“O Le Feagaiga e Faavavau,” Liahona, Oke. 2022.
O Le Feagaiga e Faavavau
O i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa.
O Le Alii o Iesu Keriso, saunia e Del Parson
I lenei lalolagi ua saeia i taua ma tala o taua, o le manaomia o le upumoni, malamalama, ma le alofa mama o Iesu Keriso e sili atu nai lo se isi lava taimi. E mamalu le talalelei a Keriso, ma ua faamanuiaina i tatou e suesue i ai ma ola e tusa ai ma ona mataupu. Tatou te olioli i o tatou avanoa e faasoa atu ai—e molimau atu ai i ona upumoni i soo se mea o tatou i ai.
Ua ou talanoa soo e uiga i le taua o le feagaiga faaAperaamo ma le faapotopotoina o Isaraelu. Pe a tatou taliaina le talalelei ma papatisoina, tatou te tauaveina i o tatou luga le suafa paia o Iesu Keriso. O le papatisoga o le faitotoa lea e taitai atu ai i le avea ma suli soofaatasi i folafolaga uma na tuuina mai anamua e le Alii ia Aperaamo, Isaako, Iakopo, ma a latou fanau.1
“O le feagaiga fou ma tumau-faavavau”2 (Mataupu Faavae ma Feagaiga 132:6) ma le feagaiga faa-Aperaamo e tutusa lava—o auala e lua o le faaupuga o le feagaiga na osia e le Atua ma alii ma tamaitai faaletino i taimi eseese.
O le upu faamatala nauna faavavau o lona uiga o lenei feagaiga sa i ai a o lei faavaeina le lalolagi! O le fuafuaga na faataatia mai i le Fono Tele i le Lagi na aofia ai le iloaina ma le faamaoni o le a vavaeeseina uma i tatou mai le afioaga o le Atua. Peitai, na folafola mai e le Atua o le a Ia saunia se Faaola o le a faatoilaloina taunuuga o le Pau. Na ta’u atu e le Atua ia Atamu ina ua uma lona papatisoga:
“Ma o oe o se tasi o le faatulagaga a ia o lē ua aunoa ma se amataga o aso po o se gataaga o tausaga, mai le vavau atoa e oo i le faavavau atoa.
“Faauta, ua tasi oe ia te aʼu, o se atalii o le Atua; ma ua faapea ona mafai ona avea tagata uma ma oʼu atalii” (Mose 6:67–68).
Na talia e Atamu ma Eva le sauniga o le papatisoga ma amata ai le faagasologa o le tasi ma le Atua. Sa latou ulu atu i le ala o feagaiga.
Pe a tatou ulu atu foi i lena ala, ua tatou maua se ala fou o le olaga. O lea tatou te fatuina ai se sootaga ma le Atua lea e mafai ai e Ia ona faamanuia ma suia i tatou. O le ala o feagaiga e toe taitai atu ai i tatou ia te Ia. Afai tatou te faamuamua le Atua i o tatou olaga, o lena feagaiga o le a taitai atu ai i tatou ia latalata atili atu ia te Ia. O feagaiga uma ua faamoemoe e fusia ai. Latou te fatuina se sootaga ma ni fusi e faavavau.
O Se Alofa Faapitoa ma le Alofa Mutimutivale
O le taimi lava tatou te osia ai se feagaiga ma le Atua, tatou te tuua loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. I le gagana Eperu, o lena alofa faalefeagaiga e taua o le hesed (חֶסֶד).3
O lehesed e leai se faaPeretania talafeagai tutusa. O faaliliutusi o le King James Version o le Tusi Paia atonu na tauivi ma le auala e faaliliu ai le hesed i le faaPeretania. E masani ona latou filifilia le “alofaagalelei.” O lenei mea e maua ai le tele ae le o uiga uma o le hesed. Sa tuuina atu foi isi faaliliuga, e pei o le “alofa mutimutivale” ma le “agalelei”. O lehesed o se faaupuga tulaga ese e faamatala ai se sootaga faalefeagaiga lea e noatia ai vaega uma e lua ina ia tuuto ma faamaoni le tasi i le isi.
O se faaipoipoga faaselesitila o se sootaga faafeagaiga. E osia e se tane ma se ava se feagaiga ma le Atua ma le tasi ma le isi ina ia faamaoni ma tuuto le tasi i le isi.
O lehesed o se ituaiga faapitoa o le alofa ma le alofa mutimutivale lea e lagonaina e le Atua ma tuuina mai ia i latou o e ua osia se feagaiga ma Ia. Ma tatou te toe taui atu ma le hesed mo Ia.
O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou.
Ata na pueina e Jerry L. Garns
Ona ua i ai i le Atua le hesed mo latou o e ua osifeagaiga ma Ia, o le a Ia alofa ia i latou. O le a faaauau pea ona ia galue faatasi ma i latou ma ofo atu ia i latou avanoa e sui ai. O le a Ia faamagaloina i latou pe a latou salamo. Ma a latou se ese, o le a Ia fesoasoani ia i latou ia maua lo latou ala e toe foi atu ai ia te Ia.
O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faatinoina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le loto o le Atua. E i ai Ona faamoemoega maualuluga mo i tatou.
Ua e iloa le tautinoga faasolopito na tuuina mai e le Alii i le Perofeta o Iosefa Samita. Na oo mai e ala i faaaliga. Na fetalai mai le Alii ia Iosefa, “O lenei folafolaga ua a outou foi, aua o outou e tupuga mai ia Aperaamo, ma sa faia le folafolaga ia Aperaamo” (Mataupu Faavae ma Feagaiga 132:31).
O lea, na toefuatai mai ai lenei feagaiga tumau-faavavau o se vaega o le Toefuataiga tele o le talalelei i lona atoatoaga. Mafaufau i ai! O se feagaiga o le faaipoipoga na osia i totonu o le malumalu e fesootai tonu lava i lena feagaiga faa-Aperaamo. I totonu o le malumalu e folasia atu ai i se ulugalii faamanuiaga uma ua faapolopolo mo fanau faamaoni a Aperaamo, Isaako, ma Iakopo.
E pei ona faia e Atamu, sa tatou ulu patino atu lava i le ala o feagaiga i le papatisoga. Ona tatou ulufale atoa atu lea i le malumalu. O faamanuiaga tupito o le feagaiga faaAperaamo e faaee i totonu o malumalu paia. O nei faamanuiaga e mafai ai e i tatou, i luga o le toetutu, ona “mautofi i nofoalii, malo, mana, puleaga, ma puleaga, i lo tatou ‘faaeaga ma le mamalu i mea uma’ [Mataupu Faavae ma Feagaiga 132:19].”4
I le anotusi faaiu o le Feagaiga Tuai, tatou te faitau ai i le folafolaga a Malaki e faapea o Elia o le a “faaliliuina loto o tama i fanau, ma loto o fanau i o latou tama” (Malaki 4:6). I Isaraelu anamua, o lea mau faasino i tamā atonu na aofia ai tamā o Aperaamo, Isaako, ma Iakopo. Ua faamanino mai lenei folafolaga pe a tatou faitau i le lomiga eseese o lenei fuaiupu na sii mai e Moronae i le Perofeta o Iosefa Samita: “O le a toto e ia [Elia] i loto o fanau folafolaga na faia i tamā, ma o le a liliu atu loto o fanau i o latou tamā” (Iosefa Samita—Talafaasolopito 1:39). O na tamā e mautinoa lava e aofia ai Aperaamo, Isaako, ma Iakopo. (Tagai i le Mataupu Faavae ma Feagaiga 27: 9–10.)
O i latou o e osia feagaiga paia ma tausia i latou ua folafola atu i ai le ola e faavavau ma le faaeaga. O Iesu Keriso o le e faamaonia ia feagaiga.
Faamatalaga mai le Keriso ma le Taitai Talavou Mauoa, saunia e Heinrich Hofmann
Iesu Keriso: O Le Totonugalemu o le Feagaiga
O le taulaga togiola a le Faaola na mafai ai e le Tama ona faataunuu Ana folafolaga na faia i Ana fanau. Ona o Iesu Keriso “o le ala, ma le upu moni, ma le ola: e le alu atu lava se tasi i le tama, pe a le ui mai ia te [Ia]” (Ioane 14:6). O le faataunuuina o le feagaiga faa-Aperaamo e mafai ona faataunuuina ona o le Togiola a lo tatou Faaola, le Alii o Iesu Keriso. O Iesu Keriso o loo i le totonugalemu o le feagaiga faa-Aperaamo.
O le Feagaiga Tuai ua le na o se tusi o tusitusiga paia; o se tusi foi o talafaasolopito. E te manatua le faitau e uiga i le faaipoipoga a Sarai ma Aperamo. Ona sa leai ni a la fanau, sa tuuina atu ai e Sarai lana auauna tamaitai, o Akara, e avea foi ma ava a Aperamo, e tusa ai ma le taitaiga a le Alii. Na fanauina e Akara ia Isamaeli.5 Sa alofa Aperamo ia Isamaeli, ae e le tatau ona avea o ia ma tamaitiiti o le a faataunuuina ai le feagaiga. (Tagai Kenese 11:29–30; 16:1, 3, 11; Mataupu Faavae ma Feagaiga 132:34.)
I le avea ai ma se faamanuiaga mai le Atua, ma i le tali atu i le faatuatua o Sarai,6 sa ia to ai i ona tausaga matua ina ia mafai ai e le feagaiga ona ui atu i lana tama tama, o Isaako (tagai Kenese 17:19). Na fanau mai o ia i le feagaiga.
Na tuuina atu e le Atua ia Sarai ma Aperamo ni igoa fou—o Sara ma Aperaamo (tagai Kenese 17:5, 15). O le faaeeina atu o na igoa fou na faailogaina ai le amataga o se olaga fou ma se taunuuga fou mo lenei aiga.
Sa alofa Aperaamo ia Isamaeli ma Isaako. Na ta’u atu e le Atua ia Aperaamo o le a faateleina Isamaeli ma avea o se nuu tele (tagai Kenese 17:20). I le taimi lava lea e tasi, sa faamanino mai ai e le Atua o le a faatuina le feagaiga e faavavau e ala ia Isaako (tagai Kenese 17:19).
O i latou uma o e talia le talalelei e avea o se vaega o le gafa o Aperaamo. I le tusi a Kalatia ua tatou faitau ai:
“Aua o outou uma lava ua papatisoina ia Keriso, ua outou oofu ia Keriso.
“… Ua tasi lava outou uma ia Keriso Iesu”
“Ma afai e avea outou o ni o o Keriso, o outou la o fanau a Aperaamo, ma suli e tusa ai ma le folafolaga”(Kalatia 3:27–29).
O lea, e mafai ai ona avea i tatou ma suli i le feagaiga e ala i le fanau mai po o le vaetamaina.
O le taimi lava tatou te osia ai se feagaiga ma le Atua, tatou te tuua loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia.
Na fanau mai Iakopo le atalii o Isaako ma Repeka i le feagaiga. E le gata i lea, sa ia filifili e ulu atu i lona lava loto. E pei ona outou silafia, na suia le igoa o Iakopo ia Isaraelu (tagai Kenese 32:28), o lona uiga “ia faamuamua le Atua” po o “se tasi e manumalo ma le Atua.”7
I le Esoto tatou te faitau ai e faapea “sa manatua e le Atua lana feagaiga ma Aperaamo, ma Isaako, ma Iakopo” (Esoto 2:24). Na ta’u atu e le Atua i le fanauga a Isaraelu, “Afai tou te usiusitai moni i lo’u leo, ma tausi i la’u feagaiga, ona avea lea o outou ma oa taua mo a’u” (Esoto 19:5).
O le fasifuaitau “oa tulaga ese” sa faaliliuina mai le faaEperu o le segullah, o lona uiga o se mea e maualuga le taua—o se “oa.”8
O le tusi o Teuteronome o loo faamatala mai ai le taua o le feagaiga. Sa silafia e Aposetolo o le Feagaiga Fou lenei feagaiga. Ina ua uma ona faamalolo e Peteru se tagata pipili i fasitepu o le malumalu, sa ia aoao atu tagata matamata e uiga ia Iesu. Fai mai Peteru, “O le Atua o Aperaamo, ma Isaako, ma Iakopo, le Atua o o tatou tama, ua viia lona Alo o Iesu” (Galuega 3:13).
Sa faaiu e Peteru lana savali i le ta’u atu i lana aofia, “O fanau outou a perofeta, ma le feagaiga na faia e le Atua ma o tatou tama, ua fetalai atu ai ia Aperaamo, Ma o au fanau o le a manuia ai aiga uma o le lalolagi” (Galuega 3:25). Sa faamanino atu e Peteru ia i latou o se vaega o le misiona a Keriso o le faataunuuina lea o le feagaiga a le Atua.
Na tuuina atu foi e le Alii se lauga faapena i tagata o Amerika anamua. O iina, na ta’u atu ai e le Keriso toetu i tagata po o ai i latou moni lava. Sa Ia saunoa:
“O outou o fanau a perofeta; ma o outou o lo le aiga o Isaraelu; ma o outou o lo le feagaiga lea na faia e le Tama ma o outou tamā, na fetalai atu ai ia Aperaamo: Ma o lau fanau o le a manuia ai aiga uma o le lalolagi.
“Ua faatu mai a’u e le Tamā e muamua ia te outou, ma auina mai a’u e faamanuia ia te outou i le liliu ese o outou taitoatasi mai i ana amioletonu; ma o le pogai ona o outou o fanau o le feagaiga” (3 Nifae 20:25–26).
O e vaaia le taua o lenei mea? O i latou o e tausia a latou feagaiga ma le Atua o le a avea ma se vaega o agaga e tetee atu i le agasala! O i latou o e tausia a latou feagaiga o le a maua le malosi e tetee atu ai i faatosinaga faifai pea a le lalolagi.
O i latou o e tausia a latou feagaiga ma le Atua o le a avea ma se vaega o agaga e tetee atu i le agasala! O i latou o e tausia a latou feagaiga o le a maua le malosi e tetee atu ai i faatosinaga faifai pea a le lalolagi.
Galuega Faafaifeautalai: Faasoaina Atu o le Feagaiga
Ua poloaiina i tatou e le Alii e faasalalau atu le talalelei ma faasoa atu le feagaiga. O le mafuaaga lena ua i ai a tatou faifeautalai. E finagalo o Ia mo Ana fanau uma ia maua le avanoa e filifili ai le talalelei a le Faaola ma galulue ai i luga o le ala o feagaiga. E finagalo le Atua e fesootai tagata uma i le feagaiga na Ia osia anamua ma Aperaamo.
O le mea lea, o le galuega faafaifeautalai o se vaega taua o le faapotopotoina tele o Isaraelu. O lena faapotopotoina o le galuega aupito sili lea ona taua o loo tupu i le lalolagi i le taimi nei. E leai se isi mea e faatusalia i le maofa tele. E leai se isi mea e faatusalia i le taua. O faifeautalai a le Alii—Ana soo—o loo auai i le lu’i aupito silisili, le mafuaaga aupito silisili, ma le galuega aupito silisili i luga o le fogaeleele i le taimi nei.
Ae e i ai se mea e sili atu—sili sili atu. O loo i ai se manaoga tele e faasalalau atu le talalelei i tagata i le isi itu o le veli. E finagalo le Atua i tagata uma, i itu uma e lua o le veli, ia olioli i faamanuiaga o Lana feagaiga. O loo matala le ala o feagaiga i tagata uma. Matou te aioi atu i tagata uma ia savavali faatasi ma i matou i lena ala. E leai se isi galuega e aofia ai i le lalolagi atoa. “Ua faapea ona mafai ona tatou vaai ai e alofa mutimutivale le Alii ia te i latou uma o e e valaau atu i lona suafa paia, ma le faamaoni o o latou loto” (Helamana 3:27).
Ona ua toefuatai mai le Perisitua Mekisateko, ua maua e tamaitai ma alii tausi-feagaiga “faamanuiaga uma faaleagaga o le talalelei (Mataupu Faavae ma Feagaiga 107:18; faaopoopo le faamamafa).
I le faapaiaga o le Malumalu o Katelani i le 1836, i lalo o le taitaiga a le Alii, na faaali mai ai Elia. O Lona faamoemoega? “Ia liliu … o fanau i tamā” (Mataupu Faavae ma Feagaiga 110:15). Sa faaali mai foi Elaia. O Lona faamoemoega? Ina ia tautino atu ia Iosefa Samita ma Oliva Kaotui “o le tisipenisione o le talalelei a Aperaamo, ua fai mai o le a faamanuiaina i tatou ma a tatou fanau i tupulaga uma pe a mavae atu i tatou” (Mataupu Faavae ma Feagaiga 110:12). O le mea lea, na faaee atu ai e le Matai ia Iosefa Samita ma Oliva Kaotui le pule o le perisitua ma le aia tatau e faailoa atu ai faamanuiaga tulaga ese o le feagaiga faaAperaamo i isi.9
I le Ekalesia, tatou te malaga ai i le ala o feagaiga taitoatasi ma faatasi. E pei lava ona faasoa mai e faaipoipoga ma aiga se sootaga tulaga ese mulimuli ane lea e fatuina ai se alofa faapitoa, e faapena foi le sootaga fou e fatuina pe a tatou noatia i tatou lava e ala i feagaiga tu’u sa’o i lo tatou Atua!
Atonu o le uiga lea o le tala a Nifae ina ua ia fai mai e “alofa le Atua ia te i latou o e e finagalo ia avea o ia ma o latou Atua” (1 Nifae 17:40). O le mafuaaga tonu lava lea, i le avea ai o se vaega o le feagaiga, o se alofa mutimutivale ma se alofa faapitoa—po o le hesed—e avanoa mo i latou uma o e ulu atu i lenei sootaga faamauina ma le vavalalata ma le Atua, e oo lava “i le afe o tupulaga” (Teuteronome 7:9).
O le osia o se feagaiga ma le Atua e suia ai lo tatou sootaga ma Ia e faavavau. E faamanuiaina ai i tatou i se fuataga faaopoopo o le alofa ma le alofa mutimutivale.10 E aafia ai i tatou ma le auala o le a fesoasoani mai ai le Atua ia i tatou ia avea ma tagata e mafai ona avea ai i tatou. Ua folafola mai ia i tatou, e mafai foi ona avea i tatou ma “oa taua” ia te Ia (Salamo 135:4).
O Folafolaga ma Avanoa
O i latou o e osia feagaiga paia ma tausia i latou ua folafola atu i ai le ola e faavavau ma le faaeaga, “o le meaalofa silisili lea o meaalofa uma a le Atua” (Mataupu Faavae ma Feagaiga 14:7). O Iesu Keriso o le e faamaonia na feagaiga (tagai Eperu 7:22; 8:6). O tagata tausi feagaiga o e alolofa i le Atua ma faatagaina o Ia e manumalo i isi mea uma i o latou olaga ua avea ai o Ia ma faatosinaga sili ona mamana i o latou olaga.
I o tatou aso ua faamanuiaina i tatou e maua faamanuiaga faapeteriaka ma aoao e uiga i lo tatou sootaga ma peteriaka anamua. O na faamanuiaga e maua ai foi sina vaaiga i mea o loo i luma atu.
Ona o la tatou feagaiga ma le Atua, o le a le vaivai ai lava o Ia i Ana taumafaiga e fesoasoani ia i tatou, ma o le a tatou le faafaatuina lava Lona onosai alofa mutimutivale ia i tatou.
Pe Sili Mai Lou Alofa ia te A’u, i lo Latou Nei? saunia e David Lindsley
O lo tatou valaauga o ni Isaraelu o le feagaiga o le faamautinoa lea ua iloa e tagata uma o le Ekalesia le olioli ma avanoa e o faatasi ma le osia o feagaiga ma le Atua. O se valaau e uunaia alii ma tamaitai uma e tausia feagaiga, tama ma teine, e faasoa atu le talalelei ia i latou o e o mai i totonu o lo latou lalolagi o tosinaga. O se valaau foi e lagolago ma faamalosiau i a tatou faifeautalai, o e ua auina atu faatasi ma faatonuga e papatiso ma fesoasoani e faapotopoto Isaraelu, ina ia mafai ona avea faatasi i tatou ma nuu o le Atua ma o le a avea o Ia ma o tatou Atua (tagai Mataupu Faavae ma Feagaiga 42:9).
O alii ma tamaitai uma o e auai i sauniga o le perisitua ma o e osia ma tausia feagaiga ma le Atua e mafai ona maua le avanoa tuusao i le mana o le Atua. Tatou te tauaveina le suafa o le Alii i o tatou luga o ni tagata taitoatasi. Tatou te tauaveina foi Lona suafa i o tatou luga o se nuu. O le faananau e uiga i le faaaogaina o le igoa sa’o O Le Ekalesia a Iesu Keriso o le Au Paia o Aso e Gata Ai o se auala taua lea e tauave ai e i tatou o se nuu Lona suafa i o tatou luga. E moni lava, o galuega agalelei uma a O Le Ekalesia a Iesu Keriso o le Au Paia o Aso e Gata Ai ma ona tagata o se faailoaga lea o le hesedo le Atua.
Aisea na faataapeape ai Isaraelu? Ona sa solia e tagata poloaiga ma tauai maa ia perofeta. Sa tali mai se Tama alofa ae faavauvau e ala i le faataapeapeina o Isaraelu i le mamao ma le lautele.11
Peitai, sa Ia faataapeapeina i latou i se folafolaga o le a i ai se aso o le a toe faapotopotoina ai Isaraelu i Lana lafu.
O le ituaiga o Iuta na tuuina atu i ai le tiutetauave e saunia ai le lalolagi mo le uluai afio mai o le Alii. Mai lena ituaiga, na valaauina Maria e avea ma tina o le Alo o le Atua.
O le ituaiga o Iosefa, e ala mai i ona atalii ma Asenati, o Efaraima ma Manase (tagai Kenese 41:50–52; 46:20), sa tuuina atu i ai le tiutetauave e taitai i le faapotopotoina o Isaraelu, e saunia le lalolagi mo le Afio Mai Faalua o le Alii.
I se mafutaga hesed tumau, ua na o se mea masani le finagalo o le Atua e faapotopoto Isaraelu. O Ia o lo tatou Tama Faalelagi! E finagalo o Ia i Ana fanau taitoatasi—i itu uma e lua o le veli—ia faalogo i le savali o le talalelei toefuataiina a Iesu Keriso.
O Se Ala o le Alofa
O le ala o feagaiga o se ala o le alofa—e ofoofogia le hesed, lena tausiga agaalofa ma le aapa atu o le tasi i le isi. O le lagonaina o lena alofa o le faasaolotoina ma le faagaeetia. O le olioli aupito sili o le a e oo i ai o le taimi e faatumulia ai oe i le alofa mo le Atua ma mo Ana fanau uma.
O le alofa i le Atua e sili atu nai lo soo se tasi po o se isi lava mea, o le tulaga lea e aumaia ai le filemu moni, mafanafana, mautinoa, ma le olioli.
O le ala o feagaiga e faatatau uma lava i la tatou sootaga ma le Atua—o la tatou sootaga hesed ma Ia. Pe a tatou ulu atu i se feagaiga ma le Atua, ua tatou osia se feagaiga ma Ia o le a tausia pea Lana afioga. O le a Ia faia mea uma Na te mafaia, e aunoa ma le faaoso i lo tatou faitalia, e fesoasoani ia i tatou e tausia a tatou mea.
O le Tusi a Mamona e amata ma faaiu i le faasinoga i lenei feagaiga e faavavau. Mai lona itulau autu i molimau faaiu a Mamona ma Moronae, ua faasino le Tusi a Mamona i le feagaiga (tagai Mamona 5:20; 9:37). O le oo mai o le Tusi a Mamona, o se faailoga lea i le lalolagi atoa ua amata e le Alii ona faapotopoto Isaraelu ma faataunuu feagaiga na Ia faia ia Aperaamo, Isaako, ma Iakopo.”12
Ou uso e ma tuafafine pele, ua valaauina i tatou i lenei taimi taua i le talafaasolopito o le lalolagi e aoao atu le lalolagi e uiga i le matagofie ma le mana o le feagaiga e faavavau. E faatuatuaina lava i tatou e lo tatou Tama Faalelagi e faia lenei galuega tele.
Sa tuuina atu foi lenei savali i se fonotaga faaleautaitai o le konafesi aoao i le aso 31 o Mati, 2022.