Folem Profet
Ol Doa long Saed blong Spirit Bae Oli Open: Ol mesej abaot tempol we i kam long Presiden Nelson
Bae yu lanem olsem wanem blong openem vel bitwin heven mo wol, olsem wanem blong askem ol enjel blong God blong givhan long yu, mo olsem wanem blong kasem gud moa ol daereksen blong heven.
Profet mo Presiden blong yumi Russell M. Nelson i talem, “Naoia yumi tokbaot ol tempol,” long Jeneral Konfrens blong Oktoba 2018.
Long tabu instraksen blong hem long olsem wanem yumi save kam ol Lata-dei Sent we i givim eksampol, hem i leftemap tingting blong yumi blong mekem ol hom blong yumi i kam ol senta blong stap lanem gospel, mo hem i rimaenem yumi abaot hamas hem i impoten blong yusum stret nem blong Jos blong Sevya blong yumi: Jos Ia blong Jisas Kraes blong Ol Lata-dei Sent.
Afta hem i askem strong long wan fasin blong respek, blong kongregesen long ful wol i mekem tempol i wan samting we i kam faswan.
“Yumi save se taem we yumi spendem insaed long tempol i wan bigfala nid blong Lod i sevem yumi, mo yumi kam olsem wan god, mo i impoten long ol famli,” hem i talem:
“Afta we yumi kasem tempol odinens blong yumiwan, mo mekem ol tabu kavenan wetem God, wanwan long yumi i nidim blong gohed blong kam strong moa, mo kasem tijing we i posibol nomo insaed long haos blong Lod. Ol bubu blong yumi oli nidim yumi blong stap olsem proksi blong olgeta.
“Tingting long bigfala sore mo stret fasin blong God, we, bifo wol i stat, i givim finis wan rod i stap blong givim ol blesing blong tempol long olgeta we oli ded be oli no save long gospel. Ol tabu tempol seremoni ia oli blong bifo. Long mi, wanem i blong bifo i gud tumas, mo i wan nara pruf se oli tru.
“Ol dia brata mo sista, ol atak blong enemi oli stap kam antap bigwan, oli strong moa, mo i gat fulap defren kaen. Nid blong yumi go long tempol oltaem, i bigwan moa bitim bifo. Mi askem yufala blong prea mo lukluk gud hao yufala i stap spendem taem blong yufala. Givim taem long fiuja blong yufala, mo long fiuja blong famli. Sapos yu yu save go nomo long tempol from i kolosap, mi askem strong long yu blong faenem wan wei blong mekem wan apoenmen oltaem wetem Lod—blong stap insaed long tabu Haos blong Hem—mo afta, kipim taem mo dei blong apoenmen ia i strik mo wetem glad. Mi promesem yufala se Lod bae i givim ol merikel we Hem i save se yu nidim, oli kam long yu taem yu stap mekem ol sakrifaes blong givim seves mo stap wosip long ol tempol blong Hem.”1
Long wan narafala toktok blong insperesen, Presiden Nelson i talemaot, “Semmak, taem eni kaen samting i hapen insaed long laef blong yu, !sef ples blong stap long hem long saed blong spirit i blong stap laef insaed long ol mak blong tempol kavenan blong yu!”2
Hem i statem toktok blong hem blong tokbaot gud konstraksen wok we i gat fulap samting i stap gohed long hem, we i nidim blong mekem blong mekem Sol Lek Tempol i kam moa strong—blong i save stap long Mileniom—mo agensem ol paoa blong wol. Afta, hem i eksplenem olsem wanem i impoten blong yumi, yumi mekem ol fandesen blong yumiwan long saed blong spirit i kam moa strong, from se naoia, moa bitim bifo, ol hariken blong laef i stap putum fasin blong sevem yumiwan we i no save finis, long denja.
“Ol dia brata mo sista, taem naoia, i ol las dei. Sapos yu mo mi i mas stanap agensem ol trabol mo fos we oli stap kam, i wan mas blong wanwan long yumi i mas gat wan stamba fandesen blong spirit we yumi bildimap antap long strong ston we i Ridima blong yumi, Jisas Kraes” (Luk long Hileman 5:12).
“Mekem se, mi askem wanwan long yufala: ?stamba blong fandesen blong yu i strong olsem wanem? ?Wanem nao yu nidim blong mekem strong moa testemoni mo andastaning blong yu long saed blong gospel?
“Tempol i stap long medel blong mekem fet mo paoa blong yu long saed blong spirit i kam strong moa, from se Sevya mo doktrin blong Hem oli stap long hat blong tempol. Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol stamba odinens blong Hem oli fasem yumi long Hem tru long ol tabu prishud kavenan. Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi (Luk long Doktrin mo Ol Kavenan 109:15, 22). Mo, O yes, bae yumi nidim paoa blong Hem long ol dei we oli stap kam.
“Yumi gat promes tu se, ‘sapos [yumi] rere, bae [yumi] no fraet,’ (Doktrin mo Ol Kavenan 38:30; luk long Doktrin mo Ol Kavenan 10:55). Stret save ia, i minim plante samting tedei. Lod i talemaot se, nomata ol jalenj blong tedei we oli no olsem hemia blong bifo, olgeta we oli stap bildimap ol fandesen blong olgeta antap long Jisas Kraes, mo oli bin lanem blong yusum paoa blong Hem, oli no nid blong foldaon long ol wari blong taem tedei.”3
Presiden Nelson i gohed mo talem, “long wanwan long yufala we i mekem ol tempol kavenan, mi plis mo askem yufala blong lukaotem—wetem prea mo oltaem—blong andastanem ol tempol kavenan mo ol odinens. Ol doa long saed blong spirit bae oli open. Bae yu lanem olsem wanem blong openem vel bitwin heven mo wol, olsem wanem blong askem ol enjel blong God blong givhan long yu, mo kasem gud moa ol daereksen blong heven. Ol hadwok wetem strong tingting we yu mekem, bae i kam givim moa paoa mo mekem strong moa fandesen blong yu long saed blong spirit. . . .
“Plis, bilivim mi taem mi talem se sapos fandesen blong yu long saed blong spirit, yu bildimap antap long Jisas Kraes, yu no nid blong fraet. Taem yu tru long ol kavenan blong yu we yu mekem insaed long tempol, bae yu kam strong moa tru long paoa blong Hem. Afta long hemia, taem graon i seksek long saed blong spirit, bae yu save stanap strong from fandesen blong yu long saed blong spirit i strong gud mo i no save muv.”4
Presiden Nelson i wantem yumi blong tingbaot se ol tempol oli impoten long laef blong yumi olsem Ol Lata-dei Sent, from se, long en, oli lidim yumi i go long Sevya blong yumi Jisas Kraes.
Long wan vidio we oli bin mekem i no long taem i pas, vidio ia i stap selebretem Wasington D.C. Tempol we oli dediketem bakegen, profet blong yumi i talem:
“Yumi gat bigfala blesing blong gat ol tempol. Bae yumi gat ol namba blong tempol we i stap kam moa bigwan taem Jos i stap gro. Be hem i no abaot namba, hem i no abaot ples we i stap long hem. I no abaot stael blong bilding. Hem i abaot ol odinens insaed long hem.
“Taem yu lukluk wan tempol, yu sapos blong luksave hem olsem wan saen blong Jisas Kraes, olsem we Hem i Man blong Toktok blong yumi wetem Papa long Heven. From Hem nomo mo tru long Hem nomo, yumi save kasem Papa blong yumi long Heven.
“Hem i wan saen tu blong fet blong yumi long laef afta long ded. Wanwan tempol i stanap olsem wan step, wan tabu step i go long laef we i no save finis blong yumi mo ol famli blong yumi.”5