Nā te mau metua

Te ’imira’a i te arata’ira’a a te Vārua

e ’utuāfare e pure ra

E te mau metua here ē,

I roto i teie ve’a, e toru huimana fa’atere rahi e fa’a’ite nei i te mau ha’api’ira’a ’e te mau ’itera’a rau o te ta’ata iho ’e o te ’utuāfare, e nāhea ’ia ’imi, ’ia ’ite mai, ’e ’ia pe’e i te arata’iraa pae vārua.

Te mau ’āparaura’a ’evanelia

Turu’ira’a i ni’a i tō tātou ’itera’a pāpū

I ni’a i te ’api 4, tē fa’ati’a nei Elder Ronald A. Rasband i te hō’ē ’ā’amu nō roto mai i tōna ’ā’amu ’utuāfare nō te ha’api’i i te parau tumu ē, e’ita tō tātou Fa’aora e fa’aru’e ia tātou. ’A tai’o i tāna parau pāpa’i ’e ’a ’āparau e mea nāhea te feiā mo’a mātāmua i te turu’ira’a i ni’a i tō rātou ’itera’a pāpū nō Iesu Mesia ’e te fa’anahora’a nō te fa’aorara’a a te Metua i te ao ra.

’Āparaura’a i te Fatu

I ni’a i te ’api 30, ’ua fa’ata’a mai Elder Patricio M. Giuffra nāhea ’oia, ’ei taure’are’a fa’afāriuhia i roto i te ’Ēkālesia, i te fa’aotira’a e tāvini i te hō’ē misiōni ’e ’ia haere ā i te ha’api’ira’a tuarua. I muri iho tē fa’a’ite ra ’oia i tāna pāhonora’a i te uira’a, e aha tā ’outou e rave ’ia mārō ana’e te heheura’a a te ta’ata iho ’e te mana’o tumu ?

Fāri’ira’a i te arata’ira’a a te Vārua

Nāhea tātou ’ia fāna’o hope atu ā i te hōro’a o te Vārua Maita’i i roto i tō tātou orara’a ? Tē tuatāpapa nei Elder José A. Teixeira i teie tumu parau i ni’a i te ’api 40. ’A tai’o i tāna parau pāpa’i ’e ’a ’āparau nāhea ’ia fāri’i i te arata’ira’a rahi atu ā a te Vārua.

Mai, pe’e mai te ’oa’oa i roto i te ’utuāfare

Feruri māite i te ’ē’a

Maseli 3–4

1. ’A tu’u i te hō’ē hōho’a nō te Fa’aora i te hō’ē pae o te hō’ē vāhi ’āteatea ’aore rā hō’ē piha matara.

2. ’A ti’a i te tahi atu pae o te piha. Te tahi i muri mai i te tahi, e tā’amu i te mata o te melo tāta’itahi o te ’utuāfare, e fa’a’ohu ia rātou i roto i te ha’amenemene, ’e e hi’o i muri iho e nehenehe ānei rātou e haere e tae roa atu i te hōho’a o Iesu Mesia ma te tauturu ’ore.

3. ’A tai’o i te Maseli 4:26–27.

’Āparaura’a : E aha te mau huru tauturu tei hōro’ahia mai ia tātou i roto i teie orara’a, nō te tāpe’a noa ia tātou i ni’a i te hō’ē ’ē’a ’o tē arata’i atu ia Iesu Mesia ra ? Nō te ’āparaura’a hau atu ā, ’a tai’o te Maseli 3:5–6. E aha te mau ’ohipa e ti’a ia tātou ’ia rave nō te ti’aturi i te Fatu ma tō tātou ’ā’au ato’a ?

Hāponohia e Mitzi Schoneman

Nō roto mai i te ve’a Nō te Pūai o te Feiā ’Āpī

I roto i te ve’a e te feiā ’āpī nō teie ’āva’e, tē vai ra te mau parau pāpa’i nō ni’a e nāhea te Fatu e nehenehe ai e tauturu ia tātou i teie mahana, nāhea te hō’ē feiā ’āpī tamāroa ’ia ha’api’i mai i te mau ha’api’ira’a a tōna nā metua, ’e te mau ha’api’ira’a a Elder Soares nō ni’a e nāhea Iesu Mesia ’ia fa’auru ia vetahi ’ē nō te tauturu ia tātou.

Nō roto mai i te ve’a Hoa

E tauturu te Hoa nō teie ’āva’e i tā ’outou mau tamari’i ’ia ha’api’i mai nō ni’a i te mau ha’api’ira’a a Isaia, ’ia hāro’aro’a nō te aha tātou e fa’a’ohipa ai i te reo mā, ’e ’ia hi’o nāhea te tahi atu mau tamari’i i te tauturura’a i te hāmanira’a i te mau video nō te Buka a Moromona.