« Te nehenehe i roto i te matahiti pa’ari », Liahona, Tetepa 2022.
Te tano o te ruhiruhiāra’a
Te nehenehe i roto i te matahiti pa’ari
Mea au a’e nā’u ’ia vai te hō’ē hōho’a mata e fa’a’ite nei i te mau rēni nō te ’ata ’e nō te mau roimata.
Tē ha’amana’o nei au, i te tamari’ira’a, e hi’o noa vau i te pāpāri’a ’ōmi’omi’o o tō’u māmā rū’au. E pao te mau ’ōmi’omi’o i te mau hiti o tōna mata, ’e e fa’a’una’una te mau ’ōmi’omi’o ri’i i tōna ’utu ni’a. ’Ua ani au iāna nāhea vau i te pāruru iā’u i te mau ’ōmi’omi’o.
Pāhono mai nei ’oia, « ’eiaha e ’ata’ata ». « ’E ’eiaha e ta’i ».
’Ua ha’apa’o vau i tāna parau—nō te hō’ē mahana. I muri iho, ’ua vaiiho vau i te reira. Nāhea e nehenehe ai e ora ma te ’ore e ’ata’ata ’aore rā e ta’i ? ’Ua fa’aoti au ē, mea au a’e nā’u te hō’ē hōho’a mata e fa’a’ite i te mau ’ōmi’omi’o o te ’ata’ata ’e o te mau roimata.
I roto i te Buka a Moromona, ’ua ha’api’i Lehi i tāna tamaiti ia Iakoba ē, tei tē tāhuti nei tātou ’ia noa’a te ’oa’oa (hi’o 2 Nephi 2:25). ’Ua ha’api’i ato’a rā ’oia ē, nō te ’ite mai i te ’oa’oa, e ti’a ia tātou ’ia ’ite i te ’oto (hi’o 2 Nephi 2:22–23). ’Ua noa’a iā’u ’ia ’ite i te ha’apāpūra’a nō te oa’oa ’e nō te ’oto, mai tei nana’ohia i ni’a i te mau hōho’a mata o te feiā tei ora i te orara’a. Tē amo nei tō rātou hōho’a mata i te mau ’ā’amu o tō rātou orara’a.
Tē tueā nei tō’u mana’o i tō te ta’ata tei parau ē : « Te mau ta’ata a’ia’i pa’ari e mau hāmanira’a rātou nō te anoihi ».1 Tē fa’ananea nei vetahi mau ta’ata i te huru ta’ata i tō rātou pa’arira’a, ’o te fa’ariro ia rātou e mea fa’ahiahia mau. ’Ei hi’ora’a, tē hi’o nei au i roto i te mau mata o te mau matorona o te hiero, ma te rouru ’uo’uo ’e tei ’ahuhia i te ’ahu ’uo’uo, ’ua putapū vau i te māramarama maere e ’ana’ana i roto i tō rātou mata ’e ’o tē ’ana’ana mai i ni’a i tō rātou hōho’a mata ’ata’ata.
I teienei tē riro nei au iho ’ei vahine pa’ari a’e, ’ua ha’api’i mai au ē, tē vai nei te tahi mau ’oa’oa ’o tē pe’e nei i te ruhiruhiāra’a. ’Ei hi’ora’a, e mea maita’i rahi roa vau i roto i tō’u iho tino. Tē māuruuru noa nei au i te mea ē, tē ’ohipa maita’i noa ra tō’u tino ! E nehenehe au e haere marū atu ā ’e e paraparau marū atu ā i tō te mātāmua ra. Tē tītau nei tō’u nā turi i te ha’amāmāra’a ’e e mea marū a’e tō’u nā rima. E mea au rā nā’u ’ia feruri ē e mea mārū a’e ato’a tā’u tāpe’ara’a.
’Ua ’ite au e nehenehe au e nu’u atu ā i mua ’e e ha’api’i mai ē, « te mau parau tumu nō te ’ite ’o tē noa’a mai ia tātou i roto i teie nei orara’a, e ti’a ato’a mai ïa te reira ’e ’o tātou i roto i te ti’afa’ahoura’a » (Te Ha’api’ira’a Tumu ’e te mau Fafaura’a 130:18). ’E nō reira, tē tīa’i onoono nei au i te mau ha’api’ira’a ’o tā’u e nehenehe e ha’api’i mai ā. Hau atu, e nehenehe au e tauturu ia vetahi ’ē—mai tā’u mau mo’otua—’ia ha’api’i mai nā roto mai i te mau ’ā’amu o tō’u orara’a ’o tā’u e nehenehe e fa’a’ite ia rātou.
Fa’ahōho’ahia e te mau ta’ata fa’a’ite’ite
E nehenehe noa ā i tā’u tāne ’e ’o vau e fāri’i i te tahi ’e te tahi ’e ’ia ’ite ē, ’o māua ato’a e nehenehe fa’ahou ā māua e ha’api’i mai ’e e tupu ’āmui i te rahi. ’Ua faufa’ahia tō māua fa’aipoipora’a maoti te mau vero ’o tā maua i fa’aruru ’āmui. ’Ua pa’ari tā māua mau tamari’i nō te fa’aha’apeu ’aore rā nō te fa’ato’aru’aru ia māua, tei te huru te mahana. E hōpoi mai te mau mo’otua i te ’oa’oa ’e i te fa’a’oa’oara’a mau.
’E ’a he’e noa ai te tau, e tae mai te ’itera’a ē, e’ita te orara’a tāhuti nei e vai ē a muri noa atu. ’Ua tae te taime i teienei ’ia rave i taua mau mea ra ’o ta’u i ’ōpua i te rave. Mai te mea e ’ere i teienei, ’āfea ïa ? « Inaha, ’o te mahana nō teie nei orara’a ’o te mahana ïa ’ia rave te ta’ata i tā rātou mau ’ohipa » (Alama 34:32). Maita’i ē, ma te matahiti pa’ari, tē ’ite nei tātou ē ’ua tae i te taime ’ia parau i te mau parau ’aita i parauhia, ’ia fa’aora i te mau aura’a, ’e ’ia fa’aoti i te mau fā e toe ra.
’A ruhiruhiā ai au, tē feruri nei au i te faufa’a ’āi’a tā’u e vaiiho i tā’u hua’ai. Tē ti’aturi nei au ē, te tuha’a o te reira ’o te mea ïa e fa’atupu i te ’oa’oa ’e te ’oto, ’ua ’itehia mai iā’u te pa’ari. ’E nō te reira, ’ua ’itehia mai iā’u te ’ai’ai o te ruhiruhiāra’a.
Tē ora nei te ta’ata pāpa’i i California, fenua Marite.