« ’A ’imi i te fa’a’itera’a e fēti’i ’oe », Liahona, Tetepa 2022.
Te reo o te feiā mo’a i te mau mahana hope’a nei
’A ’imi i te fa’a’itera’a e fēti’i ’oe
’Ua mana’o vau ē, tē ani mai ra te Fatu i te mea e’ita e mara’a ’ia rave, ’ua hape rā vau.
’Ua ora na tō’u veutupu [voisin] vahine ruhiruhiā ’e tāna tamaiti te tahi ’opani o te fare tahua i tō mātou. ’Ua riro mai ’oia ’ei vahine herehia e mātou. I muri a’e i te pohera’a tāna tamaiti, ’ua ma’ihia ’oia ’e ’ua tārava noa i ni’a i tōna ro’i. ’Ua ha’apa’o mātou iāna ē tae roa atu i te taime, ’ua fa’aru’e mai ’oia e toru ’āva’e i muri iho.
I muri a’e i tō rāua pohera’a, ’ua hina’aro vau ’ia ravehia te mau ’ōro’a hiero nō teie ’utuāfare. Nō te mea rā e’ita mātou i te fēti’i, ’aita ïa e rāve’a. I te hō’ē mahana, ’ua tae mai te hō’ē mana’o pāpū i roto i tō’u ferurira’a : « ’A ’imi i te fa’a’itera’a e fēti’i ’oe, i reira ’oe e nehenehe ai e rave i te ’ohipa hiero nō rāua ».1 ’Ua mana’o vau tē ani mai ra te Fatu i te mea e’ita e mara’a ’ia rave, ’ua tāmau noa rā teie ta’o i te tae mai i roto i tō’u ferurira’a te fa’a’itera’a.
’Ua ha’amata te mau fēti’i o tō’u veutupu i te taui i te parau fatura’a o tōna nohora’a, tē toe ra rā tā rātou te tahi mau parau nō te fa’a’itera’a i tō rātou aura’a fēti’i, noa atu ā i muri a’e i te pāherura’a i roto i te mau pu’e parau ha’aputuhia a te pū fa’aterera’a hau o te fenua.
’Ua parau mai te Vārua iā’u ē tē toe ra hō’ē mea ia mātou. Ma te parau fa’ati’a a teie mau fēti’i, ’ua pāheru vau i roto i tōna nohora’a ’ia ’itehia mai te mau pu’e parau. I roto i te hō’ē poro o te fare, ’ua ’itehia mai iā’u te tahi mau pūtē tei ’ī i te mau parau tahito. ’Ua tupu mai te mana’o i roto iā’u ē, e mea faufa’a teie mau pūtē.
’Ua hi’o atu vau i roto e piti nā pute ’e ’ua ha’amata ato’a atu vau i te hi’o i roto i te toru o te pute. ’Ua fātata roa vau i te tāpae i raro roa i te pūtē, ’a ’ite a’era vau i te tāpo’i o te hō’ē buka tāpa’ora’a parau. I roto i te pūtē tāpo’i o te buka tāpa’ora’a parau, ’ua ’itehia mai iā’u e pae parau tivira faufa’a roa : Te parau fānaura’a o tō’u veutupu vahine, te parau pohera’a ’e te parau fa’aipoipora’a o tōna metua vahine, te parau pohera’a o tōna māmā rū’au ’e te parau hunara’a o tōna metua tāne.
I te hi’opo’ara’a māua te fēti’i o tō mātou veutupu i te mau parau, ’ua ’ite mai au e toru ta’o : « Mata’eina’a nō Vagaysky », i Siberia tō’o’a o te rā. I reira noa, ’ua tupu mai te mana’o e ti’a iā’u e hi’o i tō’u papara’a tupuna. ’A nā reira ai au, ’ite a’era vau tē vai ra Vagaysky i ni’a i te mau ’āma’a ātea o te papara’a tupuna o tō’u metua tāne. ’Ua fa’a’ite mai te tahi atu ā mau mā’imira’a ē, e feti’i māua tō’u veutupu i pohe !
’Aita te Fatu i tītau mai i te mea e’ita e mara’a iā’u, ’ia feruri ana’ehia. ’Ua hope au i te ’oa’oa i te ’itera’a ē, tō’u veutupu e feti’i nō tō’u ’utuāfare. Nā teie hono e fa’ati’a iā’u ’ia ha’apāpū i te ravera’a o tōna mau ’ōro’a hiero a muri a’e.
’Ua here te Fatu i tāna mau tamari’i. ’Ua fa’aineine ’oia i te fa’anahora’a nō te fa’aorara’a nō te tā’āto’ara’a, tae noa atu i tō’u veutupu ’e tāna tamaiti.