« E hōho’a nō te ’apera’a i te mana’o maumau noa », Liahona, Tetepa 2022.
E hōho’a nō te ’apera’a i te mana’o maumau noa
« Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a » (Luke 2:52), ’e ’o tātou ato’a.
Hōho’a nā Judith Ann Beck
Mana’o maumau noa
Ma te tūtavara’a ’ia ora i te ’evanelia ’ei ta’ata pa’ari ’ōtahi, e riro paha te reira e mea fifi i te ’orera’a e fa’atumu i ni’a i te tahi mau tuha’a ’o tō tātou orara’a, ’o tā tātou e hina’aro nei ’ia riro ’ei mea ta’a ’ē. E au ra i te tahi taime e mea pūai a’e ’aore rā e mea paruparu roa, e te tahi taime e mea ta’a ’ē, i roto i tō tātou haerera’a i mua. Nō’u nei, e au ra teie mau mana’o maumau i roto i te tahi mau tuha’a e haere atu ’e e ho’i mai, ’e e nehenehe te reira e ’āpiti mai iā’u i te roara’a e rave rahi mahana, te ’āva’e, ’e ’oia ato’a ma te nu’u noa i te mau matahiti. E vai noa i roto iā’u e rave rahi mau tumu ’ia vai ’oa’oa noa, ’e te au maita’i i roto i te orara’a, i te tahi rā taime, ’ua ha’aputāpū-ta’a-’ē-hia vau e teie mana’o maumau.
I taua taime ra, ’ua ani mai tā’u tamaiti feti’i [neveu] e fa’aea mai i te tahi taime i pīha’i iho iā’u. ’Ua ’ite ’oia i te hō’ē hina’aro nō te mau fā i roto i tōna orara’a ’e ’ua ani mai i te mau a’o. ’Aita vau e mana’o ra tei roto vau i te hō’ē ti’ara’a pūai nō te hōro’a i te pa’ari rahi, ’ua fa’aro’o rā vau. ’Ua ’ite au ē, e nehenehe tā’u e « ti’aoro atu » i te tauturu a te Atua (hi’o Alama 34:17–27) ’e ’ua pure au ’ia nehenehe iā’u ’ia parau i te mea pāpū maita’i nōna. ’Ei pāhonora’a, ’ua ha’amana’o vau i te Luka 2:52 : « Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a ».
‘A tāmata noa ai au i te rōtahi i ni’a i te mau hina’aro o tā’u tamaiti fēti’i ’eiaha rā i ni’a i tō’u, ’ua ha’amata te hō’ē mea i te taui i roto iā’u. ’Ua paraparau māua tō’u tamaiti feti’i e mea nāhea tō te Mesia tupura’a i te rahi i te pae vārua, i te pae tōtiare, i te pae tino ’e i te pae ferurira’a, ’e mai te reira ato’a tātou. Noa atu e mea ta’a ’ē ri’i te mau hina’aro o tā’u tamaiti fēti’i i tō’u, ’ua tano maita’i teie nā tuha’a tupura’a e maha nō māua to’opiti. Ma te paraparaura’a nō ni’a i teie pāpa’ira’a mo’a, ’ite a’era vau ē tē pāhono nei te reira i tā’u iho mau uira’a, e nāhea ’ia tātara iā’u i te reira.
Taui i tā’u rōtahira’a, ha’a i ni’a i te mau fa’anahora’a
I tō’u tūtavara’a ’ia tupu mai te tupura’a o te Fa’aora, ’ua taui tā’u rōtahira’a ’e ’ua hōro’a mai te reira tauira’a i te tahi atu ā mau ha’amaita’ira’a. Mai tā te peresideni Russell M. Nelson i parau : « Te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a ».1 ’Ua tauturu tā’u mau tauto’ora’a ’ia tupu rahi atu ā mai ia Iesu Mesia, ’ia fāriu ’ē i te ha’apa’o maita’i i ni’a te mau tupura’a tei ha’amau’a i tā’u rōtahira’a ’e ’ia fa’ahuri atu i ni’a i te mau tuha’a ’o tā’u e nehenehe e ha’a ma te rāve’a fa’ahotu. ’Ua nehenehe iā’u ’ia haere i tō’u ferurira’a hōhonu i roto i te fa’a’ohipara’a i rāpae.
’Ua feruri maite au e nāhea vau e nehenehe ai e tupu rahi i roto i te mau tuha’a tāta’itahi i fa’ahitihia i roto te Luka 2:52, mai te haere-tāmau-ra’a i te hiero e tae atu i te hō’ē fa’atītīā’uara’a pereo’o ta’ata’ahi ātea.
Hōho’a nō te hiero nō Memphis Tennessee nā James Whitney Young
I roto i te mau tuha’a tāta’itahi o tā’u mau fā, ’ua rave au i te tahi mau hi’ora’a :
-
Ma te ha’ara’a i ni’a hō’ē fā, pinepine au i te ’ite ē tē ha’apūai nei te Mesia iā’u i te pae vārua, i te pae tōtiare, i te pae tino ’e i te pae ferurira’a i roto i teie hō’ē noa fā.
-
E mea varavara, e ’aita roa paha, te hō’ē fā e tupu iāna ana’e, ma te fa’aātea iāna i te tahi atu mau tuha’a o te tupura’a—e au ra e fa’auru ’e e turu’i te tahi i ni’a i te tahi. Te ha’amaita’ira’a i roto i te hō’ē tuha’a e arata’i atu i te ha’amaita’ira’a i te tā’āto’ara’a o te mau tuha’a. Te tau’a-’ore-ra’a i te hō’ē tuha’a e fa’atupu ato’a te reira i ni’a i te tahi atu mau tuha’a. ’Ite a’era vau ē, e mea faufa’a ’ia tau’ahia te mau tuha’a ato’a.
-
Fātata tei roto i te mau fā ato’a te tahi atu mau ta’ata—tē ’apora’a mai ānei nā roto mai ia rātou, te fa’a’itera’a ānei te mau mana’o ’e te mau ’ohipa i tupu i roto i tō rātou orara’a—’e te fa’ahōhonura’a i tō tātou mau aura’a.
Te ’itera’a mai ’e te fa’a’itera’a i te ’oa’oa i roto i te Mesia
’Ua fāna’o tāmau noa na vau ’ia ’ite ’e ’ia fa’auruhia nā roto i te tupura’a rahi o vetahi ’ē, ’e tē ti’aturi nei au ē, e nā reira ato’a vau nō rātou. ’Aita i maoro a’enei, ’ua paraparau vau ’e te hō’ē hoa ’ōtahi tē vai ra i roto iāna te mana’o maumau ’e te huehue nō te tahi mau tupura’a o te orara’a. ’Ua fa’aro’o vau nō te hāro’aro’a maita’i, i muri iho, ’ua nehenehe iā’u e fa’a’ite i te mau tupura’a ’ohipa ’o tei tauturu iā’u ’e ’ua hōro’a ato’a atu i te mau tuha’a tāta’itahi o te tupura’a rahi o te Fa’aora.
Noa atu ’aita te mau tuha’a ato’a o te orara’a i taui ’o tei ha’amaumau iā’u e rave rahi matahiti, ’ua taui au nō te mea ’ua ha’api’i mai au i te rōtahi hau atu i ni’a i te Fa’aora ’e ’ia tūtava vau iho ’ia tupu mai iāna te huru. Mai tā te peresideni Nelson i parau, « tē vai ra te mau mea e rave rahi e nehenehe tā tātou e arai. E ha’amau tātou i tā tātou iho mau ’ohipa mātāmua, ’e e fa’ata’a e nāhea tātou i te fa’a’ohipa i tō tātou pūai, te taime ’e te mau rāve’a. … E mā’iti tātou i te feiā tā tātou e fāriu atu nō te parau mau ’e nō te arata’ira’a ».2 Noa atu te huru o tō tātou orara’a, e tauturu te mau tuha’a nō te tupura’a i roto te Luka 2:52 ia tātou ’ia taui i tā tātou rōtahira’a ’e ’ia ’ite mai i te ’oa’oa ’e te haerera’a i mua hau atu maoti tō tātou Metua i te ao ra ’e te Fa’aora.
Tē ora nei te ta’ata pāpa’i i Utaha, Marite.