utuāfare i roto i te ’ohipa nō te fa’aorara’a ’e te fa’ateiteira’a a te Atua nā roto i te orara’a i te ’evanelia a Iesu Mesia, te ’atu’atura’a i te feiā nava’i ’ore, te anira’a i te tā’āto’ara’a ’ia fāri’i i te ’evanelia, ’e te tāhō’ēra’a i te mau ’utuāfare ’e a muri noa atu.⁴

’A aupuru i te tupura’a o tā ’outou mau tamari’i nā roto i te tāhō’ēra’a i roto i te « ’ohipa faufa’a rahi roa » a te Atua (Te Ha’api’ira’a Tumu ’e te mau Fafaura’a 64:33)—hō’ē ’ohipa tāvinira’a here i te taime hō’ē.

Mau mana’o nō te patura’a i te hō’ēra’a ’e te pūai nā roto i te tāvinira’a

’A fa’a’ite i tō ’outou here nō te Atua ’e ’a ha’api’i mai ’ia ’ite maita’i a’e iāna nā roto i te herera’a ’e te tāvinira’a i tāna mau tamari’i.
’A here i te tahi ’e te tahi nā roto i te aupurura’a i te feiā e hā’ati nei ia ’outou ’e te utuutura’a i te feiā nava’i ’ore.
’A ha’aputuputu ia ’Īserā’ela nā roto i te fa’a’itera’a i te ’evanelia, te ’imira’a i tō ’outou ’ā’amu ’utuāfare, te tāvinira’a i roto i te hiero, ’e te tauturura’a ia vetahi ’ē ’ia rave ’e ’ia ha’apa’o i te mau fafaura’a mo’a.
’A patu i te hō’ēra’a ’e te pūai ’āmui nā roto i te hōro’ara’a i te here, te fa’atupura’a i te hō’ē aura’a nō te tā’amura’a, ’e te pāturura’a te tahi ’e te tahi.

Fa’a’ohipa i te hōho’a i roto i tō ’outou fare

E nehenehe teie mau parau tumu arata’i e tauturu ia ’outou ’ia rōtahi i ni’a i tō ’outou ti’ara’a metua i te mau mahana ato’a. ’Ei hi’ora’a, i teie mahana e nehenehe ’outou e feruri nāhea ’outou i te fa’atupu i te hō’ē aura’a here rahi a’e, ’ia aupuru i te ha’api’ira’a mai, ’aore rā ’ia fa’ateitei ia vetahi ’ē. E ha’amaita’i te fa’a’ohipara’a i teie hōho’a i te ha’api’ira’a mai i te ’evanelia, te aupurura’a i te tupura’a o tā ’outou tamari’i iho, ’e e fa’aitoito i te hō’ē rōtahira’a rahi a’e i rāpae ’o tē fa’ateitei ’e ’o tē ha’amaita’i i tō ’outou ’utuāfare. E ha’amaita’i ato’a te fa’a’ohipara’a i teie mau parau tumu i tā outou fa’a’ohipara’a i te mau mātēria a te ’Ēkālesia tei fa’atumuhia i ni’a i te ’utuāfare mai te Mai, pe’e mai ’e te fa’anahora’a a te mau tamari’i ’e te feiā ’āpī.

E rave rahi rāve’a nō te fa’a’ohipa i te mau parau tumu o teie hōho’a. ’A fa’aau ’ōhie atu ’e ’a ’imi i te heheura’a o te ta’ata iho nō te fa’atano i te reira i te mau hina’aro o tō ’outou ’utuāfare. E ’ere te hōho’a o te « fa’atupu, aupuru, patu » nō te rave rahi atu ā. Tē vai ra paha te tahi mau mea e fa’auruhia ’outou ’ia ’āmui atu i te mea tā ’outou e rave nei i teie taime, ’ua ’ōpuahia te hōho’a nō te tauturu ia ’outou ’ia fa’a’ohipa maita’i a’e i te taime e ’āmui ai ’outou.

’Ia rave ana’e ’outou i te mau mea ato’a nō te fa’atupu i te mau aura’a here, nō te aupuru i te ha’api’ira’a mai ’e te tupura’a i te rahi, ’aore rā nō te patu i te hō’ēra’a ’e te pūai nā roto i te tāvinira’a, tē ha’amau ra ïa ’outou i te hō’ē niu pa’ari nō te mau mea ato’a tā ’outou e rave i roto i tō ’outou fare.

E mea pāpū e ’ere te mau metua maita’i i te mea maita’i roa

E mea faufa’a ’ia ha’amana’o ē, ’aita e tītauhia ’ia riro ’outou ’ei metua maita’i roa nō te riro ’ei metua maita’i. E ’imi rā ’ia riro ’ei puna pāpū nō te here ’e nō te pāturu nō tā ’outou mau tamari’i. E nehenehe te fafaura’a noa ’e tā ’outou tamari’i nā roto i te mau rāve’a ha’iha’i, e fa’atupu i te hō’ē ta’a-’ē-ra’a rahi.

’Ia ha’aparuparu ana’e te ti’ara’a metua ia ’outou, ’a ha’amana’o i te huti i te aho, ’a hōro’a ia ’outou iho i te hō’ē taime fa’afa’aeara’a, ’e ’a tāmau noa i te tāmata. E nehenehe ’outou e haere i mua ma te fa’aro’o ma te ’ite ē, tē ha’ape’ape’a hōhonu nei te Fa’aora nō ’outou ’e nō tā ’outou mau tamari’i ’e e fa’arahi ’oia i tā ’outou mau tauto’ora’a mau ’e te mau hina’aro parauti’a.

E tīa’i i te Mesia

’A tūtava ai ’outou ’ia vai ’āueue ’ore noa i roto i te ravera’a i te mau mea ato’a e ti’a ai ia ’outou ’ia here, ’ia aupuru, ’e ’ia ha’apūai i te tamari’i tāta’itahi te tahi i muri mai i te tahi, e nehenehe ’outou ’e tō ’outou ’utuāfare e ti’aturi i te Mesia nā roto i tāna fafaura’a mure ’ore ia ’outou : « ’Eiaha e mata’u, e te mau tamari’i ri’i, nō te mea nā’u ho’i ’outou, ’e ’ua riro ho’i te rē nō teie nei ao iā’u » (Te Ha’api’ira’a Tumu ’e te mau Fafaura’a 50:41).